BITIIS

Ang sangkap sa lawas sa tawo tali sa tuhod ug tiil. Si Jehova matagnaong nag-ingon sa Babilonya: “Huboa ang saya. Ipadayag ang bitiis. Tabok sa mga suba.” (Isa 47:​1, 2) Imbes usa ka rayna nga inatiman pag-ayo ug sinilbihan, siya sa mahulagwayong paagi magpadayag sa iyang bitiis hangtod sa balat-ang aron moubog nga magtiniil ingong usa ka binihag tabok sa mga suba nga diha niana ang iyang mga mananakop magguyod kaniya.

Ang bitiis gigamit usab sa mahulagwayong paagi sa paglarawan sa kakusgan o katulin ug sa gahom sa tawo. Sa Salmo 147:10 atong mabasa: “[Si Jehova] wala malipay sa kakusgan sa kabayo, ni may kahimuot siya sa mga bitiis sa tawo.” Sa Proverbio 26:7 ang pagkabakol gihisgotan ingong simbolo sa kawalay kapuslanan o pagkainutil.

Mopatim-awng batasan kanhi sa mga Romano nga tiwasan ang mga kriminal nga gihukmang mamatay diha sa estaka pinaagi sa pagbali sa ilang mga bitiis aron pamub-on ang ilang pag-antos. Ang mga sundalo, kay gisugo sa mga Hudiyo, nagbali sa mga bitiis sa mga tawo nga gilansang tapad ni Jesu-Kristo apan, sa pagkakita nga si Jesus patay na, wala magbali sa iyang bitiis. Busa, ang tagna sa Salmo 34:20 natuman.​—Ju 19:31-36; itandi ang Ex 12:46; Num 9:12.