ANDRONIKO

[Nagapangdaog sa Tawo].

Usa ka matinumanon nga Kristohanong Hudiyo sa kongregasyon sa Roma nga gipangomosta ni Pablo. Si Pablo nagtawag kang Androniko ug Junia nga “akong mga paryente.” Bisan tuod ang Gregong pulong nga gigamit dinhi (syg·ge·nesʹ) mahimong magkahulogan nga “katagilungsod” sa halapad nga diwa niini, apan ang pangunang kahulogan niini maoy “kadugo sa samang henerasyon.” Ang konteksto nagpaila nga si Androniko lagmit nga paryente gayod ni Pablo. Sama kang Pablo, si Androniko nakaagom ug pagkabilanggo, ug nianang panahona usa ka “tawong inila” taliwala sa mga apostoles, ug nahimong usa ka Kristohanon nga una pa kang Pablo.​—Rom 16:7.