Nahinumdom Ka Ba?

Gipalandong ba nimog maayo ang dili pa dugayng mga isyu sa Ang Bantayanang Torre? Makaplagan nimong makaiikag ang paghinumdom sa mosunod:

◻ Sa unsang paagi ang usa ‘moduol kang Jesus’ nga uyon sa iyang pagdapit sa Mateo 11:28?

Si Jesus miingon: “Kon si bisan kinsa buot mosunod kanako, padumilia siya pag-angkon sa iyang kaugalingon ug paalsaha sa iyang sakitanang estaka ug sa mapinadayonon mosunod kanako.” (Mateo 16:24) Busa, ang pagduol kang Jesus nagkahulogang magpasakop sa kabubut-on sa Diyos ug ni Kristo, dawaton ang pila ka luwan sa responsibilidad ug himoon kini nga mapinadayonon.​—8/15, panid 17.

◻ Nganong “diyutay” lamang ang nakakaplag sa ‘sigpit nga dalan nga motultol ngadto sa kinabuhi’ nga gihisgotan ni Jesus diha sa Mateo 7:13, 14?

Ang sigpit nga dalan gipig-otan sa mga balaod ug mga prinsipyo sa Diyos. Busa, madanihon lamang kini ngadto sa usang tim-os nga matinguhaon sa pagpahiuyon sa iyang kinabuhi ngadto sa mga sukdanan sa Diyos. Bisag daw mapig-oton, ang ‘sigpit nga dalan’ mohatag ug kagawasan sa usa ka tawo diha sa matag hinungdanong bahin. Ang mga utlanan niini gitino “sa hingpit nga balaod nga iya sa kagawasan.” (Santiago 1:25)​—9/1, panid 5.

◻ Sa unsang paagi ang pagkamailahon maugmad?

Ang pagkamailahon dili moabot nga awtomatiko o kinaiyanhon. Apan uban ang pailob, pag-ampo, malugotong paningkamot, maalamong panagkauban, pagtuon ug pagpalandong diha sa Bibliya, ug pagsalig sa balaang espiritu ni Jehova, ang pagkamailahon maugmad.​—9/1, panid 21.

◻ Sa unsang paagi ang pangabugho sa tawo mahimong puwersa alang sa maayo?

Kini magpalihok sa tawo sa pagpanalipod sa usa ka minahal gikan sa daotang mga impluwensiya. Dugang pa, ang mga tawo tukmang makapakitag pangabugho kang Jehova ug sa iyang pagsimba. (1 Hari 19:10)​—9/15, mga panid 8, 9.

◻ Unsay ipasabot sa mga pulong sa Genesis 50:23 labot sa mga apo-sa-tuhod ni Jose: “Nangatawo sila sa mga tuhod ni Jose”?

Kini yanong nagpasabot nga gidawat ni Jose ang mga bata ingong iyang mga kaliwat. Mahimong nagpasabot usab kini nga siya mabinationg nakigdula sa mga bata, ginakinnakin sila diha sa iyang mga tuhod. Maayong ipakita sa mga amahan karon diha sa ilang mga bata ang samang pagmahal.​—9/15, mga panid 20, 21.

◻ Unsa ang labing hinungdanon alang sa usa ka malamposong kaminyoon ug pamilyahanong kinabuhi?

Aron makab-ot ang maong tilinguhaong mga resulta, ang mga magtiayon kinahanglang mag-una kanunay sa kabubut-on sa Diyos. Sa pagbuhat niana, ang mga magtiayon maningkamot nga magpadayon sa pag-ipon ug magsulbad sa ilang mga suliran pinaagi sa pagpadapat sa tambag sa Pulong sa Diyos. Sa ingon malikayan nila ang tanang matang sa mga kasakit sa kasingkasing nga mosangpot sa dihang dili tagdon ang kabubut-on sa Diyos. (Salmo 19:7-11)​—10/1, panid 11.

◻ Unsa ka hinungdanon karong adlawa ang diyosnong pagbati sa pagkadinalian?

Ang diyosnong pagbati sa pagkadinalian maoy hinungdanong bahin sa tibuok-kalag nga pag-alagad kang Jehova. Kini magsalikway ug motabang sa pagpakgang sa mga paningkamot sa Yawa nga ipahinabong ang mga alagad sa Diyos ‘kapoyan ug mangaluya ang ilang mga kalag.’ (Hebreohanon 12:3) Kini manalipod kanila sa wala kinahanglanang pagkalangkit sa kalibotan ug sa materyalismo niini, nga magtumong sa ilang mga hunahuna diha sa mga butang sa itaas​—“ang tinuod nga kinabuhi.” (1 Timoteo 6:19)​—10/1, panid 28.

◻ Diha sa sambingay bahin sa mga karnero ug sa mga kanding, kanus-a si Jesus molingkod sa iyang trono ug ngano? (Mateo 25:31-33)

Ang sambingay wala magpakita kaniya nga naglingkod sa diwa nga nahimong Hari. Hinunoa, siya molingkod ingong Maghuhukom. Kana nga pagpanghukom dili usa ka butang nga magpadayon sa usa ka hataas nga yugto sa daghang tuig. Hinunoa, ang sambingay nagpunting sa umaabot sa dihang si Jesus sulod sa limitadong panahon magpahayag ug magpahamtang ug paghukom diha sa mga nasod.​—10/15, mga panid 22, 23.

◻ Unsa ang “kaliwatan” nga kanunay kaayong gihisgotan ni Jesus?

Gipadapat ni Jesus ang termino nga “kining kaliwatana” ngadto sa kontemporaryong mga panon sa katawhan uban sa ilang “butang mga giya” nga naglangkob sa Hudiyohanong nasod. (Mateo 11:16; 15:14; 24:34)​—11/1, panid 14.

◻ Sa kataposang katumanan sa tagna ni Jesus sa Mateo 24:34-39, ngadto sa unsa nagpunting ang ekspresyong “kining kaliwatana”?

Si Jesus sa dayag nagpunting ngadto sa mga tawo sa yuta kinsa nakakita sa ilhanan sa presensiya ni Kristo apan napakyas sa pagbag-o sa ilang mga dalan.​—11/1, mga panid 19, 31.

◻ Sa unsang paagi ang kahikayan sa dalangpanang mga siyudad ug ang mga restriksiyon niini nakahatag ug kaayohan sa mga tawo sa karaang Israel?

Kini nagpasilsil sa mga Israelinhon nga sila dili gayod magdinanghag o dili magtagad labot sa tawhanong kinabuhi. Gipasiugda usab niini ang panginahanglan sa pagpakitag kaluoy sa dihang ang pagbuhat niini gikinahanglan. (Santiago 2:13)​—11/15, panid 14.

◻ Unsa ang antitipikong siyudad nga dalangpanan?

Kini maoy tagana sa Diyos sa pagpanalipod kanato batok sa kamatayon tungod sa paglapas sa iyang kasugoan bahin sa pagkabalaan sa dugo. (Genesis 9:6)​—11/15, panid 17.

◻ Sa unsang paagi ang Kristohanong panag-igsoonay makatabang kanato nga “maulian sa kusog”? (Isaias 40:31)

Taliwala sa atong Kristohanong mga igsoong lalaki ug mga babaye, adunay pipila nga tingali nag-atubang sa susamang mga kapit-osan ug mga pagsulay ug kinsa tingali nakasinati sa mga pagbati nga sama gayod sa atong nasinati. (1 Pedro 5:9) Makapalipay ug makapalig-on sa pagtuo ang pagkahibalo nga ang atong nasinati maoy kasagaran ug nga ang atong mga pagbati dili talagsaon.​—12/1, mga panid 15, 16.