DAGANG

Usa ka galamiton sa pagsulat nga gigamit sa pagmarka o sa pagkudlit diha sa mga materyales sama sa yutang-kulonon o talo. (Sal 45:1; Isa 8:1; Jer 8:8) Ang dagang nga gigamit alang sa cuneiform nga sinulat adunay kuwadrado o pormag-kunya nga tumoy ug kasagarang ginama gikan sa tangbo o sa gahi nga kahoy.

Ang usa ka dagang o silsil nga ginama sa metal o sa ubang matang sa gahi nga materyales mao ang gikinahanglan sa pagsilsil o sa pagkulit sa mga letra diha sa bato o metal. Ang patriarkang si Job nagpahayag: “Oh nga gisulat unta karon ang akong mga pulong! Oh nga nakudlit unta sila sa usa ka basahon! Pinaagi sa dagang nga puthaw ug pinaagi sa tingga, Oh nga nakulit unta sila diha sa bato hangtod sa kahangtoran!” (Job 19:​23, 24) Dayag nga maoy tinguha ni Job nga ang iyang mga pulong isilsil diha sa bato ug ang kinulit nga mga letra bulitan ug tingga aron kini mas molungtad ug dugay. Kasiglohan sa ulahi, si Jehova naghisgot bahin sa mga sala sa Juda ingong nahisulat pinaagig dagang nga puthaw, buot ingnon, gitala nga dili mapapas.​—Jer 17:1.