Kinsa Sila?

MAOY tinguha sa mga Saksi ni Jehova nga mas masinati ka kanila. Tingali nahimamat na nimo sila ingong mga silingan ug mga kauban sa trabaho o sa bisan hain sa adlaw-adlawng mga kalihokan sa kinabuhi. Tingali nakita nimo sila diha sa karsada, nga nagtanyag sa ilang mga magasin sa mga lumalabay. O tingali nakaestorya mo sila sa makadiyot diha sa imong pultahan.

Sa pagkatinuod, ang mga Saksi ni Jehova interesado kanimo ug sa imong kaayohan. Buot nila nga mahimong imong mga higala ug isulti kanimo ang dugang pa bahin sa ilang kaugalingon, ilang mga pagtulon-an, ilang organisasyon, ug kon unsay ilang pagbati alang sa mga tawo ug sa kalibotan nga gipuy-an natong tanan. Aron makab-ot kini nga katuyoan, gihikay nila kining maong brosyur alang kanimo.

Sa daghan kaayong paagi ang mga Saksi ni Jehova sama ra sa ubang mga tawo. Sila adunay normal nga mga problema​—sa ekonomiya, sa panglawas, sa emosyon. Usahay masayop sila, tungod kay sila dili hingpit, dili inspirado sa Diyos, ug masalaypon. Apan sila naningkamot sa pagkat-on gikan sa ilang mga eksperyensiya ug makugihong nagtuon sa Bibliya aron mahimo ang gikinahanglang mga pagtul-id. Nakapahinungod na sila ngadto sa Diyos sa pagtuman sa iyang kabubut-on, ug nanglimbasog sila sa pagtuman niini nga pahinungod. Sa tanan nilang mga kalihokan ilang gipangayo ang giya gikan sa Pulong sa Diyos ug sa iyang balaang espiritu.

Hinungdanon kaayo kanila nga ang ilang mga pagtulon-an ipasukad sa Bibliya ug dili sa tawhanon lamang nga mga pangagpas o relihiyosong mga kredo. Gibati nila ang sama sa gibati ni apostol Pablo sa dihang miingon siya ubos sa pag-inspirar sa Diyos: “Hinaot nga makaplagang matinud-anon ang Diyos, bisan pag ang tanang tawo makaplagang bakakon.” (Roma 3:​4, Bag-ong Kalibotang Hubada) Maylabot sa mga pagtulon-an nga gipahayag ingong kamatuoran sa Bibliya, giuyonan gayod sa mga Saksi ang dalan nga gisubay sa mga taga-Berea sa dihang nadunggan nila si apostol Pablo nga nagwali: ‘Ilang gidawat ang pulong uban ang tumang kaikag sa hunahuna, nga sa adlaw-adlaw maampingong nagasusi sa Kasulatan kon tinuod ba kining mga butanga.’ (Buhat 17:11) Ang mga Saksi ni Jehova nagtuo nga ang tanang relihiyosong mga pagtulon-an kinahanglang sulayan kon kini nahiuyon ba sa Kasulatan, gipahayag man nila ang pagtulon-an o gipahayag kini sa laing tawo. Gidapit ka nila​—giawhag ka nila​—nga sulayan kini diha sa imong mga panaghisgot uban kanila.

Gikan niini dayag nga ang mga Saksi ni Jehova nagtuo sa Bibliya ingong Pulong sa Diyos. Giisip nila ang 66 ka basahon niini ingong inspirado sa Diyos ug husto sumala sa kasaysayan. Ang kasagarang gitawag ug Bag-ong Tugon gitawag nila ug Kristohanon Gregong Kasulatan, ug ang Daang Tugon ilang ginganlan ug Hebreohanong Kasulatan. Sila nagsalig niining duha, sa Grego ug Hebreohanong Kasulatan, ug gisabot kini nga literal gawas kon ang mga pahayag o mga kahimtang dayag nga nagpakita nga kini mahulagwayon o simboliko. Nasabtan nila nga daghan sa mga tagna sa Bibliya nangatuman na, ang uban nagakatuman, ug ang uban mamatuman pa sa umaabot.

ILANG NGALAN

Mga Saksi ni Jehova? Oo, mao kanay pagtawag nila sa ilang kaugalingon. Kana maoy mahubitong ngalan, nga nagpaila nga sila nagpamatuod maylabot kang Jehova, sa iyang pagka-Diyos, ug sa iyang mga katuyoan. Ang “Diyos,” “Ginoo,” ug “Maglalalang”​—sama sa “Presidente,” “Hari,” ug “Heneral”​—maoy mga titulo ug ikapadapat sa ubay-ubayng lainlain nga mga persona. Apan ang “Jehova” maoy personal nga ngalan ug nagpunting sa labing gamhanang Diyos ug Maglalalang sa uniberso. Gipakita kini sa Salmo 83:​18, sumala sa King James nga hubad sa Bibliya: “Aron ang mga tawo makaila nga ikaw, kansang ngalan mao si JEHOVA, mao ang labing hataas ibabaw sa tibuok yuta.”

Ang ngalang Jehova (o Yahweh, nga maoy gigamit sa Romano Katolikong Jerusalem Bible ug sa pipila ka mga eskolar) makita halos 7,000 ka beses diha sa orihinal nga Hebreohanong Kasulatan. Ang kadaghanang Bibliya wala mogamit sa maong ngalan kondili gipulihan kana ug “Diyos” o “Ginoo.” Apan, bisan niining maong mga Bibliya, ang usa ka tawo kasagarang mahibalo kon haing dapita gigamit ang Jehova diha sa orihinal nga Hebreohanong Kasulatan tungod kay nianang mga dapita ang gipuli nga mga pulong gisulat sa dagko ug gagmay nga mga titik, sama niini: DIYOS, GINOO. Ubay-ubayng modernong mga hubad naggamit sa ngalang Jehova o sa ngalang Yahweh. Busa, diha sa Bag-ong Kalibotang Hubad mao kini ang mabasa diha sa Isaias 42:​8, “Ako mao si Jehova. Kana ang akong ngalan.”

Ang teksto sa Kasulatan nga gibasehan sa mga Saksi ni Jehova sa ilang ngalan anaa sa ika-43 nga kapitulo sa Isaias. Didto ang talan-awon sa kalibotan giisip ingong usa ka husay sa korte: Ang mga diyos sa mga nasod giawhag sa pagpatungha sa ilang mga saksi sa pagpamatuod sa ilang giangkong mga kaso sa pagkamatarong o sa pagpamati sa mga saksi nga dapig kang Jehova ug sa pag-ila sa kamatuoran. Didto miingon si Jehova sa iyang katawhan: “Kamo mao ang akong mga saksi, miingon si Jehova, ug ang akong alagad nga akong napili; aron kamo makaila ug managtuo kanako, ug makasabot nga ako mao siya: una kanako walay Diyos nga nahimo, ni aduna pay mosunod kanako. Ako, bisan ako, mao si Jehova; ug gawas kanako wala nay manluluwas.”​—Isaias 43:​10, 11, American Standard Version.

Si Jehova nga Diyos may mga saksi na sa yuta sulod sa libolibong katuigan sa wala pa matawo si Jesus. Human ilista ang pipila niadtong mga tawo sa pagtuo diha sa Hebreohanon kapitulo 11, ang Hebreohanon 12:1 nag-ingon: “Busa, sanglit gilibotan man kita sa ingon ka bagang panganod sa mga saksi, tangtangon usab nato ang tanang kabug-at ug ang sala nga daling makasabod kanato, ug daganon nato nga malahutayon ang lumba nga gibutang sa atong atubangan.” Si Jesus miingon atubangan kang Poncio Pilato: “Tungod niini ako gipakatawo, ug tungod niini ako mianhi sa kalibotan, aron ako magpamatuod sa kamatuoran.” Siya gitawag ug “matinumanon ug matuod nga saksi.” (Juan 18:37; Pinadayag 3:14) Giingnan ni Jesus ang iyang mga tinun-an: “Kamo magadawat ug gahom sa dihang ang balaang espiritu mokunsad kaninyo, ug kamo mahimong akong mga saksi sa Jerusalem ug sa tibuok Judea ug Samaria ug hangtod sa kinalay-ang dapit sa yuta.”​—Buhat 1:8.

Busa, ang mga 6,000,000 ka tawo karon nga nagmantala sa maayong balita sa Gingharian ni Jehova pinaagi kang Kristo Jesus diha sa kapin sa 230 ka kayutaan mibati nga haom nilang gitawag ang ilang kaugalingon ingong mga Saksi ni Jehova.

[Footnote]

[Blurb sa panid 4]

Sila napahinungod sa Diyos sa pagtuman sa iyang kabubut-on

[Blurb sa panid 4]

Sila nagtuo nga ang Bibliya maoy Pulong sa Diyos

[Blurb sa panid 5]

Ang ngalan sumala sa kalambigitan niini sa husay sa korte

[Blurb sa panid 5]

Mga 6,000,000 ka Saksi diha sa kapin sa 230 ka kayutaan

[Hulagway sa panid 3]

Sila interesado kanimo

[Hulagway sa panid 4]

Ang personal nga ngalan sa Diyos sa karaang Hebreohanon