Mga Talan-awon Gikan sa Yutang Saad

Gitagan-an Niya ang Israel sa Sinai

HUNAHUNAA ang milyonmilyon​—mga lalaki, mga babaye, ug mga bata—​nga nagpadulong sa “dako ug makalilisang nga kamingawan, nga may mga bitin nga malala ug tanga ug pagba nga yuta nga walay tubig”!

Kanang mga pulong sa Diyos nga makaplagan sa Deuteronomio 8:15 mopunting sa morag dako kaayong panaw nga nagbuntaog sa atubangan sa mga Israelinhon samtang sila nanggula sa Ehipto ug nagpadulong sa kamingawan sa Sinai. Usa ka lisod-kaayo buntogong suliran: Kinsa ang motaganag igo nga pagkaon ug tubig?

Ang mga Israelinhon nahimong ulipon sa yutang-anod sa suba sa Nilo, apan wala sila hikabsi. Ang mga dibuho diha sa bungbong sa karaang mga lubnganan naghulagway sa sarisaring mga ubas, mga melon, ug ubang produktong pagkaon, ingon man isda ug manok nga mopaposible sa nagkadaiyang mga pagkaon. Nan, angay kaayo ang pagmulo sa kahidlaw sa kamingawan: “Kinsa ang mohatag kanatog karne aron makaon? Kita nahinumdom sa isda nga gipangaon nato sa Ehipto sa walay bayad, sa mga pepino ug sa mga melon ug sa mga bawang ug sa mga sibuyas ug sa mga ahos!”​—Numeros 11:4, 5; 20:5.

Human sa pagtabok sa mga Israelinhon sa Pulang Dagat, sa wala magdugay nasabtan nila kon unsa gayod ang Sinai. Wala sila mosubay sa sige-agian nga ruta sa mga negosyante paamihanan apan miliso paingon sa tumoy sa triyanggulo nga yuta. Sa panahon nga nabaktas na nila ang mga 80 kilometros agi sa kamingawan, ang ilang panginahanglan sa tubig morag migrabe. Dili sila makainom sa nakaplagan nila, kay kadto pait ug lagmit nagdalag mga sakit. “Unsay atong imnon?” sila mingtuwaw. Ang Diyos misalga, nga gihimong tam-is ang tubig.​—Exodo 15:22-25.

Matikdi ang talan-awon sa panon sa kamelyo sa itaas. Makasabot ka sa suliran kon unsaon pagpadayon sa Israel ang panaw agi sa kamingawan padulong sa Bukid Sinai. Sa unsang paagi sila makakaplag kanunay ug igo nga tubig​—ug pagkaon—​alang sa ilang kaugalingon ug sa mga panon sa kahayopan nga gikinahanglan nila aron padayon nga mabuhi?​—Exodo 12:38.

Sila mipanaw ug layolayo pa pa-habagatan ug sa wala madugay nakakaplag ug makapahupay nga tubig ug pagkaon sa Elim. (Exodo 15:27) Ugaling, kana dili mao ang dulnganan nila. Sila nagpadulong sa “bukid sa matuod nga Diyos,” ang Bukid Sinai. (Exodo 3:1; 18:5; 19:2; 24:12-18) Kadto 120 kilometros pa sa gilay-on​—daghan pang kilometros sa bukiron, uga nga yuta.

Samtang mipadayon sa panaw ang dako kaayong pundok paingon sa Bukid Sinai, sila nakaabot sa duol​—ug lagmit mihapit—​sa dako lunhawng lugar nga nailhang Feiran. Ang gamayng bahin niini dayag sa hulagway sa atbang nga panid.a Kini molatas sa usa ka bukid sa kamingawan, padulong sa Pulang Dagat (Gulpo sa Suez). Labihang kahupayan ang ilang nakaplagan didto!

Samtang ang kamingawan sa Sinai lagmit haom sa katibuk-an sa batbat nga “dako ug makalilisang nga kamingawan,” ang mga Israelinhon nakapahimulos sa landong sa habog nga mga kahoyng palma ug sa ubang kakahoyan sa lunhawng dapit sa Feiran. Sila nakakaplag ug daghang tam-is nga dates, nga mitagana dihadiha ug pagkaon ug abiyo nga ilang madala.

Kadtong tanan posible tungod kay ang tubig sa ilalom sa yuta nagpaibabaw didto sa Feiran. Handurawa kon unsay bation nimo kon didto ka sa desyertong kamingawan ug sa kalit makakitag tab-ang tubig nga mainom! Kini nagapadayag nga bisan sa Sinai adunay mga dapit nga kakuhaag tubig. Usahay ang atabay kinahanglang kubkobon nga lalomlalom. Unya gikinahanglan ang paghago sa pagbira pataas sa mga timba o banga nga puno sa kinahanglanong pluwido, ilabina kon ang mga panon sa kahayopan kinahanglang paimnon. Hangtod karon ang Bedouin sa Sinai madani sa mga atabay diin sila makakalos ug tubig alang sa ilang kaugalingon ug sa ilang mga kamelyo.​—Itandi ang Genesis 24:11-20; 26:18-22.

Oo, bisan pa sa mga higayon sa dihang sila nagbagutbot tungod sa morag dili-masulbad nga kawalad-on, ang mga Israelinhon nakabatog tubig ug pagkaon. May panahon nga gitagana kana sa Diyos sa milagrosong paagi. (Exodo 16:11-18, 31; 17:2-6) Sa ubang panahon lagmit iya silang gitultolan ngadto sa “usa ka dapit-pahulayan” diin ang ilang tinuod nga mga panginahanglan natagan-an sa kinaiyanhong mga suplay. (Numeros 10:33-36) Kasamtangan, gitanyag niya sa ilang atubangan ang kadagaya nga nagpaabot sa mga matinuohon diha sa Yutang Saad.​—Deuteronomio 11:10-15.

[Footnote]

Pictorial Archive (Near Eastern History) Est.

[Picture Credit Line sa panid 24]

Pictorial Archive (Near Eastern History) Est.

[Picture Credit Line sa panid 24]

[Picture Credit Line sa panid 24, 25]

Pictorial Archive (Near Eastern History) Est.

[Picture Credit Line sa panid 25]

Pictorial Archive (Near Eastern History) Est.