‘Pagpugas ug Daghan, Magaani ug Daghan’
“Siya nga nagapugas ug diyutay magaani ug diyutay; ug siya nga nagapugas ug daghan magaani ug daghan.”—2 CORINTO 9:6.
1. Nganong si Jehova nga Diyos mao ang labing malipayong persona sa uniberso?
ANG atong Diyos si Jehova maoy usa ka “malipayong Diyos.” Sa walay duhaduha ang usa ka katarongan mao nga siya dagayang Maghahatag. Ang iyang Anak, si Jesu-Kristo, mibatbat: “Mas dako ang kalipay sa paghatag kay sa pagdawat.” (1 Timoteo 1:11; Buhat 20:35) Walay bisan usa ang nakahatag ug labaw kay kang Jehova—sukad sa iyang pagpatungha sa iyang bugtong Anak, ang Logos, hangtod sa presenteng panahon. Busa sa walay duhaduha siya mao ang labing malipayong persona sa tibuok uniberso.
2, 3. (a) Sa unsang paagi nagpugas ug daghan ang Diyos? (b) Nganong ikaingong nakaani ug makaani pag daghan si Jehova?
2 Ang kaamgid nga prinsipyo ang gipadayag diha sa 2 Corinto 9:6: “Siya nga nagapugas ug diyutay magaani ug diyutay; ug siya nga nagapugas ug daghan magaani ug daghan.” Pagkadaghan sa gipugas ni Jehova kon bahin sa iyang mga buhat sa kalalangan! Ang iyang Pulong naghisgot ug ginatos ka milyong mga espirituhanong mga linalang. (Pinadayag 5:11) Matikdi usab ang dili maisip nga mga galaksiya sa daghag bitoong kalangitan, nga ang matag usa adunay libolibo ka milyong mga bitoon. Kon kita manaog niining yutaa, pagkadagahan sa gagmayng nagkalainlaing mga butang, may kinabuhi ug walay kinabuhi, nga gilalang ni Jehova! Tinuod nga ‘ang yuta puno sa iyang mga binuhat.’ (Salmo 104:24) Dugang pa, pagkadaghan sa iyang gihatag kanato diha sa atong hunahuna, sa atong mga igbalati, ug sa atong lawas! Tinuod gayod nga kita “katingalahang pagkabuhat.”—Salmo
139:14.
3 Walay duhaduha bahin niana, dagayang nagpugas si Jehova. Dili lamang sa iyang mga buhat sa kalalangan kondili sa iyang mga pakig-atubang sa iyang yutan-ong mga linalang. Apan, siya ba, nakaanig daghan? Oo! Sa unsang paagi? Sa pagkaagi nga siya nakabaton sa nangagi, ug sa karon, ug sa umaabot ug daghan kaayong intelehenting mga linalang nga mag-alagad kaniya tungod sa gugma. Ang ilang pagbuhat niini nakahatag kalipay sa kasingkasing ni Jehova, ilabina kay nagpamatuod kini nga bakakon ang mabiaybiayong Yawa.—Proverbio 27:11.
4. Sa unsang paagi ang prinsipyo sa 2 Corinto 9:6 aplikado sa tanang panahon, lakip sa atong kaugalingong panahon?
4 Nasudlan ang Bibliya ug daghang pamatuod nga, sugod sa Logos, daghang matinumanong mga alagad ni Jehova nga Diyos nakapugas usab ug daghan ug nakaanig daghan. Ingon gayod niini ang nahitabo, sanglit ang mga prinsipyo ni Jehova aplikado sa tanang panahon ug sa tanang mga indibiduwal. Busa, ang prinsipyo bahin sa pagpugas tinuod usab diha sa imong kinabuhi.
5, 6. (a) Unsang mga kaaway ang nakahatag kanatog kalisdanan sa pagpugas ug daghan? (b) Andam kita sa pagbuhat ug unsa, ug diha sa unsang mga bahin sa atong balaang pag-alagad?
5 Bisan pag puno ang Kasulatan sa mga katarongan ug mga pananglitan sa atong pagpugas ug daghan, dili kini masayong butang nga buhaton. Ngano? Tungod kay kita adunay tulo ka kaaway nga kusganong nagabatok sa atong paghimo niini. Una, anaa ang atong kaugalingong napanunod nga kiling sa pagkadalo. Atong mabasa diha sa Genesis 8:21: “Ang kiling sa kasingkasing sa tawo daotan sukad pa sa iyang pagkabata.” Gipahibalo usab kita sa Pulong sa Diyos nga ang kasingkasing sa tawo malimbongon ug mapangahason. (Jeremias 17:9) Ikaduha, ato pang sagubangon ang kapig-otan sa daotang kalibotan, nga anaa sa gahom sa usa nga daotan. (1 Juan 5:19) Ikatulo, ang Yawa mismo andam sa pagtukob kanato kon dili kita magbantay.—1 Pedro 5:8.
6 Alisto ka ba kanunay niadtong tulo ka kaaway? Tungod niining maong mga kaaway, kinahanglang maikagon kita sa ‘pagpamati sa tambag ug sa pagdawat sa disiplina, aron magmaalamon kita sa atong umaabot.’ (Proverbio 19:20) Sa pagkatinuod, kinahanglang sundon nato ang gihimo ni apostol Pablo, ‘sa pagpanton sa atong lawas ug sa paghimo kanilang ulipon,’ kay basig madaog kita sa kataposan. (1 Corinto 9:27) Ang prinsipyo nga kon kita magpugas ug daghan kita makaanig daghan aplikado sa nagkalainlaing bahin sa balaang pag-alagad nga ginahimo sa tanang Kristohanong mga saksi ni Jehova. Oo, bisan asa pa kita motan-aw, atong makitang aplikado kining prinsipyoha: sa atong personal nga pagtuon, sa atong pagtambong sa tigom, sa atong mga pag-ampo, sa atong pagsangyaw sa pormal ug dipormal nga paagi, ug sa atong mga relasyon sa pamilya.
Pagpugas ug Daghan may Labot sa Pagtuon sa Bibliya
7, 8. (a) Aron makapugas ug daghan may labot sa atong personal nga pagtuon sa Bibliya, unsa ang angay natong batonan? (b) Unsang mga tumong ang kinahanglan natong hikayon, ug sa unsang paagi atong makab-ot kini?
7 Aron mahimong mabungahong mga ministro ni Jehova nga Diyos, kinahanglang magpugas una kita ug daghan kon bahin sa atong personal nga pagtuon sa Bibliya. Kinahanglang tinguhaon nato nga makabaton ug mainitong espirituwal nga gana, nga nagapabili nga dili lamang sa materyal nga mga butang nga kita mabuhi. Uban sa tanang mga kabalaka ug kalihokan sa adlaw-adlawng kinabuhi nga nagapiit kanato, nagkinahanglan kita ug mahunahunaong paningkamot aron mainitong makahibalo sa atong espirituwal nga panginahanglan. (Mateo 13:19) Maayong magpakita kitag personal nga pagpabili sa Pulong sa Diyos sama sa salmista sa dihang siya misulat: “Nalipay ako sa imong pulong ingon sa usa nga nakakaplag ug daghang mga inagaw.”—Salmo 119:162.
8 Ang tinong tabang niini mao ang atong pagsunod sa tambag sa ‘pagbantay pag-ayo sa atong pagkinabuhi dili ingon nga mga buangbuang kondili ingong tawong maalamon, nga nagapalit sa kahigayonan.’ (Efeso 5:15, 16) Tingali gusto nimong susihon ang imong kaugalingon niining bahina. Pangutana: Gihikay ko ba ang akong mga kalihokan aron makapanahon sa pagbasa sa kada usa sa magasing Bantayanang Torre ug Pagmata! inigula nila? Komusta usab ang Yearbook, maingon man sa mga libro ug ubang mga basahon nga atong makuha diha sa mga kombensiyon? Tingali dili kita makakita kanunay ug mga oras sa pagbasa kanila, apan pinaagi sa pagkahimong alisto kita makakitag pila ka minuto matag karon ug unya sa pagbasa ug kapitulo sa Bibliya o usa ka artikulo sa magasin. Nakahikay ang daghang mga Kristohanon sa pagbangon ug 10 o 15 minutos nga mas sayo sa adlaw-adlaw aron sa pagbasa sa panahon nga alerto sila. Nakita sa uban nga makabasa silag daghan samtang nagabiyahe diha sa publikong sakyanan. Ikaw komusta?
9. Sa unsang paagi makaani kitag daghan may labot sa atong personal nga pagtuon sa Bibliya?
9 Pinaagi sa pagpugas ug daghan niining paagiha, makalaom usab kita nga makaanig daghan. Sa unsang paagi? Sa paagi nga kita makabaton ug mas lig-ong pagtuo, mas masanagong paglaom, ug malipayon ug positibong panghunahuna. Labaw pa niana, mas masangkapan pa kita sa pagpamatuod sa uban. Makadugang kita sa makadasig nga pagsultihay ug makatabang sa atong mga igsoon sumala sa itugot sa higayon. Matikdi sumala sa 1 Timoteo 4:15, 16 kon unsa ang resulta.
Pagpugas ug Daghan may Labot sa Pagtambong sa Tigom
10. Unsa ang angay natong tinamdan bahin sa atong mga tigom?
10 Tingali mangutana ka: Kini bang maong prinsipyo sa pag-anig daghan kon kita nagapugas ug daghan aplikado usab sa atong pagtambong sa mga tigom sa kongregasyon? Siyempre! Bation nato ang gibati sa salmistang si David sa miingon siya: “Nalipay ako sa pag-ingon nila kanako: ‘Mangadto kita sa balay ni Jehova.’” Oo, kinahanglang bation nato ang kaikag sa pagpakigtigom sa atong mga igsoon.—Salmo 122:1.
11, 12. Sa unsang paagi makapugas ug makaani kitag daghan may labot sa pagtambong sa atong mga tigom?
11 Unsay gikinahanglan niini kanato? Nagkahulogan kini sa regular ug matinumanong pagtambong sa atong lima ka senemanang mga tigom, dili tugotan ang dili maayong panahon o gamayng kaluya sa lawas nga maoy pasangil sa atong pagpabilin sa balay. Ka pila nga nakita nato ang panahon—init kun tugnaw, nag-ulan o wala—nga nakababag sa pagtambong sa tigom? Apan, kon mas daghang kababagan ang atong buntogon aron makatambong, mas dakong panalangin ni Jehova ang ihatag kanato. Kita makapugas usab ug daghan pinaagi sa pag-abot ug sayo aron matagamtam ang makadasig nga pagsultihay sa dili pa ang mga tigom, ug sa dili pagpauli dayon alang sa samang katuyoan. Komusta ka niining bahina? Paningkamotan ba nimong makapugas ka pag daghan? Nalangkit usab ang pagpangandam ug maayo alang sa Pagtuon sa Bantayanang Torre ug sa ubang mga tigom. Ang katarongan niini aron nga kita makapugas ug daghan pinaagi sa pagkomento sumala sa itugot sa higayon.
12 Sa unsang mga paagi nga makapaabot kita nga makaanig daghan gikan niini? Dili kita makahimog makadasig nga tubag kon kita mismo wala madasig; kita dili makapalipay sa nagmasulob-ong kalag kon ang atong kaugalingong kasingkasing dili malipayon. Oo, kita dili makapahayag sa atong kaugalingon sa pagkomento diha sa mga tigom kon dili nato palig-onon ang atong kaugalingong pagtuo sa mga kamatuoran nga atong ginapamulong. Simple lang kini: “Ang kalag nga mahinatagon mahimong matambok, ug kadtong dagayang magabisbis dagayang pagabisbisan.”—Proverbio 11:25.
Pagpugas ug Daghan may Labot sa Atong mga Pag-ampo
13, 14. Sa unsang paagi kita (a) makapugas ug daghan, (b) makaanig daghan, may labot sa atong mga pag-ampo?
13 Ang Kasulatanhong prinsipyo sa pagpugas ug daghan aplikado usab sa atong personal nga mga pag-ampo. Ang ato bang mga pag-ampo balikbalik na, mekanikal, soblisobli, o nagatubod ba gayod sila sa kasingkasing? Lakip ba niini dili lang ang mga hangyo kondili kinasingkasing nga pagdayeg ug pasalamat, ug, may mga panahon, nagapangaliyopo? Maugdang ba natong gitagad ang bililhong pribilehiyo sa pag-ampo? Ato bang gihikyad ang atong mga kasingkasing sa atong langitnong Amahan? O magdalidali ba kita sa atong mga pag-ampo, ug usahay walay panahon sa pag-ampo? Ang Kristohanon Gregong Kasulatan nagpakita nga importante ang pag-ampo sa kinabuhi ni Jesu-Kristo ug apostol Pablo.—Lucas 6:12, 13; Juan 17:1-26; Mateo 26:36-44; Filipos 1:9-11; Colosas 1:9-12.
14 Sa usa ka sukod nga kita nagapugas ug daghan kon bahin sa atong mga pag-ampo, nianang sukora nga kita makalaom sa pag-anig daghan pinaagi sa pagtubag ni Jehova kanila ug sa atong pagkabaton ug maayong relasyon kaniya. Ang mga pag-ampo sa pamilya makapasuod sa mga sakop sa usa nga nagaampo. Atong ibutang sa hunahuna usab ang mga pulong ni Jesus diha sa Mateo 7:7: “Padayon sa pagpangayo, ug kamo pagahatagan; padayon sa pagpangita, ug kamo makakaplag; padayon sa pagpanuktok, ug kamo pagaablihan.”
Pagpugas ug Daghan may Labot sa Atong Ministeryo
15. Diin ilabinang matagamtam ang daghang pagpugas ug pag-ani?
15 Tingali wala nay uban pang butang sa atong tema ang nakitang mas tin-aw kay sa atong ministeryo. Tataw, kon mas daghang panahon ang atong igugol niana, mas posible nga makaani kita sa paagi sa makaikag nga mga eksperyensiya, mabungahong mga pagbalik duaw, ug mabungahong mga pagtuon sa Bibliya, nga moresultag mga sulat sa rekomendasyon.—2 Corinto 3:2.
16, 17. (a) Unsa ang gikinahanglan kanato sa pagpugas ug daghan may labot sa pag-alagad sa kanataran? (b) Sa pagbuhat niini, unsay atong mapaabot nga mga resulta?
16 Apan, ang bililhon sa pagpugas ug daghan sa pag-alagad sa kanataran, dili ang gidaghanon kondili ang kalidad. Buot kita nga mahimong “mainiton sa espiritu” kon makigbahin sa ministeryo. (Roma 12:11) Kinahanglang atong atubangon ang mga tawo nga may kagawasan sa pagsulti, uban sa mainit, mahigalaong pahiyom. Aplikado kana kon magpamalaybalay man kita o makigbahin sa pagsangyaw sa dalan. Kon mabatonan sa atong pinulongan, ang bag-ong giya sa pagsangyaw nga Reasoning From the Scriptures makatabang kanatong tanan aron mahimong mas episyente, ug mas mabungahon, makaanig daghan gikan sa panahon ug kusog nga atong igugol sa ministeryo.
17 Ug dili ba ang pagpugas ug daghan may labot sa atong ministeryo sa kanataran nagkahulogan usab sa pagkamakugihon sa paghinumdom sa dapit nga kita nakakaplag ug interes? Nalangkit niana mao ang atong pagdawat sa kaakohan sa pagduaw ug balik ug sa pagpalambo nianang interesa sa usa ka punto nga makasugod ug pagtuon sa Bibliya sa balay kon mahimo. Labaw pa niana, kinahanglang mag-amping kita sa pagtukod ug dili masunog nga mga materyal. Kini nagkahulogan nga magapanudlo kita nga may pagtuo, apan may empatiya ug pagsabot, mataktikahong nagadani sa mga estudyante sa Bibliya kon unsay ilang gibati bahin sa mga prinsipyo sa Bibliya. Pinaagi lamang sa pagpugas ug daghan niining bahina nga kita makalaom nga makapatunghag Kristohanong mga personalidad nga makasukol sa mga pag-atake ni Satanas ug sa iyang sistema sa mga butang.—1 Corinto 3:12-15.
Pagpugas ug Daghan may Labot sa Relasyon sa Pamilya
18. Unsang tambag ang kinahanglang atong ibutang sa hunahuna may labot sa atong relasyon sa pamilya?
18 Ang teokratikanhong prinsipyo nga kita makaani sumala sa atong ginapugas aplikado usab sulod sa sirkulo sa pamilya. Dinhi atong hinumdoman ang pulong ni Jesus diha sa Lucas 6:38: “Bansaya ang panghatag, ug kamo pagatagaan. Ang takos nga pinaugdo, dinasok ug tinantan, ug magaawas, igabutang ra unya diha sa inyong sabakan. Kay ang takos nga inyong igahatag mao usab unya ang takos nga inyong pagadawaton.”
19. Sa unsang paagi ang mga bana ug mga asawa makapugas ug daghan ug makabaton ug kaayohan niini?
19 Adunay daghang mga higayon nga ang mga bana ug mga asawa makapugas ug daghan pinaagi sa mapinanggaong mga buhat sa pagkamahunahunaon ug pagkamahinatagon! Mihatag si apostol Pablo ug maayong tambag diha sa Efeso 5:22-33. Palihog basaha kining mga bersikuloha samtang maghunahuna ug mga paagi aron makapugas ka ug daghan. Sa usa ka sukod nga ang Kristohanong asawa tinuod nga mapinasakopon, matinabangon, ug mapaluyohon, nianang sukora nga siya makaanig daghan. Sa unsang mga paagi? Sa kainit ug mapabilhong pagbati sa iyang bana, siya matukmod sa pagmahal kaniya ingong iyang kaugalingong lawas. Maingon man, sa usa ka sukod nga ang Kristohanong bana maningkamot sa pagpakitag konsiderasyon nga giawhag diha sa 1 Pedro 3:7 ug sa dili mahakugong gugma nga gipasiugda diha sa Efeso 5:28, 29, sa ingon nga sukod nga siya makalaom sa pag-ani sa pagkamapinasakopon ug sa maunongong pagpaluyo sa iyang asawa.
20. Sa unsang paagi aplikado ang pagpugas ug daghan sa pagmatuto sa mga anak, ug uban sa unsang mga resulta?
20 Dili usab nato kalimtan ang atong responsabilidad sa atong mga anak sa pagdisiplina ug sa pagpahamatngon diha kang Jehova. (Efeso 6:4) Sa pagkatinuod, una kini sa ubang teokratikanhong mga buluhaton ug mga pribilehiyo. Ikasubong isulti, kini maoy prinsipyo nga gipasagdan sa ubang Kristohanong mga ginikanan. Sa laing bahin, ang mga ginikanan kinahanglang andam sa pagsakripisyo sa mga kalingawan ug mga kaharuhay alang sa emosyonal ug espirituwal nga kaayohan sa ilang mga anak, sa paggugol ug igong panahon kanila ug sa paghatag kanilag gugma. Sa laing bahin, ang mga ginikanan kinahanglang magpakitag kalig-on. Sila gitambagan: “Sawaya ang imong anak ug siya magahatag kanimo ug pahulay ug magahatag ug kalipay sa imong kalag.” Pagpugas niining mga paagiha, ug hayan makaani kag daghan pinaagi sa pagbaton ug maghuhupot sa integridad nga mga anak nga nagtahod ug mobating suod kanimo.—Proverbio 29:17.
Himoa ang Imong Kaugalingon nga Mangangani sa mga Kaayohan!
21, 22. Unsang nagkalainlaing mga paagi nga kita makapugas ug makaanig daghan kon bahin sa atong balaang pag-alagad ug sa relasyon sa pamilya?
21 Busa, atong nakita, nga ang prinsipyo nga makaani kita sumala sa paagi sa atong pagpugas aplikado sa tanang bahin sa Kristiyanidad. Kon magapugas kitag daghan may labot sa atong personal nga pagtuon sa Bibliya, kita makaanig malig-ong pagtuo, masanagong paglaom, ug pagkamainandamon alang sa atong ministeryo. Kon kita magapugas ug daghan may labot sa atong mga tigom, atong mapalig-on ang atong pagtuo, ug kita makalig-on sa pagtuo sa uban. Kon magapugas kitag daghan may labot sa atong mga pag-ampo, makaanig kitag maayong relasyon sa atong langitnong Amahan ug tubagon ang atong mga pag-ampo. Ug kon magpugas kita ug daghan may labot sa atong pagsangyaw, makapahimulos kita sa personal, ug kita makapaabot nga makabaton ug mga sulat sa rekomendasyon nga ikapakita tungod sa atong mga paningkamot.
22 Busa, dili usab nato kalimtan nga aplikado kining prinsipyoha sa atong relasyon sa pamilya. Pinaagi sa pagpugas ug daghan sa mahigugmaong konsiderasyon ug mga buhat sa pagkamahinatagon, kita ingong mga bana, mga asawa, ug mga ginikanan, o mga anak makalaom nga makaanig panimalaynong kinabuhi nga dagaya sa magantihong pag-ubanay ug mga eksperyensiya. Makahatag usab kini ug maayong pamatuod niadtong anaa sa gawas, nga nagarekomendar sa atong paagi sa kinabuhi.
23. Unsang tambag ang maayo natong pamation?
23 Busa tugoting ang matag usa ka Kristohanong saksi ni Jehova mangutana sa iyang kaugalingon: Makahimo ba ako sa pagpugas ug daghan? Ang mga pulong ni Pablo diha sa 1 Tesalonica 4:1 bililhon: “Sa kataposan mga igsoon, kami nagahangyo ug nagapangamuyo kaninyo diha sa Ginoong Jesus, maingon nga kamo nanagpakadawat sa pahamangno gikan kanamo kon unsaon sa pagkinabuhi ug sa pagpahimuot sa Diyos, sumala sa inyong ginabuhat karon, nga unta padayon ninyong buhaton kini sa mas bug-os pa.” Oo, pasagding paningkamotan natong tanan ang pagpugas ug daghan aron makaani kita ug daghan, sa kadayegan ni Jehova ug sa panalangin sa atong kaugalingon ug sa atong mga igsoon.
Mga Punto sa Pagrepaso
◻ Sa unsang paagi sulondan si Jehova sa kamatuoran nga makita sa 2 Corinto 9:6?
◻ Unsay imong mahimo aron makaanig daghan may labot sa pagtuon sa Bibliya ug sa Kristohanong mga tigom?
◻ Sa unsang paagi makapugas ug makaani kag daghan may labot sa pag-alagad sa kanataran?
◻ Unsang praktikal nga mga lakang ang makatabang sa imong pamilya sa pagpugas ug sa pag-anig daghan?