Kaalam sa Diyos—Makita ba Nimo?

HANDURAWA ang palasyo sa usa ka karaang hari. Didto, naglingkod ang hari sa trono sa katahom samtang nangulo siya, nga nagsapot sa harianong mga besti. Ilado siya dili lamang sa iyang bahandi kondili sa iyang kaalam. Ang iyang mga sulogoon organisado kaayo. Ang talan-awon sa himaya hilabihan gayod katahom. Tan-awa: si Haring Solomon!​—1 Hari 10:1-9, 18-20.

Pamati, karon, sa tawong giila nga mao ang Labing Dakong Magtutudlo, si Jesu-Kristo: “Mahitungod sa besti, nganong mabalaka man kamo? Palandonga ninyo ang mga lirio sa kaumahan, giunsa nila sa pagtubo; wala sila magbudlay, ni magkalinyas; apan suginlan ko kamo nga bisan pa si Solomon sa tibuok niyang katahoman wala gani makabesti maingon sa usa kanila.”​—Mateo 6:28, 29.

Unsay gipasabot ni Jesus niadto? Buweno, siya naghatag ug tambag bahin sa dili pagkahimong materyalistiko. Apan tinuod bang literal kining mga butanga maylabot kang Solomon? Hinumdomi, si Jesus migamit ug tinuod nga kinabuhing mga ilustrasyon. Busa ang mga tigdesinyo ug mga artesano ni Solomon, bisag batid, dili makatumbas sa mga desinyo, sa pagpaangay sa mga kolor, sa pagkahan-ay sa “mga lirio sa kaumahan” nga makita diha sa ilang natural nga mga palibot.

Gipakita ang Kaalam ni Jehova

Bisan ang daklit nga pagtan-aw sa mga bulak mopauyon kanimo sa mga pulong ni Jesus. Wala kita mahibalo kon unsang klaseha sa lirio ang anaa sa hunahuna ni Jesus, sanglit nagkadaiya ang mga bulak diha sa kadaghanang mga bahin sa yuta. Tan-awa pag-ayo ang bulak, bisan unsang matanga sa bulak: lirio ba, rosas, orkid. Unsa ka tahom sa bulok sa kolor ug kakomplikadong mga desinyo ang imong makita, ang pagkaangay sa mga gihay, sa mga dahon, ug sa ubang mga bahin sa lawas sa bulak. Makita ba nimo ang hilom apan malig-ong pamatuod nga ang Dakong Tigdesinyo sa dili-matugkad nga kaalam ug handurawan mao ang anaa sa likod niining matahom nga mga pananglitan sa iyang mga buhat? Dili lamang malipay ang atong mga mata sa ilang katahom kondili mahanggap sa atong mga ilong ang pagpangalimyon sa ilang kahumot diha sa hangin nga atong giginhawa.

Nakita ni apostol Pablo nga ang kang Jehova nga “dili-makitang mga kinaiya dayag nga makita sukad pa sa pagkatukod sa kalibotan, tungod kay sila nakita pinaagi sa mga butang nga nabuhat.” (Roma 1:20) Apan, ang Diyos naglalang ug labaw pa kay sa mga bulak aron mabestihan ang yuta; siya naghimog dili-maisip nga mga tanom ug mga kahoy, diin ang tanan napormang praktikal, apan malunhaw sa katahom nga gingharian. Kon makaadto ka sa Humboldt National Forest sa California, U.S.A., imong makita ang higanteng kahoyng redwood nga gituohang mao ang labing taas nga kahoy sa kalibotan. Kon mobarog ka sa tiilan niini ug mohangad sa iyang gihabugon nga kapin sa 360 ka tiil (110 m), dili ba sa hilom dayegon nimo ang Usa nga nahibalo kon unsaon sa paghimo niining kahoya?

Ang Kinaiyanhong Kaalam sa mga Mananap

Diha sa mamala ug sa tubig may mga mananap, dagko ug gagmay, nga nakadayeg kanato sa kaalam sa Diyos. Tataw nga ang matag usa nagaalagad sa usa ka katuyoan sa Maglalalang. Mitambag ang maalamong Haring Solomon: “Umadto ka sa hulmigas, ikaw nga tapolan; palandonga ang iyang mga dalan ug pagmaalamon.” (Proverbio 6:6) Kadtong nakatan-aw ug hulmigas natingala sa katakos niini sa pag-organisar. Dili tig-inusara ang mga hulmigas; nagpuyo sila sa mga komunidad. Ang uban mga magbabaol ug nagaanig mga liso. Diha sa tropikal nga mga dapit imong makita ang ubang mga hulmigas nga okupado kaayong namutol ug mga piraso sa mga dahon nga pagadalhon ngadto sa iyang mga salag. Sa unsang paagi nahibalo sila sa pagbuhat niini? Si Agur, nga usa sa mga magsusulat sa libro sa Proverbio, mitubag nga ang mga hulmigas sa “kinaiyanhon maalamon.” Kinsay naghimo kanila nianang paagiha? Si Jehova, ang Magbubuhat sa langit ug yuta.​—Proverbio 30:24, 25.

Oo, ang kalalangan sa mananap adunay kinaiyanhong kaalam. Dayag kini diha sa pagpanaw sa mga langgam. Tingali nakadungog ka mahitungod sa pagpanaw sa mga gitgit sa Capistrano. Sa usa ka panahon sa tuig, sila mopanaw ug libolibong milya gikan sa ilang puloy-anan sa pagpalabay sa tingtugnaw sa South America ngadto sa misyon sa San Juan Capistrano, California, U.S.A. Sa kinaiyanhon ug sa pagkawalay sipyat moabot sila sa samang dapit sa samang panahon sa Marso.

Maylabot sa halapad kaayong dagat, ang salmista miingon: “Pagkadaghan sa imong mga buhat, Oh Jehova! Sa kaalam gibuhat mo silang tanan. Ang yuta napuno sa imong mga bahandi. Mahitungod sa dagat nga dako ug halapad, atua ang dili-maisip nga mga butang nga nanaglihok.” (Salmo 104:24, 25) Gikan sa gagmitoy kaayong mga isda ngadto sa higanteng mga balyena, ang kaalam sa diyos makita diha sa ilang porma ug obra.

Ang purongpurong sa kalalangan sa Diyos dinhi sa yuta mao ang tawo mismo. Aniay linalang nga dili molihok sama sa gibutang nang daan, o kinaiyanhon, nga kaalam. Siya may katakos nga mahisama sa Diyos sa daghang mga paagi. Pagkatinuod niini diha kaniya nga sa “kahibulongang paagi” siya gigama! Bisag dili kita mga siyentista sa medisina, makabasa kita sa ilang mga nasusihan ug makahimog samang konklusyon sa dinasig nga magsusulat. Ang mga buhat sa Maglalalang nga makita diha sa lawas sa tawo kahibulongan gayod.​—Salmo 139:14.

Ang Langitnong Kaalam ni Jehova

Ang Salmo 19:1 nag-ingon nga ang mga langit nagapahayag sa himaya sa Diyos. Pagkatinuod niini! Ang salmistang si David walay teleskopyo o elektronikong mga gamit, apan siya may diyosnong pagpabili sa butang nga iyang nakita. Karon, ang kasarangang tawo daghag nahibaloan kay kang David mahitungod sa atong sistema sa adlaw ug sa atong dakong galaksiya, ang Milky Way. Siya nahibalo usab nga adunay dili-maisip pang dagkong mga galaksiya diha sa walay kinutubang wanang. Unsay imong bation samtang magpalandong ka sa kaalam sa dako ug dili-hilabwang Tigdesinyo? Makapamulong ka ba uban sa matinahurong tingog: ‘Jehova, imong “gibuhat ang dagkong mga butang nga dili-matukib, ug mga butang katingalahan nga dili-maisip”’? Angay gayod.​—Job 9:10.

Sa wala mabutyag nga mga panahong nanglabay, mipadayon si Jehova sa iyang mga buhat sa paglalang, una ang iyang bugtong Anak, dayon ang nanghibilin sa iyang espiritu nga kalalangan. Gisundan kini sa materyal nga uniberso. Ang tanan malinaw ug mahapsay. Gani, ang manulondang mga anak sa Diyos misinggit sa ilang apresasyon ug kalipay sa pagtukod sa kalibotan! (Job 38:4-7) Ang lalaki ug babaye gilalang ug gibutang diha sa hingpit nga tanaman, apan dihay makalilisang nga butang ang nahitabo. Usa ka tingog gikan sa dili-makita, misulti pinaagi sa usa ka bitin, nanampalas sa Dakong Maglalalang. Kini miakusar nga giabusohan ni Jehova ang iyang pagkahari; iyang gitawag ang Diyos nga bakakon. Busa, ang tag-iya sa tingog nakabaton ug mangil-ad nga mga ngalan nga nagpaila kaniya sama sa, Yawa, Serpenti, ug Satanas. Unsay buhaton karon sa Usa nga Labing-Maalamon? Unsay iyang mahimo? Usa ka bag-ong bahin sa kaalam ang gikinahanglan sa pagtabon sa mga desinyo nga milabaw sa himaya ni Solomon.​—Genesis 3:1-5.

[Blurb sa panid 4]

Gikan sa gagmitoy kaayong mga isda ngadto sa higanteng mga balyena, ang kaalam sa Diyos makita diha sa ilang porma ug obra