Mga Batan-on Nangutana . . .

Nganong Angay nga Tun-an Ko ang Bibliya?

“INIG-ULI nako sa balay gikan sa eskuylahan, dili na ko gustong motuon. Gusto kong mogawas ug makig-uban sa akong mga higala!” Kana ang reaksiyon sa usa ka tin-edyer nga ginganlag Ken sa sugyot nga gugolon niya ang diyutayng panahon sa pagtuon sa Bibliya.

Sama sa daghang tin-edyer, basin ikaw wala makahimog dakong personal nga pagtuon sa Bibliya. Tingali ikaw nagtuo nga ang Bibliya mao ang Pulong sa Diyos. Basin ikaw nagatambong pa sa Kristohanong mga tigom. Apan tingali gibati nimong nasayod ka na sa ginatudlo sa Bibliya. O kaha ikaw nahibulong: ‘Nganong angay nga tun-an ko ang Bibliya? Unsay akong makuha baylo sa akong kahago?’

Pagtagbaw sa Imong Espirituwal nga Panginahanglan

Ang pagsukna sa maong mga pangutana dili daotan o kawalay-tahod. Sa katugbang, kini tingali magpaila nga nagsugod ka sa pagmatikod sa gitawag ni Jesus nga imong “espirituwal nga panginahanglan.” (Mateo 5:3) Kini dili kay waypulos nga kamausisaon. Sumala sa paghubad sa The New English Bible sa maong bersikulo, kini maoy “panginahanglan sa Diyos”​—ang panginahanglan nga mailhan pag-ayo ang Diyos ug masabtan ang iyang mga katuyoan. Pananglitan, sa bata ka pa, ang imong mga ginikanan basi nagtudlo kanimo sa paninugdang mga kamatuoran sa Bibliya. Lagmit gituohan mo ang ilang giingon nga walay pagduhaduha. Apan samtang nagkadako ka, tingali gibati nimo ang panginahanghan nga “tinoon ang tanang butang”​—nga mahibalo kon kaha ang gitudlo kanimo matuod ba o dili.​—1 Tesalonica 5:21.

Unya, tingali ikaw wala mamatuto diha sa usa ka relihiyosong panimalay. Nagkahulogan ba kini nga ikaw walay espirituwal nga panginahanglan? Wala gayod! Tagda ang kahimtang diha sa usa ka nasod diin dugay nang gipasiugda ang ateyismo. Sa katuigang bag-o pa ang mga batan-on didto nagpakitag mausbawong kaikag sa relihiyon. Usa ka kontra-relihiyong propagandista mipunting sa, apil sa ubang mga butang, “kapakyasan sa mga ateyista sa pagtaganag makapakombinsir nga mga tubag sa mga pangutana bahin sa kahulogan sa kapakyasan ug pag-antos sa kinabuhi.” Basin ikaw mismo nagasukna sa mao mismong pangutana​—pamatuod nga ikaw may espirituwal nga panginahanglan.

Hinuon, dili tanang relihiyon nagataganag makapatagbawng mga tubag. Pananglitan, ang batan-ong si Manish nagdako nga usa ka Hindu, nga nagtuo sa milyonmilyong mga diyos. Bisan pa niana, siya miangkon: “Misugod ako sa pagkahibulong, ‘Kinsa ang Diyos?’” Ug daghang batan-on nga gipadako diha sa mga relihiyon sa Kakristiyanohan nakadiskobreng sama ka idlas ang pagpangita sa makapatagbawng mga tubag. Asa ba makadangop ang usa? Si Jesu-Kristo nagatubag: “Ang imong [sa Diyos] pulong maoy kamatuoran.”​—Juan 17:17.

Ang tukmang kahibalo sa Pulong sa Diyos, ang Bibliya, makatagbaw sa imong kauhaw sa espirituwal nga mga kamatuoran. Kini motubag sa imong mga pangutana mahitungod sa ilhanan sa Diyos, sa mga katarongan sa mga kahimtang sa kalibotan karon, ug imong mga kalaoman sa umaabot. Itugot nato, tingali gipadako ka sa mga ginikanan nga mga Saksi ni Jehova, ug tingali imong gibati nga nahibalo ka na sa ‘kamatuoran’ sa usa ka sukod. Apan imo bang “nasabtan . . . ang gibag-on ug gitas-on ug gihabogon ug giladmon” sa mga kamatuoran sa Bibliya, o ang imong kahibalo maoy pangibabaw lamang? (Efeso 3:18) Kon matuod ang naulahi, kinahanglang imong ‘pamatud-an sa imong kaugalingon ang maayo ug dalawaton ug hingpit nga kabubut-on sa Diyos,’ pinaagi sa bug-os nga pagtuon sa Bibliya.​—Roma 12:2.

Pagkaplag sa Hustong Dalan

Nahatagan ka bag sayop nga mga direksiyon ngadto sa usa ka dapit nga buot mong adtoan? Ang nawalang panahon ug nausik nga kahago makapatagam. Bisan pa niana, ang tibuok nga mga kinabuhi sa daghang batan-on nagasubay sa sayop nga dalan! Ang Bibliya nagaingon: “Adunay usa ka dalan nga matul-id alang sa usa ka tawo, apan ang mga dalan sa kamatayon mao ang sangkoan niana.”​—Proverbio 14:12.

Tagda, pananglitan, ang isyu bahin sa seksuwal nga moralidad. Usa ka 14-anyos nga batan-ong babaye miingon: “Walay butang nga matarong. Aduna lamay mga opinyon.” Itugot nato, ang tinguha nga makasinati sa sekso maoy kusganon, ilabina kon ikaw batan-on. Apan kon pasagdang dili mapugngan, kining tinguhaa makatultol kanimo ngadto sa “mga dalan sa kamatayon.” Kada tuig, 2.5 milyong U.S. nga mga tin-edyer matakdan sa sakit nga ipasa sa seksuwal nga paagi. Daghang batan-ong mga babaye nahimong dili-kasadong mga inahan​—o nagapatay sa ilang mga masuso pinaagi sa aborsiyon! Ug bisan pag malikayan tingali ang pagmabdos o sakit, ang una-kaminyoong sekso makapaagom sa kanunay sa kasuko sa Diyos.​—1 Tesalonica 4:3.

Busa nganong magkadugmodugmo diha “sa mga dalan sa kamatayon”? Ang Bibliya nagahatag ug tin-awng direksiyon sa pagtabang kanimo nga “mokalagiw gikan sa mga pangibog nga iya sa pagkabatan-on.” (2 Timoteo 2:22) Kini nagalangkit sa ‘pagpatay,’ dili sa kasagarang tinguha alang sa seksuwal nga relasyon diha sa madungganong kaminyoon, apan sa imoral seksuwal nga mga agda. (Colosas 3:5) Ang pagtuon sa Bibliya makatabang nimo sa pagbuhat niana. Kini makahatag nimog moral nga kusog sa pagkalagiw gikan sa daotang buhat​—bisan pag ang daotang buhat mopatim-awng makapadani kaayo. Kini “makahatag sa mga walay kasinatian sa kaalam, sa usa ka batan-ong lalaki [o babaye] sa kahibalo ug katakos sa paghunahuna” aron malikayan ang mga kahimtang nga mahimong motultol sa imoral nga kagawian.​—Proverbio 1:4.

Ang batan-ong si Dan maoy usa nga nakabatog kaayohan gikan sa pagtuon sa Bibliya. Bisan pag giila nga ang mahilayong mga tin-edyer daw nagkalipay, siya miingon nga siya nakakita usab “sa mga bata nga natawo nga pinaangkan, seksuwal nga mga sakit, ug daghan pang ubang suliran.” Siya nangutana: “Kon wala pa ako magtuon sa Bibliya, unsa kahay akong kinabuhi?” Ang Bibliya makaluwas kanimo, usab, gikan sa “mga dalan sa kamatayon.”

Tabang nga Masuod sa Diyos

Bisan pag daghang batan-on karong adlawa nagaangkon nga nagtuo ug Diyos, ang pagtuo diha sa personal nga Diyos nagakawala samtang magkadagko ang mga batan-on. Usa ka artikulo diha sa magasing Adolescence miingon nga alang sa pila ka batan-on, “ang ideya bahin sa Diyos lisod kaayo nga masabtan.” Daghang relihiyon ang naghimo sa Diyos nga mopatim-awng dili masabtan pinaagi sa pagtago sa kamatuoran nga ang Diyos may ngalan. Kon buot sabton, sa unsang paagi mobati ka sa kasuod sa usa kansang ngalan wala nimo hiilhi?

Ang Bibliya, hinuon, nagapadayag nga ang ngalan sa Diyos maoy Jehova, nga nagagamit nianang ngalana kapig 7,000 ka beses! (Salmo 83:18) Ang pagkaila nianang ngalana nagaabli sa dalan aron ikaw makabatog personal nga relasyon uban sa Diyos nga Makagagahom sa Tanan. Apan kini nagkahulogan ug labaw pa sa pagbatog kaswal nga kaikag sa Bibliya. Nagaingon ang 1 Cronica 28:9: “Kon imo siya nga pangitaon, siya imo nga hikaplagan.” Kini nagapasabot sa pagsusi sa Kasulatan sa paningkamot nga hiilhan pag-ayo si Jehova.

Nahimo ba nimo kana? Pananglitan, makapatin-aw ka ba nganong ang Bibliya nagapamulong nga si Jehova may “mga mata,” “mga igdulongog,” “nawong,” ug “bukton”? (1 Pedro 3:12; Ezekiel 20:33) Dili ba ang Bibliya nagaingon nga “ang Diyos maoy Espiritu”? (Juan 4:24) O nasayod ka ba sa gidak-on sa katakos sa Diyos sa pagkakita kanimo, sa pagkasayod kon unsay imong igasulti o sa dili pa nimo kana isulti? (Salmo 139:4) Ug unsa na man ang pangunang mga hiyas ni Jehova nga mao ang gugma, kaalam, hustisya, ug gahom? Makasaysay ka ba kon unsay labing dakong pasundayag sa gugma sa Diyos? (Juan 3:16) Nahibalo ka ba sa kalainan tali sa espiritu sa Diyos ug sa iyang gahom? (Miqueas 3:8) Makapamatuod ka ba nga ang Diyos may mga pagbati​—ug nga posible nga sakiton ang iyang mga pagbati?​—Salmo 78:40.

Adunay usa lang ka paagi sa pagtubag nianang mga pangutanaha​—pinaagi sa pagtuon sa Bibliya. Ang batan-ong si Luther nakasayod nga “pinaagi sa pagtuon sa Iyang Pulong, ako ‘makakita’ sa personalidad ni Jehova ug kon unsang matanga siya sa persona.” (Itandi ang Job 42:5.) Si Jaquella susamang nakaila nga mas pa sa Diyos. Pinaagi sa pagtuon sa Bibliya, nakapabili siya “nga barogan ni Jehova kon unsay iyang ginasulti. Kon siya manaad, dili niya pakyason ang iyang saad; siya dili mamakak.”​—Tito 1:2.

Ang Ganti sa Imong Paghago

Ang pagtuon sa Bibliya nagalangkit sa kahago ug sakripisyo sa pipila sa imong libreng panahon. Ang pagsugod tingali lisod ug basin makapatunghag pagbiaybiay gikan sa pamilya ug mga higala. Apan tan-awa ang mga ganti. Ang regular nga pagtuon sa Bibliya nakatabang kang Paula. Siya miingon, akong naugmad “ang mas suod nga relasyon uban kang Jehova, sa akong Kristohanong mga igsoon, ug sa akong pamilya.” Si Sandy miingon nga kini nakatabang niya “pag-ugmad sa konsensiya” nga mosanong dayon bisan sa ginagmay nga mga butang. Siya miingon: “Ako makahunahuna sa mga kasulatan o mga prinsipyo nga makapaarang nako sa paghukom kon unsay tan-awon sa TV.” Ug nahinumdoman mo ba si Ken nga gihisgotan sa sinugdan? Misugod siya sa pagbasa sa Bibliya nga mas subsob ug miingon: “Sa dugang ako mibasa, sa dugang ako nakadayeg, sa dugang kini makataronganon.” Si Ken nadasig nga mahimong usa ka bawtismadong alagad sa Diyos.

Nganong dili mohimog seryosong pagtuon sa Bibliya? Isipa kana nga usa ka hagit. Hangyoa ang imong mga ginikanan o usa ka membro sa lokal nga kongregasyon sa mga Saksi ni Jehova sa pagtabang nimo sa pagsugod. Ihukom sa hugot nga dili mohunong. Ipadapat ang imong matun-an. Ug hinumdomi: ‘Ang nagatutok sa hingpit nga kasugoan ug nagapadayon sa pagtutok magmalipayon sa iyang pagbuhat niini.’​—Santiago 1:25.

[Blurb sa panid 24]

Imo bang “nasabtan . . . ang gibag-on ug gitas-on ug gihabogon ug giladmon” sa mga kamatuoran sa Bibliya, o ang imo bang kahibalo pangibabaw lamang?

[Hulagway sa panid 25]

Ang usa ka ginikanan o laing membro sa Kristohanong kongregasyon makatabang nimo sa pagsugod sa usa ka proyekto sa pagbasa sa Bibliya