Mahala ang Tinuod nga Kinabuhi

MAO ba lamang kini ang kinabuhi? Pinaagi sa pagdasig kanato nga “makagunit nga hugot sa tinuod nga kinabuhi,” ang Bibliya nagpaila nga adunay labaw pa. (1 Timoteo 6:17-19) Kon ang atong kinabuhi karon dili mao ang tinuod nga kinabuhi, unsa ang tinuod nga kinabuhi?

Ang konteksto sa nag-una nga kasulatan nagapakita nga kini mao ang “kinabuhing walay kataposan” nga angayng gunitan ug hugot sa usa ka tawong mahinadlokon-sa-Diyos. (1 Timoteo 6:12) Alang sa kinabag-an, kini nagkahulogag kinabuhing walay kataposan sa yuta. Si Adan, ang unang tawo, may palaaboton nga mabuhing walay kataposan diha sa usa ka paraiso sa yuta. (Genesis 1:26, 27) Mamatay lamang siya kon siya mokaon gikan “sa kahoy sa kahibalo sa maayo ug daotan.” (Genesis 2:17) Apan tungod kay si Adan ug ang iyang asawa, si Eva, masupilong mikaon gikan niana nga kahoy, gibungat sa Diyos ang silot nga kamatayon. ‘Sa adlaw nga sila mikaon gikan niana,’ sila namatay sa mga mata sa Diyos ug misugod sa ilang pagkahulog ngadto sa pisikal nga kamatayon. Ang ilang kinabuhi dili na mao ang matang sa kinabuhi nga ilang natagamtam sa sinugdan.

Ang Dalan Paingon sa “Tinuod nga Kinabuhi”

Sa paghimo nga posible sa “tinuod nga kinabuhi,” si Jehova nga Diyos mihimog kahikayan sa pagluwas sa katawhan. Aron tabangan kitang makasabot niini nga kahikayan, handurawon nato ang usa ka gamayng pabrika. Ang tanang makina nga diha niana daot ug nakapaproblema sa mga tigpadagan sa makina tungod kay wala sunda sa unang tigpadagan sa makina sa mga tuig nga miagi ang manuwal sa pagpadagan niana ug nagdaot sa tanang makina. Ang bag-ong mga tigpadagan sa makina makahimo lamang sa ilang labing maarangan sa pagtrabaho ginamit ang nahibiling mga makina. Buot ayohon sa tag-iya sa pabrika ang mga makina aron tabangan ang iyang mga tigpadagan sa makina, ug siya nagagahin ug salapi nga kinahanglanon alang niana.

Ang unang ‘tigpadagan sa makina,’ si Adan, wala magpabili sa kinabuhi nga gikasalig kaniya. Busa, gipasa niya ngadto sa iyang kaliwat ang dili-hingpit nga kinabuhi, nga sama sa daot nga makina. (Roma 5:12) Sama sa ulahing mga tigpadagan sa makina sa pabrika, nga dili makausab sa kahimtang, ang kaliwat ni Adan dili makahimo sa pagbaton sa tinuod nga kinabuhi alang sa ilang kaugalingon. (Salmo 49:7) Aron matul-id kining daw walay paglaom nga situwasyon, gipadala ni Jehova sa yuta ang iyang bugtong-gianak nga Anak aron paliton pag-usab ang kinabuhing walay kataposan alang sa katawhan. (Lucas 1:35; 1 Pedro 1:18, 19) Pinaagig pagkamatay sa haladnong kamatayon tungod ug alang sa katawhan, ang bugtong-gianak nga Anak sa Diyos, si Jesu-Kristo, nagtagana sa salapi​—ang kinabuhi nga motumbas nianang kinabuhi nga giwala ni Adan. (Mateo 20:28; 1 Pedro 2:22) Tungod niining bililhong halad, si Jehova karon adunay pasikaranan sa pagtagana sa tinuod nga kinabuhi.

Alang sa masinugtanong katawhan, ang halad lukat ni Jesus magkahulogag kinabuhing walay kataposan diha sa usa ka paraisong yuta. (Salmo 37:29) Kini nga paglaom ginapaabot ngadto sa tanang maluwas “sa gubat sa dakong adlaw sa Diyos nga Labing Gamhanan,” nga gipunting ingong Har–Magedon. (Pinadayag 16:14-16) Kini magpapas sa tanang pagkadaotan gikan sa yuta. (Salmo 37:9-11) Kadtong anaa sa panumdoman sa Diyos nga mamatay una pa nianang panahona pagabanhawon ngadto sa napasig-uling Paraiso sa yuta ug makabatog palaaboton nga makatagamtam sa tinuod nga kinabuhi nga ginatagana alang sa tanang masinugtanon sa Diyos.​—Juan 5:28, 29.

Panginahanglan sa Pagmahal sa Atong Presenteng Kinabuhi

Kini wala magpasabot nga sa husto kita makapakitag kawalay-pagpabili sa pagkabalaan sa atong presenteng kinabuhi. Ang tag-iya sa pabrika mogugol kaha ug panahon ug salapi sa pag-ayo sa makina alang sa usa ka trabahante nga dili mag-amping niana? Hinunoa, dili ba isalig sa tag-iya ang naayo nga makina ngadto sa usa ka tawo nga naningkamot kutob sa iyang maarangan sa pagmintinar sa daang makina?

Ang kinabuhi maoy usa ka bililhong gasa gikan ni Jehova. Ingong mahinatagong tuboran sa maong gasa, buot niyang atong mahalon kana. (Salmo 36:9; Santiago 1:17) Mahitungod sa kabalaka ni Jehova alang sa mga tawo sa yuta, si Jesus miingon: “Bisan ang mga buhok sa inyong mga ulo naihap ang tanan.” (Lucas 12:7) Si Jehova nagbaod sa mga Israelinhon sa dili pagpatay, nga sa kinaiyanhon naglakip sa dili pagpatay sa kaugalingon. (Exodo 20:13) Kini motabang kanato nga likayan ang paghunahuna sa paghikog ingong kapilian.

Kay nahibalo sa mahigugmaong interes ni Jehova sa atong kaayohan, ang mga tawong mahinadlokon-sa-Diyos nagapadapat sa mga prinsipyo sa Bibliya sa pagtimbangtimbang sa presenteng-adlaw nga mga batasan. Pananglitan, tungod kay ang matuod nga mga Kristohanon gibaoran nga ‘hinloan ang ilang kaugalingon sa tanang kahugawan sa unod ug espiritu, nga magahingpit sa kabalaan diha sa kahadlok sa Diyos,’ likayan nila ang tabako ug makagiyan nga mga droga nga makadaot-sa-pangisip.​—2 Corinto 7:1.

Ang interes sa Diyos sa kinabuhi sa tawo dugang makita diha sa iyang tambag nga huptan ang “usa ka malinawong kasingkasing” ug likayan ang imoral nga panggawi. (Proverbio 14:30; Galacia 5:19-21) Pinaagi sa pagsunod niining hataas nga mga sukdanan, kita mapanalipdan gikan sa mga butang sama sa makadaot-sa-panglawas nga kasilag ug mga sakit nga mapasa sa sekso.

Ang kabalaka ni Jehova alang sa mga kinabuhi sa iyang katawhan makita usab diha sa iyang tambag nga likayan ang sobrang pagkaon ug sobrang pag-inom. (Deuteronomio 21:18-21; Proverbio 23:20, 21) Ang mga Kristohanon gipasidan-an nga ang mga tawong dalo ug mga palahubog dili makapanunod sa Gingharian sa Diyos, sa ato pa, sila dili gayod makatagamtam sa tinuod nga kinabuhi. (1 Corinto 6:9, 10; 1 Pedro 4:3) Pinaagig pagdasig sa pagkakasarangan, si Jehova nagatudlo kanato sa pagpahimulos sa atong kaugalingon.​—Isaias 48:17.

Sa dihang ginasunod nato ang mga sukdanan sa Diyos, ginapadayag nato nga kita nagmahal sa atong presenteng kinabuhi. Siyempre, labaw pang makahuloganon ang tinuod nga kinabuhi. Sanglit kini dumalayon, ang matuod nga mga Kristohanon nagpabili niini nga labaw pa kay sa ilang kinabuhi karon. Sa dihang gihalad ni Jesu-Kristo ang iyang kinabuhi, gipasakop niya ang iyang kaugalingon ngadto sa kabubut-on ni Jehova. Ang pagkamasinugtanon ngadto sa iyang Amahan mas hinungdanon pa alang kaniya kay sa iyang kinabuhi dinhi sa yuta. Ang dalan ni Jesus misangpot sa iyang pagkabanhaw ug sa iyang pagkadawat ug imortal nga kinabuhi sa langit. (Roma 6:9) Ang iyang kamatayon nagkahulogan usab ug kinabuhi nga walay kataposan alang sa masinugtanong katawhan nga magpakitag pagtuo diha sa iyang halad lukat.​—Hebreohanon 5:8, 9; 12:2.

Hinungdanong Kasugoan Bahin sa Dugo

Sa pagkatinuod, ang mga sumusunod ni Jesus nagabanaag sa iyang panghunahuna. Gitinguha nila ang pagpahimuot sa Diyos diha sa tanang butang, sama sa gibuhat ni Kristo. Sa usa ka butang, kini mopatin-aw kon nganong sila modumili sa mga pagdugang ug dugo, nga gitawag sa pipila ka mga doktor nga nagaluwas-ug-kinabuhi. Atong tan-awon kon sa unsang paagi ikapakita sa usa ka tawo nga iyang gimahal ang tinuod nga kinabuhi pinaagi sa pagdumili sa mga pagdugang ug dugo.

Sama kang Jesu-Kristo, ang tinuod nga mga Kristohanon nagatinguha nga mabuhi diha sa mga mata sa Diyos, ug kana nagkinahanglag bug-os nga pagsunod Kaniya. Ang Pulong sa Diyos nagabaod sa mga sumusunod ni Kristo: “Padayong magaayad sa mga butang nga gihalad ngadto sa mga idolo ug gikan sa dugo ug gikan sa mga butang nga naluok ug gikan sa pakighilawas.” (Buhat 15:28, 29) Nganong kini nga balaod bahin sa dugo gilakip taliwala sa mga sugo nga pagatumanon sa mga Kristohanon?

Ang Kasugoan nga gihatag ngadto sa mga Israelinhon nagbaod sa paglikay sa dugo. (Levitico 17:13, 14) Ang mga Kristohanon dili ilalom sa Moisesnong Kasugoan. Apan sila nakasabot nga ang sugo sa dili pagkaon ug dugo mas una pa sa Kasugoan; kini gihatag nga una pa ngadto kang Noe human sa Lunop. (Genesis 9:3, 4; Colosas 2:13, 14) Kining sugoa ikapadapat ngadto sa tanang kaliwat ni Noe, nga maoy kagikan sa tanang nasod sa yuta. (Genesis 10:32) Dugang pa, ang Moisesnong Kasugoan motabang kanato nga makita ang katarongan sa pagpasiugda sa Diyos sa pagkabalaan sa dugo. Human did-i ang mga Israelinhon sa pagkaon sa bisan unsang matang sa dugo, ang Diyos miingon: “Ang kinabuhi sa unod anaa sa dugo, ug ako naghatag kaninyo niana aron sa pagtabon sa sala sa inyong mga kalag sa ibabaw sa halaran, kay ang dugo mao ang nagahimo sa pagtabon sa sala tungod sa kinabuhi.” (Levitico 17:11) Ang dugo gireserba sa Diyos aron gamiton sa paghalad diha sa halaran. Ang iyang kasugoan bahin sa pagkabalaan sa dugo nagabutyag sa iyang awtoridad ibabaw sa tanang kinabuhi sa yuta. (Ezekiel 18:4; Pinadayag 4:11) Sa pagpalandong sa atong kinabuhi gikan sa panghunahuna ni Jehova, kita makaamgo nga kini dili atoa kondili kini gikasalig lamang kanato sa Diyos.

Sama nga ang tigpadagan sa makina diha sa atong ilustrasyon gisaligan sa usa ka makina, kita ginasaligan sa atong presenteng kinabuhi. Unsay imong buhaton kon ang imong makina kinahanglang ayohon ug ang usa ka mekaniko misugyot sa pag-ayo niana pinaagi sa paggamit ug mga piyesa nga espesipikong gidili sa manuwal sa pagpadagan niana? Dili ka ba mokonsulta ug laing mga mekaniko sa pagtino kon ang makina maayo nga uyon sa mga instruksiyon sa manuwal sa pagpadagan? Ang kinabuhi sa tawo labaw pang hinungdanon ug komplikado kay sa usa ka makina. Diha sa iyang dinasig nga Pulong, ang manuwal sa pagpatunhay sa kinabuhi sa mga tawo, ginadili sa atong Magbubuhat ang paggamit ug dugo sa pagpatunhay sa kinabuhi. (Deuteronomio 32:46, 47; Filipos 2:16) Dili ba makataronganon ang pagtapot sa mga kinahanglanon niana nga manuwal?

Sa pagkatinuod, ang Kristohanong mga pasyente nga nagahangyog walay-dugong pagtambal sa ilang kahimtang wala magsalikway sa tanang medikal nga pagtambal. Sila nagahangyo lamang sa pagtambal nga magpakitag pagtahod sa ilang kinabuhi​—karon ug sa umaabot. Ang mga doktor nga maisogong nagatahod sa baroganang gihuptan sa mga Kristohanon nagapamatuod sa mga kaayohan sa pagtambal kanila nga uyon sa ilang ginahangyo. “Ang pagkahibalag sa mga Saksi ni Jehova nag-agak kanako ngadto sa usa ka bag-ong hugpong sa mga sukdanan,” matud sa usa ka siruhano nga sa miagi sobrang nagagamit ug dugo. Karon siya naningkamot sa pagtambal nga walay dugo bisan sa dili mga Saksi.

Pagmahal sa Tinuod nga Kinabuhi

Unsa ang bag-ong hugpong sa mga sukdanan nga nakaplagan niini nga siruhano pinaagi sa pagtambal sa mga Saksi ni Jehova? Siya nakasabot na karon nga ang pagtambal sa usa ka pasyente naglakip dili lamang ang bahin sa lawas nga naapektohan sa sakit kondili ang tibuok nga pagkatawo. Dili ba angayng tugotan ang pasyente sa pagpangayog labing maayong pag-atiman alang sa iyang pisikal, espirituwal, ug emosyonal nga kaayohan?

Alang sa 15-anyos nga si Kumiko, ang pagdugang ug dugo aron tambalan ang iyang makamatayng leukemia maoy labing grabeng posibleng kapilian. Ang pagpaningkamot sa pagpatunhay sa iyang kinabuhi pinaagi niini sulod sa pipila ka semana, mga bulan, o bisan mga tuig dili takos sa iyang dumalayong kapildihan. Kay gipahinungod niya ang iyang presenteng kinabuhi ngadto kang Jehova nga Diyos ingong usa sa iyang mga Saksi, iyang gitahod ang pagkabalaan sa kinabuhi ug dugo. Bisag kusganong misupak sa iyang baroganan ang iyang amahan ug ubang mga paryente, si Kumiko mibarog nga malig-on. Kas-a gipangutana siya sa iyang doktor: “Kon ang imong Diyos mopasaylo sa mga kahuyangan, dili ba siya mopasaylo kanimo bisan kon modawat ka sa pagdugang ug dugo?” Si Kumiko wala mokompromiso ug sa ingon isalikway ang iyang pinasukad-sa-Bibliya nga pagtuo. “Padayong hugot nga nangupot sa pulong sa kinabuhi,” siya nagpabilin sa iyang baroganan. (Filipos 2:16) Sama sa giingon sa iyang dili-magtutuo nga apohang babaye, “Dili isalikway ni Kumiko ang iyang pagtuo.” Wala magdugay nausab ang tinamdan sa iyang amahan ug sa iyang apohang babaye ingon man nianang sa mga doktor nga nag-atiman kaniya.

Ang malig-ong pagtuo ni Kumiko diha kang Jehova nga Diyos, kinsa makabanhaw kaniya gikan sa mga patay, nakatandog sa daghang mga kasingkasing. Samtang buhi pa, iyang gihangyo ang iyang amahan: “Bisan kon ako mamatay, ako pagabanhawon sa Paraiso. Apan kon ikaw laglagon sa Har–Magedon, dili ko na ikaw makita. Busa palihog pagtuon sa Bibliya.” Ang iyang amahan padayon lang nga nag-ingon: “Kon ikaw mamaayo, magtuon ako sa Bibliya.” Apan sa dihang namatay si Kumiko tungod sa iyang grabeng sakit, ang iyang amahan nagsukip ug gamayng sulat diha sa iyang lungon nga nag-ingon: “Magkita kita sa Paraiso, Kumiko.” Human sa serbisyo sa paglubong, siya misulti ngadto niadtong mitambong sa paglubong ug miingon: “Gisaaran ko si Kumiko nga magkita kami sa Paraiso. Bisag ako dili pa makatuo niini tungod kay ako wala pay natun-an, ako determinado sa pagsusi niini. Palihog tabangi ako.” Ang uban sa iyang pamilya misugod usab sa pagtuon sa Bibliya.

Si Kumiko adunay tinuod nga pagtahod alang sa kinabuhi ug buot nga mabuhi. Iyang gipabilhan ang tanan nga nahimo sa iyang mga doktor sa pagluwas sa iyang presenteng kinabuhi. Apan, pinaagi sa pagsunod sa mga instruksiyon sa manuwal sa Maglalalang iyang gipamatud-an nga gimahal niya ang tinuod nga kinabuhi. Alang sa minilyon, kana unya maoy kinabuhing walay kataposan diha sa usa ka paraisong yuta. Mahiuban ka ba kanila?