Ang Panalangin ni Jehova Nagapadato Kanato
1 Ang kalamposan sa usa ka tawo kasagarang ginasukod sa gidak-on sa iyang suweldo. Kana ang hinungdan kon nganong daghang tawo naglantaw niadtong kuwartahan ingong ang labing malipayon ug labing matagbawon. Apan, ikasubo nga nasayop ang mga tawo nga mibating ang salapi makapalit ug kalipay. (Eccl. 5:12) Walay malungtarong kalipay alang niadtong “determinadong madato” sa materyal nga paagi. (1 Tim. 6:9) Sa kasukwahi, ang mga alagad ni Jehova malipayon gayod ug mao ang kinadatoang mga tawo sa kalibotan. (Prov. 10:22; Pin. 2:9) Sa unsang paagi?
2 Pamatuod sa Atong mga Bahandi: Atong nabatonan ang dagayang espirituwal nga panabot ug pagsabot sa Pulong sa Diyos, ang Bibliya. Pinaagi sa iyang yutan-ong organisasyon, si Jehova padayong nagtudlo kanato bahin sa iyang kaugalingon ug sa iyang Anak, alang sa atong malungtarong kaayohan. Ang tukmang pagsabot nagpaposible kanato nga makaduol kang Jehova ug matagamtam ang suod nga relasyon uban kaniya. (Sant. 4:8) Tungod sa pag-ila sa maayo gikan sa daotan ug sa pagsunod sa mga balaod sa Diyos napanalipdan kita gikan sa pipila ka sakit ug mga kapeligrohan. Kita masaligon nga si Jehova motagana alang kanato, nga moresulta sa diyosnong pagkatagbaw ug kalinaw sa hunahuna.—Mat. 6:33.
3 Atong gitagamtam ang pakigdait ug panaghiusa sulod sa atong espirituwal nga panag-igsoonay tungod kay atong giugmad ang bunga sa espiritu sa Diyos. Kay nahiusa sa usa ka lig-ong bugkos sa gugma, dili na gayod kita kinahanglang mobati nga gipasagdan sa Diyos o sa atong mga igsoon sa dihang makasugamak kitag kalamidad.—Gal. 6:10.
4 Ang atong mga kinabuhi adunay tinuod nga kahulogan ug katuyoan. Atong giisip kana nga usa ka talagsaong pribilehiyo nga makig-ambit diha sa globonhong pagsangyaw sa maayong balita. Magdala kinig malungtarong kalipay samtang atong tabangan ang uban nga makadangat sa maayong relasyon uban sa Diyos ug mag-alagad nga nahiusa uban kanato diha sa putling pagsimba. Ang atong bililhong bahandi sa ministeryo magdalag pasidungog kang Jehova ug maghatag kanatog katagbawan sa pagdugang sa pagbalaan sa iyang ngalan. Atong mentinahon ang positibong tinamdan sa hunahuna, kay nahibalo nga ang atong paglaom alang sa umaabot matuman na sa dili madugay.
5 Pagpakita sa Atong Pagpabili: Hinaot kita kanunay magmapasalamaton sa mga panalangin ni Jehova, nga naghimo gayod kanatong kinadatoang mga tawo sa yuta. (Prov. 22:4) Ang paggahin ug panahon matag adlaw sa pagpalandong sa atong nabatonan magtukmod kanato sa pagpasalamat kang Jehova tungod sa iyang dagayang gugma ug sa pagpadayon sa paghatag kaniya sa atong eksklusibong debosyon.