Mga Pangutana Gikan sa mga Magbabasa

Nalingaw kami sa pagtuon sa mga tagna ni Daniel sumala sa gihisgotan sa “Ang Bantayanang Torre.” Apan, ngano man nga ang mga petsa alang sa tulo ug tunga ka panahon sa Pinadayag 11:3 lahi sa librong “Pinadayag Sangkoanan”?

Oo, ang Bantayanang Torre sa Nobyembre 1, 1993, nagtanyag ug diyutayng kausaban mahitungod sa pagpetsa sa modernong katumanan sa Pinadayag 11:3. Ngano?

Tan-awon una nato ang Pinadayag 11:2, nga ang kataposan niini naghisgot ug “kap-atan ug duha ka bulan.” Ipadayon nato sa bersikulo 3: “Ug ipahinabo ko nga magapropesiya ang akong duha ka saksi sa usa ka libo ug duha ka gatos ug kan-uman ka adlaw nga magsininag sakong-panapton.” Kanus-a kana mapadapat?

Aw, ang mga Saksi ni Jehova dugay nang nakaila nga kining tagnaa natuman diha sa dinihogan-sa-espiritung mga Kristohanon human matapos “ang tinudlong panahon sa kanasoran” (ang Panahon sa mga Hentil) niadtong 1914. (Lucas 21:24; 2 Corinto 1:21, 22) Nga nagkomento bahin niini, ang Pinadayag​—Hingpit nga Sangkoanan Niini Haduol Na!a (1988) nag-ingon sa panid 164: “Dihay usa ka markadong hugna sa panahon nga tulo ug tunga ka tuig sa dihang ang malisod nga kasinatian sa katawhan sa Diyos takdo sa mga hitabo nga gitagna dinhi​—gikan sa pagbuto sa unang gubat sa kalibotan sa ulahing bahin sa 1914 ug nagpadayon ngadto sa sayong bahin sa 1918.”

Matikdi nga ang pagpetsa nga gitanyag mao “ang pagbuto sa unang gubat sa kalibotan sa ulahing bahin sa 1914 [hangtod] sa sayong bahin sa 1918.” Kini mohaom sa pagpetsa nga sagad gitanyag, sama diha sa “Then Is Finished the Mystery of God,” mga panid 261-4, (1969).b

Hinunoa, ang Bantayanang Torre nagtumong sa mga tagna sa Daniel, usa ka basahon nga kaduhang naghisgot sa yugto nga susama ngadto nianang gihisgotan sa ulahi sa Pinadayag​—3 1/2 ka tuig, o 42 ka bulan. Aron sa pagtino, ang Daniel 7:25 nag-ingon nga ang mga balaan sa Diyos pagasamokon “sulod sa usa ka panahon, ug mga panahon ug tunga sa panahon,” o 3 1/2 ka panahon. Sa ulahi, ang Daniel 12:7 nagtagna ug “usa ka tinudlong panahon, mga tinudlong panahon ug tunga,” o 3 1/2 ka panahon, nga taposon sa “usa ka pagtapos sa paglumpag sa gahom sa balaang katawhan.”

Busa aduna kitay mga tagna nga naghisgot sa usa ka susamang yugto sa Daniel 7:25, Daniel 12:7, ug Pinadayag 11:2, 3, maingon man sa Pinadayag 13:5. Ang atong mga publikasyon nagpakita nga kining tanan natuman diha sa 1914-18 nga yugto. Apan sa paghisgot nga bulag niining mga tagnaa, ang mga petsa alang sa sinugdanan ug sa kataposan adunay diyutayng kalainan.

Hinunoa, ang Bantayanang Torre sa Nobyembre 1, 1993, nangutana: “Sa unsang paagi natuman kining tanang susamang mga tagna?” Oo, ang mga tagna sa 3 1/2 ka panahon nga gihisgotan sa Daniel 7:25, Daniel 12:7, ug Pinadayag 11:3 giila ingong “susamang mga tagna.” Busa, sila managsama sa ilang sinugdanan ug sa ilang kataposan.

Maylabot sa kataposan, ang magasin nagpakita kon sa unsang paagi ang pagsamok sa mga dinihogan sa Diyos (Daniel 7:25) miabot sa kinatayuktokan niadtong Hunyo 1918 sa dihang si J. F. Rutherford ug ang ubang mga direktor sa Watch Tower Bible and Tract Society “gipahamtangan ug hataas nga sentensiya sa bilanggoan gumikan sa bakak nga mga sumbong.” Kanang hitaboa mao gayod ing “usa ka pagbungkag sa kagahom sa balaang katawhan,” sumala sa giingon sa Daniel 12:7.

Ang pag-ihap pabalik gikan sa Hunyo 1918 motultol kanato sa Disyembre 1914 alang sa sinugdanan sa 3 1/2 ka panahon. Nianang hinapos nga bulan sa 1914, ang mga dinihogan sa Diyos sa yuta nasayod sa temang kasulatan alang sa nagsingabot nga tuig: “‘Makahimo ba kamo sa pag-inom gikan sa Akong kopa?’​—Mateo 20:20-23.” Ang artikulo nga nagpahayag niana nagpasidaan: “Kinsay nasayod basin aduna tingali unyay usa ka linaing pagsulay, usa ka kopa sa pag-antos o kaulawan, alang sa maunongong mga sumusunod sa Kordero sulod sa 1915!” Sumala sa gitagna sa Daniel 7:25 alang niining yugtoa sa 3 1/2 ka panahon, ‘mitungha ang pagsamok ug mipadayon batok sa mga balaan mismo sa Supremong Usa.’ Ang mga nasod nagbugnoay sa Gubat sa Kalibotan I, nga nagpasayon alang kanila sa pagtuman sa dili-makataronganong pagsamok. Ang konklusyon mao: Ang tanang susamang mga tagna​—Daniel 7:25, 12:7, ug Pinadayag 11:3​—natuman diha sa 3 1/2 ka tuig, o 42 ka bulan, gikan sa Disyembre 1914 hangtod sa Hunyo 1918.

Kini nagsaysay sa diyutayng kausaban sa pagpetsa sa katumanan sa Pinadayag 11:3. Kining maong kausaban maoy usa ka butang nga atong hinumdoman samtang kita magatuon ug magagamit sa librong Pinadayag Sangkoanan sa umaabot.

[Footnote]