ARARAT
Kining ngalana nagtumong sa usa ka rehiyon diin ang Turkey, Iran, ug Armenia nag-abot, ug usab ngadto sa usa ka kutay sa kabukiran nga nahimutang didto.
Human sa Lunop, ang arka ni Noe nahiluna sa ibabaw sa “kabukiran sa Ararat.” (Gen 8:4) Sa panahon sa paghari ni Haring Ezequias, ang mga anak nga lalaki ni Senakerib nga si Adramelek ug Sarezer mikalagiw ngadto sa “yuta sa Ararat” human nila patya ang ilang amahan. (2Ha 19:37; Isa 37:38) Gitagna ni Jeremias nga ang Ararat maoy usa sa “mga gingharian” nga mosulong batok sa Babilonya panahon sa kalaglagan niini, niadtong ikaunom nga siglo W.K.P. (Jer 51:27) Kining ulahi nga mga paghisgot diha sa Kasulatan nagpaila sa usa ka yuta nga nahimutang sa A sa Asirya. Si Eusebius, Jerome, ug ang kadaghanan sa uban pang unang “Kristohanon” nga mga magsusulat nag-isip sa Ararat nga mao ra usab ang Armenia, ug ang hubad sa Gregong Septuagint sa Isaias 37:38 ug sa Latin nga Vulgate sa 2 Hari 19:37 naggamit usab niini. Daghang Asiryanhong inskripsiyon sukad sa paghari ni Salmaneser I, Ashurnasirpal II, Salmaneser III, Tiglat-pileser III, ug Sargon II niadtong ikasiyam ug ikawalong siglo W.K.P. naghisgot sa Ararat ingong “Urartu.” Ang usa ka inskripsiyon ni Esar-hadon, laing anak nga lalaki ni Senakerib ug manununod sa trono sa Asirya, nag-ingon nga iyang gipildi ang kasundalohan sa iyang mga igsoon nga mipatay sa ilang amahan didto sa Hanigalbat, sa dapit sa Armenia. Pinasukad niini nga mga inskripsiyon ug sa paglangkit ni Jeremias sa Ararat uban sa mga gingharian sa Mini ug Askenaz, mopatim-aw nga ang yuta sa Ararat nahimutang sa bukirong rehiyon sa Lanaw sa Van didto sa karaang Armenia, diin ang mga tinubdan sa Suba sa Tigris nahimutang dapit sa H ug ang Kabukiran sa Caucasus nahimutang dapit sa A.
Ang ngalang Ararat espesipikong nagtumong sa kinatas-ang bukid niini nga rehiyon ug kini gituohan nga mao ang dapit diin nahiluna ang arka ni Noe. Adunay duha ka pormag-kono nga mga bukid nga may distansiyang mga 11 km (7 mi) gikan sa usag usa ug giulang sa usa ka lawom nga hulpa. Ang mas taas sa duha ka bukid may gihabogong 5,165 m (16,950 p) ibabaw sa lebel sa dagat ug kanunayng naputos sa niyebe ang kataposang 900 m (3,000 p) hangtod sa kinatayuktokan niini. Ang mubomubo nga bukid, dapit sa HS, maoy 3,914 m (12,840 p) ibabaw sa lebel sa dagat. Ang mas habog nga bukid lisod kaayo tungason ug kini unang natungas ni Parrot niadtong 1829. Daghang ngalan sa mga dapit niana nga rehiyon ang nagpahinumdom sa asoy sa Bibliya. Ang Bukid sa Ararat gitawag sa mga Turko nga Aghri Dagh (Bukid sa Arka) ug gitawag kini sa mga Persianhon nga Koh-i-nuh (Bukid ni Noe).—Tan-awa ang ARKA Num. 1.