Gituman Nila ang Kabubut-on ni Jehova
Si Jesus Gidayeg Ingong Mesiyas ug Hari!
ANG banha nga panon sa katawhan nga misulod sa Jerusalem niadtong Nisan 9, 33 K.P., nakapakurat sa daghang taga-Judea. Bisag dili talagsaon nga makakitag mga tawo nga magaganayan ngadto sa siyudad sa dili pa ang Paskuwa, kini nga mga bisita maoy lahi. Ang pangunang tawo taliwala kanila mao ang usa ka tawo nga nagsakay sa usa ka nating asno. Ang tawo mao si Jesu-Kristo, ug ang mga tawo naglatag ug mga besti ug mga sanga sa palma atubangan kaniya samtang sila naninggit: “Luwasa, kami nagaampo, ang Anak ni David! Bulahan siya nga nagaanhi sa ngalan ni Jehova! Luwasa siya, kami nagaampo, sa mga kahitas-an!” Sa pagkakita sa panon sa katawhan, ang daghan nga didto na sa Jerusalem natukmod sa pagduyog sa prosesyon.—Mateo 21:7-9; Juan 12:12, 13.
Bisag siya niadtong tungora gidayeg, si Jesus nasayod nga ang mga pagsulay nagpaabot kaniya. Aw, sulod lamang sa lima ka adlaw, siya pagapatyon diha niining samang siyudad! Oo, nasayod si Jesus nga ang Jerusalem maoy masinupakong teritoryo, ug siya nagpadayag sa iyang tataw nga pagsulod sa siyudad uban niana mismo nga hunahuna.
Usa ka Karaang Tagna Natuman
Niadtong 518 W.K.P., gitagna ni Zacarias ang madaogong pagsulod ni Jesus sa Jerusalem. Siya misulat: “Pagsinggit sa kadaogan, Oh anak nga babaye sa Jerusalem. Tan-awa! Ang imong hari nagaanhi kanimo. Siya matarong, oo, may kaluwasan; mapainubsanon, ug nagasakay diha sa asno, bisan diha sa usa ka dako na nga hayop nga anak sa usa ka bayeng-asno. . . . Ug siya sa pagkatinuod magasulti ug pakigdait ngadto sa mga nasod; ug ang iyang pagmando maoy gikan sa dagat ngadto sa dagat ug gikan sa Suba ngadto sa mga kinatumyan sa yuta.”—Zacarias 9:9, 10.
Busa ang pagsulod ni Jesus sa Jerusalem niadtong Nisan 9 nagtuman sa tagna sa Bibliya. Kadto dili kay walay tumong nga okasyon kondili mainampingon nga giplano. Mas sayo pa, samtang diha lamang sa gawas sa Jerusalem, gisugo ni Jesus ang duha sa iyang mga tinun-an: “Lumakaw kamo ngadto sa balangay nga malantaw ra ninyo, ug dihadiha inyong makaplagan ang usa ka asno nga hiniktan, ug usa ka nating asno uban kaniya; badbari sila ug dad-a sila kanako. Ug kon may moingon ug bisan unsa kaninyo, kamo gayod moingon, ‘Ang Ginoo nagakinahanglan kanila.’ Niana siya magpadala gilayon kanila.” (Mateo 21:1-3) Apan nganong buot ni Jesus nga mosakay sa usa ka asno sa pagsulod sa Jerusalem, ug unsay kahulogan sa reaksiyon sa panon sa katawhan?
Usa ka Mensahe Mahitungod sa Pagkahari
Ang larawan nga makita sagad mas gamhanan kay sa gisulting pulong. Busa, usahay aktuwal nga ipabuhat ni Jehova sa iyang mga manalagna ang ilang mensahe aron palig-onon ang ilang matagnaong mensahe. (1 Hari 11:29-32; Jeremias 27:1-6; Ezequiel 4:1-17) Kining talagsaong mga paagi sa makitang komunikasyon nagbilin ug dili-mapala nga impresyon sa hunahuna bisan diha sa labing gahi-ug-kasingkasing nga tumatan-aw. Sa susamang paagi, aktuwal nga gibuhat ni Jesus ang usa ka gamhanang mensahe pinaagig pagsakay sa asno sa pagsulod sa siyudad sa Jerusalem. Sa unsang paagi?
Sa mga panahon sa Bibliya ang asno gigamit alang sa dungganong mga katuyoan. Pananglitan, si Solomon nagsakay sa “bayeng-mula” sa iyang amahan, usa ka mestisong liwat sa laking asno, sa pagdihog kaniya ingong hari.a (1 Hari 1:33-40) Busa alang kang Jesus ang pagsakay sa asno sa pagsulod sa Jerusalem nagpasabot nga siya nagpresentar sa iyang kaugalingon ingong hari. Ang mga aksiyon sa panon sa mga tawo nagpalig-on niini nga mensahe. Ang panon, sa walay duhaduha sa dakong bahin naglangkob sa mga taga-Galilea, naglatag sa ilang mga besti atubangan kang Jesus—usa ka aksiyon nga nagpahinumdom sa pagpahibalo sa publiko sa pagkahari ni Jehu. (2 Hari 9:13) Ang ilang paghisgot kang Jesus ingong “ang Anak ni David” nagpasiugda sa iyang legal nga katungod sa pagmando. (Lucas 1:31-33) Ug ang ilang paggamit sa mga sanga sa palma dayag nga nagpakita sa ilang pagpasakop sa iyang harianong awtoridad.—Itandi ang Pinadayag 7:9, 10.
Busa ang prosesyon nga nahitabo sa Jerusalem niadtong Nisan 9 tin-awng naglarawan sa mensahe nga si Jesus mao ang dinihogang Mesiyas ug Hari sa Diyos. Siyempre, dili tanan nalipay sa pagkakita nga si Jesus gipresentar niining paagiha. Ang mga Pariseo sa partikular naghunahuna nga dili gayod angay alang kang Jesus nga pakitaan nianang maong harianong pasidungog. “Magtutudlo,” sila pugsanong naghangyo, walay duhaduha nga may kasuko diha sa ilang mga tingog, “badlonga ang imong mga tinun-an.” Si Jesus mitubag: “Ako magasulti kaninyo, Kon kini sila pabiling maghilom, ang mga bato managpaninggit.” (Lucas 19:39, 40) Oo, ang Gingharian sa Diyos mao ang tema sa pagsangyaw ni Jesus. Siya maisogong nagmantala niini nga mensahe modawat man o dili niini ang mga tawo.
Leksiyon Alang Kanato
Nagkinahanglan ug dakong kaisog alang kang Jesus sa pagsulod sa Jerusalem diha sa paagi nga gitagna ni manalagnang Zacarias. Siya nasayod nga sa pagbuhat sa ingon iyang mapukaw ang kasuko sa iyang mga kaaway. Sa wala pa siya mokayab sa langit, si Jesus nagsugo sa iyang mga sumusunod sa pagsangyaw sa maayong balita sa Gingharian sa Diyos ug sa “paghimog mga tinun-an sa mga tawo sa tanang kanasoran.” (Mateo 24:14; 28:19, 20) Ang pagtuman niining buluhatona nagkinahanglan usab ug kaisog. Dili tanan ang malipay nga makadungog sa mensahe. Ang uban walay pagtagad niini, samtang ang uban supak niini. Ang pipila sa mga kagamhanan nagpahamtang ug mga pagdili sa buluhatong pagsangyaw o bug-os gayod nga nagdili niini.
Sa gihapon, ang mga Saksi ni Jehova nakaamgo nga ang maayong balita sa natukod nga Gingharian sa Diyos kinahanglang isangyaw, mamati man ang mga tawo o modumili sa pagbuhat niana. (Ezequiel 2:7) Samtang padayon nilang ginabuhat kining nagaluwas-kinabuhing buluhaton, sila gipasaligan sa saad ni Jesus: “Tan-awa! ako uban kaninyo sa tanang mga adlaw hangtod sa katiklopan sa sistema sa mga butang.”—Mateo 28:20.
[Footnote]
a Ang asoy ni Marcos nagdugang nga ang nating asno maoy hayop nga “wala pay usa sa katawhan nga nakalingkod.” (Marcos 11:2) Dayag, ang hayop nga wala pa gamita ilabinang haom alang sa sagradong mga katuyoan.—Itandi ang Numeros 19:2; Deuteronomio 21:3; 1 Samuel 6:7.