“Dili Ako Makahilom”

1. Nganong dili makahilom si Jeremias ug ang ubang mga manalagna ni Jehova?

“PAMATI sa pulong ni Jehova.” Kanang mga pulonga gimantala sa kadalanan ug sa mga plasa sa Jerusalem sugod sa 647 W.K.P. Ug ang manalagna sa Diyos wala moundang. Bisag ang siyudad nalaglag na 40 ka tuig sa ulahi, iyang gisubli ang maong awhag. (Jer. 2:4; 42:15) Nagpadala ang Labing Gamhanang Diyos ug mga manalagna aron ang mga Hudiyo seguradong makadungog sa Iyang tambag ug sila maghinulsol. Sumala sa gipakita sa sinugdang bahin niini nga publikasyon, si Jeremias maoy talagsaon taliwala sa mga tigpamaba sa Diyos. Ang Diyos miingon sa dihang iyang gisugo si Jeremias: “Tindog ug isulti kanila ang tanan nga akong isugo kanimo. Ayaw kalisang kanila.” (Jer. 1:17) Hago ang maong buluhaton ug nagkinahanglag dakong panahon. Nag-antos si Jeremias sa pisikal ug emosyonal nga kasakit, apan bisan pa sa maong mga pagsulay, gibati niyang ang iyang asaynment kinahanglang tumanon. Matod niya: “Ang akong kasingkasing magubot sa sulod nako. Dili ako makahilom.”—Jer. 4:19.

2, 3. (a) Sa unsang paagi gisundog sa mga tinun-an ni Jesus si Jeremias? (b) Nganong angay kang mosundog kang Jeremias?

² Ang paagi sa pagtuman ni Jeremias sa iyang asaynment sa pagpanagna maoy usa ka panig-ingnan sa mga alagad ni Jehova sa ulahi. (Sant. 5:10) Wala madugay human sa Pentekostes 33 K.P., gidakop sa Hudiyong mga awtoridad si apostol Pedro ug Juan ug gibaoran sila nga mohunong sa pagwali. Nakabasa ka sa ilang tubag: “Dili kami makahunong sa pagsulti sa mga butang nga among nakita ug nadungog.” (Buh. 4:19, 20) Human hulgaa si Pedro ug Juan sa mga awtoridad nga mas grabe pa ang mahitabo kanila sa sunod nga higayon, sila gibuhian. Nahibalo ka sa resulta. Dili mohunong ug wala gayod mohunong sa pagwali ang maong matinumanong mga alagad.

³ Makita ba nimo sa mga pulong ni Pedro ug Juan diha sa Buhat 4:20 nga sila usab mga masiboton kaayo sama kang Jeremias? Ingong ministro ni Jehova nga Diyos niining kataposang mga adlaw, dili ba angay nga ikaw ingon usab ka determinado sa paghunahuna nga ‘Dili ako makahilom’? Atong tan-awon kon unsaon nato pagpabiling malig-on sama kang Jeremias aron magpadayon kita sa pagwali sa maayong balita bisan pa sa nagkadaotang mga kahimtang sa atong palibot.

MAGPADAYON BISAG ANG MGA TAWO DILI MATINAGDANON

4. Unsang tinamdan ang komon sa karaang Jerusalem?

⁴ Nagtuo ka ba nga ang kahibulongang kaugmaon nga gisaad sa Diyos ubos sa pagmando sa iyang Anak mao ang labing maayong balita nga angayng madungog sa mga tawo? Bisan pa niana, daghan karon ang sama sa pipila ka Hudiyo kinsa kanhi miingon kang Jeremias: “Kon mahitungod sa pulong nga imong gisulti kanamo sa ngalan ni Jehova, kami dili mamati kanimo.” (Jer. 29:19; 44:16) Kanunayng madunggan ni Jeremias kanang mga pulonga. Mao man usab sa mga alagad ni Jehova karon, kay daghan ang moingon, “Dili ko interesado.” Makapaluya sa mga magmamantala sa Gingharian ang kaylap nga pagkadili-matinagdanon. Kon ang pipila diha sa inyong kongregasyon o kaha ikaw mismo nakasinati niana sa inyong teritoryo, unsa man ang mahimo?

5. (a) Unsay reaksiyon ni Jeremias sa pagkadili-matinagdanon sa katawhan? (b) Nganong nameligro kaayo kadtong dili matinagdanon sa maayong balita?

⁵ Palandonga ang kaisipan nga naugmad ni Jeremias bisan pag dili matinagdanon ang kadaghanan sa katawhan sa Juda. Sa bag-o pang nanagna si Jeremias, siya gihatagan ni Jehova ug pasiunang ideya bahin sa umaabot nga paghukom sa Diyos. (Basaha ang Jeremias 4:23-26.) Nasabtan niadto sa manalagna nga ang kinabuhi sa linibo nagdepende sa ilang pagkadungog sa mensahe nga iyang ipahayag kanila ug sa ilang sanong. Susama ang kahimtang sa katawhan karon, apil kadtong anaa sa inyong teritoryo. Bahin ‘nianang adlawa’ sa paghukom sa Diyos batok sa daotang kalibotan karon, si Jesus miingon: “Moabot kini sa tanang nagapuyo ibabaw sa tibuok nawong sa yuta. Nan, magpadayon sa pagtukaw, nga sa tanang panahon magapangamuyo aron molampos kamo sa pag-ikyas niining tanang butanga nga gitakdang mahitabo, ug sa pagbarog atubangan sa Anak sa tawo.” (Luc. 21:34-36) Makahinapos ka gikan sa mga pulong ni Jesus nga nameligro kaayo kadtong mosalikway sa maayong balita.

6. Nganong angay kang mopadayon sa pagsangyaw, bisan pa sa mga tawong dili kaayo interesado sa imong mensahe?

⁶ Apan kon ang mga tawo mamati lang unta ug modawat sa mensahe ni Jehova nga atong ipahayag kanila, maangkon nila ang bililhon kaayong mga benepisyo. Ang Diyos nagbukas sa dalan aron makaikyas kita sa kalaglagan ug makasulod sa iyang bag-ong kalibotan. Sa pipila ka bahin, susama usab kini sa ministeryo ni Jeremias. Makaikyas unta ang mga molupyo sa Juda. (Basaha ang Jeremias 26:2, 3.) Aron tabangan sila, migugol si Jeremias ug daghang katuigan sa pag-awhag sa mga tawo nga “mamati ug motalikod” sa ilang daotang dalan, nga magpatalinghog sa pulong sa matuod nga Diyos. Wala kita masayod kon pilay naghinulsol ug nagbag-o sa ilang kinabuhi tungod sa pagsangyaw sa manalagna. Apan gihimo kana sa pipila nianang panahona, ug ingon usab niana ang gihimo sa daghan sa atong panahon. Sa atong pagpadayon sa pagsangyaw sa maayong balita, subsob kitang makadungog kon sa unsang paagi nalukmay ang mga kasingkasing sa mga tawong kanhi dili interesado sa maayong balita. (Tan-awa ang kahon nga “Ang Dili Interesado Posibleng Mainteres ra sa Ulahi,” sa panid 184.) Dili ba kana maoy dugang rason nga kita angayng magmaaktibo sa pagsangyaw sa maayong balita nga makaluwas ug kinabuhi?

ANG MGA MAGSUSUPAK DILI MAKAHIMOG MALUNGTARONG KADAOT

7. Sa unsang paagi ang mga kaaway naningkamot sa pagpahunong sa pagpanagna ni Jeremias?

⁷ Sa ministeryo ni Jeremias subsob nga naningkamot ang mga magsusupak sa pagpatay kaniya ug sa pagpahunong sa iyang buluhaton. Ang mini nga mga manalagna nagsupak kaniya sa publiko. (Jer. 14:13-16) Sa naglakaw si Jeremias sa kadalanan, siya gisinggitan ug gibiaybiay sa mga tumatan-aw. (Jer. 15:10) Ang pipila niya ka kaaway nagplanog dugang mga paagi aron pakaulawan siya. (Jer. 18:18) Ang uban nagpakaylap ug makadaot nga hulungihong aron ang mga tawong matinud-anog kasingkasing dili mamati sa mga pulong sa kamatuoran nga giwali ni Jeremias. (Lam. 3:61, 62) Mihunong ba si Jeremias? Kasukwahi niana, nagpadayon siya sa pagwali. Nganong nahimo niya kana?

8. Unsay reaksiyon ni Jeremias sa dihang migrabe ang pagpit-os kaniya sa mga magsusupak?

⁸ Ang pangunang hinagiban ni Jeremias aron mabuntog ang tanang pagsupak mao ang pagsalig kang Jehova. Sa sinugdan sa iyang ministeryo, giingnan sa Diyos si Jeremias nga Iyang palig-onon ug panalipdan siya. (Basaha ang Jeremias 1:18, 19.) Mituo si Jeremias sa maong saad, ug wala siya pakyasa ni Jehova. Sa dihang ang mga magsusupak nagpit-os kaniya ug nagpahamtang ug mas grabeng kapintasan, mas misamot pa hinuon ang iyang kaisog ug pagkamalahutayon. Matikdi kon sa unsang paagi kanang mga hiyasa nakatabang gayod kaniya.

9, 10. Unsang mga panghitabo sa kinabuhi ni Jeremias ang angayng magdasig kanimo nga magmaisogon?

⁹ Usa niana ka higayon, si Jeremias gitaral sa rebelyosong mga saserdote ug mga manalagna ngadto sa atubangan sa mga prinsipe sa Juda aron ipapatay. Nahadlok ba si Jeremias tungod sa ilang mga panghulga mao nga gitak-om na lang niya ang iyang baba? Wala. Ang iyang pagtubag epektibo kaayong nagpanghimakak sa mga akusasyon niadtong mga apostata nga tungod niana naluwas ang iyang kinabuhi.—Basaha ang Jeremias 26:11-16; Luc. 21:12-15.

¹⁰ Hinumdomi nga human makabati sa bug-at nga mensahe sa manalagna, ang opisyal sa templo nga ginganlag Pasur nagbutang kaniya sa sepohan. Nagtuo si Pasur nga maleksiyon na niadto si Jeremias ug siya mohilom na. Busa gibuhian siya ni Pasur sa sunod nga adlaw. Apan si Jeremias, bisag gisakitan pag-ayo sa lawas tungod sa pagpaantos kaniya, direktang nakigsulti kang Pasur ug mipahayag sa paghukom ni Jehova kaniya. Wala gayod mohilom si Jeremias bisag gipaantos siya! (Jer. 20:1-6) Nganong wala man? Si Jeremias mismo nagsulti kanato: “Si Jehova nag-uban kanako sama sa usa nga makalilisang ang pagkagamhanan. Mao nga ang mga naglutos kanako mangapandol ug dili modaog.” (Jer. 20:11) Bisan atubangan sa mabangis nga mga magsusupak, si Jeremias wala mahadlok. Ang iyang pagsalig kang Jehova dili matarog, ug ikaw mahimong ingon usab niana.

11, 12. (a) Sa unsang paagi gigamit ni Jeremias ang sentido komon sa dihang gisupak siya ni Hananias? (b) Unsay kaayohan kon ikaw magpadayon sa “pagpugong sa kaugalingon bisan ilalom sa daotan”?

¹¹ Angayng hinumdoman nga si Jeremias dili panatiko. Migamit siyag sentido komon sa dihang giatubang ang mga magsusupak. Nahibalo siya kon kanus-a mobiya. Pananglitan, tagda ang iyang kasinatian maylabot kang Hananias. Human supaka sa maong mini nga manalagna ang tagna ni Jehova atubangan sa publiko, si Jeremias nagtul-id kaniya ug nagpatin-aw kon unsaon pag-ila ang matuod nga manalagna. Si Jeremias nagdalag kahoyng yugo niadtong higayona, nga nagpasabot nga sila mailalom sa yugo sa Babilonya. Si Hananias nasuko ug iyang gibali ang yugo. Walay nasayod kon unsay sunod nga buhaton ni Hananias. Busa, unsay gihimo ni Jeremias? Atong mabasa: ‘Ang manalagna milakaw.’ Oo, si Jeremias mibiya sa maong dapit. Sa ulahi, siya gisugo ni Jehova sa pagbalik didto ug pagsulti kang Hananias kon unsay ipahinabo sa Diyos—ang mga Hudiyo maulipon sa hari sa Babilonya ug si Hananias mamatay.—Jer. 28:1-17.

¹² Tin-aw gikan niining inspirado nga asoy nga sa dihang magsangyaw, ang atong kamaisogon angayng timbangan ug maayong panghukom. Kon sa usa ka balay adunay dili modawat sa Kasulatanhong pangatarongan, nga masuko ug manghulga pa gani, maayong mobiya kitang matinahoron ug moadtog laing balay. Dili maayong makig-ergo bahin sa maayong balita sa Gingharian. Kon kita magpadayon sa “pagpugong sa kaugalingon bisan ilalom sa daotan,” atong matabangan ang tagbalay nga modawat sa sunod mas paborableng panahon.—Basaha ang 2 Timoteo 2:23-25; Prov. 17:14.

“AYAW KAHADLOK”

13. Nganong si Jehova miingon kang Jeremias: “Ayaw kahadlok,” ug nganong angay nato kining palandongon?

¹³ Ang matuod nga mga magsisimba naapektohan niadto sa daotang mga kahimtang sa Jerusalem una pa kini malaglag sa 607 W.K.P. Busa masabtan nimo kon nganong ang Diyos miingon kang Jeremias: “Ayaw kahadlok.” (Jer. 1:8; Lam. 3:57) Ug gisugo ni Jehova si Jeremias nga sultihan ang uban sa iyang katawhan sa samang makapadasig nga mga pulong. (Basaha ang Jeremias 46:27.) Unsay makat-onan nato niini? Niining makuyawng panahon sa kataposan, usahay mobati kitag kahadlok. Nianang mga higayona, mamati ba kita kang Jehova, kinsa samag nagsulti kanato: “Ayaw kahadlok”? Sa sinugdang bahin niini nga publikasyon, atong gihisgotan kon sa unsang paagi gitabangan sa Diyos si Jeremias latas sa maong makalilisang gayod nga panahon. Atong repasohon sa daklit kon unsay nahitabo aron masabtan nato ang leksiyon niini alang kanato.

14, 15. (a) Unsang makuyaw nga kahimtang ang nasinatian ni Jeremias? (b) Sa unsang paagi gituman ni Jehova ang iyang saad nga panalipdan si Jeremias?

¹⁴ Samtang gipangusgan pagkontrolar sa mga Babilonyanhon ang Jerusalem, nag-antos ang katawhan sa gutom ug sa wala madugay daghan ang wala nay pagkaon. (Jer. 37:21) Dugang pa sa midangat nga gutom, si Jeremias natanggong sa usa ka dapit nga mahimo unta niyang lubnganan. Nakombinsir sa mga prinsipe sa Juda ang huyang ug desisyon nga si Haring Zedekias nga ihulog si Jeremias sa lalom nga atabay. Wala kadtoy tubig apan puno lamang ug lapok. Sa nagkaunlod si Jeremias sa lapok, wala siyay nakitang paagi nga maluwas ang kaugalingon. Kon ikaw ang anaa sa maong kahimtang, dili ka ba mahadlok?—Jer. 38:4-6.

¹⁵ Bisag si Jeremias maoy mortal sama kanato, siya misalig sa Pulong ni Jehova nga Siya dili gayod mobiya kaniya. (Basaha ang Jeremias 15:20, 21.) Gigantihan ba ni Jehova kana nga pagsalig? Nasayod kita nga Iya gayod kanang gihimo. Gipalihok sa Diyos si Ebed-melek nga dili sundon ang mga prinsipe kondili luwason hinuon si Jeremias. Uban ang pagtugot sa hari, gipagawas ni Ebed-melek ang manalagna gikan sa atabay, ug giluwas siya gikan sa kamatayon didto sa lalom nga lapok.—Jer. 38:7-13.

16. Sa unsa nga mga kapeligrohan giluwas ni Jehova ang iyang maunongong mga alagad?

¹⁶ Bisan pag nakalingkawas na si Jeremias, siya nameligro pa gihapon. Si Ebed-melek nangaliyupo sa hari alang kang Jeremias ug miingon: “Siya mamatay didto tungod sa gutom. Kay wala nay tinapay sa siyudad.” (Jer. 38:9) Nihit na kaayo ug pagkaon sa Jerusalem nga tungod niana ang mga tawo napugos na sa pagkaon sa unod sa tawo. Apan, nangilabot na usab si Jehova aron luwason ang iyang manalagna. Ug gipasaligan ni Jeremias si Ebed-melek nga siya panalipdan ni Jehova. (Jer. 39:16-18) Wala malimot si Jeremias sa pasalig sa Diyos: ‘Ako magauban kanimo sa pagluwas kanimo.’ (Jer. 1:8) Kay ang Labing Gamhanang Diyos maoy nagbantay sa duha ka maunongong mga alagad, ang mga kaaway ug ang gutom dili makapatay kanila. Naluwas sila gikan sa maong siyudad nga gihukman sa kalaglagan. Unsay buot ipasabot niini? Gisaad ni Jehova ang panalipod ug iya kanang gituman.—Jer. 40:1-4.

17. Nganong angay kang motuo sa saad ni Jehova nga iyang panalipdan ang iyang mga alagad?

¹⁷ Dili kapugngan ang bug-os nga katumanan sa tagna ni Jesus bahin sa kataposan sa sistema sa mga butang. Sa dili madugay, mahitabo na ang “mga ilhanan sa adlaw ug sa bulan ug sa mga bituon, ug sa ibabaw sa yuta tumang kasakit sa kanasoran, nga wala mahibalo sa kalingkawasan . . . Samtang ang mga tawo panguyapan sa kahadlok ug sa pagpaabot sa mga butang nga mahitabo diha sa gipuy-ang yuta.” (Luc. 21:25, 26) Magpaabot kita aron makita kon unsa gayod ang maong mga ilhanan ug ang kalisang nga ipahinabo diha sa daghang tawo. Apan, bisag unsa pay mahitabo, ayaw gayod dudahi ang katakos ug tinguha ni Jehova sa pagluwas sa iyang katawhan. Hinuon, kasukwahi unya ang dangatan sa mga tawong wala niya uyoni. (Basaha ang Jeremias 8:20; 14:9.) Bisan pag ang iyang mga alagad mabutang sa kahimtang nga maorag walay paglaom sama sa pagkahimutang sa lapokon, ngiob nga kahiladman sa usa ka atabay, siya makaluwas kanila! Ang mga pulong kang Ebed-melek mapadapat ngadto sa iyang katawhan: “‘Ako sa walay pakyas magtagana kanimo ug kaikyasan, ug dili ka mapukan sa espada; ug tino nga mabatonan mo ang imong kalag ingon nga inagaw, tungod kay ikaw misalig kanako,’ mao ang giingon ni Jehova.”—Jer. 39:18.

MGA PULONG NGA GISULAT ALANG KANIMO

18. (a) Unsang mga pulonga ang nag-usab sa kinabuhi ni Jeremias? (b) Unsay kahulogan sa sugo sa Diyos diha sa Jeremias 1:7 alang kanimo?

¹⁸ “Kanilang tanan nga ikaw akong paadtoon, ikaw moadto; ug ang tanan nga isugo ko kanimo, imong isulti.” (Jer. 1:7) Nausab gayod ang kinabuhi ni Jeremias sa dihang iyang nadungog ang maong sugo sa Diyos. Sukad niadtong gutloa, ang labaw niyang gihunahuna mao ang pagpahibalo sa “pulong ni Jehova.” Kini nga prase subsob makita diha sa basahon sa Jeremias. Sa kataposang kapitulo, giasoy ni Jeremias ang pagkabihag sa Jerusalem ug ang pagkadestiyero sa kataposang hari niini, si Zedekias. Oo, si Jeremias nagpadayon sa pagpanudlo ug pagtambag sa katawhan sa Juda nga ilang tumanon si Jehova hangtod nga tin-awng madayag sa mga panghitabo nga human na ang iyang buluhaton.

19, 20. (a) Nganong ang pag-alagad ni Jeremias usa ka sumbanan alang kanimo? (b) Nganong ang buluhatong pagsangyaw makahatag ug kalipay ug katagbawan? (c) Sa unsang paagi nakaapektar kanimo ang pagtuon sa mga basahon sa Jeremias ug Lamentaciones?

¹⁹ Daghay kaamgiran tali sa asaynment ni Jeremias ug sa publikong ministeryo sa mga Saksi ni Jehova karon. Sama kaniya, ikaw nag-alagad sa matuod nga Diyos sulod sa usa ka panahon sa paghukom. Ang ubang mga responsibilidad nagkinahanglan sa imong panahon ug kusog, apan ang pagsangyaw sa maayong balita mao ang labing hinungdanong buluhaton nga mabuhat nimo niining sistemaha sa mga butang. Pinaagi niana, gihimaya nimo ang dakong ngalan sa Diyos ug gidawat ang iyang bug-os nga katungod ug awtoridad ingong Soberano sa Uniberso. (Basaha ang Lamentaciones 5:19.) Gipasundayag usab nimo ang talagsaong gugma alang sa silingan pinaagi sa pagtabang sa uban sa pag-ila sa matuod nga Diyos ug sa pagkahibalo sa iyang mga kinahanglanon alang sa kinabuhi.—Jer. 25:3-6.

²⁰ Bahin sa buluhaton nga gihatag ni Jehova kaniya, si Jeremias miingon: “Ang imong pulong nahimong kasadya ug pagmaya sa akong kasingkasing; kay ako gitawag sa imong ngalan, Oh Jehova nga Diyos sa mga panon.” (Jer. 15:16) Ang maong pagmaya ug katagbawan masinatian sa tanan karon kansang kasingkasing napalihok sa pagsulti alang sa matuod nga Diyos. Busa, ikaw adunay maayong katarongan nga magpadayon sa pagmantala sa mensahe ni Jehova, sama sa gihimo ni Jeremias.