GARISON

Ang Hebreohanong termino nga netsivʹ mahimong magtumong sa usa ka permanenteng pundok sa mga sundalo nga nakapuwesto sa usa ka kampo militar. Ang susamang Hebreohanong pulong nga mats·tsavʹ (nagkampong mga sundalo) adunay sama usab nga ideya.​—1Sa 13:23; 14:​1, 4, 6, 11, 12, 15; 2Sa 23:14.

Ang mga Filistehanon adunay mga garison sa teritoryo sa Israel sa panahon sa mga paghari ni Saul ug David. (1Sa 10:5; 13:​3, 4; 1Cr 11:16) Human mapildi ni David ang Sirya ug Edom, siya nagbutang ug mga garison sa ilang teritoryo aron mapugngan ang rebelyon. (2Sa 8:​6, 14; 1Cr 18:13) Alang sa pakigdait ug kasegurohan sa yuta, si Jehosapat nagbutang ug mga garison didto sa Juda ug sa mga siyudad sa Epraim nga nailog ni Asa. (2Cr 17:​1, 2) Ang presensiya niini nga mga sundalo dakog nahimo sa pagmentinar sa kahusay ug sa pagpanalipod sa mga intereses sa hari diha sa mga teritoryo diin ang lumad nga mga molupyo lagmit morebelde.

Adunay usa ka Romanhong garison didto sa Jerusalem sa unang siglo K.P. Ang ilang kuwartel nahimutang didto sa hataas nga Torre sa Antonia nga sikbit sa nataran sa templo. Sa dihang ang panon sa mga Hudiyo nagguyod kang Pablo paggawas sa templo ug nagtinguha sa pagpatay kaniya, ang mga sundalo sa garison nakakanaog dayon aron sa pagluwas kaniya. (Buh 21:​31, 32) Sa panahon sa Hudiyohanong mga pista, dugang mga tropa ang gidala didto aron palig-onon kini nga garison.​—Tan-awa ang ANTONIA, TORRE SA.