Ang Yuta sa Pepper Bird Nakadungog sa “Bag-ong Awit”
MIBANAGBANAG na, ang mananoy nga saloma sa pepper bird madunggan sa tibuok Liberia. Sulod sa daghang kaliwatan, ang iyang liroglirog nagpukaw sa mga taga balangay ngadto sa laing adlaw sa pagtrabaho ubos sa mainit nga adlaw. Kining kumon nga tang-ol-ol nakahatag sa Liberia sa angga niini nga “yuta sa pepper bird.”
Ang ngalan Liberia, bisan pa, makapahinumdom sa laing sugilanon. Niadtong 1822 ang nakagawas na nga mga ulipon nga namalik gikan sa Amerika ngadto sa kontinente sa ilang mga kagikan miabot sa bukana sa Suba sa Mesurado ug nagporma sa kolonya nga nahimong Monrovia. Ang ubang mga kolonya nanungha sa Buchanan, Greenville, ug Harper, ug ang bag-ong mga lalin naghimog mga tratado uban sa mga hari sa katawhan sa lumad nga tribo. Gidala niining mga bag-ong lalin uban nila ang mga espirituwalistang Negro—mga awit nga nagtapo sa mga ritmong Aprikano uban sa mga tema sa Bibliya ug nagpabanaag sa ilang pangandoy ug kagawasan. Nunot nianang pangandoy, niadtong 1824 ang ilang kolonya ginganlan nga Liberia. Niadtong 1847 kini nahimong unang itom nga republika sa Aprika.
Ning bag-ong mga tuig, hinunoa, ang usa ka bag-ong awit nadunggan ning yutaa. Kini awit nga giawit, dili sa pepper bird o sa namalik nga mga ulipon, kondili sa usa ka nagtubo nga koro sa katawhan kinsa nagasanong sa awhag sa salmista sa Bibliya: “Mag-awit kang Jehova sa usa ka bag-ong awit. Mag-awit kang Jehova, kamong tanang katawhan sa yuta. Magsugilon taliwala sa kanasoran: ‘Si Jehova mismo nahimong hari.’ ” (Salmo 96:1, 10) Oo, mao kini ang awit sa natukod na nga Gingharian sa Diyos, uban kang Jesu-Kristo ingon nga Hari. Kini giawit sa umaabot nga mga manununod sa langitnong kagamhanan ni Jehova. Sila ug ang ilang mga kauban masadyaon nga nagmantala sa “maayong balita“ mahitungod niana nga Gingharian sa tanang kanasoran—lakip sa Liberia—niining “kataposan sa sistema sa mga butang,” diin kita karon nagkinabuhi. (Mateo 24:3, 14) Kanus-a ug sa unsang paagi kining awit unang nadunggan sa yuta sa pepper bird? Ug unsa ang epekto niining nagasusi-sa-kasingkasing nga honi diha sa mapabilhong mga tigpatalinghog? Mamati kita.
Ang “Bag-ong Awit” Nakaabot sa Liberia
Niadtong 1946 si Harry C. Behannan, usa ka hawod itom nga piyanista kinsa nagtugtog latas sa Uropa, miundang sa iyang musikal nga karera aron mag-alagad ingon nga misyonero. Sulod sa unom ka bulan siya nag-alagad nga nag-inusara ingon nga payunir nga Saksi ni Jehova, nga nagpamalaybalay sa pagpakaylap sa kamatuoran sa Gingharian. Siya nakapahalunag kapin sa 500 ka libro ug nakahimog daghang higala. Unya, sa kasubo, si Igsoon Behannan namatay tungod sa hilanat sa tropiko. Apan ang “bag-ong awit” wala mamatay, kay ang ubang mga misyonero misunod kaniya.
Niadtong 1947 si George Watkins (kanhi dili-propesyonal nga boksingiro) ug ang iyang asawa nga si Willa Mae mianha sa pag-alagad sa Monrovia, ang kapital sa Liberia. Sila mapailobon ug kugihan sa pagtudlo sa mapaubsanong mga taga-Liberia “sa pagtuman sa tanang mga butang gisugo [ni Jesus].” (Mateo 28:19, 20) Sa pagka Septiyembre 1948 ang usa ka grupo sa 15 nakig-ambit sa pag-alagad sa Gingharian uban kanila. Busa ang unang kongregasyon sa mga Saksi ni Jehova naporma sa Liberia.
Ang buluhaton sa pagwali tulin nga mikaylap ngadto sa kabaybayonan sa dunggoanan sa Harper, sa Kakata ug sa palibot nga mga balangay, ug taliwala sa nagsultig-Kisi nga mga tigpaduga sa kahoyng-goma diha sa plantasyon sa Firestone. Sa pagka 1952 ang usa ka sangang buhatan sa Watch Tower Society gitukod sa Liberia. Sa pagkasunod tuig, ang unang Kingdom Hall uban sa puy-anan sa misyonero gitukod sa McDonald Street sa Monrovia. Kadto makapahinam nga mga panahon. Karon, duna nay 1,724 ka magdadayeg ni Jehova niining yutaa, ug sila may maayong mga resulta taliwala sa mahigalaon, maabiabihon, ug mapaubsanong mga tawo.
Pagsanong sa “Bag-ong Awit” Karon
Ang mga Saksi ni Jehova gikan sa 16 ka dagkong tribo sa Liberia, uban sa mga misyonero ug sa mga indibiduwal kinsa mianha sa pag-alagad diin dako ang panginahanglan, karon nagbagay sa ilang mga tingog sa pagpalanog sa mensahe sa Gingharian. Ning bag-o pa, sila nakadugang sa usa ka nota sa pagkadinalian sa pag-awhag niadtong nangita sa kamatuoran. Sa kasarangan, ang matag Saksi nagagugol ug kapin sa 27 ka oras matag bulan sa buluhaton sa pagwali, ug ang gidaghanon niadtong anaa sa bug-os panahong ministeryo maoy kapin sa tulo ka pilo sulod sa miaging lima ka tuig. Ang maong mga paningkamot nakahatag mga panalangin kanila ug sa uban. Mamati kita sa pipila kanila.
Si Emmanuel nagpasibo sa iyang kalihokan aron siya makaatiman sa iyang dakong pamilya ug makaambit sa bug-os panahong payunir nga buluhaton sa Gardnersville. Nahinagbo niya sila si Varney ug Lucinda ug misugod sa usa ka pagtuon sa Bibliya uban kanila. Apan, sila nagtuo nga sala alang sa usa ka tawo ang pagbalhin sa iyang relihiyon. Gipakita ni Emmanuel kanila kon unsa ang giingon sa librong Nangatarongan Pinasukad sa Kasulatan mahitungod sa ulohan. Gihulaman nila ang libro, gibasa ang ubang materyales niini, ug misugod sa pagtambong sa Kristohanong mga miting. Wala madugay human niana, sila nakig-ambit sa Kristohanong ministeryo. Kasamtangan, ang ilang amo—usa ka klerigo—nakamatikod sa kausaban sa ilang kagawian ug gidapit sila sa paggamit sa iyang sala alang sa ilang pagtuon sa Bibliya. Human makatambong sa usa ka distritong kombensiyon, kombensido ang amo nga siya nakakaplag sa kamatuoran ug mihangyo sa usa ka pagtuon sa Bibliya sa iyang kaugalingon.
Ang pagsanong sa “bag-ong awit” nakapagawas kang Tamba, usa ka espiritista niadto gikan sa Purok sa Lofa. Nabalaka mahitungod sa balatian sa iyang anak, iyang gikonsulta ang mga espiritu. Sila nagpasalig kaniya nga ang iyang anak mabuhi apan miingon nga ang iyang asawa nagplano sa pagpatay sa iyang anak. Uban sa mga halad, si Tamba nangaliyopo sa mga espiritu sa pagpatay sa iyang asawa aron sa pagsumpo kaniya sa pagdaot sa iyang anak. Unsa ang resulta? Ang anak namatay apan ang asawa wala maunsa. Nasuko ug nabalo, gilabay ni Tamba ang tanan niyang mga gamit sa pang-espiritista. Sa iyang subo nga kahimtang, siya dulot nga natandog sa mensahe mahitungod sa paglaom sa pagkabanhaw ug sa nagsingabot nga paraisong yuta. Gidawat niya ang usa ka pagtuon sa Bibliya, naghinlo sa iyang kinabuhi, ug nagpahinungod sa iyang kaugalingon kang Jehova. Sukad niadto siya nakatabang sa iyang pamilya ug siyam ka tawo pa sa iyang balangay sa pagpahinugod.
Ang mga kinabuhi sa daghang mabuot-kasingkasing natandog sa “bag-ong awit.” Si Herbert nakadaog ug iskolarsip sa unibersidad sa Monrovia ug trabaho sa gobyerno tungod sa iyang talagsaong abilidad ingon nga magdudula sa soker. Sa dihang iyang nakat-onan ang giingon sa Bibliya mahitungod sa espiritu sa indigay, hinoon, siya natukmod sa pagbiya sa iyang karera sa mga dula. (Galacia 5:26) Karon siya malipayon sa iyang bag-ong karera ingong bug-os panahong ministro.
Si James nangutana sa Saksi nga nagtuon uban kaniya kon unsaon sa pagbuntog sa iyang pagkagiyan sa marijuana. Nadasig sa pag-ampo mahitungod niini, si James mihangyo kang Jehova sa pagtabang kaniya sa paghunong. Mga duha ka semana sa ulahi, wala siya makapugong ug nanabako na usab siya. Sa iyang pagpauli, nadugmo siya sa usa ka baras nga puthaw ug kusog kaayong miagas ang dugo sa palibot sa mata. Nakahinumdom sa iyang pag-ampo, wala na siya mobalik pa sa iyang batasan. Karon, siya nag-alagad ingon nga regular payunir ug ministeryal nga alagad sa kongregasyon.
Ang kamadanihon sa “bag-ong awit” nakaabot usab sa usa ka tigulang, si Samuel sa tribo sa Krahn, kinsa kanhi superintendente sa Purok sa Montserrado. Unsa ang nakatukmod kaniya sa pagbiya sa karera nga taas ug suweldo ug sa pagpadayon sa bug-os panahong ministeryo? “Ang nakadani kanako mao ang kamatuoran nga sa akong Bibliya akong makaplagan ang pamatuod sa tanang butang gisulti, gitudlo, ug gibuhat sa mga Saksi ni Jehova,” matud ni Samuel. Midugang siya nga taliwala sa mga Saksi ni Jehova nakaplagan niya ang gugma nga gihubit ni Jesus sa Juan 13:34, 35. Namatikdan ni Samuel nga ang mga sakop sa iyang iglesya niadto, sa kasukwahi, “kanunay naglantugi ug nag-awayay mahitungod sa salapi diha mismo sa simbahan.” Si Samuel karon nag-alagad nga regular payunir.
Nagkakusog ang “Bag-ong Awit”
Kon mahitungod sa pag-awit sa mga pagdayeg sa Diyos, wala nay mas malipayong panahon pa alang sa katawhan ni Jehova kay sa ilang matag tuig distritong mga kombensiyon. Sa bag-o pang mga tuig, hinunoa, dinhi sa Liberia ang hagit mao ang pagkaplag sa mga pasilidad nga may igong gidakoon aron masulod ang mga Saksi ug interesadong mga tawo nga manambong. Niadtong 1986 duha ka kombensiyon ang gihimo sa usa ra ka awditoryum, apan ang total nga nanambong nga kapin sa 4,000 dili-madala sa pasilidad. Unsa ang pagahimoon sa 1987? Buweno, ang Samuel K. Doe Sports Complex nahuman sa igong panahon uban sa panabang sa kagamhanang Intsik. Apan makabayad ba kami sa pag-abang niining pasilidara?
Tungod sa edukasyonal nga kinaiya sa atong programa, ang tagdumala misugot sa pagpagamit kanamo sa estadyom sa rasonable kaayo nga bayranan. Apan mga duha ka semana una pa sa panahon sa kombensiyon, buot sa tagdumala nga pauswagan ang bayranan. Ngano? Tungod kay ang usa ka ilado nga ebanghelista sa TV gikan sa Tinipong Bansa bag-o pang nakahuman sa usa ka krusada sa estadyom, ug gibiyaan kini sa panon sa mga tawo sa dili-maayong kahimtang, uban sa mga basura nga nakatag bisan asa. Gipasaligan ang tagdumala nga lahi ang mga Saksi ni Jehova. Usa ka adlaw una pa sa kombensiyon, kapin sa 500 ka igsoong lalaki ug babaye bug-os nga nanghinlo sa estadyom. Human sa kombensiyon, ang usa ka membro sa tagdumala nga Intsik nadunggan nga nag-ingon nga ang among paningkamot sa paghinlo sa estadyom mas dako pang kantidad sa among gibayad sa paggamit niini.
Ang kombensiyon mismo maoy usa ka kalamposan. Ang usa ka bag-ong gidaghanong 5,852 nanambong sa pakigpulong publiko “Niining Makahahadlok nga mga Panahon, Kinsa ang Imong Kasaligan?” Pagkasadya ang pagkakita sa 101 ka bag-ohan nga nagpasimbolo sa ilang pagpahinungod sa Diyos pinaagi sa bawtismo sa tubig! Ang mga bawtismo gihimo sa duha ka portable pool diha mismo sa dapit sa kombensiyon—unang higayon nga nahimo sa Liberia!
Uban sa nagtubong gidaghanon sa mga tawo nga nagasanong sa “bag-ong awit,” ang orihinal nga sangang buhatan sa McDonald Street sa Monrovia nakita nga gamay ra. Bisan ang ulahi nga tinukod sa Sinkor dili gihapon makaigo aron kapundohan sa tanang literatura sa Bibliya nga kinahanglan sa pag-atiman sa espirituhanong mga panginahanglan sa katawhan sa Liberia. Busa, ang usa ka dako nga balay gipalit ug giusab duol sa Kingdom Hall sa Paynesville, ug ang usa ka bag-ong sangang buhatan gipahinungod niadtong Marso 28, l987. Uban niining dakog-luna ug maayong pagkapahamutang nga tinukod, ang mga alagad ni Jehova sa Liberia maayong pagkasangkap sa pag-atiman sa nagtubong interes.
Unsa pa ka dako ang buluhatong nahabilin sa Liberia? Ang nanambong sa Memoryal sa 1988 nga 8,600—lima ka pilo sa gidaghanon sa mga magmamantala sa Gingharian—nagpaila nga anaay dako pa nga posibilidad alang sa dugang mga disipulo. Ug ang kugihang mga Saksi sa Liberia misanong sa hagit. Sila nagadumalag kapin sa 3,000 ka pagtuon sa Bibliya diha sa balay matag bulan. Kini mao ang among giampo nga mas daghan pa dinhi ang moduyog sa padayong pagtubo sa “dakong panon” kinsa nagadayeg kang Jehova agig pagsanong sa “bag-ong awit.”—Pinadayag 7:9, 10.
[Kahon sa panid 28]
Pagpamalaybalay sa Liberia
Sa nagkaduol kami sa usa ka balay nga hinimo sa kahoy-lapok, inay manuktok, gipahibalo namo ang among presensiya pinaagi sa pagtawag: “Kpaw, kpaw, kpaw!”
Sanglit walay tubag, miadto kami sa likod sa balay ug nakita ang usa ka pamilya nga nanglingkod sa “kusina”—usa ka gamayng payag sa nataran sa luyo. Ang usa ka kolon sa espiso pulang mantekilya sa palma nagbukal ibabaw sa kalayo nga gisugnorag kahoy. Ang inahan, kinsa nagsukad sa kan-on, nagsugo sa iyang mga anak sa balay sa pagkuhag lingkoranan alang namo.
Ang mga membro sa pamilya karon nagpahaluna na. Nanglingkod sa usa ka bangko, sila namatig maayo samtang among gitanyag ang mensahe sa Gingharian. Malipayon sila nga midawat sa usa ka kopya sa basahong Tagamtama ang Kinabuhi sa Yuta sa Walay Kataposan! ug mihimo kamig kahikayan sa pagbalik. Samtang kami nanindog, miingon sila: “Mangaon ta!”
[Mapa/Mga hulagway sa panid 26]
(Alang sa bug-os nga pagkahan-ay sa teksto, tan-awa ang publikasyon)
SIERRA LEONE
LIBERIA
LOFA COUNTY
MONTSERRADO COUNTY
Monrovia
Kakata
Buchanan
Greenville
Harper
GUINEA
IVORY COAST
ATLANTIC OCEAN
Km 0 100 200 300
mi 0 100 200
[Mapa]
AFRICA