Nakahinumdom Ka Ba?
Gihatagan ba nimog maampingong pamalandong ang dili pa dugayng mga gula sa Ang Bantayanang Torre? Kon mao, malagmit makahinumdom ka sa mosunod:
◻ Ang pipila ba ka dinihogang mga Kristohanon makalabang buhi sa “dakong kasakitan” ug mopuyo sa yuta sa makadiyot nga panahon sa dili pa dad-on sa langit?—Pinadayag 7:14.
Wala pihoa kini sa Bibliya. Ang pipila ka mga asoy sa Bibliya maorag nagpasabot nga ang mga dinihogan makapuyo ngadto sa bag-ong kalibotan. Apan, minilyon niadtong naglaom nga mabuhi sa walay kataposan sa yuta nakadawat na sa gikinahanglang pagbansay aron mapalampos ang bag-ong kalibotan. Busa, ang gamayng nahibilin dili na kinahanglan niining buluhatona, ug ang Diyos mahimong mopili nga dad-on sila sa langit alang sa “kaminyoon sa Kordero” human sa kalaglagan sa relihiyosong bigaon, ang “Dakong Babilonya.” (Pinadayag 18:2, 10; 19:2, 7, 8)—8/15, panid 31.
◻ Uban sa unsang motibo nga batonan sa usa diha sa iyang kasingkasing sa pagkahimong usa ka Kristohanong magtatan-aw? (1 Timoteo 3:1)
Ang usa ka tawong nagatinguha sa katungdanan sa pagkamagtatan-aw, magbuhat niana nga mapainubsanon tungod kay buot niyang moalagad sa uban. Sa dihang siya sa ingon gipalihok sa matarong nga motibo, kini nga aksiyon sa iyang bahin moresulta sa espirituwal nga mga panalangin sa tanang nalangkit.—9/1, panid 18.
◻ Nganong si apostol Pablo wala mawad-ig kadasig bisan pa sa tanan niyang giantos?
Si Pablo nagbatbat: “Mahimo ko ang tanang butang pinaagi kaniyang nagapalig-on kanako.” (Filipos 4:13) Si Pablo wala gayod mosulay sa pagdala sa iyang kaugalingong palas-anon nga iya lang. Hinuon, siya naglantaw kang Jehova sa pagpalig-on kaniya. (Salmo 55:22)—9/1, pahina 30.
◻ Unsay gipasabot sa giingon ni Pablo sa Efeso 4:26: “Pagkasuko kamo, apan ayaw pagpakasala”?
Kining mga pulonga miangkon nga ang usa ka tawo malagmit may katarongan nga masuko, apan sa dihang kini mahitabo, ang tawo angayng dili magpabilin ‘diha sa nasuko nga kahimtang hangtod nga masalopan sa adlaw.’ (Efeso 4:26) Ngano? Tungod kay kini mohatag sa Yawa ug higayon nga pahimuslan ang usa, malagmit moagda kaniya sa pagbuhat ug daotan, aron maangkon niya ang dili pag-uyon sa Diyos. (Salmo 37:8, 9)—9/15, panid 21.
◻ Unsang dakong kalainan ang naglungtad tali sa paagi sa pagtudlo sa mga Saksi ni Jehova ug sa paagi sa mga klero sa Kakristiyanohan?
Ang mga Saksi ni Jehova nagtudlo uban ang awtoridad sa Pulong sa Diyos, samtang ang klero sa Kakristiyanohan nagpasukad sa ilang pagtulon-an sa pagano relihiyosong tradisyon gikan sa Babilonya ug Ehipto.—10/1, panid 25.
◻ Alang sa unsang labing hinungdanong katarongan nga ang Anak sa Diyos mianhi sa yuta?
Si Jesus mianhi sa yuta alang sa pangunang katuyoan sa paghusay sa isyu nga gibangon ni Satanas mahitungod sa pagkasoberano ni Jehova.—10/15, panid 13.
◻ Sa pagtawag sa sekular nga mga awtoridad nga “superyor,” gilangkat ba nato ang dungog nga angayan kang Jehova? (Roma 13:1)
Wala, sanglit si Jehova labaw pa kay sa “superyor” lamang. Siya “ang Soberanong Ginoo,” “ang Supremong Usa.” (Salmo 73:28; Daniel 7:18, 22) Ang sekular nga mga awtoridad maoy superyor lamang kon bahin sa ubang mga tawo ug diha sa ilang kaugalingong katungdanan sa trabaho. Sila maoy responsable sa pagdumala ug pagpanalipod sa mga komunidad.—11/1, panid 12.
◻ Nganong ang gugma labing dako sa siyam ka bunga sa espiritu sa Diyos nga gihisgotan sa Galacia 5:22, 23?
Ang laing walo ka bunga sa espiritu sa Diyos maoy kapadayagan, o nagkalainlaing aspekto, sa gugma, ang usa nga gihisgotan pag-una. Kining tanang ubang mga bunga sa espiritu maoy hinungdanong mga hiyas, apan sila dili magpulos kanato kon kita kulang sa gugma. (1 Corinto 13:3)—11/15, panid 14.
◻ Unsay mga benepisyo sa pag-ampo alang sa isigkamagtutuo?
Kon atong giapil ang espirituwal nga kaayohan sa uban diha sa atong pag-ampo, kita mas masuod kanila diha sa inigsoong gugma. Kita usab may kahangawa kanila, nakig-ambit sa ilang intereses ug mga kaguol. Busa, ang bisan unsang mga kapait, maluka, naghatag luna sa makapalig-ong mga hunahuna nga maghimo kanatong mahigugmaon ug mangayaon.—11/15, mga panid 21-2.
◻ Unsa ang makapatukmod nga mga katarongan sa pagsimba kang Jehova nga Diyos?
Angay natong simbahon si Jehova tungod kay siya mao ang Maglalalang ug ang iyang mga hiyas nagpasuod kanato ngadto kaniya. (Deuteronomio 32:3, 4; 1 Juan 4:8; Pinadayag 10:6) Ang Bibliya nag-ingon: “Ang diyosnong debosyon mapuslanon gayod sa tanang butang, sanglit naghatag kini ug paglaom sa kinabuhi karon ug sa umalabot.” (1 Timoteo 4:8) Walay laing diyos gawas kang Jehova ang makasaad sa maong sangpotanan ug unya tumanon ang iyang saad.—12/1, mga panid 6-7.