Kinsay Mabasol?

DAGHAN ang mobasol sa Diyos sa ilang mga suliran. Usa ka proverbio sa Bibliya nag-ingon: “Ang kaugalingong binuang sa usa ka tawo magadaot sa iyang kinabuhi, ug unya siya magbagulbol batok sa Ginoo.” (Proverbio 19:​3, The New English Bible) Ugaling lang, ang pagpasangil nga ang Diyos maoy nakaingon sa mga kaalaotan sa tawo maoy sama sa pagbasol sa usa ka tiggama ug kotse sa pagkaylap sa mga aksidente gumikan sa hubog nga drayber.

Ang Diyos naghatag sa tawo ug bililhong giya diha sa iyang Pulong, ang Bibliya. Pinaagi sa pagtuon niining balaang mga basahon ug pagsunod sa mga balaod ug mga prinsipyo nga gipadayag niini diha sa kinabuhi, atong malikayan ang daghang lit-ag sa kinabuhi. Sa kasukwahi, ang paglihok nga supak sa giya sa Diyos malaglagon. Pananglitan, kadtong mokaon ug sobra, motabako, moinom ug sobra, o mobuhat sa imoralidad kasagarang makaagom ug mga kadaot sa panglawas. (Lucas 21:​34; 1 Corinto 6:​18; 2 Corinto 7:1) Ang Kristohanong apostol Pablo misulat: “Bisan unsay ginapugas sa usa ka tawo, kini usab iyang anihon; tungod kay siya kinsa nagapugas alang sa iyang unod moani ug pagkadunot gikan sa iyang unod, apan siya kinsa nagapugas alang sa espiritu moani ug kinabuhing walay-kataposan gikan sa espiritu.”​—Galacia 6:​7, 8.

Pagkalabi pang maayo ang pagsunod sa mga balaod ug mga prinsipyo sa Diyos diha sa kinabuhi! Kon buhaton nato kini, atong matagamtam ang katumanan sa saad sa Diyos nga gipahayag pinaagi sa propetang si Isaias: “Ako, si Jehova, ang imong Diyos, ang Usa nga nagtudlo kanimo sa pagpahimulos sa imong kaugalingon, ang Usa nga nagpalakaw kanimo sa dalan nga angay nimong pagalaktan. Oh kon unta ikaw mamati gayod sa akong mga sugo! Unya ang imong kalinaw mahimong ingon sa usa ka suba, ug ang imong pagkamatarong ingon sa mga balod sa dagat.”​—Isaias 48:​17, 18.