“Ang Inyong Kahago Dili Kawang”
1 Pagkamakapadasig nga hunahuna! Ang imong kahago sa pag-alagad kang Jehova dili kawang. (1 Cor. 15:58) Sa kasukwahi, hunahunaa kon sa unsang paagi ang mga tawo nanlimbasog sa pagsulay sa pagpauswag sa ilang kahimtang sa kinabuhi o ilang pinansiyal nga kahimtang. Sila tingali mangagpas ug tag-as nga edukasyon sa katuigan o mokayod aron mouswag sa materyal. Bisan pa niana, tungod sa ‘panahon ug wala damhang panghitabo,’ sila tingali dili gayod makakab-ot sa kabantog nga ilang gitinguha, o sila tingali mapugos nga magmakontento sa diyutay kaayong materyal kay sa ilang gusto. Sama sa “paggukod sa hangin,” ang ilang mga paningkamot maoy kawang. (Eccl. 1:14; 9:11) Nan, pagkahinungdanon nga kita adunay daghang buhatonon sa bugtong buluhaton nga dili kawang tungod kay kini adunay malungtarong bili!
2 Ang Buluhaton nga Hinungdanon Gayod: Ang pagsangyaw sa maayong balita sa Gingharian sa Diyos mao ang labing hinungdanong buluhaton sa yuta. Mao kini ang buluhaton nga kinahanglang himoon maminaw man o dili ang mga tawo. Buot natong moingon, sama sa gisulti ni Pablo: “Ako hinlo gikan sa dugo sa tanang tawo, kay wala ako magpugong sa pagsulti kaninyo sa tanang gimbut-an sa Diyos.”—Buh. 20:26, 27.
3 Sa dihang ang mga tawo maminaw ug mosanong sa mensahe sa Gingharian, pagkamakapalipay niana! Usa ka batan-ong babaye namatyag iyang iyaan. Siya nahibulong kon diin miadto ang iyang iyaan—sa langit ba o sa impiyerno? Siya miampo sa Diyos alang sa tabang, ginamit ang ngalang Jehova, ingon sa gitudlo sa iyang igsoong babaye nga buhaton niya. Sa wala magdugay siya nagtuon na sa Bibliya ug nagtambong sa Kristohanong mga tigom. Siya nakabaton ug bug-os bag-ong panglantaw sa kinabuhi ug miundang sa iyang mga kalangkitan sa mga gang sa kalye. Ang batan-ong babaye miundang sa pagpanabako, pagdroga, ug pagpangawat. Siya miangkon: “Ang gugma kang Jehova mao lamang ang nagpabiya kanako sa maong daotang dalan sa kinabuhi. Si Jehova lamang diha sa iyang dakong kaluoy ang makahatag kanakog paglaom sa walay kataposang kinabuhi.” Wala na niya gamita ang iyang kinabuhi sa kawang nga mga pangagpas.
4 Bisan kon ang mga tawo modumili sa pagpaminaw, imong malampos sa gihapon ang butang nga hinungdanon. Sila nahibalo nga ang mga Saksi ni Jehova miduaw kanila. Ang imo mismong integridad, pagkamatinumanon, ug gugma napamatud-an. Busa, kawang ba ang imong kahago sa buluhaton sa Ginoo? Dili gayod!