Ikaw Makahimog Espirituwal nga Pag-uswag

ANG tinuod nga bili mahimong lisod ilhon. Ingon niana ang kahimtang sa mga brilyante. Bisan tuod ang gipasinawang brilyante mokidlap, ang dahol nga brilyante moamag lamag diyutay. Bisan pa niana, sa kahiladman sa dahol nga brilyante nahimutang ang dili-masayop nga pagdahom sa usa ka matahom nga mutya.

Ang mga Kristohanon susama sa dahol nga mga brilyante sa daghang paagi. Bisan tuod layo pa kaayo kita sa kahingpitan, aduna kitay natagong bili nga gipabilhan ni Jehova. Sama sa mga brilyante, kitang tanan adunay atong kaugalingong lahi nga mga hiyas. Ug ang matag usa kanato makahimog dugang espirituwal nga pag-uswag kon kana mao ang kinasingkasing natong tinguha. Ang atong pagkatawo mahimong mahashasan, aron kini mosidlak pa pag-ayo ngadto sa himaya ni Jehova.​—1 Corinto 10:31.

Human matabas ug mapasinawi, ang usa ka brilyante ibutang sa usa ka enggasti nga magpauswag sa nagabanaag nga mga hiyas niini. Sa susama, si Jehova makagamit kanato sa lainlaing mga kahimtang, o mga asaynment, kon kita “magasul-ob sa bag-ong pagkatawo nga gilalang sumala sa kabubut-on sa Diyos diha sa matuod nga pagkamatarong ug pagkamaunongon.”​—Efeso 4:​20-24.

Ang maong espirituwal nga pag-uswag dili tingali sayon buhaton, sama ra nga ang brilyante diha sa kinaiyanhong kahimtang niini tagsa rang mokidlap samag mutya. Tingali kinahanglang langkaton nato sa atong kaugalingon ang pipila ka nagpabilin nga kahuyangon, pasiboon ang atong tinamdan sa pagpas-an ug responsibilidad, o maningkamot pa gani kita nga mahigawas sa usa ka espirituwal nga rutina. Apan makahimo kita ug pag-uswag kon buot gayod nato, sanglit si Jehova nga Diyos makahatag kanato “ug gahom nga labaw sa kasarangan.”​—2 Corinto 4:​7; Filipos 4:13.

Si Jehova Nagpalig-on sa Iyang mga Alagad

Ang pagtabas sa mga brilyante nagkinahanglag pagsalig nga miresulta gikan sa eksaktong kahibalo, sanglit human matabas ang usa ka bahin sa dahol nga brilyante, kasagarang kini mahanaw. Ang mahalong materyal​—usahay hangtod sa 50 porsiyento sa wala pa matabas nga bato​—kinahanglang tabason aron sa pagpatungha sa gikinahanglang porma. Kita usab nagkinahanglag pagsalig nga miresulta gikan sa tukmang kahibalo aron mahulma ang atong pagkatawo ug aron mouswag sa espirituwal. Ilabinang kinahanglanon nga kita may pagsalig nga si Jehova mohatag kanatog gahom.

Apan, mobati tingali kitang dili-takos o maghunahuna nga dili kita makabuhat ug labaw pa. Kaniadto, ang matinumanong mga alagad sa Diyos mibati usahay niana. (Exodo 3:​11, 12; 1 Hari 19:​1-4) Sa dihang giasayn sa Diyos nga mahimong usa ka “propeta ngadto sa kanasoran,” si Jeremias mipatugbaw: “Ania dili gayod ako makahibalong mosulti, kay bata lamang ako.” (Jeremias 1:​5, 6) Apan, bisan pa sa iyang pagduhaduha si Jeremias nahimong maisogong propeta nga nagpahayag ug madayganong mga mensahe ngadto sa usa ka mabatokong katawhan. Sa unsang paagi kini nahimong posible? Nakakat-on siya sa pagsalig kang Jehova. Si Jeremias sa ulahi misulat: “Bulahan ang tawo nga mosalig kang Jehova, ug kansang pagsalig mao si Jehova.”​—Jeremias 17:​7; 20:11.

Karong adlawa, si Jehova nagpalig-on usab niadtong nagasalig kaniya. Si Edward,a usa ka amahan nga may upat ka anak kinsa hinay nga mihimog espirituwal nga pag-uswag, nakakaplag nga matuod kini. Siya misaysay: “Usa ako sa mga Saksi ni Jehova sulod sa siyam ka tuig, apan daw wala ako mouswag sa espirituwal. Ang suliran mao nga diyutay ra akog panukmod ug walay pagsalig. Human mobalhin sa Espanya, nakig-uban ako sa usa ka gamayng kongregasyon nga may usa lamang ka ansiyano ug usa ka ministeryal nga alagad. Tungod sa panginahanglan, gihangyo ako sa ansiyano sa pagdumala sa daghang asaynment. Nangurog ako samtang gipahayag nako ang akong unang mga pakigpulong ug mga bahin sa tigom. Bisan pa niana, nakakat-on ako sa pagsandig kang Jehova. Ang ansiyano kanunayng modayeg kanako ug mohatag ug mataktikanhong mga sugyot aron mouswag.

“Sa samang panahon, gipauswag nako ang akong kalihokan sa pag-alagad sa kanataran ug mihimog mas maayong espirituwal nga pagpanguna sa akong pamilya. Ingong resulta, ang kamatuoran adunay mas dakong kahulogan alang sa tibuok pamilya, ug mibati akog labaw gayod nga katagbawan. Ako usa na ka ministeryal nga alagad, ug naningkamot ako nga maugmad ang mga hiyas sa usa ka Kristohanong magtatan-aw.”

“Hukasa ang Daang Pagkatawo”

Ingon sa naamgohan ni Edward, ang espirituwal nga pag-uswag nagkinahanglag pagsalig kang Jehova. Ang pag-ugmad sa samag Kristo nga “bag-ong pagkatawo” kinahanglanon usab. Sa unsang paagi mahimo kini? Ang unang lakang mao ang ‘paghukas’ niadtong mga taras nga bahin sa daang pagkatawo. (Colosas 3:​9, 10) Maingon nga ang mga pagkadili-hingpit, sama sa wala kinahanglanang mga minerales, kinahanglang kuhaon gikan sa dahol nga brilyante aron mahimo kining nagkidlap nga mutya, busa ang mga tinamdan nga “iya sa kalibotan” kinahanglang isalikway aron ang atong bag-ong pagkatawo mosidlak.​—Galacia 4:3.

Usa sa maong tinamdan mao ang pagpanuko sa pagdawat ug responsibilidad sa kahadlok nga dako kaayo ang kinahanglanon kanato. Tinuod, ang responsibilidad nagkahulogag trabaho, apan kana maoy usa ka makapatagbawng buluhaton. (Itandi ang Buhat 20:35.) Miangkon si Pablo nga ang diyosnong pagkamahinalaron nagkinahanglan nga kita ‘maghago ug manlimbasog sa atong kaugalingon.’ Buhaton nato kana nga malipayon, siya miingon, “tungod kay gipahimutang nato ang atong paglaom diha sa usa ka buhing Diyos,” usa nga dili gayod malimot sa buluhaton nga atong gihimo alang sa atong mga isigka-Kristohanon ug sa uban.​—1 Timoteo 4:​9, 10; Hebreohanon 6:10.

Ang pipila ka brilyante nahiagom sa “huyang nga mga bahin” nga namugna sa ilang pagkahimo ug kinahanglang ampingan pagtabas. Apan, uban sa tabang sa usa ka instrumento nga gitawag ug polariscope ang tigpasinaw makakita sa huyang nga mga bahin ug magmalamposon sa pagtabas sa bato. Tingali nahiagom kita sa kahuyangan sa kahiladman, o depekto sa pagkatawo, tungod sa atong kagikan o sa usa ka masulub-ong kasinatian. Unsay atong mahimo? Una, kinahanglan natong dawaton ang suliran sa atong kaugalingon ug tinoon nga mabuntog kana kutob sa maarangan. Kinahanglang ihaw-as nato ang atong palas-anon sa atubangan ni Jehova diha sa pag-ampo, posible usab nga mangayog espirituwal nga tabang gikan sa usa ka Kristohanong ansiyano.​—Salmo 55:​22; Santiago 5:​14, 15.

Ang maong kahuyangan sa kahiladman nag-apektar kang Nicholas. “Ang akong amahan maoy usa ka alkoholiko, ug gipaantos niya ako ug ang akong igsoong babaye,” siya misaysay. “Sa dihang miundang ako pagtungha, nagsundalo ako, apan ang akong rebelyosong kiling sa wala madugay nagpahitumpawak kanako sa kasamok. Ang mga awtoridad sa kasundalohan nagbilanggo kanako tungod sa pagpamaligyag droga, ug sa laing okasyon ako mibiya nga walay pagtugot. Sa kataposan, mihunong ako sa pagsundalo, apan may suliran gihapon ako. Bisan tuod gubot ang akong kinabuhi tungod sa pag-abuso sa droga ug paghuboghubog, may interes ako sa Bibliya ug nangandoy nga makabaton ug katuyoan sa kinabuhi. Ngadtongadto, nahimamat nako ang mga Saksi ni Jehova, nag-usab sa akong estilo sa kinabuhi, ug misagop sa kamatuoran.

“Apan, gidangtag katuigan una nako madawat ug madumala ang depekto sa akong pagkatawo. May dulot ako nga disgusto sa awtoridad ug mangisog kon tambagan ako. Bisan tuod gusto nakong gamiton sa bug-os ni Jehova, kini nga kahuyangan nagpugong kanako. Sa kataposan, uban sa tabang sa duha ka masinabotong mga ansiyano, gidawat nako ang akong suliran ug misugod sa pagpadapat sa ilang mahigugmaong Kasulatanhong tambag. Bisan tuod ang diyutayng kasuko mosilaob matag karon ug unya, nakontrolar na nako karon ang akong rebelyosong kinaiya. Mapasalamaton kaayo ako sa mapailobong paagi ni Jehova sa pagpakiglabot kanako ug sa mahigugmaong tabang sa mga ansiyano. Tungod sa akong espirituwal nga kauswagan, di pa dugay natudlo ako ingong ministeryal nga alagad.”

Sumala sa nadiskobrehan ni Nicholas, ang pag-usab sa nakagamot nga mga tinamdan dili sayon. Basin nag-atubang kita sa susamang suliran. Tingali sobra kita ka sensitibo. Tingali naghambin kita ug kahiubos, o tingali gihatagan nato ug dakong pagtagad ang pagkaindependente. Sa ingon, ang atong Kristohanong pag-uswag mahimong malimitehan. Ang mga tigpasinaw sa brilyante makasinati sa susamang butang sa mga bato nga ilang gitawag ug naats. Sa pagkatinuod kini maoy duha ka bato nga gitunaw aron mahiusa panahon sa pagkahimo sa brilyante. Ingong resulta, ang naats adunay duha ka managkalahing mga paagi sa pagtubo nga naghimo sa pagtabas sumala sa grano nga lisod kaayo. Sa atong kahimtang, nakaplagan nato nga ang atong kinaiya sa kinabubut-ong espiritu nakig-away batok sa kinaiya sa dili-hingpit nga unod. (Mateo 26:​41; Galacia 5:17) Usahay, basin mokiling kita nga molunga sa bug-os sa pakigbisog, nga mangatarongan nga ang mga dili-kahingpitan sa atong pagkatawo dili man bitaw hinungdanon. ‘Total,’ kita tingali moingon, ‘ang akong pamilya ug mga higala nagmahal gihapon kanako.’

Apan, kon atong alagaran ang atong mga igsoon ug himayaon ang atong langitnong Amahan, kinahanglang kita ‘magmabag-o diha sa puwersa nga nagapalihok sa atong kaisipan’ pinaagi sa pagsul-ob sa bag-ong pagkatawo. Takos ang paningkamot, ingon sa gipamatud-an ni Nicholas ug sa daghang uban pa. Ang usa ka tigpasinaw sa brilyante nasayod nga ang usa ka lama makadaot sa tibuok brilyante. Sa susama, pinaagi sa pagpasagad sa huyang nga bahin sa atong pagkatawo, madaot nato ang atong espirituwal nga panagway. Mas grabe pa, ang usa ka seryosong kahuyangan mahimong motultol ngadto sa atong espirituwal nga pagkapukan.​—Proverbio 8:33.

Sama sa “Kalayo” Diha Kanato

Ang tigpasinaw ug brilyante maningkamot sa pagtipig sa kalayo (kamagilakon) sulod sa brilyante. Himoon kini pinaagi sa pagpaangay sa mga nawong aron ipahinabo nila ang gitawag nga samag bangaw nga epekto. Sulod sa brilyante ang lainlaig kolor nga kahayag mosumbalik-silaw ngadto-nganhi, nga magpatungha ug kalayo nga maghimo sa mga brilyante nga mokidlap. Sa susama, ang espiritu sa Diyos mahimong sama sa usa ka “kalayo” sa sulod nato.​—1 Tesalonica 5:​19; Buhat 18:​25; Roma 12:11.

Apan komosta kon atong gibati ang panginahanglan nga mapalihok sa espirituwal? Sa unsang paagi mahimo kini? Kinahanglang ‘palandongon nato ang atong mga dalan.’ (Salmo 119:​59, 60) Kini maglangkit sa pag-ila sa mga butang nga magpaluya kanato sa espirituwal ug unya magtino kon unsang teokratikanhong mga kalihokan ang kinahanglang panglimbasogan natong tinguhaon. Mapalalom nato ang espirituwal nga pagpabili pinaagi sa makanunayong personal nga pagtuon ug kinasingkasing nga pag-ampo. (Salmo 119:​18, 32; 143:​1, 5, 8, 10) Dugang pa, pinaagi sa pagpakig-uban niadtong naghago diha sa pagtuo, mapalig-on pa nato ang atong determinasyon nga moalagad kang Jehova nga masiboton.​—Tito 2:14.

Si Louise, usa ka batan-ong Kristohanong babaye, miangkon: “Ako naghunahunang magregular payunir sulod sa duha ka tuig una ako aktuwal nga nagpalista ingong payunir, o bug-os-panahong magwawali sa Gingharian. Walay makapugong kanako, apan ako dihay sayon nga rutina, ug wala lamang ako maningkamot sa paggula niana. Unya kalit nga namatay ang akong amahan. Akong naamgohan kon unsa ka daling mahanaw ang kinabuhi ug nga wala nako himoa ang labing maayo sa akong kinabuhi. Busa akong giusab ang akong espirituwal nga tinamdan, gipauswag ang akong pag-alagad, ug nahimong regular payunir. Ilabinang nakatabang niining bahina kadtong akong espirituwal nga mga igsoong lalaki ug babaye nga kanunayng nagsuportar sa mga kahikayan sa pag-alagad sa kanataran ug kinsa regular nga miuban kanako diha sa ministeryo. Akong nakat-onan nga sa maayo man o sa daotan, kita nakigbahin sa mga prinsipyo ug mga tumong sa atong kaubanan.”

Gipahait nga Daw sa Puthaw

Ang mga brilyante mao ang kinagahiang kinaiyanhong motungha nga substansiya sa yuta. Busa, nagkinahanglag usa ka brilyante sa pagtabas sa lain. Magpahinumdom tingali kini sa mga estudyante sa Bibliya sa proverbio nga nag-ingon: “Pinaagi sa puthaw, ang puthaw mismo gipahait. Busa ang usa ka tawo magapahait sa nawong sa lain.” (Proverbio 27:17) Sa unsang paagi ‘mapahait’ ang nawong sa usa ka tawo? Ang usa ka indibiduwal mahimong molampos sa pagpahait sa intelektuwal ug espirituwal nga kahimtang sa lain, maingon nga ang usa ka pirasong puthaw magamit sa pagpahait sa usa ka sulab nga hinimo sa mao gihapong metal. Pananglitan, kon kita maguol tungod kay nahigawad, ang pagdasig sa laing tawo mahimong makapalig-on kaayo. Ang atong masulub-ong panagway sa ingon moarang-arang, ug kita mapalagsik alang sa nabag-ong masibotong kalihokan. (Proverbio 13:12) Ilabinang makatabang ang mga ansiyano sa kongregasyon sa pagpahait kanato pinaagi sa pagtagana ug Kasulatanhong pagdasig ug tambag aron mouswag. Ilang gisunod ang prinsipyo nga giingon ni Solomon: “Hatagi ang usa ka tawong maalamon ug siya mahimong mas maalamon pa. Tudloi ang matarong nga tawo ug siya magadugang pa sa kinaadman.”​—Proverbio 9:9.

Siyempre, ang espirituwal nga pagbansay nagkinahanglag panahon. Sulod sa kapin sa napulo ka tuig, si apostol Pablo nagpaambit sa iyang kasinatian ug mga paagi sa pagtudlo kang Timoteo. (1 Corinto 4:​17; 1 Timoteo 4:​6, 16) Ang dugay nga pagbansay nga gihatag ni Moises kang Josue sulod sa 40-ka-tuig nga yugto nakabenepisyo sa nasod sa Israel sulod sa dugayng panahon. (Josue 1:​1, 2; 24:​29, 31) Si Eliseo mikuyog kang propetang Elias sulod sa mga 6 ka tuig, nga midawat ug maayong pasukaranan alang sa iyang kaugalingong ministeryo nga gidangtag mga 60 ka tuig. (1 Hari 19:​21; 2 Hari 3:11) Pinaagi sa mapailobong pagtagana ug padayong pagbansay, ang mga ansiyano nagsunod sa pananglitan ni Pablo, Moises, ug Elias.

Ang paghatag ug komendasyon maoy hinungdanong bahin sa pagbansay. Ang sinserong mga pahayag sa apresasyon alang sa mga asaynment nga maayong pagkadumala o alang sa dalayegong mga buhat mahimong magtukmod sa uban nga buot moalagad sa Diyos nga mas bug-os pa. Ang komendasyon magtukod ug pagsalig nga, sa baylo, magtaganag panukmod nga buntogon ang mga kahuyangan. (Itandi ang 1 Corinto 11:2.) Ang pagdasig nga mouswag diha sa kamatuoran naggikan usab sa pagkapuliki kaayo sa buluhatong pagsangyaw sa Gingharian ug ubang mga kalihokan sa kongregasyon. (Buhat 18:5) Sa dihang ang mga ansiyano mag-asayn sa mga igsoong lalaki ug responsibilidad sumala sa ilang espirituwal nga pag-uswag, kini maghatag niini nga mga lalaki ug bililhong kasinatian ug lagmit magpalig-on sa ilang tinguha nga padayong mouswag sa espirituwal.​—Filipos 1:​8, 9.

Maayong Katarongan sa Paghimog Espirituwal nga Pag-uswag

Ang mga brilyante giisip nga bililhon. Ingon usab kadtong karon nakig-uban sa tibuok-yutang pamilya sa mga magsisimba ni Jehova. Sa pagkatinuod, ang Diyos mismo nagtawag kanila nga “tilinguhaon,” o “bililhon,” nga mga butang gikan sa tanang nasod. (Hageo 2:​7, potnot) Sa miaging tuig, 375,923 ang nahimong bawtismadong mga Saksi ni Jehova. Aron hatagag luna kining maong pag-uswag, adunay panginahanglan nga ‘padak-an ang tolda.’ Pinaagi sa pag-uswag sa espirituwal​—ug pinaagi sa pagkab-ot ug Kristohanong mga pribilehiyo sa pag-alagad​—posible nga makabaton ug bahin sa pag-atiman niini nga pag-uswag.​—Isaias 54:​2; 60:22.

Dili sama sa daghang bililhong mga brilyante nga gitipigan diha sa mga tipiganan sa bangko ug talagsa rang makita, ang atong espirituwal nga bili mahimong mosidlak pag-ayo. Ug samtang kanunay natong hashasan ug ipasundayag ang atong Kristohanong mga hiyas, atong gihimaya si Jehova nga Diyos. Gitambagan ni Jesus ang iyang mga sumusunod: “Palamdaga ang inyong kahayag atubangan sa mga tawo, aron ilang makita ang maayo ninyong mga buhat ug mohatag ug himaya sa inyong Amahan nga anaa sa mga langit.” (Mateo 5:16) Tino, kana maghatag kanatog maayong katarongan nga mohimog espirituwal nga pag-uswag.

[Mga footnote]