“Sa Wala pa ang Kabukiran”
“IKAW mao ang among dapit nga puluy-anan sa tanang kaliwatan. Sa wala pa motungha ang kabukiran o patunghaa nimo ang yuta ug ang kalibotan, gikan sa walay sinugdanan ngadto sa walay kataposan ikaw mao ang Diyos.” (Salmo 90:1, 2, New International Version) Kanang mga pulonga gitumong sa atong Maglalalang, ug makapahupay kaayo kana—ilabina karong adlawa, sa dihang morag walay butang nga lig-on!
Sa nagkadaot nga kahimtang sa ekonomiya, diyutay ra ang mibatig kamasaligon bahin sa umaabot. Ang makapakurat nga pag-uswag sa krimen ug pag-abusar sa droga nagbalhin sa pila ka siyudad ngadto sa mga sona sa gubat. Bisan kanang karaang institusyon, ang pamilya, nagsusapinday. Makadungog kita sa mga bag-ong butang sama sa homoseksuwal nga mga pamilya. Ang mga pamilya nga usa rag ginikanan nagkadaghan, nga kasagarang usa ka ginikanan ang kinahanglang mosagubang sa dakong kalisdanan. Ang kalinaw sa daghang pamilya gigun-ob sa mga kangil-aran, sama sa pagdagmal sa kapikas ug pag-abusar sa bata.
Kinsay mogiya kanato latas niining lisod nga kapanahonan? Aw, walay kakulang ang tambag gikan sa mga sikologo, mga edukador, ug uban pa, apan kadaghanan niana nagkasumpaki. Alang sa usa ka tibuok kaliwatan sa Kasadpan, si Dr. Benjamin Spock mao ang kinalabwang magtatambag kon bahin sa pag-edukar sa mga anak. Unya iyang giadmitir nga ang iyang tambag nasayop!
Pagkalabi pang maalamon nga himoon ang Diyos nga atong “dapit nga puluy-anan”! Niining gubot nga kapanahonan, siya maoy usa ka bato nga malig-on, nga nagalungtad “gikan sa walay sinugdanan ngadto sa walay kataposan.” Siya miingon bahin sa iyang kaugalingon pinaagi sa propetang si Malakias: “Ako mao si Jehova; ako walay pagkabalhin.” (Malakias 3:6) Ang mga sukdanan sa Diyos, sumala sa natala diha sa Bibliya, bug-os nga kasaligan. Siya naglungtad “sa wala pa ang kabukiran,” ug ang iyang tambag, nga anaa sa Balaang Kasulatan, gibase sa iyang walay-kataposang kaalam. Kini mao sa tukma ang atong gikinahanglan alang sa kalipay ug kalamposan.
Nan, maalamon ang pagsalig sa Pulong sa Diyos, ang Bibliya. Tun-i kini aron makabatog kaayohan gikan sa kaalam sa Diyos. Pagsalig sa imong nakat-onan, ug himoa kana nga kahayag aron magagiya kanimo subay sa dalan sa kinabuhi. (Salmo 119:105) Kadto lamang nagabuhat niana ang may katarongan nga magmasaligon sa umaabot ug makabaton sa tiunay nga kalinaw sa hunahuna.