Mga Batan-on, Naningkamot ba Kamong Makakab-ot ug Pribilehiyo?
1. Kanus-a ang usa ka batan-ong brader magsugod sa pagpadapat sa 1 Timoteo 3:1?
1 Kon dunay gustong makakab-ot ug pribilehiyo, “siya matinguhaon sa usa ka maayong buhat.” (1 Tim. 3:1) Kini makadasig sa mga brader nga maningkamot aron mokuwalipikar sa mga pribilehiyo sa pag-alagad sa kongregasyon. Kinahanglan ba gayong adulto ka na aron mahimo kini? Mas maayong himoon kini nga tumong samtang batan-on ka pa. Niining paagiha, ikaw mabansay ug imong ikapakita kon takos ba ka nga itudlo ingong ministeryal nga alagad pagkahamtong na nimo. (1 Tim. 3:10) Kon ikaw usa ka batan-ong brader nga bawtismado, sa unsang paagi maningkamot kang makakab-ot ug pribilehiyo?
2. Sa unsang paagi maugmad ug ikapakita ang pagsakripisyo sa kaugalingon?
2 Pagsakripisyo sa Kaugalingon: Hinumdomi nga ikaw nagtinguha sa usa ka maayong buhat, dili sa usa ka titulo. Busa, ugmara ang tinguha sa pagtabang sa mga igsoon. Ang usa ka paagi sa paghimo niini mao ang pagpamalandong sa panig-ingnan ni Jesus. (Mat. 20:28; Juan 4:6, 7; 13:4, 5) Pag-ampo kang Jehova nga tabangan ka sa pagpakitag interes sa uban. (1 Cor. 10:24) Makahatag ka bag praktikal nga tabang sa mga edaran ug luya na sa pisikal diha sa kongregasyon? Moboluntaryo ka ba sa paglampas sa sagbot, pag-mop sa salog, o sa uban pang buluhaton sa pagmentinar sa Kingdom Hall? Makaboluntaryo ka ba sa paghatag ug bahin ingong kahulip diha sa Teokratikanhong Tunghaan sa Ministeryo? Ikaw magmalipayon kon motabang ka sa uban.—Buh. 20:35.
3. Unsa ka hinungdanon ang espirituwalidad, ug sa unsang paagi maugmad kini?
3 Espirituwalidad: Mas importante gayod ang espirituwalidad sa usa ka alagad sa kongregasyon kay sa iyang linaing talento o abilidad. Ang panglantaw sa usa ka espirituwal nga tawo maoy sama sa panglantaw ni Jehova ug Jesus. (1 Cor. 2:15, 16) Makita kaniya ang “bunga sa espiritu.” (Gal. 5:22, 23) Usa siya ka masibotong magmamantala sa Gingharian. (Mat. 6:33) Maugmad nimo ang espirituwal nga mga hiyas kon maayo kag rutina sa personal nga pagtuon. Lakip niini ang pagbasag Bibliya kada adlaw, pagbasa sa matag gula sa Bantayanang Torre ug Pagmata!, ingon man usab ang pagpangandam ug pagtambong sa mga tigom sa kongregasyon. (Sal. 1:1, 2; Heb. 10:24, 25) Sa dihang gidasig ang batan-ong Timoteo sa paghimog espirituwal nga pag-uswag, si Pablo misulat: “Tagda kanunay ang . . . imong pagpanudlo.” (1 Tim. 4:15, 16) Busa tun-i pag-ayo ang imong asaynment sa Teokratikanhong Tunghaan sa Ministeryo. Pangandam ug pakigbahin kanunay sa ministeryo. Paghimog espirituwal nga mga tumong, sama sa pagpayunir, pag-alagad sa Bethel, o pag-eskuyla sa Bible School for Single Brothers, ug paningkamoting makab-ot kini. Ang espirituwalidad motabang nimo aron ‘makakalagiw gikan sa mga tinguha nga iya sa pagkabatan-on.’—2 Tim. 2:22.
4. Unsa ka hinungdanon ang pagkakasaligan ug pagkamatinumanon?
4 Pagkakasaligan ug Pagkamatinumanon: Sanglit ang mga igsoong gitudlo sa pag-apod-apod ug pagkaon sa kabos nga mga Kristohanon sa unang siglo “napanghimatud-ang maayo,” nga nailhang kasaligan ug matinumanon, ang mga apostoles wala na mabalaka kon ang buluhaton maatiman ba. Tungod niini sila nakapokus sa ubang hinungdanong butang. (Buh. 6:1-4) Busa, kon hatagan kag asaynment sa kongregasyon, buhata kini kutob sa imong maarangan. Sundoga si Noe, nga misunod gayod sa mga instruksiyon nga gihatag kaniya sa pagtukod sa arka. (Gen. 6:22) Gipabilhan ni Jehova ang pagkamatinumanon ug kini nagpaila sa espirituwal nga pagkahamtong.—1 Cor. 4:2; tan-awa ang kahong “Ang Kaayohan sa Pagbansay.”
5. Nganong ang batan-ong mga brader kinahanglang maningkamot nga makakab-ot ug pribilehiyo?
5 Ingon sa gitagna, si Jehova nagapadali sa buluhatong pagpanigom. (Isa. 60:22) Sa aberids, mga 250,000 ang mabawtismohan kada tuig. Kay daghang bag-ohan ang midangop sa kamatuoran, gikinahanglan ang kuwalipikadong espirituwal nga mga lalaki aron maatiman ang responsabilidad sa kongregasyon. Karon, misamot ka daghan ang buluhaton diha sa pag-alagad kang Jehova. (1 Cor. 15:58) Mga batan-on, naningkamot ba kamong makakab-ot ug pribilehiyo? Kon mao, kamo matinguhaon gayod sa usa ka maayong buhat!
[Blurb sa panid 2]
Kay daghang bag-ohan ang midangop sa kamatuoran, gikinahanglan ang kuwalipikadong espirituwal nga mga lalaki aron maatiman ang mga responsabilidad sa kongregasyon
[Kahon sa panid 3]
Ang Kaayohan sa Pagbansay
Ang kuwalipikadong mga brader makabenepisyo kon ang mga ansiyano maghatag ug asaynment ug magbansay kanila. Usa ka magtatan-aw sa sirkito ang naglingkod sa may plataporma samtang nagdasig sa usa ka magmamantala. Namatikdan niyang may batan-ong lalaki nga nagtindog sa duol, busa gipangutana niya kini kon gusto ba kining makigsulti niya. Matod sa batan-on, giasayn siya sa pag-vacuum sa plataporma kada human sa tigom. Ang iyang mga ginikanan gusto nang mouli, apan di siya gustong mouli nga di mahimo ang iyang asaynment. Busa ang magtatan-aw sa sirkito mipahawa sa entablado. Siya mikomento: “Ang mga ansiyano sa maong kongregasyon alisto sa pagbansay sa kuwalipikadong mga batan-on pinaagi sa paghatag kanilag asaynment sa kongregasyon. Busa pagduaw nako sa maong kongregasyon, sagad may irekomendar silang batan-ong mga brader ingong ministeryal nga alagad.”