“Kinsay Nagpatungha sa mga Yamog?”

USA ka ika-19ng siglo nga magsusulat naghubit sa mga yamog ingong “likidong alahas sa yuta, nga giumol diha sa hangin.” Ang atong Maglalalang nangutana sa karaang patriarkang si Job: “Kinsay nagpatungha sa mga yamog?” (Job 38:28) Gipahinumdoman sa Diyos si Job sa langitnong tinubdan sa bililhong yamog.

Gawas pa sa nagapangidlap, samag-mutya nga katahom niini, ang yamog gilangkit sa Bibliya sa panalangin, pertilidad, kadagaya, ug sa pagpreserbar sa kinabuhi. (Genesis 27:​28; Deuteronomio 33:​13, 28; Zacarias 8:12) Panahon sa init, walay-ulan nga yugto sa panahon sa Israel, “ang yamog sa Hermon” nagpreserbar sa katanoman sa yuta, ug usab sa katawhan niini. Ang lasang ug nagyelo nga mga taluktok sa Bukid Hermon sa gihapon nagpatunghag mga inalisngaw sa kagabhion nga nanibug-ok aron mahimong mga yamog. Ang salmistang si David nagtandi sa pangpapresko nga gihatag niining yamog sa maayong kahimtang sa pagpuyo diha sa panaghiusa uban sa mga isigkamagsisimba ni Jehova.​—Salmo 133:3.

Ang mga instruksiyon ni propetang Moises sa Israel maoy malumo ug makapapresko, sama sa mga yamog. Siya miingon: “Ang akong pulong modaligdig ingon sa yamog, ingon sa mga taligsik sa ibabaw sa sagbot ug ingon sa mga alindahaw sa ibabaw sa katanoman.” (Deuteronomio 32:2) Karong adlawa, ang mga Saksi ni Jehova nagapahayag sa nagahatag-kinabuhing maayong balita mahitungod sa Gingharian sa Diyos ngadto sa kinatumyan sa yuta. (Mateo 24:14) Ang Diyos nagadapit: “‘Umari ka!’ Ug si bisan kinsa nga giuhaw paaria; ang si bisan kinsa nga buot pakuhaa sa tubig sa kinabuhi nga libre.” (Pinadayag 22:17) Milyonmilyong tawo sa tanang nasod nagadawat niining tanyag sa espirituwal nga pangpapresko gikan sa Diyos, nga makasuportar sa kinabuhi sa walay kataposan.