Imo Bang Nabatonan ang Hunahuna ni Kristo?

“Karon hinaot ang Diyos nga nagatagana sa pagkamainantoson ug paglipay magatugot nga kamo sa inyong kaugalingon magbaton sa samang panghunahuna nga nabatonan ni Kristo Jesus.”​—ROMA 15:5.

1. Kon ang usa ka tawo moangkong Kristohanon, unsang mga pangutana ang kinahanglag tubag?

KAPIN sa usa ka bilyong tawo sa tibuok kalibotan giingong Kristohanon. Unsay ipasabot niini? Nga, labing menos sa ngalan, sila nagtuo kang Jesu-Kristo ug nag-angkong iyang mga sumusunod, o mga disipulo. (Mateo 10:24, 25) Apan unsay kinahanglan aron sa pagsunod sa panig-ingnan o paagi sa kinabuhi ni Kristo? Dayag, kinahanglang imo siyang mailhan. Ikaw ba tinuod nakaila kang Jesus sa Nazaret? Ikaw ba may tin-awng ideya kon unsang matanga siya sa tawo samtang dinhi sa yuta? O kon unsay iyang pagsanong ngadto sa mga tawo sa nagkalainlaing mga kahimtang? Imo bang nabatonan “ang hunahuna ni Kristo”?​—1 Corinto 2:16; Efeso 4:13.

2, 3. Sa unsang paagi kita makaila sa hunahuna ni Kristo?

² Sa unsang paagi atong mailhan ang usa nga nagkinabuhig halos duha ka libo ka tuig kanhi ug kansang katilingbanong kinabuhi milungtad lamag tulo ka tuig ug tunga? Sa kahimtang ni Jesus may upat ka kasaligang biyograpiya nga motabang sa paghan-ay sa hulagway sa hunahuna kon unsa siyang matang sa tawo. Pinaagi sa mainampingong pagbasa nianang upat ka asoy sa Ebanghelyo, kita makasabot usab sa paagi sa hunahuna nga nagdasig sa iyang mga lihok. Busa, aron mahimong usa ka tinuod nga Kristohanon inay nga Kristohanon sa ngalan lamang, unsay gikinahanglan? Gipahayag kini ni Jesus niining paagiha: “Kini nagkahulogan sa kinabuhing walay kataposan, ang ilang pagkuha ug kahibalo mahitungod kanimo, ang bugtong matuod nga Diyos, ug sa imong gipadala, si Jesu-Kristo.”​—Juan 17:3; 2 Pedro 3:18.

³ Busa, ang matag Kristohanon angay magbatog halalom nga kahibalo ug pagsabot sa Amahan, si Jehova, ug sa kinabuhi ug mga pagtulon-an sa Anak, si Kristo Jesus. Dili igo ang pagtawag sa kaugalingon nga Kristohanong saksi ni Jehova. Sa pagbaton sa hunahuna ni Kristo, kinahanglang regular natong pun-on ang atong mga hunahuna sa pagsabot sa kinabuhi ug panig-ingnan ni Jesus. Kana nagkahulogang kinahanglan nato ang regular ug tininuod nga pagtuon sa Kasulatan uban sa mga tabang sa pagtuon sa Bibliya nga motabang sa pagpatin-aw sa kahulogan ug sa konteksto. Kinahanglan usab niana ang hustong kaisipan aron kita makasabot ug makadawat sa papel ni Kristo diha sa mga katuyoan sa Diyos.​—Juan 5:39-47; Mateo 24:45-47.

Usa ka Tawong May mga Pagbati

4. Unsang matang sa tawo si Jesus?

⁴ Si Jesus, usa ka himsog aktibong tawo, nagtuman sa iyang ministeryo samtang siya trayentahon pa sa edad. (Lucas 3:23) Apan unsa siyang matang sa tawo? Siya ba dili mobati ug lainlainon? Sa kaatbang, tungod kay usa ka Hudiyo sa Tungang Sidlakan, siya mapadayganon. Siya dili maulawon ug tigkinaugalingon. Iyang gipasundayag ang nagkalainlaing tawhanong mga emosyon gikan sa kasubo ug kahangawa ngadto sa matarong nga kalagot ug kasuko.​—Marcos 6:34; Mateo 23:13-36.

5. Unsay sanong ni Jesus sa pagkadungog sa pagkamatay ni Lasaro?

⁵ Pananglitan, unsay sanong ni Jesus sa iyang nakaplagang si Marta ug si Maria naghilak tungod sa pagkamatay sa ilang igsoong si Lasaro? Ang asoy ni Juan nagasugid kanato: “Siya dulot ug dayag natandog, ug naguol sa espiritu,” ug siya “mihilak.” (Juan 11:33-36, The New Testament, ni William Barclay) Iyang gibati ang gibati sa maong suod nga mga higala. Siya wala maulaw sa paghilak duyog kanila. Bisan pag siya “ang Anak sa Diyos,” iyang gipadayag ang tawhanon kaayong mga emosyon. (Juan 1:34) Pagkamakapatandog gayod kadto alang kang Marta ug Maria!​—Itandi ang Lucas 19:41-44.

6. Nganong si Jesus dili man bayoton tungod kay siya mihilak?

⁶ Ang pipila karong adlawa, hinunoa, tingali mohinapos nga si Jesus huyang tungod kay siya mihilak sa dayag duyog sa maong mga babaye. Ngani, ang Katolikong magsusulat si Hilaire Belloc nagtawag kang Jesus nga “bayoton.” Tinuod ba kana? Si Jesus ba mao ang bayotong tipo nga kadaghanan gihulagway diha sa mga dibuho sa Kakristiyanohan? Dili, ang mga luha dili gayod ilhanan sa kahuyang. Sumala sa pagpahayag niana sa usa ka medikal nga basahon: “Ang pagdili sa nahiangay nga pagpadayag sa malumong emosyon maoy dili makataronganon ug makadaot . . . Ang pagpadayag sa malumong emosyon, ilabina ang paghilak, maoy usa ka hiyas nga sa linain tawhanon.”​—Itandi ang 2 Samuel 13:36-38; Juan 11:35.

7. Sa unsang mga paagi nga ang makitawhanong panig-ingnan ni Jesus makatabang kanato karong adlawa?

⁷ Ang sanong ni Jesus ngadto sa pag-antos tawhanon gayod ug makitawhanon. Kana nagatabang nga kita mailhan uban niya ug sa iyang hunahuna. Kita wala magsunod sa dili-personal nga pigura sa kasugiran kondili sa hingpit tawhanong panig-ingnan nga gipadala sa Diyos, “ang Anak sa Diyos nga buhi.” (Mateo 16:16; Juan 3:16, 17; 6:68, 69) Talagsaon gayod nga sulundan alang sa tanang Kristohanon karong adlawa, ilabina sa Kristohanong mga ansiano, kinsa kinahanglang kanunay mohatag ug paglipay ug mopakitag empatiya sa mga panahon sa kapildihan ug kapit-osan! Oo, ang pagbaton sa hunahuna ug sa kasingkasing ni Kristo sa maong mga higayon mohatag ug dakong kalainan.​—1 Tesalonica 2:7, 8.

Usa ka Maisogong Tawo sa Aksiyon

8. Sa unsang paagi gipasundayag ni Jesus ang kaisog ug walay-kahadlok nga aksiyon?

⁸ Gipakita usab ni Jesus nga siya usa ka tawong may maisogong mga pagtuo ug tawo sa dinamikong aksiyon. Pananglitan, sa duha ka okasyon iyang gipadlas ang mga namaligyag hayop ug mga tig-ilis sa salapi sa templo. (Marcos 11:15-17; Juan 2:13-17) Siya wala usab magpanuko sa pagyagyag sa dayag sa pagkamaot sa nagpakamatarong-sa-kaugalingong mga eskriba ug mga Pariseo. Sa iyang maisogong pagbadlong, siya mipasidaan: “Alaot kamo, mga eskriba ug mga Pariseo, mga maot! tungod kay kamo nahisama sa gipaputi nga mga lubong, nga sa gawas daw matahom tan-awon apan sa sulod puno sa mga bukog sa mga tawong patay ug sa tanang matang sa kahugawan.” Tino, walay pagkahuyang niana!​—Mateo 23:27, 28; Lucas 13:14-17.

9, 10. (a) Nganong si Jesus wala makasala pinaagi sa pagpakitag kasuko? (b) Sa unsang paagi ang panig-ingnan ni Kristo magaapektar sa usa ka Kristohanong ansiano?

⁹ Ang kasuko ba ni Jesus ebidensiya sa kakulang sa pagpugong-sa-kaugalingon? Si Pedro, usa ka suod nga kauban ni Jesus panahon sa iyang ministeryo, miingon: “Siya wala makasala.” (1 Pedro 2:22) Si apostol Pablo misulat: “Kay kita adunay hataas nga saserdote, dili usa nga dili mobati sa atong mga kahuyangan, kondili usa nga nasulayan sa tanang bahin sama sa atong kaugalingon, apan walay sala.” (Hebreohanon 4:15) Adunay kalainan tali sa pinugngang matarong nga kasuko ug sa walay-pugong nga kasuko.​—Itandi ang Proverbio 14:17; Efeso 4:26.

¹⁰ Busa, samtang ang usa ka Kristohanong ansiano, pananglitan, dili “masuk-anon,” siya gayod may moral nga kalig-on sa pagkaarang “sa pagbadlong niadtong mosupak,” bisan “uban ang kagrabe” kon kinahanglan. Siya kinahanglang may katakos sa ‘pagbadlong, pagsaway, ug pagtambag.’ (Tito 1:7-13; 2 Timoteo 4:1, 2) Ang pila ka kahimtang tingali makahagit usab sa iyang matarong nga kasuko, ilabina kon iyang makita ang dayag nga hulga sa panaghiusa, espirituwalidad, o moral nga kahinlo sa kongregasyon. Sumala sa giingon ni Pablo, may panahong “kinahanglan ang pagtak-om sa mga baba” sa “walay pulos nga mga tabian . . . ug mga nagalimbong sa hunahuna” nga ‘nagalunod sa tibuok nga mga panimalay pinaagi sa pagtudlog mga butang dili angay tungod sa dili-matarong nga panapi.’ Sa maong mga kaso, ang pagbaton sa hunahuna ni Kristo motabang sa mga ansiano nga mahimong maisogon, timbang, ug mahukmanon.​—Tan-awa ang 1 Corinto 5:1-5; Pinadayag 2:20-23; 3:19.

11. Unsang mga pangutana ang may kalabotan sa paagi sa atong pagsundog kang Kristo?

¹¹ Sa lakaw sa iyang mga panaw agi sa Galilea, Samaria, ug Judea, nahibalag ni Jesus ang tanang matang sa mga tawo​—mga lalaki, mga babaye, mga bata, masakiton, ug kadtong nag-isip kaniya nga ilang gipanumpaang kaaway. Giunsa niya pagpakiglabot kanilang tanan? Siya ba mapagawalon ug lainlainon, o daling duolon? Siya ba mabination sa mga suliran ug sa mga tentasyon sa katawhan? Siya ba dili mapinasayloon o maluluy-on? Ang mga tubag niining mga pangutanaha may kalabotan sa kon sa unsang paagi kita nagasundog kang Kristo sa atong adlaw-adlawng mga buhat ug mga pagsanong.​—Roma 15:5; Filipos 2:5.

Unsay Sanong ni Jesus Ngadto sa mga Bata?

12. Unsay sanong sa mga tinun-an ug ni Jesus ngadto sa mga bata sa usa ka okasyon?

¹² Atong makaplagan ang nindot kaayong asoy kon unsay sanong ni Jesus ngadto sa mga bata sa Marcos kapitulo 10, mga bersikulo 13-16. Kini mabasa: “Unya ang mga tawo misugod sa pagdala kaniya sa gagmayng mga bata aron iyang hikapon sila; apan gibadlong sila sa mga tinun-an.” Kon nganong ang mga tinun-an mihimo niadto ang asoy wala motug-an. Kadto maoy tuig 33 K.P., ug si Jesus nagpanaw gikan sa Galilea agi sa Perea ngadto sa mahimong kataposan niyang katilingbanong ministeryo sulod ug palibot sa Jerusalem. Tingali sila naghunahuna nga si Jesus importante kaayo o puliki kaayo aron sa pagtagad sa mga bata niadtong puntoha. Apan, iya ba mismong gipaila nga siya puliki kaayo? “Sa pagkakita niadto si Jesus nasuko ug miingon ngadto kanila [ang mga tinun-an]: ‘Pasagdi ang gagmayng mga bata nga moduol kanako; ayaw sila pagpugngi, kay ang gingharian sa Diyos iya sa mga sama kanila. . . . Ug iyang gikugos ang mga bata sa iyang mga bukton ug gipanalanginan sila, nga gipandong ang iyang mga kamot ibabaw kanila.”

13. Unsay sanong sa katawhan ngadto kang Jesus?

¹³ Karon unsa pay ginatudlo niana kanato bahin sa hunahuna ni Kristo? Kini nagailustrar sa iyang kalig-on uban sa nasayop niyang mga tinun-an ug sa iyang makitawhanong tinamdan ngadto sa mga ubos. Siya nakasabot kon unsay nagdasig sa mga ginikanan sa pagdala sa ilang mga anak ngadto kaniya. Buot nilang iyang hikapon ug panalanginan ang ilang mga anak. Ug unsay ginasulti niana kanato mahitungod kang Jesus? Nga ang mga tawo wala mahadlok kaniya o malisang kaniya. Siya tawo sa masa, ug buot niyang mahauban sa katawhan. Bisan ang mga bata dili gil-asan sa iyang presensiya​—ug siya dili gil-asan sa presensiya sa mga bata. Ang mga tawo ba, apil ang mga bata, dili bation sa kagil-as sa imong presensiya?​—Marcos 1:40-42; Mateo 20:29-34.

14. Bahin sa pagkadaling duolon, kinsa ilabina ang angay mosunod sa panig-ingnan ni Jesus?

¹⁴ Gipakita ni Jesus ang mainitong pagbati ug kalulot. (Marcos 9:36, 37) Siya anaa kanunay ug daling duolon. Ingong sumusunod ni Kristo, nabatonan ba nimo ang iyang hunahuna nianang bahina? Ang Kristohanong mga magtatan-aw sa mga distrito, mga sirkito, mga kongregasyon, ug sa mga sangang buhatan sa Watch Tower Society sa tibuok kalibotan maayong mangutana sa ilang kaugalingon: Ako ba dogmatiko ug dili mapailin-ilinon? O ako bang gipabati ang uban, bisan ang mga bata sa karelaks uban kanako? Ako ba tinuod nga daling duolon?​—Proverbio 12:18; Ecclesiastes 7:8.

Mga Pakiglabot ni Jesus sa mga Babaye

15, 16. Sa unsang paagi si Jesus lahi sa ubang Hudiyo sa iyang pagpakiglabot sa mga babaye?

¹⁵ Ingong mga ansiano, mga alagad, ug mga igsoon sa Kristohanong kongregasyon, ato bang nabatonan ang hunahuna ni Kristo kon makiglabot sa atong Kristohanong mga igsoong babaye ug sa kababayen-an sa katibuk-an? Unsay sanong ni Kristo, nga usa ka ulitawo, dihang nailalom sa nagkalainlaing kahimtang samtang siya nakakontak sa mga babaye sa iyang adlaw?

¹⁶ Nianang gigamhan-sa-lalaki Hudiyohanong katilingban, si Jesus maoy talagsaong magtutudlo sa pagkaaging siya andam makigsulti sa mga babaye, bisan sa dili-Hudiyong mga babaye. (Juan 4:7-30) Pananglitan, sa nagduaw siya sa usa ka balay sa Hentil nga teritoryo sa Tiro ug Sidon, ang usa ka babayeng Grego mihangyo kaniya sa pagtabang sa iyang gidemonyohang anak babaye. Sa kasagaran, ang usa ka ortodoksong Hudiyo dili makiglabot kaniya. Apan si Jesus namati ug nagsulay sa iyang pagtuo, nga miingon: “Busga una ang [Hudiyong] mga bata, kay dili matarong nga dad-on ang tinapay ngadto sa mga bata ug ilabay kana ngadto sa gagmay [Hentil] nga mga iro.” Ang tono ba ni Jesus nagtapos niadto? Sa pagkadogmatiko iya bang gipukgo ang dugang panaghisgot? Lagmit dili, kay ang babaye mataktikanhong mitubag: “Oo, senyor, ug bisan pa niana ang gagmayng mga iro sa ilalom sa talad nagakaon sa mga mumho sa gagmayng mga bata.” Si Jesus nakadayeg, ug iyang giayo ang iyang anak babaye.​—Marcos 7:24-30.

17. Unsay atong makat-onan gikan sa paagi sa pagpakiglabot ni Jesus sa usa ka babaye nga usa ka makasasala?

¹⁷ Nagbaton si Jesus ug bukas nga kaisipan uban sa mga babaye ug wala maghukom sumala sa gawas nga panagway. (Mateo 22:16) Sa laing okasyon, sa nagkaon diha sa balay sa usa ka Pariseo, iyang gitugotang ang usa ka iladong makasasala, lagmit usa ka bigaon, sa paghugas sa iyang mga tiil ug dayon pagpahid niana sa lana. Pinaagi sa iyang mga lihok iyang gipaila ang mahinulsolong tinamdan bahin sa iyang makasasalang mga buhat. (Lucas 7:36-50) Si Jesus wala magpakamenos kaniya ug magbale wala kaniya uban ang malangkobong paghukom tungod kay siya babayeng daotan. (Tan-awa usab ang Juan 4:7-30.) Iyang gipasaylo siya “tungod kay siya nahigugma pag-ayo.” Unsay ginapaila niana mahitungod sa hunahuna ni Kristo? Siya maluluy-on ug masinabtanon sa babaye. Dili ba mahimong kita molihok sa sama diha sa kongregasyon ug sa atong ministeryo?​—Lucas 19:1-10; Roma 14:10-13; 1 Corinto 6:9-11.

Mga Pakiglabot ni Jesus sa Iyang mga Tinun-an

18. (a) Unsay reaksiyon sa pipila ngadto niadtong nagatrabaho ubos kanila? (b) Giunsa pagtagad ni Jesus ang iyang mga tinun-an ug ang uban? (Marcos 6:54-56)

¹⁸ Usahay ang mga tawong may pagbulot-an mobating mameligro tungod sa ilang mga sakop. Ilang pukgoon ang butang ilang gisabot nga pakig-indig. Ang garbo mopaibabaw. Sila daling manaway ug hinay modayeg niadtong nagatrabaho ubos kanila. Ang ilang mga pagpahayag sa pagtamay walay pagtahod sa personal nga dignidad sa uban. Komosta ba si Jesus​—giunsa niya pagtagad kadtong ubos niya, ang iyang mga tinun-an? Gipabati ba silang ubos, walay-katakos, o estupido? O, hinunoa, gibati ba nilang relaks ang pagbuhat uban ni Jesus?​—Itandi ang Mateo 11:28-30; 25:14-23.

19. Unsay ginatudlo kanato sa Juan 13:1-17 bahin kang Jesus?

¹⁹ Niining bahina, usa sa talagsaong mga pagtulon-an nga gitudlo ni Jesus sa iyang mga tinun-an makaplagan sa Juan kapitulo 13. Among gisugyot nga inyong basahon ang mga bersikulo 1 ngadto 17. Niadtong mga adlawa ang mga dalan abogon, ug maoy batasan nga ang usa ka sulugoon maghugas sa mga tiil sa mga bisita. Gibuhat ni Jesus ang maong ubos nga buluhaton. Unsang hiyas ang iyang gipasiugda pinaagi sa paghugas sa mga tiil sa iyang mga tinun-an? Iyang gihatagan silag usa ka praktikal nga pagtulon-an sa pagpaubos. Unsay atong makat-onan dinhi mahitungod sa hunahuna ni Kristo? Ang mga pulong ni Jesus nagahatag sa tubag: “Ang usa ka ulipon dili labaw sa iyang agalon, ni ang gipadala labaw kay sa nagpadala kaniya. Kon inyong nahibaloan kining mga butanga, malipayon kamo kon inyong ginabuhat sila.”​—Juan 13:16, 17.

20. Unsang pagsusi sa kaugalingon ang atong ikapadapat sa pagtan-aw kon kita nakabaton sa hunahuna ni Kristo?

²⁰ Ato bang nabatonan ang hunahuna ni Kristo niining bahina? Kita ba andam mobuhat sa menos, ubos nga mga buluhaton sa balay ug sa kongregasyon? O buot ba lamang natong buhaton kadtong mga butang nga daw “importante” o mohimo kanatong daw “espesyal”? Andam ba kitang makig-ambit sa usahay makauulaw nga buluhaton sa pagsangyaw sa maayong balita sa balay-balay? O buot lamang nato ang mga asaynment sa entablado sa Kingdom Hall? Sa pagkamatuod, ang pagbaton sa hunahuna ni Kristo maghimo kanatong sa tanang panahon mapaubsanon ug daling duolon, sama kang Jesus.​—Roma 12:3.

21. Giunsa pagpakita ni Jesus ang pagkamabination ngadto sa iyang mga apostol? Ngadto sa panon?

²¹ Sa usa ka okasyon, tapos sa usa ka espesyal nga pagsangyaw, gipakita ni Jesus ang dakong konsiderasyon alang sa mga apostol. Bisan tuod hingpit, si Jesus wala magdahom sa kahingpitan gikan sa uban. Sa kataposan sa usa ka kampanya sa pagsangyaw, siya wala mopugos nga ang iyang mga apostol mobalik dayon sa ilang pagsangyaw ug mohimo sa labi pang maayo. Siya mahunahunaon sa ilang panginahanglan sa pahulay ug gidala sila ngadto sa usa ka dapit nga mingaw alang sa pribasiya. Apan dihang misunod kanila ang panon, si Jesus napikal ba ug dili mapailobon? Dili, kay “siya gibatig kaluoy kanila,” mao ang ginaingon sa asoy.​—Marcos 6:30-34, The New English Bible.

22. Unsay motabang kanato sa pagsabot sa dugang sa hunahuna ni Kristo?

²² Tungod nianang maayong panig-ingnan, katingad-an ba nga ang kadaghanan sa mga apostol maoy matinumanong mga sumusunod ni Kristo? Si Pedro tinong nakadayeg sa mga butang iyang nakat-onan sa suod nga pagpakig-uban kang Jesus. Lagmit iyang gitagana kang Marcos ang kadaghanan sa impormasyon sa iyang asoy sa Ebanghelyo. Ug inanay apan tino nga gipahiuyon ni Pedro ang iyang kaugalingon ngadto sa hunahuna ni Kristo. Ang pagsusi sa iyang unang sulat motabang nato sa pagsunod sa panig-ingnan ni Kristo sa mas suod pa.​—Mateo 16:15-17, 21-23.

Nahinumdom Ka Ba?

◻ Sa unsang paagi atong mabatonan ang hunahuna ni Kristo?

◻ Unsang matang sa tawo si Jesus?

◻ Unsay sanong ni Jesus ngadto sa mga bata? Ngadto sa mga babaye?

◻ Unsay atong makat-onan gikan sa pagpakiglabot ni Jesus sa iyang mga tinun-an?

[Hulagway sa panid 10]

Si Jesus maluluy-on ug wala magtago sa iyang mga pagbati

[Hulagway sa panid 12]

Si Jesus maoy maisogong tawo sa aksiyon

[Hulagway sa panid 15]

Gihatag ni Jesus ang talagsaong panig-ingnan sa pagpaubos