MISIA

Usa ka rehiyon sa AK nga bahin sa Asia Minor. Ang mga utlanan niini daw nabag-obag-o, apan sa sinugdan ang utlanan sa Misia gikan sa K ngadto sa A mao ang Dagat Aegean, ang Hellespont (Dardanelles) ug ang Propontis (Dagat sa Marmara). Ang Bitinia nahimutang dapit sa S ug ang Lydia dapit sa H. (Tan-awa ang ASIA.) Sa panahon sa iyang ikaduhang misyonaryong panaw, si Pablo, nga giubanan ni Silas ug Timoteo, naningkamot sa pag-adto sa Bitinia, apan “ang espiritu ni Jesus wala motugot kanila. Busa sila milabay sa Misia ug milugsong ngadto sa Troas.” (Buh 15:40; 16:1-3, 7, 8) Sanglit ang dunggoanan sa Troas nahimutang sa Misia, tin-awng gipakita niini nga si Pablo ug ang iyang mga kaubanan, bisan tuod miagi sa Misia, wala maglakip niini ingong usa ka bahin sa teritoryo sa ilang misyonaryong kalihokan. Ang ubang mga siyudad sa Misia mao ang Adramito (Buh 27:2), Asos (Buh 20:​13, 14), ug Pergamo.​—Pin 1:11; tan-awa ang TROAS.