Mga Pagtulon-an Gikan sa Kasulatan: Nahum 1:1–3:19

Posible ang Kaluwasan sa Dihang ang Diyos Manimalos

“KAY sa dili na madugay, ug ang daotan mawala na.” (Salmo 37:10) Nga kining mga pulonga matuman kusganong gipakita diha sa mga basahon sa Bibliya nga gisulat nila ni Nahum ug Habacuc. Gitapos niining maisog nga mga lalaki ang pagrekord sa ilang mga tagna sa gingharian sa Juda sulod sa ulahing bahin sa ikapitong siglo W.K.P.

Una, palandonga ang tagna sa Diyos nga gipahayag ni Nahum. Unsang mga pagtulon-an ang unod niini?

Segurado ang Panimalos sa Diyos

Si Jehova nagapangayo sa bug-os nga debosyon. (Exodo 20:5) Sa usa ka pahayag batok sa kapital sa Asirya, ang Ninive, si Nahum nagpakita nga ang panimalos sa Diyos ipahamtang sa mga kaaway kinsa wala maghatag Kaniya sa maong debosyon. Aw, sa atubangan niya ang kabukiran mangauyog, ang kabungtoran mangatunaw, ug ang yuta matay-og! Kinsa ang makasukol sa kainit sa iyang kasuko?​—1:1-6.

Makasalig kita kang Jehova ingon nga dalangpanan. Oo, ang Diyos mopanalipod niadtong modangop kaniya. Uban sa iyang mga kaaway nga napuo na, ang kasakit dili na mobangon pa pag-usab. Dunay maayong balita sa pakigdait alang sa Juda, kay ang matuod nga pagsimba dili na mababagan.​—1:7–​2:2.

Ang mga tawong dili matarong dili molampos. Kini makita diha sa nahitabo sa Ninive. Ang iyang mapintas nga pagtratar sa mga bihag naghimo kaniya nga “siyudad sa pag-ulag dugo.” Sama sa luklokanan sa mga leyon, kining lig-ong pagkakuta nga siyudad daw luwas luyo sa bagang mga padir niini. Apan pinaagi sa sugo sa Diyos, ang Ninive mag-antos ug samang silot nga gipahamtang niya sa karaang No-amon, o Thebes, sa Suba sa Nilo. Tungod iyang mga sala, ang kapital sa Asirya laglagon. Kining tagnaa natuman sa dihang gibihag sa na,gkausang mga puwersa ni Nabopolassar nga hari sa Babilonya ug ni Cyaxares nga Medianhon ang Ninive niadtong 632 W.K.P.—2:3–3:19.

Mga Pagtulon-an Gikan sa Kasulatan: Habacuc 1:1–3:19

SI Habacuc nakakat-on nga si Jehova sa Iyang tinakdang panahon molihok batok sa mapintas nga mga manlulupig. Apan ‘pinaagi sa iyang pagkamatinumanon ang matarong mabuhi.’ (2:4) Apan, unsang dugang mga pagtulon-an ang atong makat-onan niining tagnaa?

Kaluwasan Niadtong May Pagtuo

Si Jehova mamati sa mga pangaliyopo sa iyang mga alagad. Si Habacuc nangutana: “Hangtod kanus-a, O Jehova, nga ako magtuaw alang sa panabang, ug wala ka mamati?” Oo, walay hustisya, ug ang daotan naglibot sa matarong. Apan ang Diyos mamati gayod, ug ingong iyang galamiton sa pagsilot, iyang “gibangon ang mga Caldeanhon.” Apan, sa unsang paagi iyang gamiton ang magubatong gahom? Ang manalagna nagpaabot sa tubag sa Diyos, nga naglaom nga badlongon.​—1:1–​2:1.

Ang matarong ug matinumanon lamang ang mabuhi. Si Jehova nagpasalig kang Habacuc niini. Bisan pa daw dunay kalangan, sa tinakdang panahon sa Diyos ang matagnaong panan-awon “sa walay pakyas matuman.” Ang masaligon sa kaugalingon nga kaaway nga nagapanglungkab sa kanasoran dili makaabot sa iyang tumong. Sa pagkamatuod, ang mga Caldeanhon pagasilotan.​—2:2-5.

Kalaotan sa mga Daotan!

Likayi ang dili matarong nga ganansiya, kapintas, ug idolatriya. Ngano? Tungod kay alaot alang sa usa nga nagpadaghan sa butang nga dili iya, nga nagbaton ug daotang ganansiya, nga nagtukod sa usa ka siyudad pinaagi sa pag-ulag dugo, nga sa kapintas nagpahinabo sa uban sa pag-inom sa kopa sa makauulaw nga kapildihan, ug nga nagsalig sa walay kinabuhi nga mga idolo. Ang Diyos magpapha sa mga buhat nila. Ang tanang yuta pailhon sa himaya ni Jehova, diin atubangan niya ang tanan kinahanglan mobarog sa matahaon nga kahilom.

—2:6-20.

Paghulat nga mapailobon kang Jehova alang sa kaluwasan. Diha sa pag-ampo, si Habacuc nahinumdom sa nangaging mga pagpadayag sa gahom sa Diyos. Apil sa ubang mga butang, si Jehova nagmartsa latas sa yuta, nga nagagiok sa kanasoran diha sa kasuko. Nagapadayon usab siya aron sa pagluwas sa iyang katawhan. Daw sa gisanapan, si Habacuc determinado sa “hilom nga pagpaabot sa adlaw sa kasakit.” Bisan pa sa daotang mga panahon nga sagubangon, siya mangayaon diha kang Jehova ug malipayon sa Diyos sa iyang kaluwasan.—3:1-19.

[Kahon sa panid 24]

MGA TEKSTO SA BIBLIYA GISUSI

o Nahum 1:4—Ang Basan, Carmelo, ug Libano maoy mga dapit nga matahom, tabunok, ug mabungahon. Kon sila maluya magkahulogan kinig trahedya alang niadtong nagsalig kanila. Kini nagpasiugda sa kagrabe sa pagbubo sa kapungot ni Jehova.

o 1:10—Ang Ninive nag-isip sa iyang kaugalingon nga dili-mataak sama sa gilala nga tunok, ug siya nahubog sa ambisyon. Apan sayon siyang lamyon sama sa kalayo nga nag-ot-ut sa laya nga balili. Mao man usab, ang mga kaaway sa modernong katawhan sa Diyos dili makabarog sa kalayonhong mga paghukom ni Jehova.

o 2:6—Tungod sa kusog nga ulan sa panahon sa pag-atake sa Ninive, mibaha ang Suba sa Tigris. Kini nagsanap sa usa ka dapit sa siyudad ug nagguba ang usa ka bahin sa padir. Busa, kini nahimong sayon alang sa mga konkistador sa pagbihag sa kapital sa Asiria.

o 2:11-13—Sama sa ihalas nga mga mamanap, gilisang ug gitukob sa mga Asirianhon ang kanasoran. Nagpadayag usab nga ang leyon mao emblema sa nasod. Daghang estatuwa sa mga leyon ang nakaplagan sa mga kagun-oban sa Ninive.

o 3:3, 4—Sama sa usa ka bigaon, gibitik sa Ninive ang kanasoran uban sa makalukmay nga mga tanyag sa panaghigala ug mga saad sa panabang. Apan kadtong nalit-agan sa wala madugay nakasinatig kasakit ubos sa iyang malupigong yugo, sama sa gipakita sa kaso ni Achaz nga hari sa Juda.—2 Cronicas 28:16, 20, 21.

[Kahon sa panid 25]

MGA TEKSTO SA BIBLIYA GISUSI

o Habakkuk 1:2-4—Ang pagtuo ni Habacuc kang Jehova ingon nga Diyos nga dili mopalabay sa pagkadaotan maoy nagtukmod kaniya sa pagpangutana ngano ang pagkadaotan nagpadayon. Andam siya sa pagbag-o sa iyang hunahuna. (2:1) Kon kita mahibulong kon nganong pipila ka butang gitugotan, ang atong pagsalig sa pagkamatarong ni Jehova makatabang kanato nga makapabiling timbang ug maghulat kaniya.​—Salmo 42:5, 11.

o 2:5—Ang mga Babilonyanhon maoy daghang-bahin nga mga tawo kinsa migamit sa iyang mga makinarya sa gubat sa pagdaog sa kanasoran. Sama sa Sheol ug kamatayon nga kanunay andam alang sa dugang mga biktima, iyang gitinguha ang dugang kadaogan sa militar. (Itandi ang Proverbio 30:15, 16.) Ingon nga daw gigamhan sa sobra nga pag-inom, nahubog siya sa kadaogan. Apan ang iyang mga gubat sa pagpangdaog natapos sa dihang ang Babilonya nahulog niadtong 539 W.K.P.

o 3:13—Ang gahom sa Diyos sa pagluwas naeksperyensiyahan kanunay sa iyang pinili ug dinihogang katawhan, ang nasod sa Israel. (Salmo 28:8, 9) Sa gitakdang panahon, kini mipatungha sa Mesiyas, ang “binhi” sa langitnong “babaye” sa Diyos. (Genesis 3:15) Si Jehova magaluwas usab sa nahibiling mga membro nianang maong “binhi,” ang salin sa dinihogan sa espiritu nga mga disipulo ni Jesus, batok sa pag-atake ni Satanas ug sa kanasoran.—Pinadayag 12:17.

[Hulagway sa panid 24]

Dibuho sa arkeologong A. H. Layard nga naghulagway sa usa ka palasyo sa Asiria

[Kapsiyon]

Kortesiya sa Trustees of the British Museum, London