Pagpakigdait sa Diyos Pinaagi sa Dedikasyon ug Bawtismo

“Si Jehova mipadayon sa pag-ingon: ‘ . . . Ayaw kamo pagduol sa bisan kinsang tawo nga kaniya anaa ang timaan.’”​—EZEKIEL 9:4, 6.

PAGPAKIGDAIT sa Diyos? Apan ngano? Pipila lamang ka tawo ang nagalantaw sa ilang kaugalingon nga nakig-away sa Diyos. Apan, posible nga mahimo kitang aktuwal nga kaaway sa Diyos ug wala lamang makamatikod niana? Misaysay si apostol Pablo sa mga Kristohanon sa unang siglo: “Kitang tanan nanagkinabuhi kaniadto diha sa mga pangibog sa atong unod, nanagbuhat sa mga butang nga gitinguha sa unod ug sa mga hunahuna, ug busa kita sa kinaiya maoy mga anak sa kasuko sama sa uban.”​—Efeso 2:3.

1, 2. (a) Nganong ang mga tawo sa kinatibuk-an walay pakigdait sa Diyos? (b) Nganong hinungdanong makabaton ug pakigdait ang tanan?

² Susama usab karon, bisag maikagon ka sa pagpahimuot sa Diyos, ang sala nga napanunod gikan kang Adan nagaapektar sa imong panglantaw ug mopalihok kanimo sa pagpangagpas sa “mga butang nga gitinguha sa unod.” Apan bisag nagtuon ka sa Bibliya uban sa mga Saksi ni Jehova o walay-bawtismong batan-on kansang mga ginikanan mga Saksi, ang nagasentro sa kaugalingong tinamdan nga buhaton ko ang akong gusto tingali mao ang nangibabaw sa imong kinabuhi ug padayong nagapalayo kanimo gikan sa Diyos. Apan ang tawo nga magpadayon sa pagsubay niining dalana ‘nagatigom ug kasuko sa iyang kaugalingon.’ (Roma 2:5; Colosas 1:21; 3:5-8) Ipadayag sa Diyos ang iyang bug-os nga kasuko sa panahon sa tulin nga nagsingabot nga “adlaw sa kasuko ug dihang igapadayag na ang matarong nga paghukom sa Diyos.” (Roma 1:28–​2:6) Sa unsang paagi imong mabatonan ang pakigdait sa Diyos ug makalabang buhi niining “adlaw sa kasuko”?

Ang Patukoranan sa Pakigdait

³ Si Jehova ang nanguna sa pagtabang. “Siya nahigugma kanato ug nagpadala sa iyang Anak nga halad-pasig-uli alang sa atong mga sala.” (1 Juan 4:10) Ang gihalad nga kamatayon ni Jesus nga nakapasig-uli, sa ato pa, nakahupay o nakatagbaw sa hustisya ni Jehova. Kini nakahatag legal nga basehanan alang sa kapasayloan sa mga sala ug, sa ulahi, alang sa bug-os nga pagwala sa panagkaaway tali sa Diyos ug sa tawo. Oo, posible nga “mapasig-uli diha sa Diyos pinaagi sa kamatayon sa iyang Anak,” sumala sa gisulat ni apostol Pablo.​—Roma 5:8-10.

4. Unsang hinungdanong panan-awon ang gihatag kang Ezekiel, ug nganong importante kini alang kanato?

⁴ Apan aron makapahimulos sa kaugalingon gikan sa halad ni Kristo, kinahanglang mohimog kitag pipila ka mga lakang. Gipakita kini diha sa dramatikong panan-awon nga gihatag ngadto kang manalagnang Ezekiel, usa ka panan-awon nga natuman sa atong panahon dihang ang “adlaw sa kasuko” sa Diyos haduol na. Ang mga panon sa Diyos nga tigpahamtang sa silot gilarawan diha sa panan-awon pinaagi sa unom ka lalaking may dalang hinagiban. Sa dili pa ipakanaog kining kasuko sa Diyos, ang ikapitong lalaki, nga nagdalag sudlanan sa tinta, gisultihan: “‘Lumakaw ka latas sa taliwala sa siyudad, . . . ug ibutang ang usa ka timaan sa mga agtang sa mga tawo nga nagapanghupaw ug nagatiyabaw tungod sa dulumtanang mga butang nga ginabuhat sa taliwala niini.’ Ug ngadto sa [ikaunom ka lalaking may hinagiban] siya miingon sa akong pagdungog: ‘Lumakaw kamo sunod kaniya latas sa siyudad ug manigbas kamo. . . . Apan ayaw kamo pagduol sa bisan kinsang tawo nga kaniya anaa ang timaan.’”—Ezekiel 9:1-6.

5. Unsay motultol ngadto sa paghinulsol?

⁵ Kining may panalipod nga mga tawo nga ‘ginatiman-an’ nangaluya tungod kay ang mga tawong nangangkong nagasimba sa tinuod nga Diyos ‘nagpuno sa yuta sa kapintasan’ ug nakigbahin sa seksuwal nga imoralidad, idolatriya, ug sa tanang matang sa pagkadaotan. (Ezekiel 8:5-18; Jeremias 7:9) Sama karon, kadtong ‘pagatiman-an’ kinahanglang makakat-on una, pinaagi sa pagtuon sa Bibliya, sa pagpabili sa mga sukdanan sa Diyos ug maguol sa kasingkasing, oo, ‘magpanghupaw ug magatiyabaw,’ batok sa mga pagtulon-an ug mga buhat nga nagapasipala kaniya. Tingali tungod sa pagkawalay kahibalo ang uban nagbuhat ug daotan o nagakunsinte niining mga butanga pinaagi sa paghatag sa ilang pagpaluyo. Apan, sila karon misugod sa paglantaw sa maong mga kalihokan sumala sa paglantaw sa Diyos kanila​—nga may pagdumot! (Roma 1:24-32; Isaias 2:4; Pinadayag 18:4; Juan 15:19) Kining nagakauswag nga pagsabot motultol ngadto sa usa sa unang mga lakang aron mabatonan ang pakigdait sa Diyos: ang paghinulsol. Si apostol Pedro miawhag: “Busa, paghinulsol kamo, ug pamalik na kamo aron mapala ang inyong mga sala, aron ang panahon sa pagkahayahay magaabot [imbes kasuko] gikan sa persona ni Jehova.” (Buhat 3:19) Unsa ka makapapresko nga kapasayloan!

Pagkabaton sa “Timaan”

6. Alang sa unsang mga katarongan ang gitiman-an ang pipila ka tawo sa karaang panahon?

⁶ Aron dili maapil sa kasuko sa Diyos, sila nga ‘nagapanghuhaw ug nagatiyabaw’ kinahanglang may timan-an ang ilang agtang. (Ezekiel 9:4) Sa karaang mga panahon ang mga ulipon sagad timaan diha sa agtang aron mailhan dayon. Ang nagapaila nga mga timaan diha sa mga agtang ug sa ubang dapit nagpakita usab nga ang tawo nagasimba sa usa ka diyos.a (Itandi sa Isaias 44:5.) Busa, sa atong adlaw, unsa ang nagapaila, makahatag kinabuhing timaan nga tin-awng nagapadayag sa nagdala niini ingong tinuod nga mga magsisimba ug mga ulipon ni Jehova?

7. Unsa ang simbolikong timaan?

⁷ Ang simbolikong timaan maoy ebidensiya, nga daw ginapasundayag diha sa imong walay tabon nga agtang, (1) nga ikaw dedikado, bawtismadong disipulo ni Jesu-Kristo ug (2) nga imong gisul-ob ang samag Kristo bag-ong personalidad. (Efeso 4:20-24) Sanglit kadtong ‘ginatiman-an’ kinahanglang man unang magpahinungod, kinahanglang mahibalo kita kon unsay nalangkit niini. Si Jesus misaysay: “Kon adunay buot mosunod kanako, kinahanglang magadumili siya sa iyang kaugalingon ug magapas-an sa iyang kahoy sa pagsakit ug mosunod kanako kanunay.”​—Marcos 8:34.

8, 9. (a) Unsay kahulogan sa ‘pagsalikway sa imong kaugalingon’? (b) Sa unsang paagi ikailustrar ang dedikasyon?

⁸ Ang Gregong pulong nga gihubad “pagdumili” nagkahulogang “bug-os nga paglimod” kun “pagsalikway.” Busa, ang ‘pagsalikway sa imong kaugalingon’ nagkahulogan ug labaw pa kay sa pagdumili sa kaugalingon ug pipila ka kalipay o panagsang pagpatuyang. Hinunoa, kini nagkahulogan sa pagkamainandamon sa pag-ingon ug dili sa imong kaugalingon kon bahin na sa pagtugot sa imong kinabuhi nga makontrolar sa imong personal nga mga tinguha ug mga ambisyon. Matabangan kita sa pagkakita sa gilapdon sa mga pulong ni Jesus pinaagi sa pagpaniid kon giunsa paghubad kining ideyaha sa ubang pinulongan: “Sa paghunong sa pagbuhat sa gitinguha sa kasingkasing” (Tzeltal, Mexico), “dili na mopanag-iya sa kaugalingon” (K’anjobal, Guatemala), ug sa “pagtalikod sa iyang kaugalingon” (Javanese, Indonesia). Oo, kini nagkahulogan ug ekslusibong dedikasyon, dili lamang usa ka panaad nga mahimo diha sa daghang mga butang.

⁹ Ang usa ka Kristohanong ginganlag Susan, nga kaniadto may pagkaindependente, misaysay sa kahulogan alang kaniya sa dedikasyon: “Bug-os kong gitugyan ang akong kaugalingon ngadto sa usa ka persona. Si Jehova karon mao na ang nagatino sa akong dalan, maoy nagasulti kon unsay akong buhaton, ug nagahikay sa mga butang nga hinungdanon alang kanako.” Andam ka ba sa paghimo sa samang ekslusibong debosyon sa pagbuhat sa kabubut-on ni Jehova nga Diyos? Hinumdomi, ang simbolikong timaan mopaila kanimo ingong ‘iya’ sa Diyos, ingong malipayong ulipon sa iyang Agalon.​—Itandi sa Exodo 21:5, 6; Roma 14:8.

10. Unsang butanga ang kinahanglang tagdon sa usa sa dili pa magpahinungod?

¹⁰ “Kinsa kaninyo nga gustong motukod ug torre nga dili una molingkod sa pagkuwenta sa galastohan, sa pagsusi kon adunay ba siyay igong ikahuman niini?” nangutana si Jesus. (Lucas 14:28) Busa andam ka ba sa: Pagtambong sa Kristohanong mga tigom sa regular? (Hebreohanon 10:25) Sa paghupot ug hataas nga sukdanan sa moral nga gihatag sa Diyos alang sa iyang mga alagad? (1 Tesalonica 4:3, 4, 7) Sa bug-os nga pakigbahin sa buluhatong pagmantala sa gingharian kutob sa imong maarangan? Sa pag-una sa kabubut-on sa Diyos dihang magpilig karera o kon magplano ug mga tumong sa kinabuhi? (Mateo 6:33; Ecclesiastes 12:1) Sa pag-atiman sa imong mga kaakohan sa pamilya? (Efeso 5:22–​6:4; 1 Timoteo 5:8) Dihang makahimo ka nag personal nga dedikasyon diha sa pag-ampo, ang dugang lakang mao ang pagpahibalo sa sa uban sa opisyal nga paagi.

Bawtismo​—Alang Kang Kinsa?

11. Unsay gisimbolohan sa bawtismo, ug unsay makab-ot niini?

¹¹ Nagsugo si Jesus nga kinahanglang bawtismohan ang iyang mga sumusunod. (Mateo 28:19, 20) Sila bug-os nga ituslob sa ilalom sa tubig ug haw-ason gikan niana. Sama sa paglubong ug pagkabanhaw, kini naglarawan sa kamatayon sa nagasentro-sa-kaugalingon nga paagi sa pagkinabuhi sa usa ka tawo ug gibuhi sa pagbuhat sa kabubut-on sa Diyos. Pinaagi sa bawtismo imong gipaila ang imong kaugalingon ingong usa sa mga Saksi ni Jehova nga nakig-uban sa kongregasyon sa Diyos sa tibuok kalibotan.b Ang bawtismo maoy nagpabalido sa solemneng kasabotan nga gihimo uban sa Diyos. (Itandi sa Exodo 19:3-8.) Ang imong kinabuhi kinahanglang kaharmoniya sa iyang mga balaod. (Salmo 15; 1 Corinto 6:9-11) Ang bawtismo, nga maoy nagaordinar kanimo ingong ministro sa Diyos, nagapabanaag usab ug usa ka “pangamuyo nga gihimo diha atubangan sa Diyos alang sa hinlong konsensiya” tungod kay nahibalo ka nga ikaw may pakigdait sa Diyos.​—1 Pedro 3:21.

12. Kanus-a nga may panalipod ang mga anak pinaagi sa “timaan” sa ilang mga ginikanan?

¹² Angay bang magpalandong ang mga batan-on sa bawtismo? Buweno, hinumdomi nga gisultihan ni Jehova ang unom ka lalaking may hinagiban diha sa panan-awon: “Patya gayod sa pagtibawas ang mga tawong tigulang, ang lalaki nga batan-on ug ang ulay, ug ang mga bata ug mga babaye. Apan ayaw kamo pagduol sa bisan kinsang tawo nga kaniya anaa ang timaan.” (Ezekiel 9:6) Siyempre, ang gagmayng mga bata nga dili pa makahimo sa pagpahinungod panalipdan sa “timaan” sa mga ginikanan kon kanang maong ginikanan nagapaningkamot sa pag-agak sa mga anak sa paghigugma kang Jehova ug kon sila masinundanong nagasanong. (1 Corinto 7:14) Apan, kon may igo nang kaalam ang bata sa paghimog personal nga desisyon ug nakadangat na sa punto nga siya “nahibalo sa pagbuhat ug matarong,” dili makalaom nga siya padayong mailalom sa merito sa “timaan” sa iyang mga ginikanan.​—Santiago 4:17.

13. Unsa ang pipila ka butang nga kinahanglang tagdon sa pagtino sa pagkaandam alang sa bawtismo ang batan-on?

¹³ Sa dili pa magpahinungod, ang batan-on kinahanglang may igong kahibalo sa pagsabot kon unsay nalangkit ug mangitag personal nga relasyon sa Diyos. Siya kinahanglang nakasabot ug nagasunod sa mga prinsipyo sa Bibliya, uban sa kahibalo nga siya maoy manubag sa bisan unsang paglapas niini. Kinahanglang may igo siya nga eksperyensiya sa pagpaambit sa iyang pagtuo sa uban ug sa pagkahibalo nga mao kini ang hinungdanong butang sa tinuod nga pagsimba; nga siya tinuod gayod nga moalagad sa Diyos. Sa pagkatinuod, dili siya laoman nga magpakitag pagkahamtong sama sa usa ka edaran, apan ang iyang espirituwal nga kauswagan kinahanglang magpadayon.

14. Nganong gilantaw sa usa ka batan-on ang iyang bawtismo nga usa ka panalipod?

¹⁴ Kon ang usa ‘nakakuwenta na sa galastohan,’ dili maalang-alang ang iyang pagpahinungod ingong batan-on. Diha sa kadaghanang bag-ong mga Kristohanon, labi pang molalom ang apresasyon tapos sa bawtismo. “Ang pagpabawtismo nga bata pa nahimong panalipod alang kanako,” miingon si David. “Dihang nagkaedaran ako, akong namatikdan nga ang ubang walay bawtismong mga tin-edyer sa kongregasyon walay pagtahod sa awtoridad sa mga ansiano ug ingong resulta mitipas sa daotang paggawi. Apan akong gihinumdoman kanunay nga nakapahinungod na ako sa akong kinabuhi sa Diyos. Ang akong kinabuhi nakuha na, busa dili ako makasunod niining maong mga tin-edyer.”

15. (a) Sa unsang paagi atong nahibaloan nga posibleng mabatonan sa mga batan-on ang seryosong panglantaw bahin sa tinuod nga pagsimba? (b) Sa unsang paagi makatabang ug dako ang mga ginikanan?

¹⁵ Komusta, kon ang akong anak nga lalaki o babaye gibawtismohan sa bata pa ug dayon mabugnaw?’ nagpalandong ang pipila ka mga ginikanan. Siyempre dili angay nga magpabawtismo ang batan-on aron lamang pahimut-an ang ginikanan ug tungod kay mao kini ang ginahimo sa ubang mga higala. Apan, si Jose, Samuel, si Haring Oseas, ug si Jesus sa tin-edyer pa may maugdang nga paglantaw sa pagsimba sa Diyos ug mihawid niana. (Genesis 37:2; 39:1-3; 1 Samuel 1:24-28; 2:18-21; 2 Cronicas 34:3; Lucas 2:42-49) Sa modernong panahon, ang usa ka Kristohanong ginganlag Jean gibawtismohan dihang diyes anyos pa lamang siya. Sa gipangutana sa ulahi nga mga tuig kon nakasabot ba gayod siya sa iyang lakang, si Jean mitubag: “Nasayod ako nga gihigugma ko si Jehova, nakasabot sa gihimo ni Jesus alang kanato, ug nagtinguhang moalagad kang Jehova.” Siya matinumanong nakaalagad duolan na sa 40 ka tuig sukad sa iyang bawtismo. Ang matag batan-on maoy usa ka indibiduwal; walay usa ang makahatag sukdanan sa limitasyon sa edad. Ang mga ginikanan kinahanglang maningkamot sa pag-abot sa kasingkasing sa ilang anak, tabangan siya nga maugmad ang diyosnong debosyon.c Dili lamang nila ibutang diha sa atubangan sa ilang mga anak ang pribilehiyo sa dedikasyon ug bawtismo kondili hatagan sila ug kusog nga mahimong malig-ong mga magsisimba.

Pagbuntog sa mga Kababagan

16. Unsa pay dugang gikinahanglan kay sa kahibalo lamang?

¹⁶ Samtang importante ang kahibalo sa Bibliya, ang “timaan” naglangkit ug labaw pa kay sa kahibalo. Pananglitan, diha sa panan-awon nga gihatag kang Ezekiel, hayan ang gipatay nga mga ansiano tungod sa paghalad ug mga insenso sa mga diyosdiyos may dakong kahibalo sa sinulat nga Pulong ni Jehova. Apan ang ilang natagong paggawi nagpakita nga sila dili tinuod nga mga magsisimba. (Ezekiel 8:7-12; 9:6) Busa, aron makadawat ug ‘timaan’ alang sa kaluwasan kinahanglang isul-ob ang “bag-ong personalidad nga gihimo sumala sa kabubut-on sa Diyos diha sa tinuod nga pagkamatarong ug pagkamaunongon.”​—Efeso 4:22-24.

17. (a) Unsay kababagan ang nakaulang sa uban gikan sa bawtismo? (b) Sa unsang paagi ikapadapat ang tambag sa Santiago 4:8?

¹⁷ Ang dakong kababagan mao ang impluwensiya sa imong makasasalang unod. (Roma 8:7, 8) Ang uban wala magpabawtismo tungod kay dili sila makakontrolar sa pipila ka seryosong mga kahuyangon sa unod o tungod kay gusto silang magpatuyang sa malaw-ayng mga kalingawan sa kalibotan. (Santiago 4:1, 4) Sila nawad-an ug bililhong relasyon. Ang Pulong sa Diyos nagtambag: “Magpasuod kamo sa Diyos, ug siya mosuod kaninyo. Mga makasasala, hugasi ang inyong mga kamot, ug putlia ang inyong mga kasingkasing, kamo nga mga maduhaduhaon.” (Santiago 4:8) Gikinahanglan ang malig-ong desisyon. Ingong pananglitan, ang usa ka tawo nga nagsugod na sa pagtuon sa Bibliya nag-abuso niadto sa alkohol ug nakagamit ug mga droga sulod sa 16 ka tuig ug nagkasakit tungod niini. Uban ang determinasyon iyang gibuntog kining daotang mga batasan. “Apan dihang miuswag na ako padulong sa pagpahinungod, gidani ako sa usa ka babaye nga makigrelasyon kaniya. Dako kaayo kadto nga pagsulay,” siya miadmiter. “Bisag nagtuo ang babaye nga nabuang ako, ako siyang gisultihan: ‘Nagtuon ako sa Bibliya uban sa mga Saksi ni Jehova, ug dili ako makahimo niana.’” Unsay nakapukaw sa iyang tubag? “Akong nakita ang nahimo ni Jehova sa akong kinabuhi pinaagi sa pagtabang kanako nga mapalayo sa alkohol. Gitabangan usab niya ako sa ubang mga paagi. Kini ang mas nakapasuod kanako kaniya. Dili ako makapakyas kaniya.” Nagpasuod kining tawhana sa Diyos.

18. Unsa ang sekreto sa pagbuntog sa mga kababagan?

¹⁸ Ang bililhon dili ang imong nahibaloan kondili ang imong pagmahal sa imong nakat-onan. Ang Salmo 119:165 nag-ingon: “Dagaya ang pakigdait kanila nga nahigugma [dili lamang nakahibalo] sa imong kasugoan, ug kanila walay kahigayonan sa pagkapandol.” Ang sekreto mao ang paghigugma sa kasugoan sa Diyos, kinasingkasing nga pabilhan kini diha sa imong kinabuhi.​—Isaias 48:17, 18.

19, 20. (a) Unsang mga kababagan ang kinahanglang buntogon, ug unsang pasalig ang atong nabatonan? (b) Unsay moresulta sa malamposong pagbuntog sa tanang mga kababagan?

¹⁹ Siyempre, may motunghang ubang mga kababagan o kapangdolan. “Ang labing malisod alang kanako,” miingon ang igsoon nga gihisgotan sa ibabaw, “mao ang kahadlok sa mga tawo. May ‘mga higala’ ako sa kalibotan nga kauban nako niadto sa pag-inom-inom. Naglisod ako sa pagsulti kanila nga dili na ako gustong makighugoyhugoy pa kanila tungod kay magpahinungod na ako sa akong kinabuhi sa Diyos.” (Proverbio 29:25) Giatubang sa uban ang pagbiaybiay sa mga sakop sa pamilya. Ang usa ka bag-ong bawtismadong Saksi, kinsa nakabuntog sa pagsupak sa iyang bana, miingon: “Inay usa lamang ka dakong kababagan, dihay daghan pang gagmayng mga kababagan nga usa-usa nakong gibuntog.” Ang matinumanong pagbuntog sa tanang kababagang moabot mopalig-on sa imong kasingkasing. Makasalig ka nga walay kababagan nga dili mabuntog niadtong nahigugma sa kasugoan sa Diyos!​—Lucas 16:10.

²⁰ Dihang imong madaog ang matag usa ka kababagan, imong maangkon ang “dagayang pakigdait.” (Salmo 119:165) Oo, “ikaw magalakat sa imong dalan nga may kasegurohan . . . Ang imong pagkatulog matam-is. Dili ka mahadlok sa kalit nga katalagman, ingon sa dangatan sa mga daotan, nga moabot kanila sama sa bagyo. Kay si Jehova ang imong kasaligan.”​—Proverbio 3:23-26.

[Mga footnote]

Mga Punto Alang sa Repaso

◻ Sa unsang paagi tabangan kita sa Diyos nga makabaton ug pakigdait kaniya?

◻ Unsa ang simbolikong timaan nga makaluwas ug kinabuhi?

◻ Unsay kahulogan sa pahinungod ug bawtismo?

◻ Unsang matanga sa mga kababagan ang kinahanglang atubangon, ug sa unsang paagi mabuntog kini?

3. Sa unsang paagi gitagana sa Diyos ang basehanan sa kapasig-ulian?

[Kahon sa panid 13]

Pagtuslob o Pagwisikwisik?

Ang asoy sa bawtismo ni Jesus naghisgot sa iyang “pagkawas gikan sa tubig.” (Marcos 1:10) Nga gituslob sa tubig si Jesus nahiuyon sa kahulogan sa Gregong pulong nga gihubad nga bawtismo (baʹpti·sma). Gikan kini sa pulong ba·ptiʹzo, nga nagkahulogang “pagtunlob, pagtuslob.” Gigamit kini sa pagbatbat sa paglubog sa barko. Ang ikaduhang-siglong magsusulat nga si Lucian migamit ug nalangkit nga pulong sa pagbatbat sa paglumos ug tawo: “Paglusbog kaniya sa lalom kaayong tubig [ba·ptiʹzon·ta] nga dili na siya makatunga pag-usab.” Ang The New International Dictionary of New Testament Theology miingon: “Bisan unsa pay gisulti sa uban bahin niini, daw nagpakita nga ang baptizō, sa Hudiyo ug Kristohanong kontekso, sa kasagaran nagkahulogang ‘pagtuslob,’ ug dihang nahimo kining teknikal nga termino sa bawtismo, ang ideya sa pagtuslob nagpabilin.”