KEDAR

[gikan sa lintunganayng pulong nga nagkahulogang “moitom”].

1. Usa sa 12 ka anak nga lalaki ni Ismael.​—Gen 25:​13-15; 1Cr 1:29-31.

2. Usa ka tribong Arabo nga naggikan sa anak nga lalaki ni Ismael nga si Kedar ug gilakip sa “mga anak sa Sidlakan.” Ang ilang yuta gitawag usab nga Kedar. (Jer 2:10; 49:​28, 29) Usa ka katawhan nga tigbalhinbalhin ug puyo ug tigbuhig hayop, may mga panon sa karnero, kanding, ug kamelyo (Isa 60:7; Jer 49:​28, 29), ang mga Kedaranhon lagmit namuyo sa desyerto sa Sirya-Arabia sa S sa Palestina sa AK nga bahin sa Peninsula sa Arabia. Ang paghisgot sa “kabalangayan nga gipuy-an sa Kedar” (Isa 42:11), bisan tuod mahimong magtumong sa temporaryong mga kampo, mahimong magpasabot hinuon nga ang pipila kanila lagmit may pinuy-anan na. Tingali tungod sa ilang kahinungdanon taliwala sa mga tribo nga Arabo, ang ngalang Kedar sa ulahing mga panahon gigamit sa katibuk-an alang sa mga tribo sa desyerto. Diha sa mga Targum ug sa literaturang rabbiniko, ang Arabia gitawag usahay nga Kedar.

Ang babayeng Sulamita sa Awit ni Solomon nagpakasama sa iyang itom nga panagway sa “mga tolda sa Kedar” (Aw 1:​5, 6; itandi ang Sal 120:5), lagmit kini hinimo gikan sa itom nga balhibo sa kanding, ingon sa mga tolda sa daghang modernong-adlaw nga Bedouin. Ang tagna ni Ezequiel naghisgot sa ‘mga pangulo sa Kedar’ uban sa mga Arabo ingong mga magpapatigayon sa mga laki nga nating karnero, mga laking karnero, ug mga laking kanding alang sa komersiyal nga siyudad sa Tiro.​—Eze 27:21.

Sa panahon sa pagmando sa Asirya sa Tungang Sidlakan, ang manalagnang si Isaias nagtagna sa kalit nga pagkahanaw sa himaya sa Kedar, nga ang iyang gamhanang mga magpapana diyutay na lamang ang nahibilin. (Isa 21:​16, 17) Ang mga Kedaranhon lagmit mao ang Qidri o Qadri nga gihisgotan diha sa mga rekord sa mga pagpakiggubat sa Asirya. Ang Asiryanhon nga si Haring Ashurbanipal naglakip kanila uban sa Aribi (mga Arabo) ug Nebaiot (itandi ang Isa 60:7) sa usa ka asoy sa pagpakiggubat ug nanghambog labot sa mga asno, mga kamelyo, ug mga karnero nga gikuha kanila ingong mga inagaw.

Sa ulahing panahon, si Nabucodonosor nga hari sa Babilonya, naghampak sa Kedar. (Jer 49:​28, 29) Ang pagsakop ni Nabucodonosor sa A sa Arabia gihisgotan sa Babilonyanhong historyador nga si Berossus, nga gikutlo ni Josephus.​—Against Apion, I, 129, 133 (19).

Usa ka plata nga panaksan (gituohan nga sa ikalimang siglo W.K.P.) nga nakaplagan sa Tell el-Maskhutah sa Ehipto may Aramaikong inskripsiyon: “Qainu bar [anak nga lalaki ni] Gesem, hari sa Qedar [Kedar].” Ang Gesem nga gitumong dinhi lagmit mao si “Gesem nga Arabiano” kinsa misupak sa pagtukod pag-usab sa paril sa Jerusalem sa adlaw ni Nehemias.​—Neh 2:19; 6:​1, 2, 6.

Ang mga rekord sa Asirya nagpakita nga diha sa ampoanan ni Haring Hazail sa Kedar may mga larawan sa mosunod nga bakak nga mga bathala: Si Atarsamain (gituohan sa mga Asiryanhon nga mao si Ishtar Dilbat), Dai, Nahai, Ruldaiu, Atarquruma, ug Abirillu. Usa ka bituon nga bulawan nga gidayandayanan ug mahalong mga bato nagsilbing usa ka simbolo sa diyosa nga si Atarsamain. Sumala sa Babilonyanhong Talmud (Taʽanit 5b), ang tubig gisimba usab sa katawhan sa Kedar.