ETBAAL

[Uban Kang Baal].

Hari sa mga taga-Sidon, ang amahan ni Jezebel nga asawa ni Haring Ahab. (1Ha 16:31) Pinaagi sa pagpaasawa sa iyang anak nga babaye kang Ahab, si Etbaal nakahimog politikanhong pakig-alyansa uban kaniya. Si Etbaal lagmit mao ang Ithobal nga gihisgotan ni Josephus sa iyang pagkutlo sa historyador nga si Menander ingong saserdote sa diyosa nga si Astarte (Astoret). Kini nga saserdote nahimong hari pinaagi sa pagbuno kang Phelles, usa ka kaliwat ni Hiram nga hari sa Tiro nga kaniya si Solomon may mga pagpakiglabot mahitungod sa pagtukod sa templo. Si Etbaal gituohan nga 32 ka tuig nga nagmando sulod sa 48 ka tuig sa iyang kinabuhi. (Against Apion, I, 123 [18]) Ang timaan nga iyang gipadako ang komersiyo sa panahon sa iyang paghari mao ang paghisgot ni Menander sa pagtukod ni Etbaal sa Auza sa Libya. Gihisgotan usab ni Menander nga ang usa ka tuig nga hulaw nahitabo sa paghari ni Etbaal.​—Jewish Antiquities, VIII, 324 (xiii, 2).