“Bumalik Kanako, ug Ako Mobalik Kaninyo”
ANG pamilya nagpahimulos sa makawiwiling pamasiyo sa kakahoyan. Unya, si Pedro, ang kinamanghoran, nagpalayo, migukod hangtod sa ubos sa bungtod sa usa ka squirrel. Sa kalit, ang langit midag-om, ug misugod sa pag-ulan. Sa sinugdan hinay lang ang taligsik, apan sa inanay mibunok. Ang pamilya dalidaling nanghipos sa ilang mga kagamitan ug nangdagan padulong sa ilang sakyanan. Ang tanan nahibulong kon diin si Pedro.
Sa kasamtangan, si Pedro naningkamot nga makabalik sa pamilya. Lisod nga makit-an ang unahan, ug ang dalan patungas sa bungtod danglog tungod sa ulan. Sa wala damha, morag nawala ang yuta nga gitumban sa iyang tiil samtang siya nahulog ngadto sa usa ka lalom, natagong lungag. Naningkamot siya pagkatkat pagawas, apan ang mga kiliran danglog kaayo.
Ang tubig-ulan gikan sa bungtod mibuhagay sa pagpuno sa lungag uban sa lapok. Si Pedro nameligro gayong malumos. Apan unya nakaplagan siya sa iyang amahan ug gibira siya pagawas pinaagig usa ka pisi. Sa ulahi, si Pedro gikasab-an pag-ayo tungod sa pagpalayo. Apan, kay nalukoban sa habol nga gikugos sa iyang inahan, ang kasaba sayon ra kaayong dawaton.
Kining kasinatiana nagailustrar kon unsay nahitabo sa pipila nga kanhi nakauban taliwala sa katawhan sa Diyos. Sila nahulog ngadto sa halalom nga lungag niining sistema sa mga butang ug sa kawalay-paglaom nagsingkamot sa pagkamang pagawas ug sa pagbalik ngadto sa luwas nga dapit sa organisasyon ni Jehova. Makalilipay gayod nga mahibalo nga si Jehova maoy maluloy-on ug andam sa ‘pagtunton ug pisi’ ug sa pagtabang kanila balik sa luwas nga kahimtang!
Maluloy-ong mga Pakiglabot ni Jehova
Balik sa mga adlaw sa Israel, pagkahuman sa pagtukod sa templo, si Solomon nag-ampo sa pagpahinungod diin siya nagpakiluoy kang Jehova sa pagpatalinghog sa mga hangyo alang sa templo. Unya siya miingon: “Kong sila [ang mga Israelinhon] makasala batok kanimo (kay walay tawo nga dili makasala), ug ikaw masuko kanila ug magtugyan kanila ngadto sa kaaway, . . . ug sila gayod mahibalik sa maayong panabot diha sa yuta diin sila gidala nga binihag, ug sila mobalik ug mohangyo alang sa pag-uyon diha sa yuta sa ilang mga magbibihag patalinghogan usab nimo gikan sa mga langit, sa imong dili matarog nga puloy-anan, ang ilang pag-ampo ug pakiluoy alang sa pag-uyon.”—1 Hari 8:46-49.
Ang hangyo ni Solomon natuman sa daghang mga higayon sa panahon sa kasaysayan sa Israel. Sa balikbalik, ang katawhan sa Diyos mingtipas ug mingbiya kaniya. Unya giila nila ang ilang kasal-anan ug namalik, nangita kaniya. Ug si Jehova nagpasaylo kanila. (Deuteronomio 4:31; Isaias 44:21, 22; 2 Corinto 1:3; Santiago 5:11) Pinaagi kang Malaquias, si Jehova nagsumada sa usa ka libo ka tuig nga pakiglabot uban sa Iyang katawhan sa dihang Siya nag-ingon: “Sukad sa adlaw sa inyong mga amahan kamo mingtipas gikan sa akong mga tulomanon, ug wala managtuman kanila. Bumalik kanako, ug ako mobalik kaninyo.”—Malaquias 3:7.
Mga Hinungdan sa Pagkapandol
Susama sa mga Israelinhon, ubay-ubay sa katawhan sa Diyos karong adlawa ang mingtipas ug nagpalain sa ilang kaugalingon gikan sa organisasyon ni Jehova. Ngano? Ang pila nangagpas sa usa ka butang nga morag inosente sa sinugdanan, sama kang Pedro nga migukod sa squirrel. Mao kini ang nahitabo kang Ada. Siya nagtaho: “Maoy naandan alang namong tanan nga magkauban sa trabaho ang maniudto ug dungan sa duol nga restawran sa tingpaniudto. Busa sa dihang gidapit nila ako nga mangape sa pagtiklop sa adlaw, sayon ra nakong gidawat. Ako nangatarongan nga ako wala mogamit ug panahon nga angay gamiton alang sa mga tigom o sa pagsangyaw. Wala nako maamgohi nga kini nahimong kapakyasan sa pagbantay sa prinsipyo sa 1 Corinto 15:33.
“Sa wala madugay, ako kauban na nila nga mangabayo matag Sabado. Unya motan-aw na akog sine kauban nila. Kana mingtultol ngadto sa akong dili pagtambong sa pila ka mga tigom. Sa kataposan, ako dili na motambong ug bisan unsang tigom ni makig-ambit sa pagwaling buluhaton. Sa dihang ako nakaamgo kon unsay nahitabo, ako wala na makig-uban sa organisasyon.”
Sa laing mga kaso ang katarongan mahimong usa ka seryoso tinagoang sala nga magpahinabo sa usa nga mobating dili-takos sa pag-alagad sa Diyos. (Salmo 32:3-5) O ang indibiduwal lagmit mapandol tungod sa usa ka butang gisulti o gihimo sa Kristohanong mga kauban, nga dili mosabot, sama sa gisulti ni Solomon, nga “walay tawo nga dili makasala.”—1 Hari 8:46; Santiago 3:2.
Lain pa ang uban mangaluya sa dihang sila disiplinahon. (Hebreohanon 12:7, 11) Ang pangdani sa materyalistikong estilo-sa-kinabuhi nakaagak sa daghan sa paghunong sa pag-alagad sa Diyos. Sa subsob, sa pagpangita sa kalibotanong kalamposan, ilang bug-os gitugyan ang ilang kaugalingon sa sekular nga trabaho nga wala nay luna sa ilang kinabuhi alang sa pag-alagad sa Diyos. (Mateo 13:4-9; 1 Timoteo 6:9, 10) Ang kahimtang ba sa maong mga indibiduwal walay paglaom?
Ikaw ba Mosanong sa Imbitasyon ni Jehova?
Sa usa ka higayon si Jesus may gisulti nga lisod sabton, ug ang pila napandol. Ang rekord nag-ingon: “Daghan sa iyang mga sumusunod ningbalik sa mga butang gibiyaan ug dili na molakaw uban kaniya.” Apan dili ang tanan napandol. Ang asoy sa Bibliya nagpadayon: “Si Jesus nag-ingon sa napulog-duha: ‘Kamo buot ba usab mobiya?’ Si Simon Pedro mitubag kaniya: ‘Ginoo, kang kinsa kami moadto? Ikaw ang may pulong mahitungod sa kinabuhing dayon.’” (Juan 6:66-68) Ang mga apostoles ni Jesus sa kamaalamon nakasabot nga mahimong kapildihan ang pagbiya kang Jesus.
Ang pila nga nahulog sa kataposan makadangat ra sa susamang panghinapos. Sila nakasabot nga ang pagbiya sa organisasyon sa Diyos maoy usa ka makapilding lakang nga pagahimoon ug nga uban lamang kang Jehova ug Kristo nga sila makakaplag sa mga pulong nga motultol sa kinabuhi. Sa dihang sila makaamgo, angay usab nilang ilhon nga dili pa gayod ulahi ang paghunahuna pag-usab, pagpangayog kapasayloan kang Jehova, ug pagbalik kaniya. Si Jehova mismo ang naghatag imbitasyon: “Bumalik kanako, ug ako mobalik kaninyo.”—Malaquias 3:7.
Tinuod, asa man ang sinserong Kristohanon makakaplag ug kalipay kon siya wala mag-alagad kang Jehova? Kon ang usa maanod palayo pagkatapos mahimong bahin sa organisasyon sa Diyos sa usa ka panahon, unsay naghulat kaniya sa kalibotan sa gawas? Sa madali iyang masabtan nga siya sa pagkakaron bahin na sa kalibotan nga dugang ug dugang nga nahimong mabangis. Iyang madiskobrehan ang iyang kaugalingon nga nalangkit diha sa sistema sa mga butang sa hilabihang kasalingkapaw, kabakakan, panglimbong ug imoralidad, usa ka kalibotan nga ingon ka peligroso ug kadili-maayo sa lapokong lungag nga naghulga sa kinabuhi sa batang si Pedro. Sa dihang siya naulian sa iyang panabot ug nakaamgo nga ang iyang kinabuhing dayon nameligro, siya dili angay maglangan sa pagpangitag tabang sa pagkuha sa iyang kaugalingon gikan sa kahimtang. Bisan pa ang pagbalik mahimong dili sayon.
Ikaw ba usa nga naningkamot sa pagbalik kang Jehova apan nalisdan? Nan hibaloi nga kinahanglan nimog tabang. Ug tuohi nga ang imong mga brader ug mga sister diha sa organisasyon sa Diyos andam sa paghatag kanimog tabang. Apan ikaw kinahanglang maningkamot sa pagpakita kang Jehova sa imong tinguha. Panahon na ‘sa pagbalik sa imong panabot’ ug ‘sa tinuod mobalik kang Jehova.’—1 Hari 8:47.
Natabangan sa Pagbalik
Si Ada misaysay kon unsay nakatabang kaniya sa pagbalik kang Jehova: “Sa tukma gayod nga yugto, ang sister nga nagdumala kanakog pagtuon midapit kanako sa pagtambong sa sirkitong asembliya kuyog kaniya. Siya maayohon kaayo! Ug wala gayod niya ako kasab-i! Siya mipakita ug tumang gugma. Usa ka tuig ang milabay sukad sa ulahing pagtambong nako sa tigom, apan ako nang gipamalandong ang mahitungod sa kahaw-ang sa kalibotan ug mahitungod sa kamatuoran nga, sa luyo sa pangdani niini, ang anaa lamang maoy kasub-anan, kapakyasan, ug imoralidad. Busa ako nakahukom sa pagtambong sa asembliya. Sa miabot na ako sa teatro diin kana pagahimoon, ako miadto sa kataposang lumbay sa mga lingkoranan ug nagtago sa akong kaugalingon diha sa ngitngit nga suok. Dili nako buot nga makit-an sa mga brader ug suknaog mga pangutana.
“Ugaling, ang programa naghatag ug tambag nga gikinahanglan nako pag-ayo. Sa dihang natapos kadto, ako determinado dili lamang sa pagbalik sa katawhan ni Jehova apan usab sa pagdeboto sa akong kaugalingon kaniya uban sa bug-os nakong kasingkasing. Ang mga brader nagdawat kanako nga mainiton ug ang ‘mausikon’ mibalik.” (Lucas 15:11-24) Ang tanan niini nahitabo sa miagi, ug si Ada sa pagkakaron nakahimo nag bug-os panahon nga pag-alagad sulod sa kapin 25 ka mga tuig.
Ang kaso sa laing indibiduwal nga nagpalayo may susamang makalipay nga gisangpotan. Ang pila ka mga ansiano naghatag tambag kang José nga labawng nagpasundayag sa ilang kaugalingong panghunahuna kay sa mga prinsipyo sa Bibliya. Si José, nga naluya ug naligutgot, ngadtongadto nahulog sa pagkawalay kalihokan. Sulod sa walo ka tuig siya nahimulag gikan sa katawhan sa Diyos, ug sa maong panahon naminyo sa dili magtutuo ug nahimong amahan sa mga bata nga iyang gitugotan ang usa kanila nga mabawtismohan sa Katolikong Simbahan.
Sa kataposan, siya natabangan sa dihang ang magtatan-aw sa sirkito naghimog pag-atiman nga pagbisita kaniya ug nagdasig sa mga ansiano sa paghimo sa sama. Siya napasig-uli ug malipayon sa pagtan-aw sa iyang asawa nga nainteres sa kamatuoran. Si José sa presente nag-alagad ingong usa ka ansiano diha sa kongregasyon. Ingon sa gipakita niining duha ka mga kasinatian, si Jehova wala magpugong sa mga panalangin gikan kanilang mosanong sa iyang mahigugmaong imbitasyon sa pagbalik.
Hinuon, aron makapahimulos sa maong mga panalangin ang usa kinahanglan una nga moapresyar sa tabang nga ginatanyag ug mosanong niana. Diha sa kadaghanan sa kongregasyon ang mga brader nakahinumdom kanilang nahimong dili aktibo ug nagbisita kanila matag karon ug unya, nagtinguha sa pagtabang kanila. Ang pagsanong sa maong tabang nagpakita ug apresasyon sa kaluoy ni Jehova.—Santiago 5:19, 20.
Sa pagkamatuod, kini mao ang panahon sa pagsanong sa imbitasyon ni Jehova: “Bumalik kanako.” (Malaquias 3:7; Isaias 1:18) Ayaw paglangan. Ang mga panghitabo sa kalibotan nagapadayon uban sa tagsaong katulin. Ang kinamaayohang dapit nga kahimutangan sa panahon sa magubotong mga panahon nga naghulat sa unahan maoy sa sulod sa organisasyon ni Jehova, nga luwas ilalom sa iyang panalipod. Sila lamang nga mingdangop kang Jehova ang may lig-ong paglaom nga pagatagoan sa dakong adlaw sa iyang kasuko.—Sofonias 2:2, 3.
[Hulagway sa panid 30]
Mosanong ka ba sa imbitasyon ni Jehova, “Bumalik kanako”?