REHOBOT

[Halapad nga mga Dapit].

1. Ang gingalan ni Isaac sa usa ka atabay nga iyang gikalot. (Gen 26:22) Gituohan sa pipila ka eskolar nga ang Rehobot lagmit mao ang Ruheibeh (Horvat Rehovot [ba-Negev]), mga 35 km (22 mi) sa HK sa Beer-seba. Ang mga ngalan may pipila ka kaamgiran. Sa pagngalan sa maong atabay, miingon si Isaac nga ang Diyos karon naghatag ug dakong luna. Siya ug ang iyang mga magbalantay sa mga hayop mahimong magmabungahon nga dili manghilabot sa uban, o sila hilabtan sa uban.

2. Usa ka siyudad nga wala masayri ang nahimutangan diin naggikan si Shaul, kanhi usa ka hari sa Edom. (Gen 36:​31, 37; 1Cr 1:​43, 48) Sa duha ka paghisgot bahin niini, ang dapit gitawag nga ‘Rehobot nga duol sa Suba.’ Kasagaran diha sa Bibliya kon hisgotan ang “Suba” kini nagpasabot sa Euprates. (Sal 72:8; 2Cr 9:26; itandi ang Ex 23:31 ug Deu 11:24.) Busa gipresentar sa pipila ka geograpo ang bisan hain sa duha ka dapit diin magtagbo ang suba sa Khabur ug Euprates. Hinuon, kini magkahulogan nga si Shaul naggikan sa usa ka siyudad nga halayo sa gawas sa Edomhanong teritoryo. Apan, ang pipila ka modernong mga geograpo nagtuo nga niining duha ka kahimtang ang “Suba” nagtumong sa suba sa Edom o duol sa usa sa mga utlanan niini, sama sa Zered (Wadi el-Hasaʼ) nga nag-agos ngadto sa habagatang tumoy sa Patayng Dagat. Ang geograpo nga si J. Simons nagsugyot ug usa ka dapit nga mga 37 km (23 mi) sa HS sa tumoy sa Patayng Dagat.