Ang Hunahuna sa Bibliya
Sayop ba nga Mahimong Mapasigarbohon?
DUNAY naandang panultihon nga ang garbo mao ang una sa pito ka makamatayng mga sala. Apan, daghan karon nagtuo nga ang maong ideya kinaraan kaayo. Sa pagsugod sa ika-21ng siglo, ang garbo giisip nga usa ka kaayohan, dili sala.
Ugaling lang, sa dihang maghisgot ang Bibliya bahin sa garbo, sagad nga kini dili-maayog ipasabot. Ang basahon sa Bibliya sa Proverbio lamang aduna nay daghang pahayag nga nagsaway sa garbo. Pananglitan, ang Proverbio 8:13 nag-ingon: “Ang pagbayaw-sa-kaugalingon ug garbo ug ang daotang dalan ug ang baba nga mahugaw ug sinultihan akong gidumtan.” Ang Proverbio 16:5 nag-ingon: “Ang tanan nga garbosog kasingkasing dulumtanan kang Jehova.” Ug ang bersikulo 18 nag-ingon: “Ang garbo nagauna sa pagkalaglag, ug ang mapahitas-ong espiritu nagauna sa pagkapandol.”
Garbo nga Makadaot
Ang garbo nga gisaway diha sa Bibliya mahubit ingong di-timbang nga pagtamod-sa-kaugalingon, di-makataronganong pagbati sa pagkalabaw labot sa mga kahanas, katahom, bahandi, edukasyon, ranggo, ug uban pa, sa usa ka tawo. Kini madayag diha sa mayubitong panggawi, pagpanghambog, pagkaway-batasan, o pagkamapahitas-on. Ang sobrang paghunahuna sa kaugalingon mahimong motultol sa dili-pagdawat sa gikinahanglang pagtul-id; pagdumili sa pagdawat sa kasaypanan ug sa pagpangayog-pasaylo, pagsibog, ug pagkadili-gustong maulawan; o sa di-makataronganong pagkasuko sa gibuhat o gisulti sa usa ka tawo.
Ang garboso tingali moinsistir kanunay nga himoon ang mga butang sumala sa ilang gusto o maayo pang dili na lang himoon. Dayag nga ang maong tinamdan sagad moresulta ug lainlaing matang sa personal nga kabangian. Ang garbo sa rasa o nasyonalidad mitultol sa di-maihap nga mga gubat ug sa pag-ulag dugo. Sumala sa Bibliya, garbo ang nakaingon nga nagtukmod sa usa ka espiritung anak sa Diyos sa pagrebelde, nga naghimo sa iyang kaugalingon nga Satanas nga Yawa. Maylabot sa mga kuwalipikasyon sa Kristohanong mga ansiyano, si Pablo nagtambag: “Dili usa ka tawo nga bag-ong nakabig, kay basin unyag siya moburot sa garbo ug mahulog sa paghukom nga gikapakanaog nganha sa Yawa.” (1 Timoteo 3:6; itandi ang Ezequiel 28:13-17.) Kon mao kini ang mga resulta sa garbo, dili ikahibulong nga ang Diyos nagsaway niana. Apan, ikaw tingali mangutana, ‘Wala bay mga kahimtang nga ang garbo mahimong makataronganon?’
Duna bay Makataronganong Garbo?
Diha sa Kristohanon Gregong Kasulatan, ang berbong kau·khaʹo·mai, nga gihubad nga “magpasigarbo, maghugyaw, manghambog,” gigamit diha sa negatibo ug positibong diwa. Pananglitan, si Pablo miingon nga kita mahimong ‘maghugyaw, pinasukad sa paglaom sa himaya sa Diyos.’ Siya nagrekomendar usab: “Siya nga nagapanghambog, papanghamboga siya diha kang Jehova.” (Roma 5:2; 2 Corinto 10:17) Kini nagpasabot sa pagpasigarbo kang Jehova isip atong Diyos, usa ka pagbati nga mahimong motultol kanato sa paghugyaw tungod sa iyang maayong ngalan ug reputasyon.
Sa pag-ilustrar: Sayop ba ang pagtinguha sa pagdepensa sa usa ka maayong ngalan sa dihang kini gipasipalahan? Siyempre dili. Kon ang mga tawo mosultig daotan bahin sa mga membro sa imong pamilya o sa uban nga imong gihigugma ug gitahod, dili ka ba masuko ug mapukaw sa pagdepensa kanila? “Ang usa ka [maayong] ngalan pagapilion inay kay sa daghang bahandi,” matod sa Bibliya. (Proverbio 22:1) Sa usa ka higayon, ang Labing Gamhanang Diyos miingon sa usa ka garbosong Paraon sa Ehipto: “Tungod niini nga katuyoan nga gipapadayon ko ikaw nga buhi, aron ipakita kanimo ang akong gahom ug aron ang akong ngalan igasangyaw sa tibuok yuta.” (Exodo 9:16) Busa ang Diyos nagmalipayon sa iyang maayong ngalan ug reputasyon ug masiboton alang niini. Kita usab mahimong interesado sa pagdepensa sa ato mismong maayong ngalan ug reputasyon apan dili matukmod sa pagpangandak ug mahakogong garbo.—Proverbio 16:18.
Ang pagtahod hinungdanon sa bisan unsang maayong relasyon. Ang atong sosyal nga kinabuhi ug mga pakiglabot sa negosyo madaot sa dihang mawad-an kitag pagsalig sa atong mga kauban. Sa susama, ang duyog nga kalihokan o panag-uban hayan madaot kon bisag usa lamang sa mga tigpasiugda niini makahimog usa ka butang nga makadaot sa iyang dungog o sa iyang mga kauban. Aron makab-ot ang mga tumong, bisag unsa man kini, ang reputasyon kinahanglang ipatunhay. Kini mao ang usa ka hinungdan kon nganong ang mga magtatan-aw sa Kristohanong kongregasyon kinahanglang adunay “maayong panghimatuod” gikan sa mga tagagawas. (1 Timoteo 3:7) Ang ilang tinguha alang sa maayong ngalan gipalihok, dili tungod sa magarbohong pagbayaw-sa-kaugalingon, kondili tungod sa panginahanglan sa paghawas sa Diyos diha sa takos ug maligdong nga paagi. Kon buot sabton, katuohan ba ang usa ka ministro nga dili maayog panghimatuod gikan sa mga tagagawas?
Komosta na man ang garbo sa personal nga mga kalamposan? Tagda, pananglitan, ang kalipay nga bation tingali sa mga ginikanan sa dihang maayo ang lakat sa ilang anak diha sa eskuylahan. Ang maong kalamposan maoy usa ka tinubdan sa nahiangayng katagbawan. Sa dihang nagsulat ngadto sa mga isigka-Kristohanon sa Tesalonica, gipadayag ni Pablo nga siya nalipay usab sa mga kalamposan: “Kami obligado nga kanunayng magpasalamat sa Diyos alang kaninyo, mga igsoon, ingon nga kini nahiangay, tungod kay ang inyong pagtuo nagatubo sa hilabihan ug ang gugma sa matag usa ug ninyong tanan nagauswag ngadto sa usag usa. Ingong resulta kami mismo nagapasigarbo kaninyo taliwala sa mga kongregasyon sa Diyos tungod sa inyong paglahutay ug pagtuo diha sa tanan ninyo nga mga paglutos ug mga kasakitan nga inyong ginaagwanta.” (2 Tesalonica 1:3, 4) Oo, ang kinaiyanhong kiling mao ang pagkalipay tungod sa kalamposan sa mga hinigugma. Busa, unsay nagpaila sa sayop nga garbo gikan sa hustong garbo?
Dili sayop nga magtinguha nga mapatunhay ang atong personal nga reputasyon, nga molampos, ug nga magmalipayon tungod sa maong kalamposan. Ugaling, ang pagbayaw-sa-kaugalingon, pagkamapahitas-on, ug pagpanghambog bahin sa kaugalingon o sa uban maoy mga butang nga gisaway sa Diyos. Makapasubo gayod kon adunay magsugod sa ‘pagburot’ tungod sa garbo o sa ‘paghunahunag labaw bahin sa iyang kaugalingon kay sa gikinahanglan.’ Ang mga Kristohanon walay luna alang sa garbo o alang sa pagpanghambog diha kang bisan kinsa o sa bisan unsa gawas kang Jehova nga Diyos ug sa iyang nahimo alang kanila. (1 Corinto 4:6, 7; Roma 12:3) Ang propeta nga si Jeremias naghatag kanato ug usa ka maayong prinsipyo nga sundon: “Pasagdi nga ang usa nga nanghambog bahin sa iyang kaugalingon manghambog bahin sa iyang kaugalingon tungod niining butanga mismo, ang pagbaton ug pagsabot ug ang pagbaton ug kahibalo maylabot kanako, nga ako si Jehova, ang Usa nga nagapasundayag ug mahigugmaong-kalulot, hustisya ug pagkamatarong diha sa yuta.”—Jeremias 9:24.
[Hulagway sa panid 20]
“Papa Inocentes X,” ni Don Diego Rodríguez de Silva Velázquez
[Credit Line]
Scala/Art Resource, NY