Mga Pangutana Gikan sa mga Magbabasa

◼ Unsa ka kusganon suklan sa usa ka Kristohanon ang abuno sa dugo nga gisugo o giawtorisahan sa usa ka korte?

Ang matag situasyon uniko, busa walay tanan-tanan nga lagda niini. Ang mga Kristohanon ilado sa matinahurong ‘pagbayad balik kang Cesar sa mga butang iya ni Cesar,’ sa pagsugot sa mga balaod sa sekular nga kagamhanan. Apan, ilang naamgohan nga ang ilang labaw nga obligasyon mao ang pagbayad “sa Diyos sa mga butang nga iya sa Diyos,” nga wala maglapas sa iyang kasugoan.​—Marcos 12:17.

Gihisgotan sa Roma 13:1-7 ang relasyon sa mga Kristohanon sa kagamhanan “superyor nga mga awtoridad.” Ang maong mga kagamhanan dunay awtoridad sa paghimog mga balaod o sa pagluwat sa mga direksiyon, sagad sa pagpatunhay sa linangkob nga kaayohan sa katawhan. Ug ang mga kagamhanan ‘dunay espada’ sa pagpatuman sa ilang mga balaod ug sa ‘pagpahayag sa kapungot sa usa nga nagbatasan sa daotan sumala sa ilang mga balaod.’ Ingon nga mopasakop sa superyor nga mga awtoridad, tinguha sa mga Kristohanon ang pagsugot sa mga balaod ug mga dekreto sa korte, apan kining pagpasakop kinahanglan relatibo. Kon ang usa ka Kristohanon hagaron sa pagpasakop sa usa ka butang molapas sa mas taas nga balaod sa Diyos, kinahanglan labaw ang langitnong balaod; una kini.

Ang uban modernong mga balaod nga maayog sukaranan mahimong sayop ipadapat sa pag-awtorisar nga ipugos ang abuno sa dugo sa Kristohanon. Niining kaso ang mga Kristohanon kinahanglan mobaton sa samang baroganan nga gibatonan ni apostol Pedro: “Kinahanglan among sugton ang Diyos ingon magmamando inay kay sa mga tawo.”​—Buhat 5:29.

Si Jehova nagsugo sa mga Israelita: “Lig-ona ang pagkadesidido nga dili mokaon ug dugo, tungod kay ang dugo mao ang kalag ug dili ka magakaon sa kalag uban sa unod.” (Deuteronomio 12:23) Usa ka Judiyong hubad sa Biblia sa 1917 mabasa: “Lamang magmaunongon ka nga dili mokaon sa dugo.” Si Isaac Leeser mihubad niining bersikuloha: “Lamang magmalig-on sa dili pagkaon sa dugo.” Kana ba nagpakita nga ang mga alagad sa Diyos di kaayo manumbaling o uyon-uyon lang sa pagsuporta sa iyang balaod?

Uban sa maayong hinungdan nga ang mga Kristohanon bug-os determinado sa pagtuman sa Diyos, bisan kon ang kagamhanan magsugo sa kasukwahi. Si Propesor Robert L. Wilken misulat: “Ang mga Kristohanon wala lamang midumili sa [Romanhong] serbisyo militar apan dili usab sila modawat sa publikong katungdanan ni bisan unsang responsabilidad pagmando sa mga siyudad.” (The Christians as the Romans Saw Them) Ang pagdumili mahimong mangahulogan nga ilhong maglalapas-balaod o tunglohon sa Romanhong mga arena.

Ang mga Kristohanon karon angay usab nga sama ka maunongon, lig-ong desidido sa dili paglapas sa langitnong sugo, bisan kon mameligro sila sa sekular nga mga kagamhanan. Ang kinatas-ang balaod sa uniberso​—ang balaod sa Diyos—​nangayo nga ang mga Kristohanon maglikay sa dugo, sama nga sila gisugo nga likayan ang pakighilawas (seksuwal nga imoralidad). Ang Biblia nagtawag niining mga pagdili nga “kinahanglanong mga butang.” (Buhat 15:19-21, 28, 29) Ang maong balaang sugo dili yanoyanohon lang, nga sundon lang kon kombiniyente o walay problema nga ipatungha. Ang balaod sa Diyos kinahanglan sundon!

Busa, atong mapabilhan nganong ang batan-ong Kristohanon nga gihisgotan sa pahina 17 miingon sa korte nga “giisip niya ang pag-abuno ingon paglapas sa iyang lawas ug gitandi kini sa paglugos.” Ang Kristohanong babaye ba, batan-on o edaran, mouyon lang sa paglugos, bisan kon dunay legal nga pagtugot nga himuon ang maong pakighilawas pinaagig pag-among-among?

Sa susama, ang 12-anyos nga gikutlo sa samang panid di-kaduhaduhaan nga ‘suklan niya ang maong abuno uban sa tanang kusog nga matigom niya, nga siya mosiyagit ug mangusog, ug iyang ibton ang himan sa inyeksiyon sa iyang bukton ug paningkamotan ang pagdaot sa-dugo ibabaw sa sudlanan sa iyang higdaan.’ Siya lig-ong desidido nga sundon ang balaang balaod.

Si Jesus mipahilayo gikan sa usa ka dapit dihang ang panon buot mohimo kaniyang hari. Sa susama, kon ang giawtorisahan-korte nga pag-abuno daw mahitabo, ang usa ka Kristohanon basin mopili nga dili magpaduol aron dili masupak ang balaod sa Diyos. (Mateo 10:16; Juan 6:15) Sa samang panahon, ang Kristohanon angay nga maalamong mangita ug kahulip nga pagtambal medikal, nga naghimog tinuod nga paningkamot aron mapabilin ang kinabuhi ug maulian ang panglawas.

Kon ang Kristohanon tumang nanlimbasog aron makalikay paglapas sa balaod sa Diyos sa dugo, ang mga awtoridad basin moisip kaniya ingon maglalapas-balaod o mokiha kaniya. Kon ang silot moresulta, ang Kristohanon makalantaw niana ingong pag-antos tungod sa pagkamatarong. (Itandi ang 1 Pedro 2:18-20.) Apan sa kadaghanang kaso, ang mga Kristohanon nakalikay sa pag-abuno ug uban sa maayong medikal nga pag-atiman naulian, nga walay nagpabiling legal nga mga problema. Ug labing hinungdanon, ilang napabilin ang ilang pagkamaunongon sa Balaang Maghahatag-Kinabuhi ug Maghuhukom.