Ibutang ang Diyos nga Una sa Imong Pamilyahanong Kinabuhi!

SI Bob ug Jean—ang magtiayon nga gipailaila sa unang artikulo—​wala magdiborsiyo. Hinunoa, ilang gihisgotan ang ilang mga suliran uban sa usa ka Kristohanong ministro. Wala magdugay iyang nasabtan nga ang ilang kasamok maoy resulta gikan sa ilang magkalahing mga kaagi.

Pananglitan, sanglit si Bob gikan man sa usa ka pamilya sa mga obrero ug mga trabahante sa bug-at nga trabaho sama kaniya mismo, siya gustog pabusog nga pamahaw kada buntag. Si Jean, nga gikan sa de-opisinang mga pamilya, nagdulot lamang kaniya ug kape ug tostadong tinapay. Busa ang maong away maylabot sa pamahaw nahimong usa ka dakong away!

Kinahanglang pauswagon ni Bob ug Jean ang ilang komunikasyon. Apan, ang tinuod nga hinungdan sa ilang kagubot mas lalom pa. “Gilantaw ba ninyo ang usag usa diha sa kahayag sa 1 Corinto 13:4?” nangutana ang ministro. Kanang teksto sa Bibliya mabasa: “Ang gugma hataas ug pailob ug maluloton. Ang gugma dili abughoan, dili tigpagawal, dili tigpaburot.” Ang sunod nga bersikulo 1Co 13:5 nag-ingon nga ang gugma “dili magalihok nga binastos, dili maghunahuna sa iyang kaugalingong kaayohan, dili masuk-anon. Kini dili madumtanon.” Si Jean ug Bob andam nga mopadapat niining mga pulonga sa ilang relasyon.

Ang mga suliran niining magtiayona nagkinahanglan ilabina ug espirituwal nga solusyon. Sanglit si Bob ug Jean nagtinguha nga makabaton ug maayong relasyon sa Diyos, labaw sa tanan gikinahanglan nila ang pagpadapat sa mga prinsipyo sa Bibliya ug amgohon nga “gawas nga si Jehova mismo ang magtukod sa balay, kawang lamang ang kahago sa mga magtutukod niini.” (Salmo 127:1) Ang mga Sal 127 bersikulo 3 ngadto sa 5 nagtumong sa pagtukod sa usa ka pamilya. Ug ang labing dakong kalamposan sa pagpauswag sa kalipay sa pamilya nagagikan sa pag-una sa Diyos diha sa pamilyahanong kinabuhi.​—Efeso 3:14, 15.

Kon Unsay Nalangkit sa Pag-una sa Diyos

Ang pag-una sa Diyos diha sa inyong pamilyahanong kinabuhi mosaylo pa sa panultihon, “Ang pamilyang nagaampo nga hiusa magpabiling mahiusa.” Sumala sa basahong Family Relations, daghan ang nagtuo nga ang ang “relihiyon naghatag positibo ug himsog nga pakigsandurotay sa pamilya ug mopalambo sa katagbawan sa kinabuhi sa mga sakop niini.” Apan ang pagsunod ug relihiyon lamang dili sama sa pagbutang pag-una sa Diyos. Daghan ang pormal nga nagpabilin sa usa ka relihiyon tungod lamang sa batasan, tradisyon sa pamilya, o sosyal nga bentaha. Diyutay lamang ang impluwensiya sa Diyos sa ilang adlaw-adlaw nga kinabuhi. Labing hinungdanon, dili tanang relihiyon mao “ang matang sa pagsimba nga putli ug dili bulingon gikan sa panan-aw sa atong Diyos.”​—Santiago 1:27.

Sa pag-una sa Diyos diha sa atong pamilyahanong kinabuhi, kita ug ang atong mga hinigugma kinahanglang mosimba kang Jehova, “ang Labing Hataas sa tibuok nga yuta,” sumala sa iyang mga kinahanglanon. (Salmo 83:18) Ang Anak sa Diyos, si Jesu-Kristo, miingon: “Ang takna nagsingabot, ug mao na karon, dihang ang matuod nga mga magsisimba magasimba sa Amahan diha sa espiritu ug sa kamatuoran, kay, sa pagkamatuod, kanang matanga sa mga tawo ang gipangita sa Amahan nga maoy managsimba kaniya. Ang Diyos Espiritu, ug kadtong magasimba kaniya kinahanglang magasimba diha sa espiritu ug sa kamatuoran.” (Juan 4:23, 24) Sa pagsimba kang Jehova nga Diyos “diha sa espiritu,” ang atong balaang pag-alagad kaniya angay nga tinukmod sa usa ka kasingkasing nga puno sa gugma ug pagtuo. (Marcos 12:28-31; Galacia 2:16) Ang pagsimba kang Jehova diha sa “kamatuoran” nagkinahanglan nga atong isalikway ang relihiyosong kabakakan ug bug-os tumanon ang iyang kabubut-on sumala sa gipadayag sa Bibliya. Dili nato mauna si Jehova nga Diyos gawas kon ang atong relihiyon nakaabot sa iyang mga sukdanan.a Unsa ang pipila niini? Ug sa unsang paagi ang pagpadapat niini makaayo sa imong pamilya?

Pag-una sa Diyos Ingong Bana

Diha sa 1 Corinto 11:3, ang Bibliya nag-ingon: “Ang ulo sa matag lalaki mao si Kristo; ug ang ulo sa babaye mao ang lalaki; ug ang ulo ni Kristo mao ang Diyos.” Kon ikaw bana, ikaw dunay hinatag-sa-Diyos nga responsabilidad nga mahimong pangunang tighimog-desisyon diha sa imong pamilya. Apan kini wala magtugot kang bisan kinsang bana nga mahimong daogdaogan o diktador.

Ang Bibliya nagdasig sa mga bana nga tagdon ang pagbati sa ilang isigka asawa sa dihang mohimog mga desisyon nga makaapekto kanila. (Itandi ang Genesis 21:9-14.) Sa pagkamatuod, ang Kasulatan nag-awhag kanatong tanan nga ‘maghunahuna, dili lamang ang atong kaugalingong kaayohan, kondili ang kaayohan usab sa uban.’ (Filipos 2:2-4) Kon walay prinsipyo sa Bibliya ang malangkit, ang Kristohanong bana kasagaran mouyon sa kagustohan sa iyang asawa. Kay naghunahuna sa iyang kaayohan, iyang tinoon usab nga siya dili sobrang mabug-atan sa mga kaakohan. Pananglitan, siya makatabang kaniya sa mga buluhaton sa balay, ilabina kon adunay sekular nga trabaho ang iyang asawa.

Si apostol Pablo misulat: “Mga bana higugmaa ang inyong mga asawa sama sa inyong kaugalingong mga lawas. Siya nga nahigugma sa iyang asawa nahigugma sa iyang kaugalingon, kay walay tawo ang nagadumot sa iyang kaugalingong lawas; apan iyang gipakaon ug gimahal kini, ingon sa gibuhat ni Kristo sa kongregasyon.” (Efeso 5:28, 29) Si Jesu-Kristo nakiglabot sa mga sakop sa kongregasyon sa mahigugmaong paagi.

Angay usab tagdon ang gitambag ni apostol Pedro: “Kamong mga bana, padayon sa pagpuyo sa samang paagi uban sa [inyong mga asawa] sumala sa kahibalo, nagahatag kanila ug pasidungog ingon nga labaw pang mahuyang nga galamiton, ang usa nga babayen-on, sanglit kamo usab mga manununod man uban kanila sa dili-takos nga gasa sa kinabuhi, aron dili mabalda ang inyong mga pag-ampo.” (1 Pedro 3:7) Dili ba makapahinuklog ang pag-amgo nga ang dili-mahigugmaong pagtratar sa asawa makabalda sa mga pag-ampo sa bana? Oo, ang lalaki kinahanglang makiglabot sa iyang asawa sa mahigugmaong paagi kon buot niyang dunggon ug tubagon sa Diyos ang iyang mga pag-ampo.

Ang pag-una sa Diyos makaapekto usab sa relasyon sa amahan uban sa iyang mga anak. Siya dulot gayod nga mabalaka sa ilang espirituwal nga kaayohan. Apan, diha sa pangunang surbi sa T.B., katunga lamang sa mga lalaki ang miingon nga ang “pagpakigbahin sa pagtuon sa Bibliya o sa mga ginurupong panaghisgot” maoy ‘labing hinungdanon sa espirituwal nga kauswagan sa ilang pamilya.’ Ang nahibilin nagpunting sa mga butang sama sa “pagtan-aw o pagpamati sa gisibya nga mga serbisyo sa relihiyon” o ‘pagpalandong sa kahulogan sa kinabuhi.’

Bisan pa niana, ang Bibliya nagsulti sa mga amahan: “Ayaw ninyo pasuk-a ang inyong mga anak, apan padayon sa pagmatuto kanila diha sa disiplina ug sa mga pahamangno ni Jehova.” (Efeso 6:4) Taliwala sa mga Saksi ni Jehova, ang mga amahan gilaoman nga maoy manguna sa pagsimba sa pamilya. Pinaagi sa regular nga pagdumala sa mga pagtuon sa Bibliya sa pamilya, pagtambong sa Kristohanong mga tigom, ug pagsunod sa ubang mga kinahanglanon sa Kasulatan, ang maong mga lalaki nagauna sa Diyos diha sa pamilyahanong kinabuhi.

Pag-una sa Diyos Ingong Asawa

Kon ikaw usa ka asawa, imong mauna ang Diyos pinaagi sa pagpaluyo sa imong bana sa iyang papel ingong ulo sa pamilya. Nag-ingon ang Bibliya: “Kamong mga asawa, magpasakop kamo sa inyong mga bana, ingon nga maoy angay diha sa Ginoo.” (Colosas 3:18) Tingali malisod kini kon ang lalaki dili-makigkomunikar o walay-kaikag sa pagpanguna sa pagsimba sa pamilya. Bisan pa, ang kanunayng paghisgot sa iyang sayop o, mas grabe pa, mosupak kaniya makapasamot lamang sa kalisod sa pamilya.

Ang Proverbio 14:1 nag-ingon: “Ang tinuod nga maalamong babaye nagatukod sa iyang balay, apan ang buangbuang nagabungkag niana sa iyang kaugalingong mga kamot.” Ang usa ka paagi nga ginauna sa usa ka tinuod maalamong babayeng minyo ang Diyos ug ‘nagatukod sa iyang balay’ maoy pinaagi sa pagpasakop sa iyang bana. (1 Corinto 11:3) Uban ang ‘balaod sa dili-takos nga kalulot nga anaa sa iyang dila,’ siya nagalikay sa wala kinahanglanang pagsaway sa iyang bana. (Proverbio 31:26) Siya naningkamot usab nga molampos ang mga desisyon sa iyang bana.

Ang laing paagi nga ginauna sa minyong babaye ang Diyos mao ang pagkahimong kugihang asawa. Siyempre, kon siya kinahanglang magtrabaho sa sekular, basin siya wala nay panahon o kusog nga gikinahanglan sa pag-atiman sa iyang balay sumala sa iyang gusto. Siya makapaningkamot nga mahimong sama sa “takos nga asawa” nga bahin kaniya ang Bibliya nag-ingon: “Siya nagsud-ong ug maayo sa mga hitabo sa iyang panimalay, ug dili mokaon sa tinapay sa pagkatapolan.”​—Proverbio 31:10, 27.

Labaw sa tanan, kinahanglang unahon sa asawa ang pagsimba sa Diyos diha sa iyang kinabuhi. Daghan niadtong nakaduaw sa Kingdom Hall sa mga Saksi ni Jehova sa unang higayon nakakomento sa kahinlo sa panagway sa mga kabataan. Ang buluhaton sa asawa niining bahina bililhon kaayo. Apan siya usab kinahanglang maningkamot sa paghupot sa iyang espirituwalidad pinaagi sa pag-ampo, pagtuon, ug sa pag-alagad sa Diyos.

Pag-una sa Diyos Ingong mga Batan-on

Ang usa ka artikulo sa Adolescent Counselor nag-ingon: “Ang mga anak may kiling sa pag-ugmad ug mga tinamdan ug mga pilosopiya nga magtugot kanila sa pagkontrolar sa ilang mga ginikanan. . . . Sanglit naladlad sa usa ka katilingban nga nagpasiugda ug naghimaya sa dihadihang katagbawan ug kabahandianon, ang mga batan-on nakaugmad ug ‘gusto ko niana karon dayon’ nga tinamdan.” Kon ikaw usa ka batan-on, ingon ba niana ang imong tinamdan?

Ang Colosas 3:20 nagaingon: “Kamong mga anak, magmasinugtanon kamo sa inyong mga ginikanan sa tanang butang, kay kini kahimut-anan sa Ginoo.” Ang usa ka batan-on nga naglantaw sa maong pagkamasinugtanon ingong kinahanglanon sa Diyos mokooperar sa iyang mga ginikanan. Pananglitan, siya dili tago nga mosupak kanila pinaagi sa pakighugoy-hugoy sa iyang mga kauban sa eskuylahan nga wala sila makauyon; ni malipatlipaton niyang maniobrahon ang bisan hain sa iyang mga ginikanan aron matuman ang iyang gusto. (Proverbio 3:32) Hinunoa, ang bisan kinsang batan-on nga nagauna sa Diyos diha sa iyang kinabuhi magpasakop sa mahigugmaong paggiya sa mga ginikanan.

Unaha Kanunay ang Diyos!

Bisan unsa pay atong dapit diha sa pamilya, angay natong unahon ang Diyos sa atong kinabuhi ug ugmaron ang suod nga relasyon uban kaniya. Ikaw ba ug ang imong pamilya nagabuhat niana?

Niining “kataposang mga adlaw,” atubangon natong tanan ang “malisod nga mga panahon.” (2 Timoteo 3:1-5) Bisan pa, posible ang pagpauswag sa espirituwal ug sa pagkalabang-buhi sa kataposan niining sistemaha sa mga butang. (Mateo 24:3-14) Pinaagi sa pagkinabuhi uyon sa tukmang kahibalo sa Bibliya, ikaw ug ang imong pamilya makabaton sa paglaom sa kinabuhing dayon sa paraiso sa yuta. (Lucas 23:43; Juan 17:3; Pinadayag 21:3, 4) Oo, kana mamahimo kon imong unahon ang Diyos diha sa imong pamilyahanong kinabuhi.

[Footnote]

[Hulagway sa panid 5]

Ang usa ka takos nga asawa ginapabilhag maayo

[Hulagway sa panid 7]

Ang Bibliya nagadasig sa mga bana sa pagpanguna diha sa pagsimba sa pamilya