MUTH-LABEN

Usa ka ekspresyon nga gilakip sa superskripsiyon sa usa sa mga salmo ni David (Sal 9), nga sumala sa tradisyon giingon nga nagkahulogan nga “[mahitungod] sa kamatayon sa anak nga lalaki.” Ang pipila ka komentarista nagtuo nga kini nga ekspresyon nagpaila ngadto sa direktor sa musika sa ngalan o tingali sa pangbukas nga mga pulong sa usa ka pamilyar nga awit nga naghatag sa tono nga gamiton sa pag-awit niini nga salmo. Usa ka posibilidad sa kahulogan niini nga pulong gihatag sa Targum, diin ang superskripsiyon sa Salmo 9 mabasa: “Labot sa kamatayon sa tawo nga migula gikan sa mga kampo,” nga nagtumong sa usa ka bantogan nga manggugubat. Dayag nga ang gitumong dinhi mao si Goliat, ang bantogang manggugubat sa mga Filistehanon nga gipildi ni David sa gubat tali sa mga kampo sa mga Israelinhon ug sa mga Filistehanon.​—1Sa 17:45-51.