Mga Batan-on Nangutana . . .

Ang Diyos Magpabilin Bang Akong Higala?

SI Haring David maoy usa ka tawo nga dunay pakighigala sa Diyos. Apan sa usa ka punto siya miingon: “Midaghan ang mga kasakitan sa akong kasingkasing.” Si David nag-antos dili lang tungod sa pagmaltratar sa uban kondili tungod usab sa iyang mga sayop. Mibati siya nga bisan ang Diyos nagsalikway kaniya, ug siya miampo: “Iliso ang imong nawong kanako, ug pakitai ako sa pag-uyon; kay ako nag-inusara ug sinakit.”​—Salmo 25:11, 16-19.

Tingalig ikaw usab adunay kasakitan. Tingali diha sa balay o sa tunghaan nahisugamak ka sa daotang kahimtang nga bug-at gayod kaayo. Unya usab, tingali ikaw adunay seryosong mga suliran sa panglawas o mibatig kaluya tungod sa usa ka kahuyangan nga imong giatubang. Bisan kon unsay kahimtang, dili kinahanglang mag-inusara ka sa pag-antos; sa kamahinatagon ang Diyos nagtanyag sa iyang panaghigala ug pagpaluyo.a Kon nasugdan mo na pag-ugmad ang relasyon uban kaniya, malipay ka nga masayod nga dili siya mobiya sa iyang mga higala sa dihang sila adunay kalisdanan. Bisan pag tinuod kana, sa dihang sakiton ka sa mga suliran, tingali bation nimo nga halayo ang Diyos. Basin mopatim-aw pa kanimo nga wala gayod siya magtabang kanimo. Apan tinuod ba kana?

“Tunok sa Unod”

Una sa tanan, palihog basaha ang 2 Corinto 12:7-10. Dinha si apostol Pablo nagsugid kon sa unsang paagi siya nag-antos sa butang nga gitawag ug “tunok sa unod.” Lagmit, ang “tunok” maoy usa ka matang sa lawasnong sakit, nga tingali naglangkit sa iyang panan-aw. Bisan kon unsa man kadto, kadto nagpadayon sa “pagdagmal” kaniya sa emosyon. Bisan pa sa tulo ka tim-os nga paghangyo sa Diyos nga wagtangon kana, ang “tunok” nagpabilin.

Si Jehova wala ba magpakabana sa mga pag-ampo ni Pablo? Dili gayod! Ang Diyos miingon kaniya: “Ang akong dili-takos nga kalulot igo alang kanimo; kay ang akong gahom ginahingpit diha sa kahuyangan.” Bisan pag gipalabi ni Jehova nga dili ibton ang maong “tunok,” wala niya biyai si Pablo. Tungod sa dili-takos nga kalulot sa Diyos, gipahimuslan ni Pablo ang suod nga panaghigala uban niya. Kadto “igo” na sa pagtabang kang Pablo pagsagubang sa iyang kaluyahon. Samtang si Pablo nanlimbasog pagsagubang niana, siya nakasinati usab sa makapalig-ong gahom sa Diyos sa bag-o ug sa personal nga paagi.

Tabang sa Pagsagubang sa mga Kalisdanan

Sama kang Pablo, tingali ikaw adunay “tunok,” o suliran, nga nagsakit kanimo, nga nagpahinabo sa kadi-malaomon ug kaluya. Sama sa kahimtang ni Pablo, mahimong gitugot sa Diyos nga ang suliran magpadayon. Kana wala magpasabot nga siya dili na imong Higala. Ang Diyos misulti kang apostol Pablo: “Ang akong gahom ginahingpit diha sa kahuyangan.” Kon mosalig ka sa gahom sa Diyos ug dili sa imong kaugalingon, ikaw makaantos. Basin imo pang hidiskobrehang sa tabang sa espiritu sa Diyos, makaarang ka sa paghimog mga butang nga wala gayod nimo hunahunaa nga posible. Si Pablo miingon: “Ako nagakalipay tungod sa mga kahuyangan . . . Kay sa dihang ako mahuyang, nan ako gamhanan.”

Usa ka batan-ong babaye nga ginganlag Robinb nakadiskobreng tinuod kini. Sa panuigong 14 siya nabuta tungod sa glaucoma. Niadtong tuiga mismo ang iyang inahan kalit namatay. “Si Jehova na lamang ang akong nabatonan karon,” miingon si Robin bahin sa pagsugod sa pagsagubang niining masakit nga “mga tunok.” “Nahibalo ako nga aron ako molampos, kinahanglang ako motapot kaniya.” Kanay gibuhat ni Robin, nga sa kadugayan nag-alagad ingong tibuok-panahong magwawali. Miingon siya: “Gihangyo ko si Jehova nga tabangan ako diha sa tanang butang. Gibuhat gayod niya kana.”

Daghang batan-on nakadiskobreng ang pagkaagom ug mga pagsulay sa aktuwal motabang kanila nga masuod sa Diyos. Tagda ang batan-ong si Jeff. Ang iyang pamilya gibiyaan sa iyang amahan, nga gipasagdan ang inahan ni Jeff sa pag-atiman sa pito ka anak. “Gikaguol ko ang pagkawalay amahan,” miangkon si Jeff, kinsa 12 anyos pa lamang niadto. “Nangandoy ako nga adunay mopuno sa kahaw-ang nga akong gibati sa kada adlaw.” Unsay gibuhat ni Jeff? “Miampo ako kang Jehova nga tabangan ako nga matagan-an ang maong panginahanglan.” Si Jeff milihok nga nahiuyon sa iyang mga pag-ampo ug napuliki sa espirituwal nga mga kalihokan. Sa nahaigong panahon, iyang nabatyagan ang pagpaluyo ni Jehova​—nga gitagana pinaagi sa iyang makapalig-ong balaang espiritu ug pinaagi sa Kristohanong kongregasyon. (Itandi ang Salmo 27:10.) Karon sa edad 27 si Jeff naghinumdom: “Wala akoy kasaligan alang sa kasegurohan, mao nga ako nakigsuod kaayo kang Jehova.” Gitawag niya ang maong suod nga relasyon nga “bililhon kaayong panalangin nga mitungha gikan sa maong pagsulay.”

Kon Unsaon Pagkabaton sa Tabang sa Diyos

Ang imong langitnong Higala susamang motabang kanimo latas sa imong mga kalisdanan. Apan unsay kinahanglan nimong buhaton? Aw, aron molambo ang bisan unsang panaghigala, kinahanglang adunay komunikasyon. Ang pag-ampo maoy atong paagi sa pagpakigkomunikar sa Diyos. Pinaagi niana ato siyang pahibaloon nga gikinahanglan nato ang iyang tabang. Hinuon, ang pag-ampo diyutay rag bili kon kini way-lahay o mekanikal. Sama sa mga batan-on nga gihisgotan sa ibabaw, kinahanglang “ibubo nimo ang anaa sa imong kasingkasing” ngadto sa Diyos! (Salmo 62:8) Mahimong gikinahanglan pa nga ikaw mangaliyupo. (Filipos 4:6) Ang mga pangaliyupo maoy mga pag-ampo nga sa linain mainiton ug tim-os.

Pananglitan ikaw may suliran sa pagpugong sa imong mga hunahuna o naglisod sa pagbuntog sa usa ka daotang bisyo. Pangaliyupo kang Jehova! Pangayo sa iyang tabang sa mga panahon sa tentasyon. Kini dili kanunayng sayon. “Sa dihang mobati akog kusog nga agda sa pagbuhat ug daotang butang, ako moampo,” miangkon si Gary. “Usahay ako maghunahuna, ‘Sa unsang paagi makaduol ako kang Jehova?’ Bisan pa niana, ako modangop gihapon kaniya alang sa tabang. Siya naghatag kanako sa kusog nga akong gikinahanglan aron makapangupot.” Bisan pag sa sinugdan kini lisod, ipadayon pagpahayag kon unsay anaa sa imong kasingkasing ngadto sa Diyos.

Apan komosta man kon mopatim-awng wala tubaga ang imong mga pag-ampo? Si Lora, pananglitan, nanlimbasog pagbuntog sa daotang bisyo sa masturbasyon. “Makigsulti akong matinud-anon kang Jehova bahin sa suliran,” misaysay siya, “apan maorag dili gayod ako makahunong.” Usahay ang Diyos mahimong motugot nga atong ipasundayag kon unsa kita ka seryoso bahin sa atong mga hangyo. (Itandi ang Salmo 88:13, 14.) Busa kinahanglang magmalugoton kita sa pag-ampo! (Mateo 7:7; Roma 12:12) Kana gayod ang gibuhat ni Lora. Sa samang panahon, gisugdan niya pagpadapat ang mga sugyot nga diha sa materyal bahin sa ulohan sa mga basahon sa Watch Tower Society.c Sa nahaigong panahon, iya nang nakita ang mga resulta. Nahinumdom siya: “Matag higayong milampos ako pagsukol sa tentasyon, gipasalamatan ko si Jehova tungod kay nasayod ako nga siya nag-uban kanako.” Tinuod, mahimong makaagom ka ug pipila ka sugmat samtang naningkamot ka pagbuntog sa imong suliran. Apan samtang ikaw nagpakigbugno ug wala magtuyo nga magpadaog sa imong mga kahuyangan, ang Diyos mahimuot sa imong ‘tim-os nga mga panlimbasog’ ug magpabilin nga imong Higala.​—2 Pedro 1:5.

Pagbuhat Uban sa Diyos

Ang laing paagi nga mabatonan nimo ang tabang sa Diyos mao ang pagdawat sa iyang imbitasyon nga ikaw mahimong usa sa iyang “mga isigkamagbubuhat.” (1 Corinto 3:9) Naglakip kini sa pagpakigbahin sa pagtabang sa uban nga makakat-on bahin sa Diyos. (Mateo 28:19, 20) Kon gibati nimo ang kaguol o kaluya, ang hunahuna nga mohimo sa bisan unsang matang sa buluhaton mahimong daw dili madanihon. Bisan pa niana, “ang pagkaadunay daghang buluhaton sa Ginoo” makatabang gayod kanimo. (1 Corinto 15:58) Labing menos, dili ka maghunahuna sa imong kaugalingong mga suliran. (Itandi ang Proverbio 18:1.) Si Robin, nga gikutlong sayosayo, nag-ingon bahin sa mga panahon sa iyang kalisdanan: “Ang butang nga nagpalahutay kanako mao ang akong buluhaton alang kang Jehova!”

Ang pagbuhat uban sa Diyos makatabang usab nga mabuntog nimo ang bisan unsang nagpadayong pagbati nga gibiyaan ka sa Diyos. Kon ang duha ka tawo magkauban sa pagbuhat ingong tem padulong sa samang tumong, dili ba sagad nga mas masuod sila ingong mga higala? Samtang nagsangyaw ka, kanunay nimong maatubang ang mga hagit. Imong hidiskobrehan nga modangop ka sa Diyos alang sa tabang. Ug samtang panalanginan sa Diyos ang imong mga paghago, ang iyang pakighigala mahimong mas tinuod. Mosugod ka pagkasinati sa pagsalig nga gibutang sa Diyos kanimo ingong kaubang-magbubuhat. Kini makapalambo pag-ayo sa imong pagsalig-sa-kaugalingon.

Pananglitan, si Carol wala gayoy pagsalig sa kaugalingon. Ang iyang inahan naghikog, ug ang iyang mapasipad-anong amahan kanunayng nagtamay kaniya. Apan sa edad nga 17 siya nahimong usa sa mga Saksi ni Jehova ug mihimo sa buluhatong pagsangyaw. Karon human sa napulo ka tuig ingong bug-os-panahong magwawali, siya nag-ingon: “Kining buluhatona nakatabang ug dako kaayo kanako tungod kay akong nakita ang pagpanalangin ni Jehova kanako. Ako moingon sa akong kaugalingon, ‘Kon gihigugma ako sa Diyos, ako dili kay way-pulos.’ Kay gigamit ni Jehova sa pagpahayag sa iyang ngalan ako mibatig dakong kasegurohan.”

“Tilawi ug Tan-awa nga si Jehova Maayo”

“Gikan sa tanan kong mga kahadlok [ang Diyos] nagluwas kanako,” misulat si Haring David human nga igo rang makaikyas sa usa ka nagpameligro-sa-kinabuhing kahimtang. (Salmo 34:4, 6, superskripsiyon; 1 Samuel 21:10-12) Busa si David nakasulti gikan sa kasinatian: “Tilawi ug tan-awa nga si Jehova maayo, Oh kamong katawhan; malipayon ang tawong kusgan nga modangop kaniya.”​—Salmo 34:8.

Bisan pag ang imong kinabuhi tingali wala gayod mameligro sama sa kang David, seguradong makasinati ka, usahay, ug pipila ka kalisod ug kapit-osan. Sa dihang ‘ang mga kasakitan modaghan diha sa imong kasingkasing,’ pangaliyupo sa Diyos. (Salmo 25:17) Ayaw kahadlok nga isibog sa Diyos ang iyang pagpakighigala. Samtang mapailobon kang mag-antos ug makasinating direkta sa pagpaluyo ug pagtagad ni Jehova, imong ‘matilawan ug matan-aw’ sa imong kaugalingon “nga si Jehova maayo.” Ug siya magpabiling imong Higala sa walay kataposan.​—Santiago 4:8.

[Mga footnote]

[Hulagway sa panid 19]

Mobiya ba ang Diyos sa iyang mga higala sa mga panahon sa kalisdanan?