ELKANA

[Ang Diyos Nagpatungha].

1. Usa ka Levihanon, anak nga lalaki sa rebelyosong si Kore; siya ug ang iyang mga igsoong lalaki, si Asir ug Abiasap, wala makaagom sa gidangatan sa ilang amahan. (Ex 6:24; Num 26:11) Lagmit siya mao ang Elkana nga gihisgotan sa 1 Cronicas 6:23.

2. Ang ikaduha sa upat ka Levihanon nga Kohatnon nga ginganlag Elkana ug gitala sa Cronicas. Siya gipaila ingong amahan ni Amasai ug Ahimot, ug mopatim-aw nga siya mao ang anak nga lalaki ni Joel.​—1Cr 6:​25, 36.

3. Ang ikatulo sa mga Levihanon sa itaas; lagmit mao ang anak nga lalaki ni Mahat.​—1Cr 6:​26, 35.

4. Ang anak nga lalaki ni Jeroham ug amahan ni Samuel nga manalagna, maingon man sa ubang mga anak nga lalaki ug mga anak nga babaye. Si Elkana usa ka pumoluyo sa Rama sa bukirong rehiyon sa Epraim. Busa siya gitawag ug Epraimnon, bisan tuod siya usa ka Levihanon sa talaan sa kagikan. (1Sa 1:1; 1Cr 6:​27, 33, 34) Nabatasan ni Elkana nga moadto sa Shilo tuigtuig “aron sa pagyukbo ug sa paghalad kang Jehova.” Siya dunay duha ka asawa, si Ana ug Penina. Bisag si Ana nagpabiling apuli, gihigugma siya ni Elkana ug gihupay siya sa iyang pagkaapuli. Sa ulahi, ingong tubag sa pag-ampo ni Ana, gipanalanginan sila ni Jehova pinaagi sa pagkatawo ni Samuel ug sa ulahi pa gayod sa tulo ka anak nga lalaki ug duha ka anak nga babaye.​—1Sa 1:​2, 3, 5, 8, 19; 2:21.

5. Usa ka Levihanong katigulangan sa usa ka Berekias.​—1Cr 9:16.

6. Usa sa mga Korehanon nga dayag nga nagpuyo sa teritoryo sa Benjamin ug kinsa “miadto kang David sa Ziklag samtang siya ilalom pa sa mga pagpig-ot tungod kang Saul.”​—1Cr 12:​1, 2, 6.

7. Usa sa mga magbalantay-sa-ganghaan sa Arka sa dihang gipabalhin kini ni David ngadto sa Jerusalem gikan sa balay ni Obed-edom; lagmit mao ra usab ang Num. 6.​—1Cr 15:​23, 25.

8. Usa ka opisyal nga nag-okupar ug katungdanan sunod kang Haring Ahaz sa Juda ug kinsa gipatay ni Zikri, usa ka gamhanang tawo sa Epraim, sa dihang si Peka nga hari sa Israel misulong sa Juda.​—2Cr 28:​6, 7.