KIBROT-HATAAVA

[Lubnganang mga Dapit sa Pangandoy].

Usa ka dapit nga gikampohan sa mga Israelinhon didto sa kamingawan, diin ang nagkasagol nga panon nagpahayag ug hinakog nga pangandoy sa mga pagkaon sa Ehipto. (Num 11:4; 33:​16, 17; Deu 9:22) Gituohan sa kadaghanan nga mao kini ang Rueis el-Eberij, mga tungatunga tali sa Jebel Musa, ang gituohang nahimutangan sa Bukid sa Sinai, ug Hazerot. Didto si Jehova milagrosong nagtagana ug usa ka bulan nga abiyo sa mga buntog alang sa tibuok kampo. (Num 11:​19, 20, 31) Apan ang katawhan hakog kaayo nga “ang nakatigom ug kinadiyutayan nakatigom ug napulo ka homer” (2,200 L). Ang rekord nag-ingon nga samtang “ang karne diha pa sa taliwala sa ilang mga ngipon, sa wala pa kini mausap, . . . gihampak ni Jehova ang katawhan sa dako kaayong pagpamatay.” Inay nga nagpasabot ug literal nga pag-usap, kini mahimong magkahulogan nga una pa “mahurot” o “makonsumo” (AT, RS) ang bug-os nga tagana nga karne, tungod kay ang Hebreohanong pulong nga gihubad nga “mausap” sa panguna nagkahulogang “pagputol.” Human niini ang mga namatay gilubong, ug busa ang dapit gitawag nga Kibrot-hataava.​—Num 11:32-35.