Ang Hunahuna sa Bibliya

Homoseksuwalidad—Nganong Dili?

“Sa akong hunahuna ang Diyos walay pagtagad bahin sa hilig sa sekso sa usa. Siya matinagdanon kon sa unsang paagi kita nagakinabuhi. Ug ang sekso dili mao ang bililhon.”—Membro sa usa ka pundok sa mga homoseksuwal nga nagatuon ug Bibliya.

ANG nagkadaghang tawo nagadawat sa homoseksuwalidad ingong kapaingnan lamang nga paagi sa kinabuhi. Uyon ba ang Diyos?

Bisag giusab sa daghang tawo ang ilang hunahuna ug ang uban wala makahukom, tin-aw ingon sa kristal ang hunahuna sa Bibliya: “Dili ka makigsekso sa usa ka lalaki sama nga uban sa usa ka babaye. Kini usa ka butang dulumtanan,” nagaingon ang Bibliya. (Levitico 18:22, The New Jerusalem Bible) Walay mga pamalibad, walay mga pagtugot, walay kahanap—ang homoseksuwalidad maoy dulumtanan sa panan-aw sa Diyos.a Alang sa karaang mga Israelinhon nga nagkinabuhi ilalom sa Moisesnong Kasugoan, ang silot maoy kamatayon. (Levitico 20:13) Ug sa pag-abot sa Kristiyanidad, ang pagtunglo sa Diyos sa homoseksuwalidad nagpadayon.—1 Corinto 6:9, 10.

Supak ang Diyos—Ngano?

Apan nganong ang Diyos magahion sa pagsupak niini? Ang usa ka hinungdan gipahayag sa Isaias 48:17: “Ako, si Jehova, mao ang imong Diyos, ang Usa nga nagatudlo kanimo sa pagpahimulos sa imong kaugalingon, ang Usang nagapalakat kanimo sa dalan nga imong pagalaktan.” Kanang mga pulonga nagagikan sa Tagmugna sa unibersohanong mga balaod sa kinaiyahan. Nasayod siya sa atong pisikal, mental, emosyonal, ug espirituwal nga pagkagama. Siya supak sa homoseksuwalidad tungod kay, apil sa uban pang butang, dili kini makahatag kaayohan sa indibiduwal. Ang pagsubli sa sulat ni Pablo ngadto sa mga Kristohanon nga nagpuyo sa Roma nagapamatuod niini. Misulat siya:

“Kana ang hinungdan gitugyan sila sa Diyos ngadto sa makauulaw nga mga gana sa sekso, kay ang ilang mga babaye nag-ilis sa kinaiyanhong kagamitan sa ilang kaugalingon ngadto sa usang supak sa kinaiyahan; ug maingon man usab nga bisan ang mga lalaki mibiya sa kinaiyanhong kagamitan sa babaye ug nasunog sa ilang kaulag sa usag usa, ang mga lalaki uban sa mga lalaki, nga nagbuhat kon unsay malaw-ay ug nagadawat sa ilang kaugalingon sa bug-os nga balos, nga nahiangay sa ilang sala. Ug maingon nga sila wala mouyon sa pagtuo sa Diyos diha sa tukmang kahibalo, ang Diyos nagtugyan kanila ngadto sa dili-kahimut-anang panghunahuna, sa pagbuhat sa mga butang dili angay.”—Roma 1:26-28.

Matikdi, ang homoseksuwalidad gitawag dili lamang “makauulaw,” “malaw-ay,” ug “dili angay” kondili “supak sa kinaiyahan” usab. Mahitungod niining mga bersikuloha, ang usa ka taho gikan sa Church of England nagaingon: “Ang gipasabot ni Pablo sa ‘dili kinaiyanhon’ maoy ‘dili kinaiyanhon’ alang sa katawhan diha sa sumbanan sa kalalangan sa Diyos. Ang tanang homoseksuwal nga kagawian maoy pagbulag sa laraw sa kalalangan sa Diyos.” Ang antropologo nga si Weston LaBarre nagtawag niining “pagpakyas sa bililhong lawasnong kinaiya” sa kaugalingon ug sa iya sa uban. Kini nahiuyon sa kahulogan sa Gregong pulong nga gigamit sa Bibliya ug gihubad nga “kinaiyanhon” o, “sumala sa kinaiyahan.”

Dili katingad-ang ang bisan unsang “pagbulag gikan sa laraw sa kalalangan sa Diyos” nagaanig daotang mga bunga (sumala sa gipadayag sa timawang rekord sa tawo uban sa silinganan). Ang mga homoseksuwal ‘nagadawat sa ilang kaugalingon sa bug-os nga balos, nga maoy nahiangay sa ilang sala.’ Sa laing mga pulong, ang ilang kinabuhi mahimong kinabuhi sa dili-kinaiyanhong kahiwian sa sekso; busa, usa ka kinabuhing wala kahimut-i sa Diyos. Dugang pa, sila basin makaagom ug lawasnong kadaot tungod sa ilang mga kahiwian.b

Daotang mga Bunga

Si Pablo miingon usab nga ang mga homoseksuwal “manginit [sa literal, masunog] sa ilang kaulag sa usag usa.” Samtang ang daotang hunahuna makapaypay sa daotang mga kailibgon bisan sa mga relasyon sa lalaki ug babaye, mopatim-aw nga sa pagdahom sa mahilayong relasyon sa sekso, mas kusog ang dilaab sa mapatuyangong kaulag. Ang “Usa ka Peligrosong Dobleng Kinabuhi sa Gugma,” usa ka artikulong gipatik sa magasing Newsweek, miingon: “Ang mga lalaki ug mga babayeng makigsekso sa dobleng sekso kadaghanan maghisgot sa ‘kusog kaayong’ kagana, sa ‘lahi nga kusog’ masinati nila uban sa pareho nilag sekso. Si James nahinumdom nga kini maoy ‘sama sa pagsalom sa kahanginan. Kadto makapahubog, lalim nga pagbati.’” Tungod kay sa ingon nanginit, daghang homoseksuwal may kapid-ang kaparis (ang pipila may ginatos), ug alang sa pipila ang ilang kawalay-pugong nagatukmod nila sa pagbatog sekso sa daghang beses sa usa ka adlaw, bisan uban sa bug-os nga mga estranghero. Kining kawaypili sa sekso dili lamang mohatod sa mananakod nga mga sakit, sama sa hepatitis, kondili mopausbaw sa pangabugho, kawalay-kasegurohan, ug kasubo, sama ra sa ginahimo niini diha sa waypiling mga relasyong tali sa lalaki ug babaye o heteroseksuwal.

Sa dihang ang usa ka tawo mopahiuyon sa “maibogong gana sa sekso,” siya mahimong ulipon niana. (1 Tesalonica 4:5) Sa unsang gidak-on? Nga nagtumong sa AIDS, usa ka homoseksuwal miangkon: “Bisan moatubang sa lisod kaayo, mangil-ad nga kamatayon, ang aghat sa sekso maoy kusog nga aghat.” Kini mopahinumdom sa pasidaan sa Bibliya: “Ayaw itugot nga ang sala mopadayon sa paghari diha sa inyong himalatyong mga lawas aron nga inyong pagasugton ang ilang mga pangibog.”—Roma 6:12.

Sanglit ang seksuwal nga imoralidad gipasukad ilabina sa pagtagbaw-sa-kaugalingon, kini kadaghanan mohatod sa labi pang mangil-ad nga mga buhat. Ug tungod sa nahulog nga tawhanong kinaiyahan, sa dihang ang usa ka buhat mahimong kasagaran, ang kaukyab niana lagmit magkahupas. Busa, ang pipila ka homoseksuwal mipadayon ngadto sa sadomasochism ug sa ubang labihan ka daotang mga buhat.c Ang usa ka komentarista sa Bibliya nagaingon nga “ang epekto sa maong talamayon ug dili-kinaiyanhong kusog nga mga pagbati . . . lagmit magdaot sa hunahuna; aron iunlod ang tawo sa ubos nganha sa lebel sa mananap; aron dugmokon ang pagkamabination.” Ang usa ka eskolar sa Bibliya naglumpong sa homoseksuwalidad uban sa “mga krimen, nga bug-os supak sa gahom sa pangatarongan, sa kinaiyahan, ug sa kaugalingon nilang kaayohan ug sa usag usa.”

Mga Sukdanan sa Bibliya Mopatunghag Kalinaw

Makapasalamat kitang ang Diyos dili magausab sa iyang mga sukdanan aron tagbawon lamang ang umalaging gusto o hiwing mga pangibog sa mga tawo. Maingon nga dili siya mouyon sa paghugaw sa yuta o sa pagbakak tungod kay buot kanang buhaton sa daghang tawo, siya dili usab mokonsentir sa homoseksuwalidad bisag daghan ang madasigong nagaduso niana. Walay sapayan kon unsay ipasiugda sa mga tawo nga pagkinabuhi, buot ni Jehova nga ato siyang pasidunggan ug kita makabatog kaayohan.

Salamat lamang, gisalikway sa pipila ang maong mga buhat ug nagpahiuyon sa “maayong pagtulon-an” nga hikaplagan diha sa Pulong sa Diyos. (1 Timoteo 1:10; 1 Corinto 6:9-11) Sumala sa giingon sa usa ka kanhi nagapraktis nga homoseksuwal: “Ang makahatag kanakog kalipay mao nga karon ako may hinlong konsensiya, ug ako nasayod nga ako nagakinabuhi sa kinabuhing kahimut-anan sa Diyos nga Makagagahom sa Tanan.”

[Mga footnote]