Mga Pangutana Gikan sa mga Magbabasa

Nahibalo na ba karon si Jesus sa petsa sa Armageddon?

Daw makataronganon kaayo ang pagtuo nga siya nahibalo.

Ang pipila tingali mahibulong kon nganong ang pangutana mitungha pa. Lagmit kana tungod sa komento ni Jesus nga makaplagan sa Mateo 2436: “Mahitungod niana nga adlaw ug takna walay nahibalo, ni ang mga anghel sa kalangitan ni ang Anak, gawas sa Amahan lamang.” Matikdi ang prase nga “ni ang Anak.”

Kining bersikuloha maoy bahin sa tubag ni Jesus sa pangutana sa mga apostol: “Kanus-a man kining mga butanga mahitabo, ug unsa man unya ang ilhanan sa imong pagkaanaa ug sa katiklopan sa sistema sa mga butang?” (Mateo 24:3) Sa iyang nabantog karon nga tagna mahitungod sa mga pamatuod nga naglangkob sa “ilhanan,” iyang gitagna ang mga gubat, mga kanihit sa pagkaon, mga linog, paglutos sa matuod nga mga Kristohanon, ug ubang mga butang sa yuta nga magpaila sa iyang presensiya. Pinaagi sa maong ilhanan ang iyang mga sumusunod makaila nga ang kataposan haduol na. Iyang giilustrar kining pagkaduol na sa panahon nga ang usa ka kahoyng igos magsugod sa pagpanahon, nga nagpaila nga haduol na ang ting-init. Siya midugang: “Sa sama usab kamo, sa dihang inyong makita kining tanang butanga, hibaloi nga haduol na siya diha sa mga pultahan.”​—Mateo 24:33.

Apan si Jesus wala magsulti sa tukma kon kanus-a moabot ang kataposan. Hinunoa, iyang gipamulong ang atong mabasa sa Mateo 24:36. Mao kana ang hubad sa Bag-ong Kalibotan nga Hubad sa Kristohanon Griegong mga Kasulatan, ug ang daghang modernong mga Bibliya mabasa nga susama. Apan, ang pipila ka daang mga hubad wala maundi sa “ni ang Anak.”

Pananglitan, ang Katolikong Douay Version mabasa: “Apan mahitungod sa maong adlaw ug takna walay nahibalo, ni ang mga manulonda sa langit, kondili ang Amahan lamang.” Ang King James Version mabasa nga susama. Nganong ang “ni [o, bisan] ang Anak” gitangtang, bisan tuod kana makaplagan sa Marcos 13:32? Tungod kay balik sa sinugdanan sa ika-17ng siglo sa dihang kanang duha ka hubad gisulat, ang mga manuskrito nga gigamit sa mga tighubad wala maundi sa prase. Sa kasamtangan, hinunoa, daghang mas daang Gregong mga manuskrito ang nakaplagan. Kini sila, nga mas duol sa panahon sa orihinal nga sinulat ni Mateo, naundan sa “ni ang Anak” sa Mateo 24:36.

Makaiikag, ang Katolikong Jerusalem Bible naglakip sa prase, uban sa potnot nga nag-ingon nga ang Latin Vulgate nagtangtang sa pahayag “lagmit tungod sa teolohikanhong mga hinungdan.” Aw, siyempre! Ang mga tighubad o mga tigkopya nga nagtuo sa Trinidad mahimong matental sa pagtangtang sa prase nga nagpakita nga si Jesus nakulangan sa kahibalo nga nabatonan sa iyang Amahan. Sa unsang paagi si Jesus dili makahibalo sa usa ka tinong hitabo kon siya ug ang iyang Amahan maoy mga bahin sa tulog-persona nga Diyos?

Sa susama, ang A Textual Commentary on the Greek New Testament, ni B. M. Metzger, nag-ingon: “Ang mga pulong ‘ni ang Anak’ dili makita sa kadaghanan sa [manuskristo nga] mga pagpanghimatuod sa Mateo, lakip ang ulahing Byzantine nga sinulat. Sa laing bahin, ang kinamaayohang mga hawas sa Alexandrian, sa Western, ug sa Cesareanhon nga mga matang sa sinulat naundan sa prase. Ang pagtangtang sa mga pulong tungod sa doktrinal nga suliran nga gipresentar niana lagmit mas posible kay sa paghunahuna nga kini gidugang sa” Marcos 13:32.​—Italiko amoa.

Kadtong “kinamaayohang mga hawas” sa mas unang mga manuskrito nagpaluyo sa hubad nga nagpresentar ug usa ka makataronganong pag-uswag mahitungod sa kahibalo bahin sa takna sa kataposan. Ang mga manulonda wala mahibalo sa takna sa kataposan; ni ang Anak; kondili ang Amahan lamang. Ug kini kaharmoniya sa mga pulong ni Jesus sa Mateo 20:23, diin iyang giangkon nga wala siyay awtoridad sa paghatag ug prominenteng mga dapit diha sa Gingharian, apan ang Amahan aduna.

Busa, ang kaugalingong mga pulong ni Jesus nagpakita nga sa dinhi pa sa yuta wala siya mahibalo sa petsa sa ‘kataposan sa kalibotan.’ Nahibaloan na ba niya kana karon?

Ang Pinadayag 6:2 nagbatbat kang Jesus ingong naglingkod sa puting kabayo ug miasdang “nga nagpangdaog ug sa pagbug-os sa iyang pagpangdaog.” Misunod ang mga mangangabayo nga naghawas sa mga gubat, mga gutom, ug mga hampak, sama nianang atong nasinati sukad magsugod ang Gubat sa Kalibotan I sa 1914. Ang mga Saksi ni Jehova nagtuo nga sa 1914, si Jesus gientrono ingong Hari sa langitnong Gingharian sa Diyos, ang usa nga manguna sa umaabot nga gubat batok sa pagkadaotan dinhi sa yuta. (Pinadayag 6:3-8; 19:11-16) Sanglit si Jesus karon gihatagag gahom ingong usa nga magapanaog sa ngalan sa Diyos, daw makataronganon nga ang iyang Amahan nagsulti kaniya kon kanus-a moabot ang kataposan, sa dihang siya ‘magbug-os sa iyang pagpangdaog.’

Kita dinhi sa yuta wala sultihi sa petsa, busa ang mga pulong ni Jesus sa gihapon mapadapat kanato: “Padayon sa pagtan-aw, padayon sa pagtukaw, kay wala kamo mahibalo kon kanus-a ang tinudlong panahon. . . . Ang akong ginaingon kaninyo akong ginaingon sa tanan, Padayong magbantay.”​—Marcos 13:33-37.