Segurado ang Tibuok-Kalibotang Pag-igsoonay!

ANG misyonaryo dili pa dugay sa West Africa sa dihang mitambong siyag usa ka relihiyosong kombensiyon sa usa ka nahilit nga rehiyon. Sa nagpaduol siya sa usa ka lokal nga pamilya, ang usa ka dos-anyos nga batang lalaki, nga walay dayag nga hinungdan, mihilak.

Gisulayan sa misyonaryo ang pag-alam-alam sa bata, apan unya ang hilak sa bata nahimong mga singgit. “Unsay deperensiya?” nangutana ang misyonaryo sa inahan. Siya mitubag uban sa diyutayng kataha: “Sa akong hunahuna ikaw ang hinungdan. Nahadlok siya sa imong kolor. Wala pa sukad siya makakitag tawong puti.”

Sukad sa pagkabata tingali kita nahibalo sa pisikal nga mga kalainan sa mga katawhan. Ang mga pagpihigpihig naugmad sa ulahi. Ang mga hunahuna sa mga bata maumol samtang mapanid-an nila ang mga tinamdan ug kagawian sa gulanggulang nga mga tawo, sama sa ilang mga ginikanan. Sa eskuylahan sila maimpluwensiyahan sa dugang pa sa ilang mga magtutudlo, mga higala, ug mga klasmet.

Sumala sa dugay nga pagtuon sa Tinipong Bansa, sa pag-abot sa mga bata sa edad nga 12 anyos, sila makaugmad na sa naandang mga panghunahuna ug mga tinamdan bahin sa etniko, rasanhon, ug relihiyosong mga grupo alirong nila. Sa pagkahamtong ang maong mga hunahuna makadulot na.

Ang mga Saksi ni Jehova Lahi

Sa usa ka kalibotan diin daghan ang pagpihigpihig, ang mga Saksi ni Jehova nailhan nga lahi kaayo. Sa tibuok kalibotan sila nailhan tungod sa ilang rasanhong panag-uyonay. Kini kasagarang mamatikdan sa mga maniniid panahon sa ilang dagko tinuig nga mga kombensiyon.

Pananglitan, ang mantalaang States-Item nagtaho niini bahin sa usa ka dakong kombensiyon sa mga Saksi sa habagatang Tinipong Bansa: “Ang pagbati sa panag-igsoonay mipuno sa Louisiana Superdome samtang ang batag tigulang, itom ug puting mga Saksi ni Jehova nagpahimutang sa pagsugod sa . . . kasinatian sa pagkakat-on ug pag-ambitay. . . . Ang rasanhong pagpihigpihig . . . dili usa ka suliran sa mga saksi.”

Sa usa ka kombensiyon sa mga Saksi, sa South Africa, ang usa ka babayeng Xhosa mikomento: “Kahibulongan nga dinhi sa South Africa ang katawhan sa tanang rasa mahimong nagkahiusa pag-ayo. Kini lahi kaayo sa akong naandan diha sa mga simbahan.”

Sa dihang ang mga bisita gikan sa Amerika del Norte ug Sur ingon man sa Uropa mitambong sa dagkong mga kombensiyon sa mga Saksi sa Halayong Silangan ug sa South Pacific, “wala gayod,” sumala sa usa ka taho, “bisan diyutayng rasismo sa ilang bahin, ni sa bahin sa ilang mga gibisita.”

Busa, ang nakapalahi kaayo sa minilyong Saksi ni Jehova sa tibuok yuta mao ang ilang tinuod nga panaghiusa ug rasanhong panag-uyonay. Sila gihugpong sa matuod Kristohanong gugma. Kini maoy sumala sa giingon ni Jesus: “Pinaagi niini ang tanan mahibalo nga kamo akong mga tinun-an, kon kamo may gugma sa inyong taliwala.”​—Juan 13:35.

Busa ang mga Saksi ni Jehova duna nay matuod, permanente tibuok-kalibotang panag-igsoonay! Gibutang nila sa kasingkasing ang giingon ni Jesus sa Mateo 23:8: “Kamong tanan mga managsoon.” Ug kini sa panahon mismo nga ang rasanhon ug etnikong mga pagbahinbahin ug dinumtanay nagaguba sa gambalay sa kanasoran.​—Tan-awa usab ang 1 Corinto 1:10; 1 Juan 3:10-12; 4:20, 21; 5:2, 3.

Kon sa Unsang Paagi Makab-ot ang Panaghiusa

Pasikaranan sa maong panaghiusa mao ang gibase-sa-Bibliya nga instruksiyon nga ginadawat sa mga Saksi ni Jehova diha sa ilang mga Kingdom Hall ug pinaagi sa ilang personal nga pagtuon sa Bibliya. Sila nahisama sa mga Kristohanon sa Tesalonica, nga bahin kanila si apostol Pablo miingon: “Sa gidawat ninyo ang pulong sa Diyos, nga inyong nadunggan gikan kanamo, inyong gidawat kana, dili ingon nga pulong sa mga tawo, kondili ingon nga sa pagkamatuod mao kini, ingon nga pulong sa Diyos, nga nagalihok usab diha kaninyong mga magtutuo.”​—1 Tesalonica 2:13.

Busa, ang mga Saksi nagtuo sa ginaingon sa Bibliya, ug sila maikagong nagasulay sa pagsundog sa paagi sa panghunahuna sa Diyos. Gibutang nila sa kasingkasing ang giingon sa Kristohanong si apostol Pedro ubos sa inspirasyon: “Sa pagkamatuod akong naila nga ang Diyos dili madapigon, apan sa matag nasod ang tawo nga nahadlok kaniya ug nagabuhat sa pagkamatarong dalawaton kaniya.”​—Buhat 10:34, 35.

Nahiuyon niini, gisugo ni Jesus ang iyang mga sumusunod sa paghimog mga tinun-an sa mga tawo “sa tanang nasod.” (Mateo 28:19) Busa, ang mga Saksi ni Jehova aktibong nagapangita sa mga nahigugma sa pagkamatarong sa tanang rasanhon ug etnikong mga grupo, nga walay eksepsiyon. Ug sa dihang kadtong sakop sa lainlaing mga kagikan ug mga rasa magkahiusa sa pagsimba, magbuhat, ug mag-uban-uban, mabuntog ang naandang panghunahuna. Sila makatuon sa pagpabili sa usag usa, sa paghigugma sa usag usa.

Tinuod, ang usa ka tawo nga dugay nang mapihigon tungod sa rasa tingali dili dihadiha mag-usob sa iyang mga hunahuna. Apan sa dihang siya mahimong Saksi, siya mosugod sa “pagsul-ob sa bag-ong pagkatawo” sa usa ka matuod nga Kristohanon, ug siya manlimbasog pag-ayo sa pagbuntog sa iyang mga hunahuna sa nangagi. (Efeso 4:22-24) Dili siya mosulay sa pagpakamatarong sa iyang mga pagpihigpihig sa pag-ingon, ‘Mao kanay akong gidak-an.’ Dili, siya maningkamot sa pagbag-o sa iyang hunahuna ug “pagbatog gugma alang sa tibuok kahugpongan sa mga igsoon.”​—1 Pedro 2:17.

Mga Tagna sa Bibliya Nangatuman

Ang nagakahitabo taliwala sa mga Saksi ni Jehova karong adlawa dakog kahulogan. Sa pagkamatuod, kini gitagna diha sa Bibliya.

Matikdi ang gitagna sa Isaias 2:2-4 nga mahitabo “sa kataposang bahin sa mga adlaw,” niining “kataposang mga adlaw” niining daotang sistema sa mga butang. (2 Timoteo 3:1-5, 13) Kanang tagna sa Isaias nagpahayag nga ang matuod nga pagsimba ni Jehova pagatukoron niining kaliwatana, ug ‘niana magaganayan ang katawhan gikan sa tanang nasod. Ug daghang mga katawhan ang mangadto ug magaingon: “Umari kamo, kamong katawhan, ug manungas kita ngadto sa bukid sa matuod nga pagsimba ni Jehova. Ug siya magatudlo kanato mahitungod sa iyang mga dalan, ug kita magalakaw sa iyang mga alagianan.”’

Ang tagna ni Isaias nagpahayag usab sa mosunod talagsaong sangpotanan, nga maoy sa tibuok-kalibotang gilapdon taliwala sa mga Saksi ni Jehova latas niining tibuok nga siglo: “Ug ilang pagasalsalon ang ilang mga espada nga mga punta sa daro ug ang ilang mga bangkaw nga mga galab. Ang nasod dili mobakyaw ug espada batok nasod, ni sila makakat-on pa sa gubat.”

Usab, ang basahong Pinadayag sa Bibliya, sa paghisgot sa atong panahon, mitagna nga ang usa ka dakong panon sa katawhan “gikan sa tanang nasod ug mga tribo ug mga katawhan ug mga pinulongan” magkahiusa diha sa matuod nga panag-igsoonay sa pag-alagad sa Diyos nga hiusa.​—Pinadayag 7:9, 15.

Kini dili paghanduraw. Ang dakong panon gikan sa tanang nasod, gikan sa tanang rasanhon ug etnikong mga grupo, nagakaporma na. Ang matuod ug malungtarong tibuok-kalibotang panag-igsoonay ginatukod na sa pagkakaron! Kini mao ang patukoranan sa bug-os bag-o tibuok-kalibotang kapunongan sa nahiusa, malipayong katawhan nga maoy mopuli niining presenteng hiwi nga kapunongan nga duol nang laglagon sa Diyos. Kining nahiusang kapunongan, sumala pa ni Jesus, “magapanunod sa yuta,” ug sila magapuyo ibabaw niini sa walay kataposan ilalom sa pagmando sa Gingharian sa Diyos.​—Mateo 5:5; 6:9, 10; Salmo 37:10, 11, 28, 29, 37, 38.

Nganong dili kini tan-awon sa imong kaugalingon? Libre kang moduaw sa bisan asang Kingdom Hall sa mga Saksi ni Jehova ug masinati sa ilang rasanhong panag-uyonay. O sa sunod panahong moduaw kanimo ang mga Saksi, padayona sila ug hangyoa sila nga ipakita kanimo gikan sa Bibliya kon unsa ang pasikaranan sa ilang rasanhong panag-uyonay. Hangyoa nga ipakita nila kanimo ang ilang Biblikal nga paglaom sa usa ka bag-ong kalibotan diin ang matuod nga panag-igsoonay magalungtad sa tibuok nga yuta.

Ang Diyos nga Makagagahom sa Tanan, si Jehova, nagahatag sa iyang pasalig nga ang iyang katuyoan nga tukoron ang panag-igsoonay sa tanang tawo mamatuman. Siya nagaingon: “Busa ang akong pulong nga magagula sa akong baba matuman. Kini dili mobalik kanako nga walay sangpotanan, apan kini magatuman sa akong gikahimut-an, ug kini magmalamposon sa butang nga alang niana kini akong gipadala.”​—Isaias 55:11.

Ikaw gidapit namo sa pagsusi sa ebidensiya gikan sa mga tagna sa Bibliya ug gikan sa katumanan nianang mga tagnaa. Kon buhaton nimo kana, imong makita nga ang rasanhong panag-uyonay dili lamang posible apan seguradong mahitabo!

[Blurb sa panid 9]

Ang nagakahitabo taliwala sa mga Saksi ni Jehova karong adlawa gitagna diha sa Bibliya

[Hulagway sa panid 10]

Ang mga Saksi ni Jehova talagsaon tungod sa pagbatog tinuod rasanhong panag-uyonay sa ilang taliwala