JASON

[lagmit gikan sa lintunganayng pulong nga nagkahulogang “nag-ayo”].

Usa ka prominenteng Kristohanon sa Tesalonica kinsa ‘nag-abiabi kang Pablo ug Silas’ sa ilang unang panaw paingon sa Macedonia. Ang usa ka magubtanong panon sa nasina nga mga Hudiyo miatraka aron sa pagkuha kang Pablo ug Silas gikan sa balay ni Jason, apan, kay wala makakaplag kanila didto, si Jason ang ilang gidala ug gihimo siyang pangunang akusado sa mga sumbong sa pag-alsa batok kang Cesar. Si Jason ug ang uban pa nga kauban niya gibuhian human makahatag ug “igong piyansa.”​—Buh 17:5-10.

Sa sulat ni Pablo ngadto sa mga taga-Roma, nga gisulat gikan sa Corinto sa panahon sa sunod niyang panaw agi sa Macedonia ug Gresya, gilakip niya ang mga pangomosta ni Jason. (Rom 16:21) Kon siya mao ra ang Jason sa Tesalonica, siya tingali miadto sa Corinto, lagmit kauban ni Pablo. Siya gitawag nga usa ka “paryente” ni Pablo, nga mahimong magkahulogan nga siya iyang katagilungsod, bisan tuod nga ang pangunang kahulogan sa Gregong pulong maoy “kadugo sa samang kaliwatan.” Kon siya usa ka suod nga unodnong paryente ni Pablo, natural lamang nga si Pablo didto moestar kaniya sa Tesalonica.