PATARA

Ang dunggoanan sa Licia diin si apostol Pablo ug ang iyang mga kaubanan, lagmit niadtong 56 K.P., mibalhin pagsakay sa usa ka sakayan nga molawig paingon sa Fenicia. (Buh 21:​1, 2) Ang Patara karong adlawa gituohan nga mao ang karaang mga kagun-oban sa balangay sa Gelemish sa bukirong HK nga baybayon sa Asia Minor ug nahimutang nga mga 10 km (6 mi) sa S sa bokana sa Suba sa Xanthus (Koca). Kini nahimong dunggoanan sa mga barko gikan sa Italya, Ehipto, Sirya, ug sa ubang mga dapit, ug mao kini ang pangunang dunggoanan sa mga siyudad ubay sa walog sa Suba sa Xanthus.

Sa Buhat 21:1 ang pipila ka karaang mga manuskrito nagdugang sa “ug Mira” human sa Patara. Kon husto kini nga pagdugang, nan ang sakayan nga gisakyan ni Pablo gikan sa Mileto mahimong milabay lang sa Patara o kaha mieskala didto, ug ang pagbalhin ngadto sa laing sakayan nahitabo didto sa Mira, dili sa Patara.