Unsay Labing Hinungdanon sa Imong Kinabuhi?

“Ipahibalo kanako ang dalan nga akong pagalaktan.”​—SALMO 143:8.

1. Unsay gihinapos ni Haring Solomon bahin sa tawhanong mga pangagpas ug mga kahimoan?

IKAW lagmit nasayod ingon man ang si bisan kinsa nga ang kinabuhi maoy puno sa mga kalihokan ug mga kabalaka. Kon maghunahuna ka bahin niana, mapiho nimo ang pipila niana ingong hinungdanon. Ang ubang mga kalihokan ug mga kabalaka dili kaayo hinungdanon o bisan walay kapuslanan. Nga ikaw nakaamgo niini nagpasabot nga ikaw uyon sa usa sa labing maalamong mga tawo sukad, si Haring Solomon. Human mapalandong sa bug-os ang mga kalihokan sa kinabuhi, siya mihinapos: “Kahadloki ang matuod nga Diyos ug bantayi ang iyang mga sugo. Kay kini mao ang tibuok nga katungdanan sa tawo.” (Ecclesiastes 2:4-9, 11; 12:13) Unsay kahulogan niini kanato karong adlawa?

2. Unsang paninugdan nga pangutana ang angayng isukna sa kaugalingon sa mahinadlokon-sa-Diyos nga katawhan, nga moagak ngadto sa unsang nalangkit nga mga pangutana?

² Kon buot nimo nga ‘kahadlokan ang matuod nga Diyos ug bantayan ang iyang mga sugo,” suknaa ang imong kaugalingon niining mahagiton nga pangutana, ‘Unsay labing hinungdanon sa akong kinabuhi?’ Itugot, wala nimo tingali palandonga kanang pangutanaha adlaw-adlaw, apan nganong dili kini tagdon karon? Sa pagkatinuod, kini magpahinumdom sa pipila ka nalangkit nga mga pangutana, sama sa, ‘Naghatag ba kaha ako ug di-angayng pagpasiugda sa akong trabaho o propesyon o sa materyal nga mga butang? Unsa ka hinungdanon ang akong pinuy-anan, pamilya, ug mga minahal?’ Ang usa ka batan-on tingali mangutana, ‘Sa unsang gidak-on ang edukasyon makakuha sa akong pagtagad ug panahon? Sa pagkatinuod, ang lingawlingaw, esport, o pipila ka matang sa kalingawan o teknolohiya mao ba ang akong pangunang interes?’ Ug bisan pa kon unsay atong edad o kahimtang, kita angayng sa husto mangutana, ‘Unsay dapit sa pag-alagad sa Diyos diha sa akong kinabuhi?’ Lagmit mouyon ka nga gikinahanglan ang mga prioridad. Apan sa unsang paagi ug diin kita makakuhag tabang sa paghimo niini nga maalamon?

3. Unsay nalangkit sa paghimog mga prioridad alang sa mga Kristohanon?

³ Ang “labing hinungdanon” may paninugdang diwa nga mauna sa tanang uban o kinahanglan nga pagatagdon una. Kon ikaw usa sa mga Saksi ni Jehova o ikaw lakip sa milyonmilyong sinsero nga mga estudyante sa Pulong sa Diyos nga nakig-uban kanila, palandonga kini nga kamatuoran: “Kay ang tanang butang adunay tinudlong panahon, bisan usa ka panahon alang sa tagsatagsa ka kalihokan ilalom sa mga langit.” (Ecclesiastes 3:1) Makataronganon, kana maglakip sa imong pagpakitag mahigugmaong kabalaka sa mga relasyon sa pamilya. (Colosas 3:18-​21) Nalangkit niini ang paghimog matinud-anong tagana sa imong panimalay pinaagi sa sekular nga trabaho. (2 Tesalonica 3:10-​12; 1 Timoteo 5:8) Ug agig pagpalahi, ikaw tingali mogahig panahon alang sa paglingawlingaw o panalagsang kalingawan o lulinghayaw. (Itandi ang Marcos 6:31.) Sa pagpalandong ug maayo, hinunoa, nakita ba nimo nga walay usa niini ang labing hinungdanon sa kinabuhi? Aduna pay labing hinungdanon.

4. Sa unsang paagi ang Filipos 1:9, 10 nalangkit sa atong paghimog mga prioridad?

⁴ Lagmit nasayod ka nga ang nagagiyang mga prinsipyo sa Bibliya maoy hinungdanong mga tabang sa paghimog mga prioridad ug paghimog maalamong mga desisyon. Pananglitan, sa Filipos 1:9, 10, giawhag ang mga Kristohanon nga “modagaya nga labi ug labi pa gayod uban ang tukmang kahibalo ug bug-os mailahong pagpanabot.” Alang sa unsang katuyoan? Si apostol Pablo midugang: “Aron inyong matino ang mas hinungdanong mga butang.” Dili ba kana makataronganon? Pinasukad sa tukmang kahibalo, ang masinabotong Kristohanon makatino kon unsay angayng tagdon pag-una​—ang labing hinungdanon​—sa kinabuhi.

Usa ka Sumbanan Kon Unsay Labing Hinungdanon

5. Sa paghubit sa sumbanang gibilin alang sa mga Kristohanon, sa unsang paagi gipakita sa Kasulatan kon unsay labing hinungdanon sa kinabuhi ni Jesus?

⁵ Makaplagan nato ang usa ka bililhong dagway sa kahibalo diha sa mga pulong ni apostol Pedro: “Nganhi niini nga dalan kamo gitawag, tungod kay bisan si Kristo nag-antos alang kaninyo, nga nagbilin kaninyo ug sulondan aron inyong sundon pag-ayo ang iyang mga tunob.” (1 Pedro 2:21) Oo, aron may ideya kon unsay labing hinungdanon sa kinabuhi, atong masusi kon unsay hunahuna ni Jesu-Kristo bahin niana. Ang Salmo 408 nag-ingon nga matagnaon bahin kaniya: “Sa pagbuhat sa imong kabubut-on, Oh akong Diyos, ako nagakalipay, ug ang imong kasugoan ania sa akong sulod nga mga bahin.” Kini ang iyang gisulti sa samang hunahuna: “Ang akong pagkaon mao ang pagbuhat ko sa kabubut-on niya nga nagpadala kanako ug ang paghuman sa iyang buluhaton.”​—Juan 4:34; Hebreohanon 12:2.

6. Sa unsang paagi mabatonan nato ang samang mga sangpotanan sama sa gibuhat ni Jesus sa pag-una sa kabubut-on sa Diyos?

⁶ Matikdi ang yawi​—ang pagbuhat sa kabubut-on sa Diyos. Gipasiugda sa panig-ingnan ni Jesus kon unsay angayng himoon sa iyang mga tinun-an nga labing hinungdanon sa ilang mga kinabuhi, kay siya miingon nga “ang matag usa nga hingpit natudloan mahisama sa iyang magtutudlo.” (Lucas 6:40) Ug samtang nagkinabuhi si Jesus sa paagi nga uyon sa iyang Amahan, gipakita niya nga dihay “makapatagbaw nga kalipay” sa paghupot sa kabubut-on sa Diyos nga labing hinungdanon. (Salmo 16:11; Buhat 2:28) Nakita ba nimo kon unsay ipasabot niana? Samtang gipili sa mga sumusunod ni Jesus ang pagbuhat sa kabubut-on sa Diyos ingong labing hinungdanong butang sa ilang mga kinabuhi, sila makapahimulos sa “makapatagbaw nga kalipay” ug sa tinuod nga kinabuhi. (1 Timoteo 6:19) Busa adunay labaw pang katarongan sa pagbuhat sa kabubut-on sa Diyos nga mahimong prioridad sa atong mga kinabuhi.

7, 8. Unsang mga pagsulay ang giatubang ni Jesus, ug unsay atong makat-onan gikan niini?

⁷ Human gilayon magpasimbolo si Jesus sa pagtanyag sa iyang kaugalingon sa pagbuhat sa kabubut-on sa Diyos, ang Yawa nagtinguha sa pagpatalikod kaniya. Sa unsang paagi? Pinaagi sa pagtental sa tulo ka natad. Sa matag higayon si Jesus mitubag sa Kasulatanhon, tin-awng mga pulong. (Mateo 4:1-​10) Apan ang dugang nga mga pagsulay nagpaabot kaniya​—paglutos, pagtamay, pagbudhi ni Judas, bakak nga mga sumbong, ug dayon ang kamatayon diha sa kahoyng pagsakit. Sa gihapon, walay usa niini nga mga pagsulay ang nakapatarog sa maunongong Anak sa Diyos gikan sa iyang dalan. Sa kritikal nga yugto, si Jesus miampo: “Dili sumala sa akong pagbuot, kondili sumala sa imohang pagbuot. . . . Ipahinabo ang imong kabubut-on.” (Mateo 26:39, 42) Dili ba angayng mapalihok gayod ang matag usa kanato niining bahina sa sumbanang gibilin kanato, nga magpahinabo kanatong ‘molahutay sa pag-ampo’?​—Roma 12:12.

⁸ Oo, sa dihang maghimo kita sa atong mga prioridad sa kinabuhi, makatabang sa partikular ang paggiya sa Diyos, ilabina kon atubangon nato ang mga kaaway sa kamatuoran ug mga magsusupak sa kabubut-on sa Diyos. Hinumdomi ang pangaliya alang sa paggiya sa matinumanong Haring David sa dihang naagoman niya ang pagsupak sa kaaway. Atong makita kini samtang atong tagdon ang bahin sa Salmo 143. Kini angayng motabang kanato sa pag-ila kon sa unsang paagi makapalig-on kita sa atong personal nga relasyon kang Jehova ug mapalig-on sa padayong pagbuhat sa kabubut-on sa Diyos nga labing dako diha sa atong mga kinabuhi.

Si Jehova Magpatalinghog ug Magtubag sa Atong mga Pag-ampo

9. (a) Bisag si David usa ka makasasala, unsay gibutyag sa iyang mga buhat ug mga lihok? (b) Nganong dili kita angayng moangka sa pagbuhat kon unsay matarong?

⁹ Bisag usa ka tawong makasasala, si David nagtuo nga si Jehova mamati sa iyang pangaliyupo. Siya mapainubsanong nangamuyo: “Oh Jehova, dungga ang akong pag-ampo; patalinghogi ang akong pangaliyupo. Sa imong pagkamatinumanon tubaga ako sa imong pagkamatarong. Ug ayaw paghukmi ang imong ulipon; kay sa atubangan nimo walay usa nga buhi nga matarong.” (Salmo 143:1, 2) Si David mahunahunaon sa iyang pagkadili-hingpit, bisan pa ang iyang kasingkasing maoy hingpit ngadto sa Diyos. Busa, siya masaligon nga madawat niya ang tubag sa pagkamatarong. Dili ba kini makadasig kanato? Bisan pag kita nakulangan sa pagkamatarong sa Diyos, kita makasalig nga siya mamati kanato kon ang atong mga kasingkasing maoy hingpit ngadto kaniya. (Ecclesiastes 7:20; 1 Juan 5:14) Samtang molahutay diha sa pag-ampo, kinahanglang tinguhaon gayod nato ang ‘pagdaog sa daotan pinaagi sa maayo’ niining daotang mga adlaw.​—Roma 12:20, 21; Santiago 4:7.

10. Nganong si David may mabalak-ong mga yugto?

¹⁰ Si David may mga kaaway, ingon man usab kita. Kon kaha usa ka kagiw gikan kang Saul, nga napugos sa pagpangitag kadangpan sa mingaw, dili daling matud-an nga mga dapit, o ingong hari nga gihasi sa mga kaaway, si David may iyang mabalak-ong mga yugto. Siya naghubit kon sa unsang paagi kini nakaapektar kaniya: “Ang kaaway migukod sa akong kalag . . . Siya nagpapuyo kanako sa mangitngit nga mga dapit . . . Ug ang akong espiritu naluya sa sulod nako; sa kinataliwad-an kanako naminhod ang akong kasingkasing.” (Salmo 143:3, 4) May katarongan ka bang mobati sa ingon niana?

11. Unsang mabalak-ong mga yugto ang giatubang sa modernong-adlaw nga mga alagad sa Diyos?

¹¹ Ang pagpit-os sa kaaway, mga pagsulay tungod sa grabeng kalisod sa ekonomiya, seryosong sakit, o ubang makapabalakang mga problema miagak sa pipila sa katawhan sa Diyos nga mobating naluya ang ilang espiritu. May higayon nga ang ilang mga kasingkasing usab ingon sa daw naminhod. Morag sa tinagsatagsa sila mitiyabaw: “Tungod kay imong gipakita kanako ang daghang kalisod ug mga katalagman, hinaot ikaw magpasig-uli kanako pag-usab . . . Hinaot ikaw maglikos ug maghupay kanako.” (Salmo 71:20, 21) Sa unsang paagi sila natabangan?

Kon Unsaon Pag-atubang sa mga Paningkamot sa Kaaway

12. Sa unsang paagi nakaantos si Haring David sa kapeligrohan ug mga pagsulay?

¹² Ang Salmo 143:5 nagpakita kon unsay gibuhat ni David sa dihang gihampak sa kapeligrohan ug dagkong mga pagsulay: “Nahinumdom ako sa mga adlaw sa dugay nang panahon; namalandong ako sa tanan nimong mga buhat; naghunahuna ako sa nahimo sa imong mga kamot.” Si David nahinumdom sa mga pagpakiglabot sa Diyos uban sa Iyang mga alagad ug kon sa unsang paagi siya mismo nakasinatig kaluwasan. Siya namalandong kon unsay nahimo ni Jehova alang sa Iyang dakong ngalan. Oo, si David padayong naghunahuna sa mga buhat sa Diyos.

13. Sa dihang atubangon nato ang mga pagsulay, sa unsang paagi ang atong pagpalandong sa karaan ug modernong mga pananglitan sa matinumanong mga alagad motabang kanato sa pag-antos?

¹³ Dili ba subsob natong mahinumdoman ang mga pagpakiglabot sa Diyos uban sa iyang katawhan? Tino! Kini naglakip sa rekord nga nahimo sa ‘dakong panganod sa mga saksi’ sa una-Kristohanong mga panahon. (Hebreohanon 11:32-​38; 12:1) Ang dinihogang mga Kristohanon sa unang siglo gidasig usab sa ‘padayong paghinumdom sa kanhing mga adlaw’ ug kon unsa ang ilang giantos. (Hebreohanon 10:32-​34) Komosta ang bahin sa mga kasinatian sa mga alagad sa Diyos sa modernong mga panahon, sama niadtong giasoy diha sa Mga Saksi ni Jehova​—Mga Magmamantala sa Gingharian sa Diyos?a Ang mga asoy nga gitala didto ug sa uban pang basahon magpaarang kanato sa paghinumdom kon sa unsang paagi gitabangan ni Jehova ang iyang katawhan nga makaantos sa mga pagdili, pagkabilanggo, aksiyon sa magubtanong panon, ug mga kampo konsentrasyon ug pagtrabaho-sa-ulipon. Dihay mga pagsulay sa nagusbat-sa-gubat nga kayutaan, sama sa Burundi, Liberia, Rwanda, ug kanhing Yugoslavia. Sa dihang nadayag mismo ang pagsupak, nakaantos ang mga alagad sa Diyos tungod sa paghupot ug malig-ong relasyon kang Jehova. Ang iyang kamot nagsapnay niadtong nagahimo sa pagbuhat sa iyang kabubut-on nga labing hinungdanon sa ilang mga kinabuhi.

14. (a) Unsa ang usa ka panig-ingnan sa pagpaluyo sa Diyos sa usa ka tawo diha sa kahimtang nga lagmit susama sa atoa? (b) Unsay imong makat-onan gikan niana nga panig-ingnan?

¹⁴ Ugaling, ikaw tingali mosanong nga wala ka pa makasinati nianang mabangis nga pag-abuso, ug tingali bation nimo nga daw dili ka gayod makasinati niana. Ang pagpaluyo sa Diyos sa iyang katawhan, hinunoa, dili kanunayng sama sa tingali lantawon sa pipila ingong dramatikanhong mga kahimtang. Siya nagpaluyo sa daghang “kasarangang” mga indibiduwal diha sa “normal” nga mga kahimtang. Ania ang usa lamang sa daghang panig-ingnan: Mailhan ba nimo ang letrato sa ibabaw, ug makatabang ba kini kanimo sa paghinumdom sa mga pagpakiglabot sa Diyos sa iyang katawhan? Kini makita sa Ang Bantayanang Torre sa Disyembre 1, 1996. Nabasa ba nimo ang sugilanon nga giasoy ni Penelope Makris? Pagkamaayong panig-ingnan sa Kristohanong integridad! Makahinumdom ka ba kon unsay iyang giantos gikan sa mga silingan, kon sa unsang paagi siya nakigbisog sa grabeng mga kaluyahon, ug unsang mga paningkamot ang gihimo niya aron makapabilin sa bug-os panahong ministeryo? Komosta ang bahin sa iyang magantihong kasinatian sa Mytilene? Ang punto mao, Giisip ba nimo ang maong mga panig-ingnan ingong mga tabang alang kanatong tanan sa paghimog mga prioridad, nagauna sa pagbuhat sa kabubut-on sa Diyos sa atong mga kinabuhi?

15. Unsa ang pipila sa mga buhat ni Jehova nga angay natong palandongon?

¹⁵ Magpalig-on kanato ang pagpalandong sa mga buhat ni Jehova, sama sa gibuhat ni David. Sa pagtuman sa iyang katuyoan, si Jehova naghimog tagana alang sa kaluwasan pinaagi sa kamatayon, pagkabanhaw, ug kabayawan sa iyang Anak. (1 Timoteo 3:16) Gitukod niya ang iyang langitnong Gingharian, naghinlo sa mga langit kang Satanas ug iyang mga demonyo, ug nagpasig-uli sa matuod nga pagsimba dinhi sa yuta. (Pinadayag 12:7-​12) Siya nagtukod sa usa ka espirituwal nga paraiso ug nagpanalangin sa iyang katawhan uban ang pag-uswag. (Isaias 35:1-​10; 60:22) Ang iyang katawhan karon nagahatag ug kataposang pamatuod sa dili pa magsugod ang dakong kasakitan. (Pinadayag 14:6, 7) Oo, daghan gayod kita ug mapalandong.

16. Diha sa unsa kita gidasig sa paghunahuna, ug unsay ginapasiugda niini diha kanato?

¹⁶ Ang padayon natong paghunahuna sa buhat sa mga kamot sa Diyos imbes mahimong okupado kaayo sa tawhanong mga paningkamot magpasiugda diha kanato nga ang gipadapat nga gahom ni Jehova dili mapugngan. Kadtong mga buhata, hinunoa, dili limitado lamang sa kahibulongang pisikal nga mga buhat sa paglalang sa mga langit ug dinhi ibabaw sa yuta. (Job 37:14; Salmo 19:1; 104:24) Ang iyang kahibulongang mga buhat naglakip sa mga buhat sa kaluwasan alang sa iyang katawhan gikan sa mga magsusupak nga kaaway, ingon sa gipakita sa mga kasinatian sa iyang karaang piniling katawhan.​—Exodo 14:31; 15:6.

Pagkahibalo sa Dalan nga Pagalaktan

17. Unsa ka tinuod si Jehova kang David, ug sa unsang paagi gipasaligan kita niini?

¹⁷ Si David nag-ampo alang sa tabang aron dili mauga ang kaumog sa kinabuhi nga diha kaniya: “Gibayaw ko ang akong mga kamot diha kanimo; ang akong kalag sama sa usa ka uga nga yuta alang kanimo. Tubaga dayon ako, Oh Jehova. Ang akong espiritu midangat na sa kataposan. Ayaw itago ang imong nawong gikan kanako, o mahisama ako niadtong manaog ngadto sa gahong.” (Salmo 143:6, 7) Si David, nga usa ka makasasala, nahibalo nga ang Diyos nasayod sa iyang kahimtang. (Salmo 31:7) Usahay kita usab mobati nga ang atong espirituwalidad nakaabot sa kinaubsan. Apan ang situwasyon dili kay walay paglaom. Si Jehova, nga nagapamati sa atong mga pag-ampo, magpadali sa pagpasig-uli kanato pinaagi sa paghupay kanato pinaagi sa mahigugmaong mga ansiyano, sa mga artikulo sa Ang Bantayanang Torre, o sa mga bahin sa tigom nga daw gidisenyo alang kanato.​—Isaias 32:1, 2.

18, 19. (a) Unsay angayng kinasingkasing natong pangaliyupo kang Jehova? (b) Bahin sa unsa kita makatino?

¹⁸ Ang atong pagsalig kang Jehova mopalihok kanato sa pagpangaliyupo kaniya: “Ipabati kanako ang imong mahigugmaong-kalulot, kay kanimo gibutang ko ang akong pagsalig. Ipahibalo kanako ang dalan nga akong pagalaktan.” (Salmo 143:8) Gipakyas ba niya si Sister Makris, nga nahilain sa usa ka isla sa Gresya? Busa pakyason ka ba niya samtang ikaw magahimo sa pagbuhat sa iyang kabubut-on nga labing hinungdanong butang sa imong kinabuhi? Gusto sa Yawa ug sa iyang mga ahente nga babagan ka o sa bug-os pahunongon ang atong buluhaton sa pagmantala sa Gingharian sa Diyos. Kon kaha kita nag-alagad sa kayutaan diin ang matuod nga pagsimba gitugot sa katibuk-an o kita nag-alagad diin kini gidili, ang atong hiniusang mga pag-ampo nahauyon sa pangamuyo ni David: “Luwasa ako gikan sa akong mga kaaway, Oh Jehova. Kay gitago ko ang akong kaugalingon diha kanimo.” (Salmo 143:9) Ang atong seguridad batok sa espirituwal nga kalamidad nagdepende sa pagpuyo diha sa tinagong dapit sa Labing Hataas.​—Salmo 91:1.

¹⁹ Ang atong pagtuo kon unsa ang labing hinungdanon gipasukad nga malig-on. (Roma 12:1, 2) Nan, sukli ang mga paningkamot sa kalibotan nga ipatuman diha kanimo ang gihunahuna niining hinungdanon sa tawhanong laraw sa mga butang. Ipadayon ang pagpabanaag sa tanang bahin sa imong kinabuhi kon unsa ang nahibaloan mong labing hinungdanon​—ang pagbuhat sa kabubut-on sa Diyos.​—Mateo 6:10; 7:21.

20. (a) Unsay atong nakat-onan bahin kang David sa Salmo 143:1-9? (b) Sa unsang paagi ikapabanaag sa mga Kristohanon ang espiritu ni David karong adlawa?

²⁰ Ang unang siyam ka bersikulo sa Salmo 143 nagpasiugda sa suod personal nga relasyon ni David kang Jehova. Sa dihang gipig-otan sa mga kaaway, siya gawasnong nangamuyo sa Diyos alang sa pagtultol. Iyang gibubo ang iyang kasingkasing, nangayog tabang sa hustong dalan nga pagalaktan. Susama kini karong adlawa sa nahibilin sa mga dinihogan-sa-espiritu sa yuta ug sa ilang mga kauban. Giisip nila ang ilang relasyon kang Jehova nga bililhon samtang sila nangaliya kaniya alang sa pagtultol. Sila nag-una gayod sa pagbuhat sa kabubut-on sa Diyos, bisan pa sa mga pagpit-os gikan sa Yawa ug sa kalibotan.

21. Nganong hinungdanon alang kanato ang pagpakitag maayong panig-ingnan kon kita magtudlo sa uban kon unsay angayng mahimong labing hinungdanon sa ilang mga kinabuhi?

²¹ Ang milyonmilyon nga nagtuon sa Bibliya uban sa mga Saksi ni Jehova kinahanglang mahibalo nga ang pagbuhat sa kabubut-on sa Diyos mao ang labing hinungdanon. Matabangan nato sila nga makasabot niini sa dihang hisgotan ang kapitulo 13 sa librong Kahibalo nga Motultol sa Kinabuhing Walay Kataposan, nga nagpasiugda sa mga prinsipyo nga nalangkit sa pagkamasinugtanon sa Pulong.b Siyempre, angay nilang makita nga gipadapat diha kanato ang atong ginatudlo kanila. Human sa mubong yugto sa panahon, sila usab makahibalo sa dalan nga angay nilang pagalaktan. Samtang kining milyonmilyon sa personal makasabot kon unsa unya ang labaw nga hinungdanon sa ilang mga kinabuhi, daghan ang mapalihok nga mokuhag mga lakang sa pagpahinungod ug pagpabawtismo. Human niana, ang kongregasyon makatabang kanila nga magpadayon sa paglakaw diha sa dalan sa kinabuhi.

22. Unsang mga pangutana ang pagahisgotan sa mosunod nga artikulo?

²² Daghan ang midawat dayon nga ang kabubut-on sa Diyos angayng mahimong labaw nga hinungdanon sa ilang mga kinabuhi. Nan, sa unsang paagi si Jehova padayong nagatudlo sa iyang mga alagad sa pagbuhat sa iyang kabubut-on? Unsay mga kaayohan ang ikahatag niini ngadto kanila? Kini nga mga pangutana pagatagdon, duyog sa usa ka panaghisgot sa pangunang bersikulo, sa Salmo 143:10, sa mosunod nga artikulo.

[Mga footnote]

Unsay Imong Tubag?

◻ Pinaagi sa pagpadapat sa Filipos 1:9, 10, sa unsang paagi kita makahimog mga prioridad?

◻ Sa unsang paagi gipakita ni Jesus kon unsay labing hinungdanon sa iyang kinabuhi?

◻ Unsay atong makat-onan gikan sa mga lihok ni David sa dihang siya ilalom sa pagsulay?

◻ Sa unsang paagi ang Salmo 143:1-9 motabang kanato karong adlawa?

◻ Unsay angay nga mahimong labing hinungdanon diha sa atong mga kinabuhi?

[Hulagway sa panid 10]

Ang mga lihok ni David nagpamatuod sa iyang pagsalig kang Jehova

[Credit Line]

Gihulad gikan sa Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s