Sa Unsang Paagi Imong Mapugngan ang Imong mga Pagbati?
DAGHAN karon nagapangandoy nga mapukaw ang pagbati. Mangita sila ug paukyab pinaagi sa kusog nga pagmaneho, peligrosong mga dula, ginadili nga sekso, ug makapukawng mga droga. Sa pagkatinuod, gipasiugda sa kalibotan sa negosyo ug kalingawan ang panginahanglan sa emosyonal nga mga eksperyensiya. Busa, daghan ang dili makaantos sa kalinaw ug kahilom, mobating takos sila sa pagbaton ug dugang emosyonal nga kadasig gikan sa kinabuhi.
Siyempre, kitang tanan adunay mga pagbati. Pananglitan, kon kita mopahiyom, mokatawa, o mohilak, atong gipakita ang atong pagbati nianang higayona. Apan nasayod ba kamo nga makaapekto sa inyong lawas ang pagbati, sama sa pagbag-o sa presyon sa dugo, pitik sa kasingkasing, ug pagsingot? Mohatag usab sila ug pisikal nga kalisod, sama sa mga sakit sa ulo, daot nga tiyan, ug mga sakit sa bukobuko. Busa, ang mga tawo sa kinatibuk-an mangitag makaayong pagbati ug molikay sa dili-maayo. Ang uban mosulay sa paglikay sa dili maayong mga pagbati pinaagi sa pagpangdamgo, sobrang kaon, ug sobrang inom. Sa laing bahin, ang tukmang emosyonal nga kahimtang mohatag maayong panglawas. Ang Proverbio 14:30 nag-ingon: “Ang malinawong kasingkasing maoy kinabuhi sa unod.”
Makapaikag, ang Pulong sa Diyos naghisgot ug tanang matang sa tawhanong mga pagbati, sama sa gugma, pagdumot, kalipay, kaguol, kaisog, ug kahadlok. Tingali makahinumdom ka nga kas-a “mihilak si Jesus,” nga nagpakita sa iyang pagbati sa kamatayon sa usa ka higala. (Juan 11:35) Naningkamot si Jose sa pagpugong sa iyang mga luha “tungod kay napukaw ang iyang mga pagbati sa iyang mga igsoon,” nga wala niya makita sa daghang katuigan.—Genesis 43:30.
Nganong Pugngan ang Imong mga Pagbati?
Sanglit nagkinabuhi kita sa “panahon sa kalisod” ug kay dili man kita hingpit, daghang dili maayong mga pagbati ang mosulod sa atong mga kinabuhi kay sa maayo. (2 Timoteo 3:1-5, Revised Standard) Sumala sa gipahayag sa Bibliya, “ang gamayng pagpanglupig makapabuang sa manggialamong tawo.” (Ecclesiastes 7:7) Busa kon dili kita mosulay sa pagpugong sa atong dili-tilinguhaong mga pagbati, madaot ang atong relasyon sa atong pamilya, kauban sa klase, kaubang mga trabahante, ug kaubang mga Kristohanon.
Sa pagkatinuod, kitang tanan maapektohan sa emosyon nianang gitermino sa Bibliya nga “panahon ug dili mahibaloang mga hitabo.” (Ecclesiastes 9:11) Pananglitan, usa ka magtiayon, nga anaa sa bug-os panahong ministeryo, mipauli sa ilang apartment ug nakadiskobreng gikawatan sila halos sa tanan nilang kabtangan. Naguol sila niini, hangtod sa punto nga nagkasakit sila. Milabay una ang daghang adlaw sa naulian sila sa pagkontrolar sa ilang mga pagbati. Sa naayo sila, nagpadayon sila sa ilang buluhaton sa ‘paglipay sa mga nagbalata.’—Isaias 61:2.
O tingali may nailhan kang nagpadala sa ilang kaugalingon nga mapukaw ang pagbati pinaagi sa pagtan-aw sa mga drama diha sa telebisyon o teyatro. Ilang ibutang ang ilang kaugalingon diha sa bahin sa mga magdudula mohilak niining tinumotumong mga sugilanon. Tagda, usab, ang kaso sa usa ka dalaga nga nag-inusara sa pagpuyo. Sa usa ka gabii mitan-aw siyag makahahadlok nga salida. Bisan ug nahadlok kaayo, dili siya makahunong sa pagtan-aw. Human niana naglisod siya sa pagkatulog. Sa nakatulog na siya sa kataposan, imong mahanduraw ang iyang gidamgo: mga bampira ug mga mangtas. Ang punto mao: Kita maapektohan sa pagbati sa mga butang nga mahitabo sa atong palibot. Nan, kinahanglang magmapilion kita, likayan kanang makadaot o walay hinungdang kagubot sa atong pagkatimbang sa emosyon.
Pagpasiugda sa Tilinguhaong mga Pagbati
Sa laing bahin, ang Pulong sa Diyos nagrekomendar nga kita “kinahanglang kasarangan sa pamatasan,” sa paggamit sa ‘atong gahom sa pagsabot.’ (Tito 2:2; Roma 12:1) Wala kini magkahulogan nga kinahanglang pugngan ang atong kaugalingon hangtod sa punto nga dili na lang hinoon magtagad sa kinabuhi. Ang tukmang pagkakontrolar nga pagbati makadugang ug lamas sa kinabuhi. Ang Bibliya nag-ingon, pananglitan: “Wala nay laing maayo kay niadtong tawo nga magakalipay sa iyang mga buhat.”—Ecclesiastes 3:22.
Busa, aron mahimong malipayon ang kinabuhi, kita makatuon sa pag-ugmad sa positibong mga emosyon. Kini, inay sa negatibong paghunahuna, ang makatabang kanato nga mahimong “maikagon sa maayo.” (Tito 2:14, New International Version) Ang mabaskog, mahimsog nga mga pagbati makalig-on sa determinasyon ug pag-antos aron makab-ot ang butang bililhon. Siyempre, nasayod ang mga Kristohanon nga dili nila mahimo ang mga butang diha sa pag-alagad sa Diyos tungod lang sa positibong paghunahuna. Hinunoa, sila nahibalo sa panginahanglan sa bug-os nga pagsalig sa espiritu ni Jehova aron makaatubang sa umaabot. (Lucas 11:13; Proverbio 19:21) Nan, sa unsang paagi, atong mapugngan ang atong mga pagbati, sa pagpalambo sa mga pagbating maayo?
“Hunong na sa Pagkabalaka”
Tungod sa ilang makadaot nga mga epekto, ang mga pagbati sama sa kasuko, pangabubho, pagdumot, ug kahadlok kinahanglang kontrolahon. Sa pag-ilustrar kon unsaon nato sa pagbuhat niini, tagda ang usa ka pagbati: kabalaka.
Ang aktibong gahom sa Diyos nakalig-on sa iyang mainandamon ug matinumanong mga alagad sa nangagi, sama sa karon. Gitultolan sa balaang espiritu, si Jesus adunay positibong panglantaw pinaagi sa pagpakitag dakong kaikag sa espirituwal nga mga butang. Iyang gidasig ang iyang mga sumusunod sa “paghunong na sa pagkabalaka.” (Lucas 12:29) Wala siyay pagduhaduha sa mahigugmaong pagtagad sa iyang Amahan. (Juan 15:9, 10) Ang iyang kasibot ug kadasig wala mababagi sa kalaay ug sa kaguol. Maingon man usab, kon buot nimong kontrolahon ang sobrang kabalaka, pun-a ang imong hunahuna sa ‘dalayegong mga butang.’ (Filipos 4:8) Oo, ang pagsalig kang Jehova makawala sa negatibong mga hunahuna.
Pananglitan, ang baldadong batan-ong babaye sa São Paulo, Brazil, nga nabalaka bahin sa iyang kakulang ug katakos ug sa umaabot. Siya ang nag-atiman sa gagmayng mga bata sa balay samtang nagtrabaho ang iyang mga ginikanan. Mibati nga walay mahimo, siya misulat: “Nahadlok ako nga mawala ang akong maayong panghunahuna, nga makabuhat ug butang nga dili maayo. Naghunahuna pa gani akong maghikog. Gibati ko nga dili na gayod ako maminyo pa.” Human nakadawat ug sulat nga nagdasig kaniya sa pagpauswag sa iyang pagtuon sa Bibliya, siya misulat: “Misugod ako sa pagbati nga sa kataposan adunay naikag sa pagtimbangtimbang sa akong mga problema. Imong gipakita kanako kon unsa ka hinungdanon ang pagkinabuhi diha sa bag-ong sistema ni Jehova.” Busa, imbes mabalaka, nganong dili maghikay ug tinong mga tumong, ilabina sa espirituwal nga mga tumong, sama sa pagkugi pa ug dugang sa pagpakaylap sa maayong balita sa Gingharian o sa paggugol ug dugang panahon sa pagtuon sa Pulong sa Diyos?
Tinuod, moresulta ug temporaryong kahumpayan ang pagrelaks, ang pagpasiyo, pagbag-o sa naandang buhat o palibot, o sa pagpamati sa mabugnawng musika. Kita, sa gihapon, mokiling sa negatibong hunahuna ug kabalaka, depende sa mga butang nga atong nakat-onan o naeksperyensiyahan. Tungod niini, ang katakos sa kinaadman ug kusog nga kabubut-on dili igo sa pagpatunghag kalinaw sa hunahuna o makaagak sa usa ngadto sa kahimuot sa Diyos. Kinahanglang magtuon kita sa ‘pagtugyan sa tanan natong kabalaka kang Jehova.’ Imong mahimo kini ‘tungod kay siya may kahangawa kanato.’—1 Pedro 5:7.
Ang Personal nga Kaikag sa Diyos Kanimo
Dili kabubut-on sa Maglalalang nga managsama ang tanan ug may samang reaksiyon. Diha sa Bibliya, siya nagtagana ug sumbanang mga prinsipyo nga angay ug takos alang sa tanan. Naghatag usab siya kanato ug tin-awng mga pananglitan sa iyang pagpakitag personal nga kaikag sa ikaayo sa iyang mga alagad. “Si Jehova haduol niadtong mga nasubong kasingkasing . . . Daghan ang kagul-anan sa matarong, apan si Jehova magaluwas kaniya gikan kanilang tanan.” (Salmo 34:18, 19) Sa pagkatinuod, nasayod si Jehova sa atong kinasulorang mga pagbati, bisan sa atong mga problema ug mga luha. Gipahayag kini niining paagiha sa Salmo 56:8: “Ibutang mo ang akong mga luha sa imong mga botelya. Wala ba sila diha sa imong basahon?” Busa, kon tinuod gayod kitang nanginahanglan, bisag “nasakit ug kabus,” si Jehova mahimong atong “katabang ug Magtataganag kaikyasan.” (Salmo 40:17) Apan unsay gikinahanglan kanimo aron imong madawat ang iyang tabang?
Ang pagpabili sa labawng mga hiyas sa Diyos, ang iyang “kalulot,” makatabang kanato sa paglikay sa walay kapuslanang paghunahuna sa atong kaugalingon. (2 Corinto 1:3, 4) Dili mahimong isentro nato ang atong kaugalingon sa pagsunod sa atong mga pagbati sa binutang paagi tungod kay ang kasingkasing sa tawo “malimbongon,” nga moresultag dili maalamong mga buhat, o imoral nga mga relasyon. (Jeremias 17:9) Pananglitan, usa ka minyong babaye sa Latin Amerika nadani sa silingang lalaki. Natukmod tungod sa iyang mga pagbati, iyang gipakamatarong ang iyang pangibog pinaagi sa “pagtabang” kaniya. Apan, nangita siyag espirituwal nga tambag gikan sa hamtong nga mga Kristohanon. Uban sa napauswag nga pagpabili sa mga hiyas sa Diyos, iyang gitapos ang relasyon. Karon sa malipayon siya miingon: “Naluwas ang akong kaminyoon.” Sa pagkatinuod, maayong ugmaron natong tanan ang madinawatong pagpanudlo ni Jehova ug sa pagpasuod kaniya.—Salmo 19:7-11.
Ang lig-ong pagtuo, nga mao, ang ginalaomang pagpaabot ug masaligong paglaom, makadugang sa positibong tinamdan, samtang ang pagkakulang ug pagtuo makapukawg kabalaka ug kahadlok. (Hebreohanon 11:6) Tinuod, ang negatibong paghunahuna o mga pagduhaduha mohatag kanatog kapakyasan sa dapit nga molampos unta kita. Ang kakulang sa pagtuo nagpakita sa panginahanglan sa pag-ugmad ug dugang pagsalig sa katakos sa Diyos sa paglihok. (1 Juan 5:10) Nan, pagkahinungdanon, ang pagsalig sa Diyos, sa pagtanyag ug makanunayong mga pag-ampo sa pagtabang sa pagpugong sa atong mga pagbati!—Santiago 1:5.
Ang pagpugong sa kaugalingon ug pagkamakataronganon, usab, maoy mga hiyas nga atong kinahanglang ugmaron aron mapalambo ang maayong mga relasyon sa usag usa. “Ang tawong maalamon mabugnaw sa espiritu,” magpugong sa iyang mga pagbati. (Proverbio 17:27) Gawas pa niini, si apostol Pablo misulat: “Ang inyong pagkamakataronganon ipaila sa tanang tawo,” busa makahatag ug usa ka mahapsay ug malinawong kinabuhi.—Filipos 4:5.
Ang gugma alang sa uban nagaagda sa labing makaayong mga emosyon, ang pagkamainandamon sa pagdasig sa uban ug sa pagpabati kanilang relaks. “Sa inigsoong gugma pagbaton ug malulutong pagbati sa usag usa. Panguna sa pagpakitag pasidungog sa usag usa.” “Ang gugma mapailobon ug mapuanguron; ang gugma dili abughoan o mapahitas-on o hambogiro; ang gugma dili mogawing walay batasan o dalo o daling masuko; ang gugma dili magtipig ug mga talaan sa kalapasan.”—Roma 12:10; 1 Corinto 13:4, 5, Today’s English Version.
Kon magpadayon ka sa pag-ugmad niining mga hiyasa, ikaw makasalig sa tabang ni Jehova. Sumala sa gisulat ni Pablo: “Ang kalinaw sa Diyos nga lapaw sa tanang pagpanabot magbantay sa inyong mga kasingkasing ug sa inyong mga hunahuna pinaagi ni Kristo Jesus.”—Filipos 4:7.
Unsay Imong Gustong Buhaton?
Bisan pag modawat ang matag usa kanato sa iyang kaugalingong panginahanglan sa dugang pagpugong sa pila ka pagbati, makasalig kita nga ang kauswagan ug mas dakong kalipay atong maabot. Tungod niana, mag-amping gayod kita nga dili kita magpangdamgo ni magpadala sa walay pagpugong nga mga pagbati sama sa walay hinungdang kabalaka. Hinunoa, maningkamot kita sa pag-ugmad ug positibo, mahimsog nga mga pagbati aron mahimong malinawon uban sa atong kaugalingon, sa atong mga kauban, ug sa Diyos.
Oo, bililhon gayod nga determinado kita sa pagbuhat niana, magapaabot sa adlaw sa dihang si Jehova ‘motagbaw sa tinguha sa tanang buhing butang.’ (Salmo 145:16) Busa, pagkugi kanunay padulong sa pagtagamtam sa kinabuhi diha sa malinawon bag-ong sistema sa mga butang sa Diyos. Ang pagbuhat sa ingon makadugang pa gani sa imong presenteng kalipay, nga sa pagkatinuod mao ang labing tilinguhaong pagbati.