Ang Diyos Mao ang Nagpatubo​—Gibuhat ba Nimo ang Imong Bahin?

HANDURAWA ang talan-awon. Naa ka sa usa ka tanaman nga matahom, nga gilibotan sa hatag-as nga kakahoyan, labong nga mga tanom, ug tapoktapok sa mga bulak nga magilakon ang mga kolor. Ang balili nga berde-esmeralda midulhog ngadto sa giatiman-kaayong mga tampi sa sapa nga mikanaas sa tin-aw samag kristal nga tubig. Walay nagdaot sa talan-awon. Kay nakadayeg, nangutana ka kon kinsay nagbuhat nianang matahom nga dapit. Sa pagtubag ang hardinero mapaubsanong miingon nga ang Diyos mao ang nagpatubo sa tanang butang.

Natural lang, ikaw nahibalo niana. Ug mahinumdom ka sa mga pulong sa hardinero inig-abot nimo sa balay ug makakita sa imong kaugalingong walay-atiman nga tugkaran, nga walay nagatubo nga makapadani, nagtipun-og ang basura, ug puno sa tubig-ulan ang ngil-ad nga mga lungag sa yuta. Sa dulot nagtinguha ka sa pagbaton ug usa ka tanaman nga sama sa imong bag-ong giduaw. Busa, kay hugot nagtuo sa mga pulong sa hardinero, moluhod ka ug tim-os moampo sa Diyos nga patuboon ang nindot nga mga bulak diha sa imong tugkaran. Unsay mahitabo? Siyempre, wala.

Unsay ikasulti sa espirituwal nga pagtubo? Tingalig ikaw dulot nagtinguha nga makakita nga ang mga butang motubo sa espirituwal nga paagi, sama sa bag-ong mga tinun-an nga mosanong sa kamatuoran sa Pulong sa Diyos o sa imong kaugalingong espirituwal nga pag-uswag. Ug tingali tim-os kang moampo kang Jehova nga ipatungha ang maong pagtubo, tungod sa halalom nga pagtuo nga siya may gahom sa pagbuhat niana. Apan ang imong dulot nga tinguha ba, tim-os nga pag-ampo, ug pagsalig sa gahom sa Diyos sa kaugalingon mopahinabo sa pagtubo?

Ang Diyos Mao ang Nagpatubo

Tingali gibati nimo nga ang imong bahin sa pagpatunghag espirituwal nga tinuboan maoy dili bililhon, gani walay kahulogan. Dili ba si apostol Pablo nagsugyot niini sa 1 Corinto 3:5-7? Siya misulat: “Nan, unsa ba diay si Apolos? Oo, unsa man si Pablo? Mga ministro nga pinaagi kanila kamo nahimong mga magtutuo, sumala sa gitugot sa Ginoo sa matag usa. Ako ang nagtanom, si Apolos ang nagbisibis, apan ang Diyos mao ang nagpatubo; mao nga ang may bili dili ang nagtanom o ang nagbisibis, apan ang Diyos nga mao ang nagpatubo.”

Sa husto giila ni Pablo nga sa dihang motubo ang mga butang, ang tanang pasidungog moadto sa Diyos. Ang usa ka hardinero tingali mag-andam sa iyang yutang tamnan, magpugas sa iyang binhi, ug mag-atiman pag-ayo sa mga tanom, apan sa kataposan maoy tungod sa kahibulongang gahom sa panglalang sa Diyos nga ang mga butang motubo. (Genesis 1:11, 12, 29) Apan, unsay ipasabot ni Pablo sa dihang siya nagaingon “ang may bili dili ang nagtanom o ang nagbisibis”? (“Dili ang mga hardinero uban sa ilang pagtanom ug pagbisibis ang bililhon,” The New English Bible.) Iya bang gipakamenos ang bahin sa tinagsa ka ministro sa paghimog bag-ong mga tinun-an, nga nagpasabot nga ang kataposang sangpotanan dili mohimog kalainan kon sa unsang paagi ginatuman nato ang atong ministeryo?

“Ang May Bili Dili ang Nagtanom”

Hinumdomi nga niining bahina sa iyang sulat, si Pablo wala maghisgot sa Kristohanong ministeryo apan sa kabuangan sa pagsunod ug mga tawo inay kay kang Jesu-Kristo. Ang pipila sa Corinto naghinobra sa pagpabili sa iladong mga alagad ni Jehova, sama kang Pablo ug Apolos. Ang uban nagpasiugda sa pundokpundok ug nagbayaw sa mga tawong naghunahuna nga labaw sila kay sa ilang Kristohanong mga igsoon.​—1 Corinto 4:6-8; 2 Corinto 11:4, 5, 13.

Ang pagdayeg ug mga tawo niining paagiha dili maayo. Kini unodnong panghunahuna, ug mopatungha kinig pangabugho ug panag-away. (1 Corinto 3:3, 4) Gipakita ni Pablo ang sangpotanan sa maong panghunahuna. Siya miingon: “Ang mga panagbangi nagalungtad sa inyong taliwala. Ang akong ipasabot mao kini, nga matag usa kaninyo nagaingon: ‘Ako iya ni Pablo,’ ‘Apan ako iya ni Apolos,’ ‘Apan ako iya ni Cefas,’ ‘Apan ako iya ni Kristo.’”​—1 Corinto 1:11, 12.

Busa, sa misulat siya, “ang nagtanom ug ang nagbisibis dili bililhon” (Phillips), gibugno sa apostol ang maong unodnong panghunahuna, nga gipasiugda ang panginahanglan nga motan-aw kang Jesu-Kristo ingong Pangulo ug moila nga ang tanang pagdayeg tungod sa pagtubo diha sa kongregasyon moadto sa Diyos. Ang mga apostoles ug ubang mga ansiano maoy mga alagad lamang sa kongregasyon. Walay mausa ang angay mabayaw ni sila mismo magtinguha sa dungog o pagkailado. (1 Corinto 3:18-23) Busa ang nagtanom ug ang nagbisibis dili bililhon, matud ni Pablo, “kon itandi kaniya nga nagahatag sa kinabuhi sa binhi.”​—1 Corinto 3:7, Phillips.

Mga Isigkamagbubuhat sa Diyos

Busa, sa pagsulti niini si apostol Pablo wala magpakamenos sa bili sa atong bahin sa pagtanom ug pagbisibis. Siya wala magpasabot nga kita mosugod sa paghunahuna, “ang Diyos magpatubo sa mga butang sa iyang kaugalingong panahon,” ug unya mohirag lamang ug maghulat nga buhaton niya kana. Siya nahibalo nga kon unsay atong ginabuhat ug sa unsang paagi ginabuhat nato kana may epekto sa pagtubo sa mga butang.

Kanay hinungdan nga si Pablo kanunayng nagdasig sa mga Kristohanon nga magkugi diha sa ilang ministeryo ug pauswagon ang ilang mga kahanas ingong mga magtutudlo. Hunahunaa ang tambag nga iyang gihatag ngadto sa batan-ong lalaking si Timoteo. “Bantayi kanunay ang imong kaugalingon ug ang imong pagpanudlo. Magpabilin niining mga butanga, kay sa pagbuhat niini maluwas mo ang imong kaugalingon ug silang nagapatalinghog kanimo.” (1 Timoteo 4:16) “Ako ugdang magatugon kanimo . . . , iwali ang pulong, buhata kini nga dinalian . . . , uban ang bug-os hataas-nga-pailob ug arte sa pagpanudlo. . . . Tumana sa bug-os ang imong ministeryo.” (2 Timoteo 4:1, 2, 5) Walay kahulogan ang pagkugi ni Timoteo sa pagpauswag sa iyang mga kahanas kon ang iyang pagtanom ug pagbisibis walay epekto sa pagpatubo sa mga butang.

Sama kang Pablo ug Apolos, ikaw usab mahimong makabaton sa dili-masukod nga pribilehiyo sa pag-alagad nga usa sa mga isigkamagbubuhat sa Diyos. (1 Corinto 3:9; 2 Corinto 4:1; 1 Timoteo 1:12) Sa ingon niana, ang imong buluhaton maoy hinungdanon. Ang hardinero dili magdahom nga sa milagroso ipatungha sa Diyos ang matahom nga tanaman nga walay pagkugi sa bahin sa hardinero. Kinahanglan bang malahi sa espirituwal nga pagtubo? Tinong dili. Sama sa mag-uuma nga mapailobong “nagapaabot sa bililhong bunga sa yuta,” kinahanglang kita magbudlay una sa atong kaugalingon sa pagtanom ug pagbisibis, nga magpaabot samtang kana ginapatubo sa Diyos.​—Santiago 1:22; 2:26; 5:7.

Buhata ang Imong Bahin

Sanglit, sumala sa giingon ni apostol Pablo, “ang matag tawo magadawat sa iyang kaugalingong ganti sumala sa iyang kaugalingong pagbudlay,” maayong mangutana kita sa atong kaugalingon kon giunsa nato pagbudlay.​—1 Corinto 3:8.

Ang eksperto sa pagpananom nga si Geoffrey Smith miingon: “Walay espesyal nga mga kuwalipikasyon ang gikinahanglan aron mahimong hardinero, interes lamang sa mga tanom.” (Shrubs & Small Trees) Sa susama, walay kinaiyanhong espesyal nga mga kuwalipikasyong gikinahanglan aron kita mahimong mga isigkamagbubuhat sa Diyos, ang tinuod lamang nga interes sa mga tawo ug kaandam nga gamiton sa Diyos.​—2 Corinto 2:16, 17; 3:4-6; Filipos 2:13.

Tagda ang pila sa maayong tambag nga gihatag sa hanas nga mga hardinero. Sumala sa giingon sa usa ka awtoridad, kon ang bag-ohang hardinero andam mamati niadtong mas eksperyensiado kay kaniya, “ang tumutuon daling mahimong eksperto.” Ug, matud niining samang awtoridad, “ang eksperto kanunay nagapangitag butang bag-o nga makat-onan.” (The Encyclopedia of Gardening) Andam ka bang nagadawat sa tabang ug pagbansay nga gitagana ni Jehova aron ikaw makatanom ug makabisibis nga epektibo? Kon mao, bisan kon ikaw bag-o sa buluhaton o eksperyensiado niana, imong maugmad ang dugang mga kahanas ingong isigkamagbubuhat sa Diyos ug sa ingon mahimong “may igong katakos sa pagtudlo sa uban.”​—2 Timoteo 2:2.

Kon siya andam mamati ug makakat-on, matud ni Geoffrey Smith, “ang bag-ohan makalikay sa kinagrabehang mga lit-ag.” Kon mamati kita sa pagtultol nga ginahatag ni Jehova pinaagi sa iyang Pulong ug iyang organisasyon, buhaton nato ang mga butang sa iyang paagi. Atong malikayan unya, pananglitan, ang mga lit-ag sama sa binuang nga pakig-ergo batok niadtong buot lamang makig-away o makiglalis mahitungod sa mga pulong.​—Proverbio 17:14; Colosas 4:6; 2 Timoteo 2:23-26.

Ang laing maayong tambag sa pagpananom mao ang pagpalandong pag-ayo sa mga butang sa dili pa modali sa pagkalot sa yuta. “Sa dili pa mosugod sa pagkalot,” matud sa The Encyclopedia of Gardening, “gugola ang panahon sa mahilomong pagbanabana [sa imong mga palaaboton].” Ikaw ba mabitik sa lit-ag nga magdali sa pagsulod sa Kristohanong ministeryo nga walay paghunahuna una nga maampingon ug mainampoon kon unsay buot nimong malampos ug kon sa unsang paagi mahimo kana sa labing maayo? Himoang tin-aw ang imong mga tumong sa dili pa mosugod. Pananglitan, hunahunaa ang matang sa mga tawo nga tingali imong mahibalag ug ang mga suliran nga imo tingaling maatubang, ug magmaandam sa pagsulbad niini. Kini motugot kanimo sa “pagkabig sa kadaghanang tawo [samtang ikaw] mahimong tanang butang alang sa katawhan sa tanang matang.”​—1 Corinto 9:19-23.

“Ayaw Papahulaya ang Imong Kamot”

Kon kita nag-apresyar sa pribilehiyo sa pag-alagad ingong mga isigkamagbubuhat sa Diyos, kita dili magdaginot sa atong bahin sa panagkombuya. “Sa buntag ipugas ang imong binhi ug ayaw papahulaya ang imong kamot hangtod sa gabii; kay ikaw wala masayod kon hain kini magmalamposon, dinhi kaha o didto, o kon silang duha sama nga magmaayo.” (Ecclesiastes 11:6) Ang kataposang mga resulta anaa sa mga kamot ni Jehova, apan magaani lamang kita kon kita makugihon una sa pagpugas.​—Ecclesiastes 11:4.

Walay tanaman ang sukad nahimong matahom pinaagi sa labing gamay, taphaw nga pagkalot ug pagsabod sa mga binhi. Sa susama, labaw ang gikinahanglan diha sa Kristohanong ministeryo kay sa labing gamay nga bahin sa pagpanagtag sa mga basahon sa Bibliya. Ingong mga isigkamagbubuhat sa Diyos, kinahanglang kita sa makugihon ug sa bug-os magmantala sa maayong balita mahitungod sa Gingharian sa Diyos, nga pangitaon kadtong mahiligon sa pagkamatarong. (Buhat 13:48) Hinumdomi ang prinsipyo sa mga pulong ni apostol Pablo sa 2 Corinto 9:6: “Siya nga nagapugas ug tagidyot magaani ug tagidyot; ug siya nga nagapugas ug daghan magaani usab ug daghan.”

Sama sa tanang maayong hardinero, kita nagasulay sa pagtanom sa maayong yuta. Ugaling, sa dihang may itanom bisan sa labing maayong yuta, kana dili matapos dinha. Matud ni Geoffrey Smith: “Kini wala magpasabot nga sa dihang ikatanom na wala nay gikinahanglan gikan sa tawong responsable gawas ang pagrelaks na lamang.” Dili, aron motubo ang mga butang, ang paningkamot gikinahanglan sa pagbisibis ug pagsalipod sa mga tanom.​—Itandi ang Proverbio 6:10, 11.

Sa pagkatinuod, ang Kristohanong ministeryo tingali magkahulogan sa tagdugay nga mga yugto sa pagbudlay sa dihang mopatim-aw nga morag walay dakong nahimo. Apan sa kalit, ug usahay wala dahoma, mahimong mosunod ang kahibulongang mga resulta. Si Geoffrey Smith nag-ingon: “Ang pagpananom gilangkoban sa tagdugayng mga yugto sa rutinang pagbudlay nga sinal-otan sa mga gutlo sa kinalabwang katahom nga ang tanang pagkalot, pagbunglay, ug pagkabalaka mahikalimtan.” Ikaw usab mahimong makabaton ug mga gutlo sa kinalabwang katagbawan sa dihang ang madawatong kasingkasing mosanong sa mensahe sa kamatuoran​—basta ikaw andam nga mohimo sa unang pagkalot, pagtanom, pagbunglay, ug pagbisibis.​—Itandi ang Proverbio 20:4.

Si Pablo ug si Apolos nasayod nga ang ilang buluhatong pagwali sa Gingharian ug paghimog tinun-an wala makapaangkon nilag espesyal nga pagkainila diha sa Kristohanong kongregasyon. Ilang nasabtan nga ang Diyos mao ang nagpatubo sa mga butang. Sa gihapon, sila nagtanom ug nagbisibis​—nga makugihon. Hinaot nga atong sundon ang ilang panig-ingnan ug magtanyag sa atong kaugalingon ngadto sa Diyos ingong “mga ministro nga pinaagi kanila [ang uban nahimong] mga magtutuo.”​—1 Corinto 3:5, 6.

[Hulagway sa panid 23]

Ang Diyos mao ang nagpatubo sa mga butang​—apan ang hardinero nagabuhat usab sa iyang bahin