PUTEOLI

Sa unang siglo K.P., usa kini ka pangunang dunggoanan sa HS sa Roma. Si Pablo miabot sa Puteoli sa iyang pagpaingon sa Roma aron moatubang kang Cesar niadtong mga tuig 59 K.P. (Buh 28:13) Pinaagi sa hangin gikan sa H, ang iyang gisakyang barko nakaabot “sa ikaduhang adlaw” didto sa Puteoli gikan sa Regio, usa ka dapit nga mga 320 km (200 mi) dapit sa HHS.

Ang Kristohanong kaigsoonan sa Puteoli naghangyo kang Pablo ug niadtong miuban kaniya nga magpabilin ug usa ka semana uban kanila. (Buh 28:14) Kini nagpakita nga bisan tuod siya binilanggo, siya nakapahimulos ug diyutayng kagawasan. Una pa niana, samtang gitener didto sa Cesarea ug Sidon, sa samang paagi si Pablo nakapahimulos ug limitadong kagawasan.​—Buh 24:23; 27:3.

Ang Puteoli sagad nga gituohang mao ang modernong Pozzuoli, diha sa luok nga pareho niinig ngalan, mga 10 km (6 mi) sa KHK sa Naples. Ang dakong kagun-oban sa usa ka diki makita gihapon didto. Si Josephus nagtawag sa maong dapit pinaagi sa karaang ngalan niini, ang Dicaearchia, ug nag-ingon nga may usa ka kolonya sa mga Hudiyo nga nahimutang didto.​—Jewish Antiquities, XVII, 328 (xii, 1).