Ang Ipasabot sa mga Balita
“Pagtan-aw Pag-usab”
Ang Genesis 1:1 nag-ingon: “Sa sinugdan gibuhat sa Diyos ang langit ug yuta.” Kapin sa usa siglo, ang mga siyentipiko nga dapig sa teoriya sa ebolusyon nagsaway niining tekstoha sa Bibliya. Apan, “daghan kanila karon nagatan-aw pag-usab niining labing sayo, labing gamhanang kaso sa paglungtad sa usa ka Maglalalang,” mitaho ang The Orange County Register, usa ka mantalaan sa California.
Pananglitan, naghisgot ang artikulo bahin sa gipahayag sa usa ka Australianong biologo si Michael Denton diha sa iyang librong Evolution: A Theory in Crisis. Siya miingon nga sukad sa panahon nga gipatik ni Darwin ang iyang librong On the Origin of Species hangtod karon, wala gayoy bisag usa ka ebidensiya nga molig-on sa teoriya ni Darwin.
Sa susama, gihisgotan sa Register ang librong The Mystery of Life’s Origins: Reassessing Current Theories, nga gisulat sa tulo ka siyentipiko. Sumala sa basahon, sila miingon nga dili mahitabo nga sulagmang misugod ang kinabuhi ug “nangatarongan nga usa ka ‘Maglalalang saylo sa kosmos’ mao ang labing makataronganong katin-awan sa sinugdan sa kinabuhi.” Mipaluyo niini nga hunahuna, naghisgot ang artikulo nga ang Britanikong astronomo si Fred Hoyle “kaylap nga gikutlo sa iyang pahayag nga ang pagtuo sa unang panawag nga mitungha sa sulagma sama ra sa pagtuog usa ka alimpulos nga milangkat sa junkyard nga punog mga piyesa sa ayroplano nga makapatunghag Boeing 747.”
Alang sa ubay-ubayng mga siyentipiko, ang ebidensiya sa pagsuportar sa Supremo nga Nagpahinabo dili-masayop. Apan komosta kadtong nagpabilin sa paglimod sa paglungtad sa usa ka Maglalalang? Maayong palandongon niining mga tawhana kining mga pulong nga gisulat ni manalagnang Isaias: “Ginabalit-ad ninyo ang mga butang! Pagapasidunggan ba ang magkokolon sama sa yutang kolonon? Aron nga ang butang nga binuhat moingon mahitungod niadtong nagbuhat: ‘Ako wala niya buhata’?”—Isaias 29:16.
Usa ka Makamatayng Gikabuangan
Niadtong Enero niining tuiga, ang mamumunong si Theodore Robert Bundy, gipalingkod sa silya-elektrika sa Florida State Prison ug gisilotag kamatayon. Siya nalangkit sa mapintas nga mga kamatayon sa mga 36 ka babaye, apan nagduhaduha ang mga awtoridad nga tingali mikabat kini sa 100.
Diha sa interbiyo sa wala pa siya hukmi sa kamatayon, miadmiter si Bundy nga ang pornograpiya mao ang pangunang butang nga nakaamot sa iyang kriminal nga kagawian. Sumala pa ni Dr. James Dobson, nga maoy mihimo sa interbiyo, “sa panuigong 12 o 13 misugod siya sa pagkakitag pornograpiya diha sa mga botika, bisan sa karsada, ug nahimong giyanon, nabuang niini,” mitaho ang Daily News.
Ang pagtug-an ni Bundy nagpalanog sa mga pulong ni Arthur Gary Bishop, laing gihukmang mamumuno, kinsa gipatay sa miaging tuig tungod sa mga pagpamatay maylabot sa sekso sa lima ka batang lalaki. Sumala sa The Tribune, mantalaan sa San Diego, California, si Bishop miingon nga ang pornograpiya “maoy ‘nakadaot’ kaniya sa bata pa ug maoy mitultol sa iyang pagkapukan.” Gikutlo ni Bishop ang usa ka sikolohista kinsa mihatag ug testimoniya sa panahon sa paghusay kaniya nga “sa dihang mahimong giyanon ang tawo [sa pornograpiya] modako ang ilang mga pangibog, ang ilang normal nga mga pagbati makubalan ug sila kiling sa paglihok sumala sa ilang makita.” Si Bishop mitug-an: “Busa mao kanay nahitabo kanako. Ako naghimog homoseksuwal nga mga buhat diha sa mga bata ug gihukman tungod sa pagpatay, ug ang pornograpiya mao ang dakong hinungdan sa akong pagkapukan.”
Bisan pa nga giadmiter sa mitug-ang mga mamumuno nga malaglagon ang pornograpiya, dunay daghan pang mga tawo nga naglantaw niini nga dili-makadaot nga kalingawan. Alang kanila ang pasidaan nga gihatag sa Isaias 5:20 aplikado: “Alaot kanila nga nagangalan sa daotan nga maayo, ug sa maayo nga daotan, nga nagabutang sa kangitngit ilis sa kahayag ug sa kahayag ilis sa kangitngit.”
Dili Misteryo
Ang ministro sa United Church si Phyllis Smith miingon nga ang pagtuo sa pipila ka klero ginahulga sa mga pangutana sa mga pasyente nga gitakda na ang kinabuhi, mitaho ang The Toronto Star, usa ka mantalaan sa Canada. Sumala pa kang Smith, “ang mga tawong himalatyon nangutana bahin sa mga misteryo sa kinabuhi ug kamatayon nga walay tawo ang nakasabot.” Siya miingon: “Dili angay natong bation nga kita gihulga tungod lamang kay atong gibati kita angay dunay mga tubag.” Kon ibangon ang malisod nga espirituwal nga mga pangutana, si Smith miingon nga ang mga klero “dili kinahanglan magapanalipod sa Diyos.”
Samtang tinuod nga ang mga indibiduwal tingali walay mga tubag sa tanang sa mga pangutana bahin sa kinabuhi ug kamatayon, ang Bibliya dunay tubag. Dili ba angay kadtong nagaangkong mga ministro sa Diyos mahibalo sa gipahayag sa iyang Pulong? Si apostol Pedro miingon nga ang isigkamagtutuo kanunayng “andam sa pagtubag kang bisan kinsa nga mangutana sa hinungdan sa paglaom nga anaa kanimo.” (1 Pedro 3:15) Ang unang mga Kristohanon walay suliran sa pagsabot sa kahimtang sa mga patay o kon unsay palaabuton sa himalatyong katawhan. Sila nahibalo nga ang Ecclesiastes 9:5 nag-ingon: “Ang buhi nahibalo nga sila mangamatay; apan ang mga minatay dili mahibalo sa bisan unsa.” Ug gisultihan ni Jesus ang iyang mga sumusunod: “Ang takna nagsingabot na nga kadtong tanan nga anaa sa handomanang mga lubnganan managpakabati sa iyang tingog ug managpanggula.” (Juan 5:28, 29) Alang sa tinuod nga mga ministro sa Diyos, ang kinabuhi ug kamatayon dili misteryo.