Kinabuhi ug Ministeryo ni Jesus

Mga Luha Nahimong Dakong Kalipay

DIHANG nakita ni Jairo ang babaye nga naayo sa pagdugo, sa walay duhaduha misamot ang iyang pagsalig sa milagrosong mga gahom ni Jesus. Sayo niadtong adlawa, gihangyo si Jesus ni Jairo sa pagduaw ug sa pagtabang sa iyang pinalanggang 12 anyos nga anak nga babaye, nga nagpinal. Apan sa nagpaingon sila sa balay ni Jairo, nga duol sa Capernaum, ang usa ka babaye nga nakahikap lamang sa borlas sa sapot ni Jesus naayo.

Apan, kasamtangan, nahitabo ang gikahadlokan ni Jairo. Samtang nagsulti pa si Jesus sa babaye, may mga tawo nga miabot ug sa hilom gisultihan si Jairo: “Ang imong anak patay na! Nganong imo pa mang hagoon ang magtutudlo?”

Pagkamakapasubo nga balita! Palandonga lang: Kining tawhana, nga tinahod sa komunidad, karon walay mahimo dihang nahibalo nga namatay na ang iyang anak. Apan, si Jesus, nakadungog sa panag-estorya. Busa, miatubang kang Jairo, siya miingon: “Ayaw kahadlok, pagbaton lamang ug pagtuo.”

Giubanan ni Jesus ang naguol kaayong tawo balik sa iyang balay. Sa dihang miabot sila, nakita nila ang dakong kagubot ug paghilak ug pagminatay. Dihay nagpundok nga mga tawo, ug ilang gibun-og ang ilang kaugalingon tungod sa kaguol. Dihang misulod si Jesus, siya nangutana: “Nganong nagkagubot man kamo ug nanagpanghilak? Ang bata wala mamatay, kondili natulog lamang.”

Sa pagkadungog niini, mabiaybiayong nangatawa ang mga tawo kang Jesus tungod kay sila nahibalo nga namatay na gayod ang dalagita. Apan, si Jesus, miingon nga siya natulog lamang, aron sa pagpakita nga, pinaagi sa hinatag sa Diyos nga gahom, ang mga tawo mahimong banhawon gikan sa patay nga sama ka sayon sa ilang pagmata gikan sa lalom nga pagkatulog.

Karon gipagawas ni Jesus ang tanan gawas kang Pedro, Juan, Santiago, ug inahan ug amahan sa patayng dalagita. Iyang gidala kining tulo ngadto sa gihayaan sa dalagita. Gigunitan siya sa kamot, si Jesus miingon: “Talʹi·tha cuʹmi,” kon, hubaron, nagkahulogan: “Inday, magaingon ako kanimo, Bumangon ka!” Ug dihadiha mibangon ang dalagita ug misugod sa paglakaw! Halos nabuang sa kalipay ang iyang mga ginikanan sa talan-awon.

Human nga iyang gisugo sila sa paghatag sa bata ug makaon, gibaoran ni Jesus si Jairo ug ang iyang asawa sa dili pagsulti sa nahitabo kang bisan kinsa. Apan bisan pa sa gisulti ni Jesus, mikaylap kini niadtong dapita. Mao kini ang ikaduhang pagbanhaw nga gihimo ni Jesus. Mateo 9:18-26; Marcos 5:35-43; Lucas 8:41-56.

◆ Unsang balita ang nadawat ni Jairo, ug sa unsang paagi gidasig siya ni Jesus?

◆ Unsay kahimtang dihang miabot sila sa balay ni Jairo?

◆ Nganong miingon si Jesus nga natulog lamang ang dalagita?

◆ Kinsa ang lima nga uban kang Jesus nga nakasaksi sa pagkabanhaw?